好似呢度唔多人睇呢套,不過我會繼續,因為真係同其他一般電競片唔同,電競只係一個背景,唔係套劇要講嘅主題。有不少微博同youtube劇評都有推介穿越火線,不約而同話意外發現鹿晗表現出人意表,佢唔賣靚樣,演一個打扮不修邊幅而又係當時被普遍人睇唔起嘅所謂「失敗者」肖楓,心中夢想係成為電競選手,當然有考慮會賺到錢,但同時見到佢唔係為咗蠃而不擇手段,佢成日講先學做人再做事,發現同伴作弊令戰隊可以出線,如果佢唔出聲,可以唔會有人發現,但佢選擇同賽方自首,承認過錯,重新出發。
另一個男主吳磊,終於都搵到一套唔係爛劇,演技都得到証明,比起肖楓,路小北起步雖然係電競已為人接受嘅年代,但佢同樣面對種種困難,但都選擇忠於自己夢想,即使可能會失敗都要盡力。
穿越真係估佢唔到,電競只係背景,鎗戰畫面當然好睇,但親情友情愛情反而係重點,估唔到都幾多淚點,巧妙地連起由2008到2019年嘅民生歷史,好似2008年劉翔退賽、Gala樂隊成名等。玩電競嘅固然有共鳴,我呢D唔打嘅亦有感觸,好多事都係曾經發生,好多嘢錯過咗,俾多次機會你,是否又真係可以重來?究竟之後劇情會發展落去,有待分解。
穿越火線係我今年覺得有驚喜嘅陸劇,從來冇睇過鹿晗,亦冇點睇過三石弟弟,電競非我首選,愛情劇亦唔係,偏偏呢套就集合好多元素,就好似之前嘅我只喜歡你同冰糖燉雪梨,以為只係愛情劇甜寵劇,但睇落發現其他親情、友情、人生觀、價值觀等至係最打動人心。
P.S.嗱,利申:我唔係打手嚟架,冇人睇都冇關係,我睇得開心就得,只係介紹一套我認為好嘅劇,希望佢唔好爛尾,拆我招牌。
花旗太太生活在花旗國,留意時差,你問我未必即時答到。