6-10/4兩大兩小(7歲&16個月)新加坡之旅, 完全靠網上找資料計劃行程,而家分享番找過的資料, 回饋各位 JM們!
行程篇:
5日4夜的行程, 3日新加坡, 2日新山, 早機去晚機返!
Day 1: Carlton Hotelà牛車水àGardens by the bay
2:30到酒店check in, 小休後MRT(詳見交通篇)到牛車水附近小吃, 包括肉骨茶及咖椰多(詳見美食篇), 再慢遊牛車水街道及林志源買肉乾! 前往Gardens by the bay, 目標共二個, 吃海鮮(詳見美食篇)及睇skyway星光show! 本來還想到children’sgarden玩水, 但留意星期一是例休維修, 故要回程那天再玩! 由於這個Garden真係好多, 所以最好黃昏後才到, 及遇多點時間行去food court! Skyway show有7:30及8:30兩場, 值得睇, 好有阿凡達feel! 睇完撘MRT回酒店!Day 2: Singapore Zooà老巴刹à魚尾獅
一早撘SEAx Coach(詳見交通篇)往Zoo, 10點多已開始玩, 因買了Tram Ride,先撘車行一圈, 再落地跟車路沿途睇動物, 可以近距離睇溫馴的動物, 11:30睇大象表演, 值得睇但記得早D攞位, 好多人! 園內午飯, 推介阿明餐廳的喇沙及雞飯! 飯後到小朋友最愛的水上樂園, 記得帶泳衣毛巾, 有滑水梯等等, 大人可一齊玩, 有更衣室, 沖身位及locker! 趕撘4:30 Coach返酒店, 休息後往老巴刹晚飯, 吃了串燒, 炒棵條, 叉燒麵, 西米露! 步行往魚尾獅, 8:00前到可睇類似幻彩詠香江的環節, 望去金沙酒店及Singapore Flyer好靚!Day 3: Little Big Club
包車上新山, 10點幾已到legoland hotel, 可先寄存行李, 包車司機好心車埋我地去Little Big Club, 戴手帶可無限次進出! 其實Little Big Club好似一個有主題的冒險樂園, 最啱精力無限的小朋友, 大人可涼住冷氣陪玩, 我地去呢日包場咁滯, 得十幾個家庭在, 機動遊戲任玩N次唔洗排! 除中午在外的餐廳午飯後, 玩到4點幾才離開! 的士返回Legolandhotel check in, 小朋友會好high, 留意房內wifi較弱, 反而在大堂OK, 大堂有任玩lego, 小朋友可留足幾個鐘唔走(大人覺得好恐怖! 好在wifi任上)! 泳池在5樓, 好普通但降吓溫幾好! 房內寶箱有禮物, 2key扣+1貼紙, 話要找密碼但我個就咁打開已得, 若真係開唔到, 到reception話開唔到佢會找人幫你! 晚飯只到隔離Mall of Medini搞掂(撘lift B2出, 對住legoland正門入口就係), 食咗Old Town White Coffee, 唔好食蒸飯, 其他飯麵粉都好食, 不過真係要早D, 我地7點多去到已冇咩人食, 又包場, 伙記們都是悠悠閒的! 另我們帶了杯麵晚上宵夜, 否則記得晚飯時在mall內唯一兩間便利店買定宵夜, 因為嗰到晚上真係百冇架!Day 4: Legoland
早餐酒店包埋, 但可以的話早少少去, 我9點多去到要排隊等位, 等咗15分鐘先安排到, 食物真係一般過一般, 同埋都好亂吓, 大家自己照顧自己啦! 食完10點半入園, 建議由Lego city開始玩起, 細個小朋友都好啱玩, 渣車坐船救火車等等! 然後到Land of Adventure, 但開始90CM以下小朋友都冇咩啱玩! 差不多時間就去食午餐先, 我地去咗食Pizza, 只能用不過不失形容! 跟住就開始玩幻想樂園, BB們都有得玩吓, Pizza鋪對開有個有蓋的遊樂場! 大個仔D可以去玩人手拉的跳樓機, 砌Lego同睇4D電影! 下一站Lego Kingdom, 除咗騎馬仔外, 全部都係過山車! 最後一站Lego Technic, 大囝狂玩水上衝浪賽手, 好玩在岸上可放水炮, 但留意岸上D人係仲濕過衝緊浪嗰D! 總括嚟講因為人少任玩, 係玩得好開心GE, 大人除咗攰之外其實都好開心, 我地5點就閃了, 返酒店沖涼, 晚飯去咗買Burger King, 好食過香港喎!Day 5: 新山à金沙酒店àGardens by the Bay 內Children’s Gardenà機場
包車返新加坡, 到金沙酒店賭場那邊寄存行李, 在商場內行吓再到food court午飯, 海南雞飯及喇沙抵食! 過咗中午時段就行過去Gardens by the Bay內的Children’s Garden玩水, 不過日間這公園實在太熱, 唔係應承咗個囝要去玩我真係未必會去, 由金沙行過去都要接近30分鐘! 玩到3點多就返回金沙提行李撘的士去機場, 車費約S$18! 在T3買了班蘭蛋糕($13.5/個), 一定要買一個才可擺多幾日, 單件只能即食! 由於晚上8點機, 所以在機場內閒遊了各間DFS, 但酒也不算平, 冇嘢好買架! 不過可將小朋友「寄存」在禁區內中間位置的小型遊樂場內, 其實冇人睇, 我地都勁大膽咁放咗大囝喺嗰到玩!
