我仔女都試過用錢買遊戲入面嘅道具,不過冇偷過錢,我地有俾零用錢佢地,細個時一向佢地都係用嚟買嘢食,哥哥係最早打機嘅,佢想買道具會等到生日、聖誕等時候,因為我地會問佢想要咩禮物,佢通常就係話遊戲券。直到疫情要在家上課,連妹妹都加入打機,因為困喺屋企太悶,兩兄妹有時一齊出街散步,後來俾我發現個仔有買遊戲券嘅收據,跟住我同老公就開家庭會議,問佢地點解用錢買遊戲券,兩個每人都用咗過千蚊,佢地話打到一D關卡住咗,又有D道具好想要,因為隊友或網友都有。。。
我同老公就問佢地買完道具係咪就天下無敵?以後有冇更多要買?佢地未識賺錢就駛咁多錢,D錢點嚟?平日見佢地打機有時打到發脾氣,點解玩遊戲唔係開心而係發脾氣?遊戲券唔係應該帶來快樂咩?用完幾百後又幾百,幾時先完?我叫佢地自己答自己,再講答案出嚟大家傾,我都有打機,都有俾錢玩,但絕對係維持每個月唔過一百蚊果種(我認我比較孤寒),同時我問佢地,如果去到有一日冇錢可以玩遊戲咁點?
樓主試下同老公傾下,再坐低成家講,盡量俾個仔講佢想法,12歲話大唔大,話細唔細,佢有D想法可能係我地大人唔理解,而佢又未成熟到可以理解幾千蚊係一個大數目嘅意義,小朋友世界有時太直接,佢想要,但要唔到,於是就只會想如何可以擁有,冇真係想清楚方法是否正確同可以接受,我而家容許仔女用錢玩遊戲,但必須同我地商量,絕對唔可以係一千幾百嘅大數目,我俾張糧單佢地睇,等佢地明白果一千幾百係要媽咪返幾耐工至有。
花旗太太生活在花旗國,留意時差,你問我未必即時答到。