少年成長

收藏本版
發帖
返回列表
跳至頁

首頁
1

尾頁
   2
csir3290


子爵府

積分: 11007


1#
發表於 19-5-5 11:53 |只看該作者
前幾日突然間諗吓原來每一日返到屋企講得最多嘅就係叫對仔女執好啲嘢， 如果佢哋一早做完功課就會玩到成地都係玩具，未做完功課嘅佢呢就習慣將啲書簿放到一枱面都係，我見到佢哋張枱亂到咁我都會奇怪佢哋亂到咁都可以做到功課。有陣時講得多唔只對仔女覺得煩連我自己都覺得煩。而家自己越嚟越覺得教仔女其實彈性真係係好緊要，唔好逼得自己同佢哋咁緊。不論對自己同對其他人畀一定程度嘅彈性其實係有助減少磨擦。例如每一日返到屋企叫佢哋執嘢其實都知道佢哋唔會一叫就即刻執。為咗唔想令到自己唔開心，所以我都會同佢哋講要佢哋喺我沖完涼出嚟之前要執好曬。咁由於自細嘅教導佢哋都知道佢哋執唔好通常我就會將啲嘢收起曬。咁到我沖完涼出嚟通常佢都會開始執緊，咁跟住我就會再提佢哋要快啲執因為執完就食飯。 跟住通常佢都會慢慢又執一輪到食飯。如果到食飯都未執好，咁佢只會睇住我同媽媽兩個食，佢哋要繼續執所以佢哋又會快手快腳執好曬。其實每一日嘅循環都係咁，但係最終佢哋都係會完成任務，我哋又唔使嬲又可以減少彼此嘅磨擦。

其實當我對仔女越嚟越大個，越嚟越發覺其實我哋之間嘅磨擦好多時都係嚟自於究竟我哋要佢哋幾耐同用乜方法完成我哋嘅指令。好多時我哋一講咗叫仔女做嘢就希望佢哋即刻做好，或者要完全跟我哋嘅指示去做。但係當仔女開始長大佢哋有自己諗法嘅時候，大家對幾時完成同埋點樣完成我哋嘅指示 可能嘅睇法已經唔一樣。咁磨擦就自然會產生。除咗家長覺得好大壓力仔女亦都會覺得我哋好煩，到頭來大家嘅關係只會越嚟越緊張越嚟越差。我有陣時會諗親子關係有啲似我返工一樣，我好唔鍾意啲上司交個工作畀我做之後， 中間仲要不停干涉我點做，明明講咗幾耐完成但係中間又成日催我。咁樣我會覺得佢好煩好唔鍾意同佢做嘢。我會覺得如果你係信任我嘅，你交咗份工作畀我，話咗畀我聽要幾時完成中間你就唔好干涉我點做，總言之到時到候我完成到畀你。咁樣嘅上司先至畀到我彈性同埋自由度去完成我嘅工作， 就算件工作幾辛苦總言之到時到候我都會交到貨畀佢。所以我開始覺得 喺屋企對住對仔女其實都應該要畀呢一啲嘅彈性同埋自由度佢哋。既然我自己最唔鍾意嗰啲假民主嘅老細，咁我屋企亦都唔應該做一個假民主嘅家長。

有啲家長可能會覺得如果俾彈性啲細路仔其實都頭來佢哋都係完成唔到，咁咪又係煩又係唔開心。但係我嘅諗法就相反，因為既然我一早已經講咗畀對仔女聽你要幾時做好，示都提過佢哋當做唔到嘅時候佢哋就要承擔後果，咁到時就算佢哋要承擔後果都心甘情願，因為我哋一早已經提咗佢。好似啱啱五一放假嘅時候，又係一早已經同家姐講咗我哋會幾點出門口，出門口之前要執好曬所有嘅嘢先至可以出街。家姐嗰次可能開始嫌我哋煩，所以提咗兩次我都冇再提，去到差唔多臨出門口我只係再提醒佢，如果執唔掂咁我哋就唔出街。其實家姐知道我哋一向都係呢一個習慣講咗就係，終於佢都係鼓埋泡腮執好曬所有嘢，其實我知佢出門口嘅時候唔係好開心，因為佢好似覺我哋話佢咁。但係我哋又冇特別氹佢，總言之佢執好曬我哋就照常出街，出咗街之後好快，我又已經好似平時咁拖返佢，講返吓笑又攬吓，跟住又冇曬事好似平時一樣。

所以我覺得不論對自己或只對其他人，做乜嘢嘢都好存在一啲彈性其實係好緊要。家長逼得自己仔女緊其實等於迫緊自己，都頭來大家都唔開心咁又何必呢？每個人都有自己嘅諗法，都有自己嘅標準要互相尊重。總言之知道件事嘅後果懂得去接受就已經足夠。做父母好多壓力其實都係自己造成自己畀自己。懂得放鬆同埋存在彈性除咗對自己好之外，其實亦都可以對親子關係有正面嘅影響。不過生活習慣唔係一朝一夕養成，如果之前冇諗過咁做，唔好諗住一做一俾彈性就會有效果，我對仔女今時今日呢一個嘅習慣其實都係用咗好多年時間慢慢培養慢慢養成。以為一轉咗方法就可以即刻成功，其實咪又係冇畀彈性自己到最後又會覺得點解用咗其他方法都唔得，又係令到自己更加大壓力。唔係個方法冇用，而係太急於求成，冇恆心冇毅力去實行。 總之對人對己有多一啲嘅彈性其實都係好嘅。 仔女一路長大父母亦都要開始適應轉變同佢哋相處嘅方法。
私人傳訊


首頁
1

尾頁

跳至頁
返回列表
回覆
發帖

© 2024 Baby-Kingdom.com Limited.

網站： 聯絡管理員 廣告查詢 私隱政策 使用條款 免責聲明 使用意見