美食篇:
松發肉骨茶 –新橋路17號本店: #01-01 / 17 NewBridge Road (S$20.9)
<MRT NE5 ClarkeQuay>
叫了招牌肉骨茶, 胡椒味重, 都幾辣, 不過湯任添, 我們飲了4碗! 用白飯送好正!
魚肉湯都辣但魚肉很滑! 雞腳就一般!
記得飲意米水, 好解渴, 同香港的好唔同!
亞坤咖椰多 - 18 China St (S$5.6)
<MRT NE4China Town>
只叫了一個餐一家share, 咖椰多會切成4份, 又脆又足料, 牛油咖椰仲厚過塊包!
生雞蛋加胡椒粉豉油打混食, 可用咖椰多點來食!
奶茶奶味重但都飲到茶香!
Marina live seafood & steamboat - Gardens By The Bay, 18 MarinaGardens Drive (Satay by the Bay)
<DT16(Bayfront)B出口>
Blogger介紹的食海鮮地方, 地點有點偏, 但好好食喎!(S$112)
我們叫了胡椒蟹(好大隻好夠辣), 海鮮炒飯, 炒白菜, 咸蛋炒尤魚, 毛蚶!
老巴刹 美食中心 - 18 Raffles Quay (S$51.4)
<EW14(RafflesPlace)F出口, 沿Robbinson Rd直行至Cross St.>
都是跟blogger介紹去食, 一入去就有人問你食唔食串燒, 見佢價錢ok就要了, S$28有40串!
另外炒棵條, 柯仔煎好一般, 比較特別係西米露!
新加坡動物園內 - 阿明餐廳的喇沙及雞飯
本來諗住動物園內食KFC就算, 但睇完大象已經好餓, 行到去Tram嗰到有間餐廳, 唔理咁多衝入去食! 嗰到買食物係你買邊款就去佢counter排, 有點似小型food court, 我見喇沙人少就去排, 估唔到咁好味, 椰香味重的! 至於雞飯, 有點似但又不算是海南雞, 不過都好好味, 最緊要抵食, 喇沙S$8.8/碗, 雞飯S$9.8, 但唔包飲品! 有小朋友的可到門外買沙冰(S$7.9), 因為個樽好靚好得意, 有隻長頸鹿!
金沙酒店賭場那邊的food court
回程前因體力上頂唔住冇去到食天天海南雞, 所以只在金沙food court內食, 不過新加坡可能邊到食海南雞飯都唔差,S$16.5有大大碗飯, 湯, 去骨雞肉, 棵汁豆腐! 非常夠份量!
酒店篇:
City Hall附近其實有很多酒店, 用Google map輔以Trivago其實是一個不錯選擇, 因為喺地圖上可以睇到離MRT有多遠, Google map亦會show埋價錢, 見到過2K一晚的已可不看! 以下是考慮過又啱水位的酒店:
Carlton Hotel Singapore – 終極選擇可以講多一點! $1500左右/晚, 我是直接經酒店訂, 因為我很多問題想知(例如張床幾大, 係咪全部房都係新裝修), 所以email佢地, 亦得到非常不錯的回覆! 不過佢地唔包早餐(其實好多新加坡酒店都唔包早餐), 要去隔離商場食(Raffles City)! Standard酒店房SIZE, 有地方放兩個行李, BB車, BB床, 床尾距離電視位都夠遠, 一家四口住算闊, 廁所亦夠大, 有浴缸有企缸, 留意浴缸對出是全透視玻璃窗, 最好笑係遮嗰塊簾係由出面的人控制, 若同朋友去小心比人玩, 襯你洗白白…! 一家人就冇咩所謂啦! 另記住開電視唔好開戲睇, 要收錢架, 只可睇有台號嗰D! 我就咁冇咗百幾蚊!!
史丹福瑞士酒店
– 地點仲正, 去MRT馬路都唔洗過, 去ZOO架COACH喺正樓下!
Peninsula Excelsior – 朋友住過價錢OK, 但比較舊!
CarltonCity Hotel Singapore –BK JM推薦, 我睇的blogger亦住這間, 13年才開業, 比較新!
