少年成長今日: 1|主題: 15859

收藏本版

發帖

返回列表

跳至頁

查看: 11789 | 回覆: 1

窩心感覺 [複製鏈接]

csir3290

子爵府

積分: 11005

1^#

發表於 21-1-31 10:18 |只看該作者 |倒序瀏覽 |打印

早兩日喺公司遇到啲唔開心嘢而且嗰日又好多嘢做，所以做到都幾晏先至返到屋企。可能嗰日心情真係唔係幾好，返到屋企一開門都係乸口乸面，唔知係咪細佬都感覺到我嗰日唔係幾開心，佢一開門望到我竟然問我「點呀！做咩事呀！」我當然扮冇嘢同佢講冇事啦。食完飯嗰陣我同老婆坐咗喺廳度同佢講返今日啲唔開心事，我留心到細佬豎起隻耳仔咁喺度聽我哋講乜仲望住我哋。到之後個個都坐喺度睇書嘅時候，我就坐咗喺度諗緊今日發生嘅事，可能同之前有啲唔同，而且成餐飯我都唔係好講嘢坐喺度又好似諗緊嘢咁。唔知係咪細佬都感覺到我有啲唔開心，竟然我坐喺度嘅時候佢自己主動走埋嚟攬咗我一陣間仲喺度望住我笑！嗰種感覺就好似佢喺度安慰緊我咁！雖然佢冇乜點講嘢，只係攬咗我一陣，唔係有咩特別，但係事後諗番就真係好窩心！
我成日都覺得細佬係一個感情豐富嘅小朋友，佢成日無端端都會走埋嚟攬我哋。可能我哋習慣咗成日都會攬佢又會間唔中就吓錫佢哋兩姊弟，到而家臨瞓前都會先攬住kiss咗先至講good night瞓覺，雖然阿仔都已經差十歲有多，但係到而家出街佢都仲會主動俾隻手我哋要我哋拖住佢行。其實整體而言我哋成家人嘅相處都係咁樣樣，經常都仲會擁抱同埋錫下塊面，就算坐喺度睇電視家姐好多都會挨住我，細佬又成日要坐喺我上面。所以一家人嘅關係都係非常之親密。

我成日都覺得親密嘅關係，除咗要用說話表達之外，仲要成日有呢啲身體嘅接觸，令到啲細路仔經常都會感受到屋企人嘅愛。而當細路仔亦都習慣咗爸爸媽媽不論開心嘅又講唔開心嘅又講嘅時候佢哋都會習慣咗去表達佢哋自己嘅諗法。有陣時可能有啲家長覺得唔開心嘢同細路仔講都冇用，但係到細路仔去到一定年紀，你慣咗開心又講唔開心又講，唔係諗住細路仔可以幫到啲乜嘢，而係習慣分享大家嘅感受，亦都等佢哋知道其實唔開心事係經常都會發生唔需要掩飾。另外，當仔女細個嘅時候好多父母都會經常對仔女攬攬錫錫，但係當細路仔越嚟越大嘅時候，可能有啲家長就會覺得唔係咁需要。但係我覺得呢一啲嘅身體接觸係表達對仔女嘅愛嘅訊息，唯有大家都經常感受到呢種愛，大家先至可以坦誠咁去相處。作為父母嘅我，成日都覺得可以攬攬錫錫仔女嘅機會隨著佢哋年紀越嚟越大可能真係越嚟越少，所以我應該珍惜每一個可以攬佢哋同錫佢哋嘅機會。我總覺得小朋友一出世本應就應該係感情豐富，但係唔知點解當佢係越嚟越大個嘅時候就越嚟越唔識得表達自己嘅感情。佢哋學習表達感情嘅方法其實就喺家長身上學返嚟，家長用乜嘢方式去表達對仔女嘅愛，仔女亦都用同樣嘅方式去表達。