夫婦情感今日: 9|主題: 42456

收藏本版

發帖

返回列表

跳至頁

查看: 22892 | 回覆: 0

有冇離婚後的爸爸講下，同仔女分開住是否很難過？

[複製鏈接]

anidacat

大宅

積分: 1249

1^#

發表於 17-6-13 14:44 |顯示全部帖子

wing1388 發表於 17-6-13 12:29
我同個女分開咗住十幾年，早年佢媽咪唔多願俾我見個女，可能係怕我講俾個女知點解我哋分開啦！

到小學後 ...

唔知你同你老婆點解離婚？如果唔係你對唔住老婆的話，我諗囡囡大個啲有機會同你近番啲。

見到你嘅故事，我諗起我自己。五年級時爸媽離婚，我同細佬當然跟阿媽，佢憎到我老豆死，成日同我地講老豆點衰，又係唔俾老豆見我地，老豆一搵到我地住邊就即刻搬屋，所以我地搬成十幾次屋。小學雞，阿媽又係唯一照顧者，自然佢講乜我都信，漸漸都覺得老豆係衰人。有次老豆去學校等我，話阿爺唔得啦，佢係醫院，你快啲同我一齊去見佢啦！阿爺以前係好錫我的⋯離婚後一直都冇再見過⋯當時我死唔肯跟老豆走，最主要其實係驚阿媽打我⋯我每次諗番起都極度後悔，冇去見阿爺最後一面⋯我以家打番出黎都忍唔住流淚⋯

後來一路大，先睇清其實有問題嗰個係我阿媽，老豆當年或者都有對阿媽唔住，但衰啲咁講，俾著我係佢都頂唔住阿媽！後來輾轉到大學，我轉去跟老豆住，但多年冇相處過，住埋都係唔掂，大家都好爆！於是我一搵到嘢做就搬咗出黎。

直到而家，都三十幾歲人，呢幾年我同細佬都對老豆好好，因工作忙未必可以成日見，但早前老豆有病，我地都同佢睇醫生，佢又會黎探我兩個細路。尤其我細佬，出世冇耐就離婚，細個基本上只係見過老豆幾次，本身對佢都冇乜感情，但到佢都讀大學，出黎做嘢，終於好似我咁，願意多啲搵老豆，了解吓佢。

俾啲耐性，唔理個女有冇回應，照樣 send msg 關心佢。而家有手機已經好好多，以前我老豆真係可以完全搵唔到我地架。我好記得，十幾歲時搵番老豆，上去佢屋企，佢竟然仲留住當年我細個沖涼個盆！嗰時我先知，老豆唔係好似阿媽咁講，完全唔理我地。而且，佢仲一直俾錢我阿媽，俾到今時今日！而家我最敬重佢！你 keep 住搵個女，佢而家青少年期，唔理你係好正常，但願佢大咗會明白你嘅心意！唔好放棄！