stkyo 發表於 15-12-13 12:39
你呢個搭巴士既例子令我諗起香港個D新移民,要求香港學校用普通話教學。。。
去到人地地方係想辦法融入,而 ...
我呢度都有,仲要新移民去社區大學學英文係免費,只係冇學分,問題係你去唔去讀,我見過好多都係學學吓唔學,話難話深,自己學極都唔識,又話遠,上堂時間唔好。。。我父母當年嚟都五十過外,都有去讀,學唔到幾多,但都唔會一D得著都冇,融入係好緊要,我呢類成年後移民係好難學到地道語言同文化習慣,即係美國人好迷Super Bowl、baseball同NBA呢D,我係唔係好明點打點計分,本土笑話笑唔出,但我好享受呢度藍天白雲,周圍花草樹木,空氣清新,係就係比香港冷,冇幾多日可以著短袖衫短褲,我一樣可以行街睇戲食嘢,只係型式有D唔同。而家慣咗去任何餐館或商場洗手間都有廁紙供應,返香港反而成日唔記得帶紙巾。
見過有新移民抱怨返工放工freeway塞車,來回返工放工要個幾鐘,其實個幾鐘揸freeway隨時都可以行咗50公里,香港由葵涌去港島唔係住近地鐵站單程距離得十幾公里都要成粒鐘啦,要咁比冇咩好講,心態問題。
親耳聽過有不少人話美國買香港雜誌好貴,十幾蚊本X周刊,我真係從來未買過,有咩而家上網睇唔到?多到睇唔切就真,美國大城市有中文報章雜誌添。TBB或者其他中文電視台甚至韓劇都有得睇,只要裝有線就得,話貴唔捨得又要怨點解冇得睇,都唔知點答佢地好。
我覺得好多人嘅最大問題係工人,呢度真係唔興,有嘅只係好似鐘點咁,你唔得閒帶小朋友返學放學可以請人幫你帶,收番一日十零蚊一個鐘,再唔係放學有課後班,有平有貴,公校嘅絕對唔係負擔唔起,學校有早餐午餐,早餐1.5,午餐3蚊,唔係咩好花巧嘢,但近年已經唔係太難,仲有熱食,每餐有生果同牛奶,只係小朋友鍾唔鍾意食啫。
我有個同事由廣州嚟,佢話以前一直覺得香港人好勁,能屈能伸,最出名獅子山精神,好捱得。。。其實我自己所見所感,呢度好多老外都冇長老幫手,又冇工人,一樣係兩公婆返全職,又係要自己執屋煮飯,佢地唔死得,我地一向出名捱得嘅香港人又點會唔得,馬死落地行,做唔到100分做80分都得嘅,降低要求唔駛逼死自己。
利申:我認我係懶架,而且好感恩有我媽幫手,老公肯分擔好多家務,我地唔有錢,興趣班都係政府資助果隻,人地每星期一堂35蚊,我地去一季10堂100蚊果隻,我估我同老公都算係粗養對仔女啩,只係對佢地食嘅嘢有D要求,唔要化學嘢唔食味精咁。。。我覺比上不足,比下有餘,已經滿足。
花旗太太生活在花旗國,留意時差,你問我未必即時答到。