首先家長自己接受個仔同普通小朋友唔同,睇完咁多版,似乎而家係樓主自己唔肯接受,所以希望有人話俾佢聽個仔唔係自閉,係又好,唔係又好,最緊要係即時介入、幫助個仔,佢語言遲緩,就密集訓練,佢感統有問題,對症下藥,係自閉又好,唔係又好,樓主手提及嘅語言問題、情緒問題、感統問題,全部都要經由訓練、學習去改善,要知道自閉唔係傷風感冒,唔會一個星期就好,好多時係持續幾年下來都冇大進展,咁點?繼續囉,搵新方法囉,平時教一個普通小朋友講3次就學識,5次就記得,自閉小朋友講30次50次都未必學到,學到300次500次點都會有進步嘅,問題係自己要講300次教500次,首先係要自己調整心態。
確診自閉其實唔一定係壞事,起碼有個範圍,有個目標,你可以去搵資源搵支援,睇下點樣幫到個仔,如果有醫生或者評估完話佢咩都唔係,咩嘢都冇,你仲唔知點教,到時更崩潰。與其去諗佢係咪撞邪,不如花多D時間去學下點教,就算有訓練有堂上,一日都係幾個小時,喺屋企同時自己密集教先有用。作為自閉小孩家長,心要寬要強,同時又要識得樂觀積極,咁先可以令到自己同個仔都過得好。
花旗太太生活在花旗國,留意時差,你問我未必即時答到。