9/8 (放胎後第2日) 星期日
在家休息, 冇返沙田, 老公一早去堅尼地城打波, 起身食左2隻烚蛋, 奇異果, 橙, 一片90%黑朱古力, 希望增加黃體, 幫助著床,
今日個肚冇感覺, BBS有冇跌左出黎?
10/8 (放胎後第3日) 星期一
請左一日假在家休息, 原先唸住返娘家, 但費事周居勞動, 最後留在家, 朝早煮左飽魚麵 + 2隻烚蛋 + 奇異果 + 橙, 繼續煲劇, 瞓覺. 晏晝煲熱鴻福堂既花膠湯飲, 其實唔知有冇效用
, 今日個肚仍然冇感覺, 但去左3次廁所, 到底 BBS仲起度嗎? 其實有點覺得唔需要放假, 返工好過
11/8 (放胎後第4日) 星期二
返工了, 同事們都問侯我, 叮囑我唔好搬重野, 放慢腳步, LUNCH TIME, 肚依然冇感覺, 我去洗手間時摸住肚皮同BBS講: 你們在嗎? 可唔可以比啲反應比媽媽呀? 點知, 下午, 開始感覺M feel, 上網睇BK講, 有m feel 係好的, 我心踏實了!
12/8 (放胎後第5日) 星期三 M Feel 感覺仍然存在, BBS好似努力中呀! 呢幾日開始每日上網睇BK, BLOG, 尋找每人放胎後的感覺, 希望有人同我感覺一樣後BINGO! 放工時排隊等小巴時感覺更強烈, 腰骨勁痛
13/8 (放胎後第6日) 星期四
M Feel 冇了, 又開始擔心, 其實一向都擔心因為放雪胎而冇針打, 冇藥塞, 因為自然週期下, 排卵後身體自行會分泌黃體幫助著床, 食晏時Whatsapp左舊同事, 問佢經驗 (佢8年前起瑪麗做IVF後成功誕下女兒), 佢話當年放雪胎都有藥塞的, 可能現在改制了, 不過佢話唔好自己去配藥塞, 有M FEEL或肚谷谷都係正常的, 叫我唔好咁擔心! 到下午, 又開始感到谷M Feel, 好似又有希望了!
14/8 (放胎後第7日) 星期五
今日乜Feel都冇了, 其實呢幾日除左有M Feel, 人們說什麼胸漲, 水狀分泌, 左/右肚拮拮下或者拉扯感覺都沒有, 惟有安慰自己, 每人身體狀況不同, 不用太在意! 但心裡已打定輸數, 認為自己冇咁幸運, 一次就中, 認定自己已失敗, 反而今日返工放鬆了, 步伐都大了, 希望M小姐來臨時, 無咁大打激!
15/8 (放胎後第8日) 星期六
今日又有返M Feel, 仲好強勁添,
正常計, 如果排卵日是 5/8, 加14天, 真正來M應是19/8, 今日既M Feel, 可能就是為M小姐來臨前既準備, 早上跟媽媽通電, 報告一下好似有黎M的感覺, 佢即時反應叫我唔好亂講野,
感受到佢失望既聲音, 其實我希望佢預左失敗先, 到時不用咁失望!
16/8 (放胎後第9日) 星期日
黎M Feel 依然強勁, 好似就湧出黎, 我已經括出去, 當作已經失敗, 所以9點幾起身執屋拖地, 之後返娘家, 放胎後都冇返過去了, 爸媽一定好掛住我, 出門前仲唸好唔好換大M巾添, 等地鐵其間, 突然有一下勁想訓覺, 似是被人打左迷暈劑一樣, 好想即刻搵張床訓覺, 好在老公起身邊, 可以有得倚靠, 行街行左一陣見攰, 最後返左娘家休息
17/8 (放胎後第10日) 星期一
同尋日一樣, 一早起身M feel 感依舊, 但中午又消失, 每次去洗手間時都會看看護墊, 睇有冇M, 有冇咩特別分泌, 但到臨收工, 有啡色分泌物, 直至返到屋企, 仲有少許, 之後就冇左了
18/8 (放胎後第11日) 星期二
M Feel 冇左, 食晏時同事問我情況如何, 我話有黎M既感覺, 佢地顎然地問點解既, 唔會既, 你太緊張喇…. 唉, 大佬, 我心唸都想問點解, 一早講左唔係一定得啦, 唔係因為時不時要請假, 我真係唔想同佢地講!
晚上問老公, 仲有3次機會, 我地做唔做埋佢, 因為放雪胎每次都要大約$24,000, 好在大家意見一致, 有當然做埋佢啦! 夜晚訓覺半夜, 感覺M要黎喇!
19/8 (放胎後第12日) 星期三
起身返工, 用了大M巾做定準備, 因為今日姨媽一定會探我, 今日個肚成日都怨住怨住咁, 同平時黎M感覺一模一樣, 好似就黎湧出黎咁樣, 點知時間一路一路過, 去到放工都未有, 只見有一兩撻淺啡色分泌! 返到屋企就有啲淺啡加少少粉紅, 跟住又冇喇, 天呀, 要黎就黎喇, 我都唔想成日估估下呀!