少年成長今日: 0|主題: 15861

收藏本版

發帖

返回列表

跳至頁

查看: 3505 | 回覆: 9

如果考試考頭三名就買畀你！ [複製鏈接]

csir3290

子爵府

積分: 11009

1^#

發表於 18-4-8 12:57 |只看該作者 |倒序瀏覽 |打印

放假當然會同阿仔阿女去行玩具鋪啦！每次行玩具鋪如果細心啲聽一定會聽到呢一句說話就係“ 嗱！如果你下次默書100分，咁就買畀你啦！” 係一句普通嘅說話經常都會聽到。但係我就會提醒自己唔好經常講呢一句說話，因為我覺得小朋友唔應該為咗得到獎品先至努力。我應該要教佢哋明白讀書係自己嘅責任，咁細個小朋友唔應該學到要為咗獲得酬勞先至肯去做好一啲事。而且我覺得最重要嘅問題係，係咪考唔到高分就表示佢唔努力呢？或者做唔好就表示佢冇付出過呢？如果小朋友自細已經因為禮物作為推動力先至肯做好，咁係咪表示份禮物要越嚟越大份佢哋先至會越嚟越肯做好呢？當有朝一日佢哋發覺冇左獎品作為推動力咁佢哋仲會唔會做好呢？我時刻都會提醒自己我哋要欣賞嘅係小朋友付出過嘅努力，係個過程唔係個結果。考得好當然係好啦，但係有陣時付出咗努力未必一定會考得好，仲有啲其他嘅因素會影響，所以我會教阿仔阿女要盡力付出，所以有陣時就算阿仔阿女默書或者考試成績唔係咁好，但係只要佢哋肯努力我哋都會話爸爸媽媽真係好欣賞你哋咁努力溫習，都會買啲小禮物好似雪糕咁獎勵下佢哋。其實比起禮物，小朋友更加在乎爸爸媽媽嘅欣賞同肯定。我唔係話唔應該獎勵佢哋或者唔應該買玩具畀佢哋，只不過唔應該令小朋友覺得因為有禮物先至肯做好。我覺得爸爸媽媽一個支持嘅擁抱加上欣賞嘅說話，對於小朋友嚟講更加重要，更加有效，因為責任感同埋推動力應該係發自自己嘅內心。