有個讀者同男朋友一齊好多年,由熱戀期走到去冷淡期,兩個人已經相對無言,活死屍一大條。鑑於過去嘅深厚感情,佢唔捨得貿然放棄,佢話想再試下挽救⋯⋯我問佢你哋有無努力挽救過,定或者根本已經回不去⋯⋯
人同感情都一樣,會隨住時間同經歷而慢慢改變。一段感情唔係一時三刻變淡,而係經過時間慢慢沖淡,當佢已經變成一灘絕望嘅死水時,已經唔再係努力就可以救得番嘅局面,佢已經錯過咗黃金救援嘅時機,變成一個一世都叫唔醒嘅植物人,只係等緊你哋放手幫佢拔喉結束嘅一刻。係,你可以繼續keep住佢條命,畀佢苟延
殘存,但又有咩意思呢?
擁有咁多年感情的確會唔捨得隨便放棄,但你必須要承認有啲關係已經無辦法挽救,放開一段了無生氣嘅感情,其實都係放過自己同對方。愛情唔可以淨係依靠過去嘅美好回憶支撐,對自己對對方坦白其實好重要。明知道一齊落去都無意思,又何必勉強拖住大家嘅時間?