懷孕前後今日: 30|主題: 329747

收藏本版

回覆發帖

返回列表

跳至頁

查看: 5108 | 回覆: 4

聯合醫院開刀生仔記 [複製鏈接]

rc111

別墅

積分: 666

1^#

發表於 24-5-4 23:06 |只看該作者 |倒序瀏覽 |打印

本帖最後由 rc111 於 24-5-4 23:07 編輯

雖然過了一年了，但都想分享下喺公立醫院開刀生仔嘅經歷，俾孕媽媽們參考下。我自己懷孕時好少見到有人分享公立醫院開刀記，希望分享下俾孕媽媽，如果你「有幸」係公立醫院開刀，可以俾到一些參考你。
今次係我第二胎，第一胎係私家醫院開刀，過程順利無咩特別。第二胎本打算係私家開刀，產檢時公立醫生告知因為第一胎有開刀，所以第二胎可以選擇喺公立開刀，我以為都係一樣麻醉應該無分別，為左慳8萬，我就選擇左公立，即係聯合醫院開刀。

Day1 入去只做檢查，過一夜，第二日才做手術。去公立生仔乜都要自己帶，我唔多詳細分享要帶乜，但當中一定要買「連扣裝」產婦衛生巾（如圖），係連扣裝，唔係扣裝！網上有好多分享話公立要買扣裝，我就買左扣裝但姑娘話錯，要求屋企人買返返入嚟俾我，出面唔易買，屋企人搵勁耐。但後來發現原來醫院樓下便利店有。

Day2 到左生仔當天，因為有些緊急開刀，原本排中午嘅我，無記錯是被延遲到下午差不多3:00-4:00先開始。戲肉來了，麻醉師打完麻醉藥後，把一袋冰放係我肚上問，凍唔凍？我其實feel到凍，但係弱左50%左右，我答佢「凍」。佢通知醫生手術可以開始，當醫生第一下戒落嚟，我竟然感覺到痛楚！！！係痛！我叫左出嚟，（大佬我唔係第一次開刀，我知道開刀生仔唔係咁樣！）。醫生停手抬頭問麻醉師「咁點？」麻醉師低頭同我講「不如我地瞓覺？」我話好，然後俾嘢我聞，我慢慢暈睡去，但聞氣睡去嘅感覺係極唔舒服，並唔係一下子睡去，係天旋地轉好暈好暈，暈左十幾秒才睡去。到我再醒來，係麻醉師拍醒我，話唔可以聞太耐，我一醒，就感覺到我個肚翻天覆地地痛，我同麻醉師講我仍然痛，然後麻醉師又再讓我聞氣暈睡。第2次拍醒我，因為BB要出世，我忍住痛，我望了BB一眼，努力記住醫生同我講幾重幾點出世，但我無力再錫下佢或者乜嘢，我叫麻醉師你快啲整暈我。到第3次被拍醒，話清緊胎盤，問我仲要唔要聞氣，因為聞氣都好痛苦我決定忍一忍，但我忍唔夠5秒，我再次叫麻醉師整暈我。如是者我重覆暈完又醒左四次。最後一次醒來，醫生全走了，剩下姑娘，我仍在手術床上，但我感到劇痛。哩種痛，已經係我上一胎開刀生完回房隔幾小時後麻醉藥全退的痛！而我仍在手術床上！姑娘話要襯麻藥未退，要幫我按肚推惡露。我當下係痛到頭髮根都樹起。我懷疑我經歷了一趟比順產嘅十級生仔更痛嘅二十級開刀生仔。

醫院都係照顧病人嘅地方，相信唔會有人叫一個剛做完割腎嘅病人幾小時後落床去洗衫拖地吧？但公立產房係另一個世界。做完割開子宮咁大手術，姑娘要你幾小時後痾尿，然後湊B. 我6pm回病房，當晚就被迫半夜3:00am落床湊B餵奶。結果又痛又攰嘅我暈倒在廁所，我只記得有十個姑娘衝入嚟救我。也不知是幸運還是不幸，因為暈倒，我可以瞓過夜。

係度想溫馨建議一下大家，我知道餵母乳好好，餵母乳媽媽是偉大到天花板，但其實BB唔會因為飲左3日水奶就變到有咩唔一樣。不需要跟自己過不去，你剛做完大手術，係好應該抖下。所以大家在公立醫院嗰幾日，如果想BB食得飽你又可以休息抖下，還是告知餵水奶吧。我就是一早告知醫院我餵奶粉，係醫院嗰幾日才有足夠休息。同房幾個媽媽餵人奶，不停被逼迫，有個因為BB食唔夠去唔到黃直頭要照燈，有個媽咪發曬脾氣鬧個B好嘈，何必呢，回家慢慢餵也未遲。

後來跟做醫護朋友分享開刀痛嘅事，佢地話係落少左麻藥，但未必個個都會落少，視乎麻醉師經驗，好明顯我就是唔好彩嗰個。

分享到哩度，希望可以俾到參考各孕媽媽。祝孕媽媽們都生產順利，母子平安。

attach1_sign/tmp/php0IpS9F