交通篇:
新加坡市區的交通, 其實靠MRT已經可以到達很多地方, 所以頭兩日在新加坡的行程, 除了去Zoo要坐Coach外, 基本上只撘MRT! 當然事先要做很多功課, 酒店的配合亦很重要, 我們選了City Hall站的酒店, 類似香港的旺角區一樣四通八達! 以下是一些tips:
事前先在MRT網混熟一點, 知道有那幾條線, 自己酒店與目的地位置, 是否用MRT已到達!
http://www.smrt.com.sg/Journey-with-Us/Trains/Train-Map-Line-and-Station-Information
由於我沒有買上網卡, 所以事前已print 定目的地地圖及MRT出口, 就算自己找不到, 都路在口邊!
有關「通行卡」, 由於我只是第一天行程需要撘很多MRT, 計過數不買通行卡也可, 所以到達機場售票處後, 只買了普通增值的通行卡, 1張S$12, 當中S$5是不能退回的, 卡值S$7, 某程度上夠用, 但原來新加坡的八達通, 卡值少於S$3就要增值, 而每次最少增值S$10, 所以前前後後每人就用了S$22在通行卡上。其實餘值在機場T2售票處是可以退回的, 不過C6將卡收了在行李箱寄了倉, 只好帶回做紀念!
有關通行卡網站:
http://www.thesingaporetouristpass.com.sg/chinese/%e5%85%b3%e4%ba%8e%e9%80%9a%e8%a1%8c%e5%8d%a1/
有關JM提及過的小朋友未夠7歲優惠, 了解過並不是甚麼優惠, 總之小朋友7歲前撘MRT都是免費的, 但他們是以年份計, 不是以生日計, 所以以今年計, 2008年1月1 日至12月31日出世的小朋友, 都是要付費的了!
有關Singapore Zoo的交通安排, 以City Hall為起點計, 有酒店員工建議我們撘的士,據聞都是廿多元波紙, 但我覺得撘Coach「Singapore Attractions Express (SAEx®)快捷巴士服務」是便宜一點的選擇! 不過時間地點有限制, 只有兩條路線, 分別是從烏節路以及小印度直達河川生態園 &從美芝路、新達城以及牛車水直達新加坡動物園, 若唔啱地點可能想撘都未必得! 車費是單程計, 成人S$6, 小童S$3! 有關網站: http://www.zoo.com.sg/chn/visitor-info/how-to-get-here-3.html
消費篇:
由於資金唔多, 必需慳住洗, 又要唱定錢唔蝕匯率, 預算兩萬五全餐, 最後都做得到, 分享少少心得!
最好事前列表各類消費, 大數如機票酒店購買後就要計其他消費! 另外最好每晚都list番當日喺各方面洗咗幾多錢, 咁就唔怕唱咗D錢唔夠用!
我大致分了幾類: 交通, 入場費, 膳食, 手信及後備!
入場費其實好多都可以網上買, 撞啱有做promote就更好! 我在網上買了legoland, little big club, Singapore zoo的門票, 除little big club外全部都有最少9折!
膳食費的預算, 其實好靠網上資料, 先找咗目標食店, 再在網上找blogger資料, 通常都有列出價錢, 咁就可以計算到每餐幾錢, 再將遇好的支出X1.17, 因為新加坡有7%稅, 有人服侍的店鋪又會加10%! 最後出來的大數再X1.1, 咁就可避免唔夠用, 但亦唔會overbudget! <最終我喺膳食方面只係洗多咗$36港幣>
手信篇:
新加坡手信都離不開肉乾, 班蘭蛋糕!
肉乾真係要去林志源(China Town站), C6係咁話好食, 我買了3款(招牌豬肉1000G, 辣味豬肉300G, 牛肉乾250G)約S$80!
班蘭蛋糕是應同事要求買的, 其實我原本係唔知有呢樣手信! 我在上機前在T3 “BengawanSolo”買, 但要買1個才可擺幾日(記得放雪櫃)! 另推介一款糕點叫 “Kueh Talam”, 綠白兩色班蘭及椰汁味, S$1好好食, 用來洗埋餘下的散紙最好!但榴槤糕就麻麻!
去Legoland真係唔好買玩具,比香港貴之餘又要拎! 我地就買咗人仔鎖匙扣, 身上有 “I love legoland”字, 起碼喺香港冇得買!另外可以買postcard, 喺酒店大堂可以寄, $2馬幣一張!
wang88 發表於 15-4-22 19:33
想請問响SG Zoo官方網站買門票，是否用DBS 卡有30％折扣？買咗之後點取門票？
叧外，去Zoo坐taxi是否只是SG ...
發表於 
亞坤咖椰, 吃剩一塊才記得影, 本身有4塊
返回列表
