本帖最後由 zoe_youngshop 於 18-3-31 23:02 編輯
我係近呢個幾月先睇呢版既(因為清緊假好得閒哈哈)，見到好多jm婚姻都有第三者/另一半外遇，我就想分享下自己既經歷，都幾長架，唔好介意 。
我第一次拍拖係19歲(可能自己唔靚，一直冇拖拍)
嗰時仲可以叫自己做細路囡吧，返pt時鍾意左一個男人，啱啱去做嗰時已經知道佢有一個同居而一齊供緊樓既女朋友(正印)，同時係公司亦有一個一齊左3年既女朋友(第三者)，其實兩者都知道對方存在，因為佢地之前係朋友，係因為呢件事先反左面，我都覺得個男人好賤，但我偏偏鍾意左佢。
點解我會鍾意佢呢？其實佢無錢無樣但把口好掂浪過油，好識氹人，但我一直都收埋，直到有一日，佢應該都feel到我對佢有感覺，佢就不斷追我，當然，最後我同左佢一齊，即係我係第四者(我已經知錯了)。其實我同佢一齊，並非想佢同佢地分手，我只係貪佢既甜言蜜語，係拍拖嗰半年，我一次都未試過主動打過一次電話俾佢，每次都係等佢打黎，而且我地半年都未出多過三次街。
諗返起都真係覺得自己好賤架，都唔知為乜！嗰時我成日食安眠藥先瞓到教，晚晚睇電話等佢打黎，佢sd一個晚安俾我，我已經好開心。
就係咁就過左半年，佢就調左去其他舖做，亦知道左佢係其他舖又識左個女仔，同時間佢有4個女朋友，但我一直都唔捨得分手，因為嗰時都唔知咩叫係愛。之後公司啲同事話要恭喜佢啦！因為正印有左，恭喜佢做爸爸，嗰刻我都冇諗過分手，亦冇唔開心，因為我覺得只要佢會打下俾我我就滿足，直到第二日，佢就同啲同事講個BB唔係佢的，我就係聽到呢句說話先醒，我覺得呢個人好有問題，呢啲說話唔係人講，所以嗰晚我就即刻改電話號碼，因為我知要斷只有呢個方法。
由於大家唔同左舖，所以分手後都冇聯絡過，但間中佢會借過黎幫下手，佢都仲係以前一樣會不斷口花花，不斷撩你，不過我已經無再回頭，因為改得電話就預左斷。
我宜家想分享下正印(同居八年嗰個)同第三者既諗法，之後我同左做第三者嗰個女仔做左好朋友，佢都有同我傾計，以下係我想分享俾各位jm。
正印同第三者兩個互不相讓第一係因為愛情令人盲目，個男把口真係好西利，見人講人話，見鬼講鬼話。第二係兩個都唔甘心唔輸得，一直覺得自己付出咁多，一定要搶到佢返黎。
大家唔好睇少第一點，其實我自己覺得有第三者既最大問題一定係個男人而非女人，而且個男人對兩者都講各自壞話，又話冇再聯絡，嗌生嗌死要求你原諒，點知一直冇斷過，一直享齊人之福。
正印嗰嗰就以為有左BB可以駁住個男人，後尾真係結左婚，但個男人同以前一樣，冇改變過，佢只係因為一齊供緊樓先簽紙。個男人最愛嗰個係第三者，所有時間(除左瞓教要返屋企)，其他都俾晒佢，會同佢去行街食飯睇戲去旅行，仲共同養狗，正印有左BB佢都冇乜點理佢。不過個第三者一直都迫唔到佢離婚，後來都係因為自己有個更好追緊佢既，佢先放手退出，當然個男人不斷求佢，話會離婚，但佢都退出咗。
件事仲未完
個男人知道第三者唔再回頭，就返屋企同老婆(正印)講，我同佢斷左來往啦，一直係佢痴埋黎之嘛，我宜家覺得佢太煩忍夠啦，而且我仲有老婆仔囡(其實係個男人俾人飛之嘛)。佢個老婆一定好happy啦信到十足，以為終於贏左呢場扙，終於坐正，又有老公又有BB。
不過狗係改唔到吃屎，佢老婆生左個零月，佢又成功係舖溝到件，而且個女仔有一個拍左4年拖男友，仲要大家同舖做野，後尾個女仔同自己男友分左手，同左佢一齊，所以你話個男人真係好西利，佢無禮送無錢既所以一定唔係貪佢呢啲，人又唔靚仔，後來一齊左年幾，佢地分左手。
我好耐冇係間公司做，不過同舊同事都fd，有時大家都會傾計八下，之後原來佢一直都有好多新女友，我有時都會撞到佢，每次拖住嗰個都唔同樣。過程中佢老婆有自過殺，但佢始終實際冇去改，佢用盡辦法氹佢老婆，其實係為左層樓，因為佢錢都冇個，而佢老婆唔放手就係因為覺得自己年紀大(其實3X歲)擔心搵唔到更好，而且付出左咁耐感情，一直係度自己呃自己。總之就一直循環緊。。。。
Sorry我打得好長，而且1999，
不過我想帶出
1.有時以為自己好愛，其實只係自己唔甘心同唔輸得，但往往冇諗過過程中最攰嗰個係自己
2.就算俾你贏左，都只係一時
3.有得第三者，即係佢最愛嗰個係自己，你做啲乜其實佢都唔會有咩感覺同心痛，只係表面上打發下你
4.自己一個人係唔會受傷(無論年紀幾大都好)，何必俾人傷害你
5.一直咁落去，最終自己既自信心自尊心一直會下降
6.唔好信男人既爸爸媽媽，佢地一定係維護自己個仔，信就信自己雙眼
7.男人把口係唔睇小得，佢有心呃你，點呃都呃到，佢只會愈玩愈精
8.有一次就會有第二次，有得一個第三者，就會有下一個第三者
9.最可惡既唔係人地呃自己，而係自己一直呃自己，唔面對現實
10.咁同作賤自己無分別，你都唔愛自己，人地點會愛你
最後送上一句歌詞: 被騙的那個 比騙徒更混帳
以上就係我既分享了，不喜勿插
希望幫到各位因為有第三者而煩惱中既JM
加油
發表於 
返回列表
