這幾天，多了時間在親子王國流連，看了很多篇報導都是講現在的陪月有幾差，本人真係好心痛。見到有些陪月嘅操守真係完全唔掂，影響曬另一班用個心出嚟做陪月嘅同業，自己亦做了陪月一段時間了，以前我們舊嘅一班陪月唔會咁無愛心和咁向錢看，個個只會用心去做，有時我都會接觸到新手入行的陪月，但佢哋我嘅印象係，[為錢]。多錢先同你接JOB，少錢嘅話唔做，嘩，大姐，我咁多年經驗都係收人咁多咋。你個新牌想收多過我，我貼埋比你好唔好(我個人諗)。
我覺得，每行業都應該有自己操守，不能胡亂一通，人家出咁多錢請你，你應盡心盡力做好佢。畢竟有兩條人命喺你手中，有咩事你都唔安樂啦！如果覺得自己升任唔到不如唔好接啦！做吓家務助理算吧啦！
姊妹們，你要記住，人哋識就唔洗請你啦！人哋做到都唔洗請你啦！掉轉係你，或你家人請了你一個咁嘅陪月，你會點呢？本來生BB係一件好開心嘅事，但又要用咁多錢請你，得嚟係一肚氣而唔係開心嘅回憶，你會點呢？你們要明白，現今i社會百物藤貴，迎接一個小生命已經用了很多錢啦！又要用一筆咁貴嘅人工去請你，你良心過意得去嗎？
姊妹們，你哋回頭想想當年自己坐月嘅時候，邊個幫你？自己坐月嘅時候幾想有人幫到自己；餵奶嘅時候幾想有人幫到自己；又話坐月唔可以濕水，但又要同阿B沖涼，幾想有人幫到自己；呢樣又唔識；嗰樣又唔識；可以食乜又唔識；唔可以食乜又唔識；淨係想有人幫到自己，自己唔洗辛苦，可以瞓吓覺，夜晚可以起床餵夜奶............
姊妹們，雖然用錢請你唔係大曬，但基本嘅操守你們應該要有的，同埋基本嘅服務態度同質素你們應該要有的，如果唔記得，唔緊要，你將自己代入你個僱主度，你睇吓自己想要啲咩服務，你就會知你個僱主想要啲咩架啦！
我知道今日呢個POST一定會得罪好多人架啦！不過我都係說出一啲內心感受啫！希望姊妹們不要見怪！
