以下係我老公寫嘅：
---------------------------------------------------------------
0個個POST我都有追開，淨係唔明白，明明唔信嘅人點解一定要話自己信呢？如果是真心渴望認識神，神係always welcome架，呢個係我親身經歷，亦都係聖經上明明白白寫嘅："所以我告訴你們，你們祈求，就得到；尋找，就找到；敲門，就給你們開門。"〈路加福音 11:10〉不過，我冇資格論斷其他人，因為係我信主之前，真係有d似保羅所講嘅罪人中的罪魁，如果唔係蒙主怜憫，根本冇機會做大家嘅弟兄。
小弟屋企有親屬係傳道人，佢後來更蒙召做左宣教士。唔好以為同傳道人/牧師/宣教士住埋同一屋簷下就一定會信耶穌，相反如果你家中有"神職人員"，你就會好清楚知道佢地只係人一個，係屋企都有軟弱嘅一面，係冇光環架。偏偏小弟生性反叛就更加唔順超，於是熟讀聖經唔係為左認識神，而係要搵當中的謬誤加以攻擊，務求將屋企0個位尊貴嘅傳道激到生蝦咁跳。如是者十多年來經常以傳道為“自由搏擊”對手，經驗不可謂不豐富，加上兩分伶牙利齒就更加鐘意以絆倒人為樂，係一般平信徒中難逢敵手。返大學時師兄好心帶我返團契，我去到就將佢地羞辱到無地自容；出黎做野同事向我傳福音，佢d point都未講完我就知道哂佢想講乜，然後駁到佢一棟都冇，所以佢後來同我講返，未向我傳福音時覺得我斯斯文文，試過同我傳福音至知道原來係隻禽獸黎嘅！當時有朋友(即係後來我老婆)話佢信耶穌，我自大到叫佢唔駛同我講喇，因為佢會輸得好慘！:;pppp:
如是者另一個唔係好熟嘅朋友話佢教會有福音主日，約我去聽吓喎，我笑笑口答佢話好呀，心諗我身經百戰駛驚你？如是者本住“踢館”嘅心態跟左佢返去，發現間教會都幾細，炒埋一碟唔夠一百人，連個hall都坐唔滿，令我有少少失望添。到個牧師講道，講d乜實在唔係好記得，淨係記得又係d老生常談聽過廿九幾次，可能我去講仲好過佢喇。但係唔知點解，當牧師係祈緊禱時問邊個想決志時，我就真係一時衝動舉起左隻手，當時個心仲諗： “X！做乜Q野呀，咪人舉你又舉好喎，係咪受氣氛感染咋？”
後來我至知道，當日全場得我一個舉手。
好喇，既然有D無厘頭咁 “信左主”，咪又睇吓聖經囉，但係有多好野仲係過唔到自己0個關，於是我就同神祈禱： “老老實實，我同祢唔係好熟，祢可唔可以俾我知道多d你係點架？” 跟住就黎料嘞。係祈禱之後睇聖經嘅眼光有d唔同左，突然間我真係意識到(而唔只係 “頭腦上認知”)，原來天上地下最大0個位真係可以愛我愛到連自己條命都唔要，仲有d咩好得過咁樣呢？我即場喊到收唔到聲，0個刻真係覺得自己好幸福，就算要我用成世人嘅時間換0個幾分鐘我都肯，至此至真正明白咩叫做“神就是愛，住在愛裡面的、就是住在神裡面、神也住在他裡面。”(約翰一書4:16)，人嘅愛會有雜質，但神就係愛，呢種純度100%嘅愛簡直係wonderful，係我從來未試過嘅，我諗天堂都係咁上下嘅0者。然後至知咩叫做“在愛裡沒有懼怕，完全的愛把懼怕驅除” (約翰一書4:18)， 因為人地可以殺死我，但冇人搶得走呢份愛，咁仲有咩要驚呢？當然，我都係一個好軟弱嘅人，好難keep住呢種與神同在嘅感覺，所以仍然會成日患得患失，但係追求與神同在會成為我一生嘅目標，而我亦firmly believe如果每個人都試過呢種咁正嘅感覺，呢個世界會好唔同，天國就真係近在眼前嘞，所以要努力傳福音~
未信主之前我都接觸過唔少其他宗教同哲學，而且我都算幾熱愛傳統文化架，連讀MASTER都揀科人地覺得無無謂謂嘅歷史黎讀。以前我唔開心時都試過用其他宗教同哲學嘅方法去解決，直到而家我仍然覺得儒釋道三家嘅智慧真係非同小可，但係，只有神俾到我前所未有嘅平安。唔經唔覺由 “手抽筋”決志到而家十年都黎緊嘞，當中我後悔過好多野，淨係冇後悔過娶我老婆(佢係我隔離睇緊)同埋當日“手抽筋”。講真0個句，今時今日你叫我面對返十年前嘅我，叫我同佢駁過，我都未必會贏到(其實係輸九成至真)。你可以話我蠢，但係我就係信，AND I AM SO HAPPY ABOUT THAT！
所以，如果任何人唔係真心尋求神而又要夾硬要話自己係信嘅，咁都係算罷喇，冇著數過喎！不過我唔會對佢地灰心，因為我咁衰神都冇放棄到我，未來嘅野，ask God, God knows!。如果係真心想去經歷神嘅，咁我有兩個小小嘅建議：1. 唔好再話自己未經歷話神喇，一隻洗頭水好唔好，用吓咪知囉！試吓打開本聖經睇吓神講D乜，然後唔理0岩唔0岩聽都試吓跟住做喇！容許我用句佛家用語，神嘅話語唔係淨係要黎睇架，仲要去「証」架，唔「証」就唔會「悟」，只會永遠原地踏步。2. 唔好淨係向神求呢樣0個樣黎prove 神有幾愛你，試下求神俾我地了解佢多d吖，因為搵到神佢自己係開心過得到任何野架，任何經歷過神嘅弟兄姊妹都會知道呢句話唔係吹水！
如果天空總是黑暗的，那就摸黑生存；如果發出聲音是危險的，那就保持沉默；如果自覺無力發光的，那就蜷伏於牆角。但不要習慣了黑暗就為黑暗辯護；不要為自己的苟且而得意；不要嘲諷那些比自己更勇敢熱情的人們。我們可以卑微如塵土，不可扭曲如蛆蟲 - 曼德拉
發表於 
返回列表
