第一次開始寫呢個日誌...心情複雜.
今日我0既心情唔係咁好...唉...以前我好喜歡同渴望有小朋友,到我而家有了一個仔仔,今年都已經3歲,我先至發覺原來自己一個人無負擔,無責任,就係最簡單.
見到人地一家人(父母+小朋友)我就好開心好羡慕,好奇怪,自己都已經擁有一個家,但係點解自己唔同人地0既?問題在於人地一家人齊齊整整健健康康,我0既並唔係!
故事要從仔仔5個月大抽筋入醫院住咗差不多10多天開始說起...2005年8月份某一天....到出院後一直都要每天3次的服食抽筋藥物,直至去年11月份停藥,足足食咗兩年多...我唔知道是否因為咁樣而影響到仔仔0既發展,姑娘話佢比同齡0既小朋友發展慢咗差不多9至12個月,講0野亦都唔達標,慢咗好多;只係近呢半年先至開始講多咗說話...我無得比較,因為身邊無咩親朋好友係有咁上下0既小朋友可以比我做比較,只知道一發現到仔仔學識多咗唔同0既0野講多幾個字就覺得好開心,因為咁樣係有進步.況且周圍0既人都講男仔係特別慢0架,遲吓到咁上下咪識講0羅,驚咩啫...
但係原來唔係只係咁簡單.小朋友0既發展與學習係隨住每段時間而要有適當0既進展,我所謂的仔仔有所進步原來係比實際時間上慢,呢種叫學習遲緩,再加上語言亦未能隨住時間有所進展;整體上,仔仔原來係比較有問題0既一類小朋友.
一直以來醫院都仲有跟進情況,亦都每隔一段時間要返去覆診,但呢0的都已經變得例行公事.因為醫院只會係機械式的問幾個問題,又或轉介去做其它評估等等,好公式化,亦同時只能評估到仔仔係學習遲緩同言語較慢.
自從由仔仔抽筋入院開始,我都已經成日擔心,再加上仔仔體弱多病,經常要去睇醫生,基本上每個星期都要食西藥,唔係發燒就係喉嚨發炎,唔係傷風感冒就係咳...雖然辛苦,但我都積極面對.
直至到前幾個月前,醫生同我講,仔仔有可能係有自閉傾向...可以講今次我係選擇咗逃避,我只要覺得唔會0既,仔仔只不過係各方面遲咗啫...可以話係給自己藉口吧!直到現在,我發覺仔仔0既情況比之前還要差咗,連朋友都同我講提醒我最好帶仔仔去做評估,我先至意識到嚴重性,就連朋友都能夠知道.
現在我開始憎恨自己點解唔一早聽醫生講,早0的帶仔仔去做評估做治療,直到現在還不是一樣要去面對要去接受,但當中已經失去咗一段黃金時間,而呢0的時間係唔能夠追回返來的...
