fanny2014 發表於 22-10-10 20:15
係啦,就係我越嚟越覺得11個鐘太長,之前走咗人,諗住公司請到人冇所謂, 頂住先, 但係一路都請唔到人, ...
就算唔係更年期,日日11鐘可以捱得幾耐?鐵打都唔得啦,你公司計時薪定月薪?老實講就算有錢都係假,身體係自己嘅,仔都大啦,可以幫輕下家務,太辛苦就煮少一餐半餐叫外賣。同老細講下,再唔搵人的話,即係逼你走,呢種都係體力活,點可能一個人做兩個人嘢,一頭半個月都話啫,長期係咁就係搵笨,命都俾埋佢。
頭痛可以係壓力影響,又可以係因為休息唔夠,亦可以係其他問題,總之就係身體俾你嘅警號,要正視。更年期可長可短,識人前後10年,見到佢都覺得辛苦,有個舊同事幾乎不間斷嚟足1年M,仲要係有時開水喉咁,果頭行出廁所呢頭就走番入去,睇晒中西醫,照晒MRI都搵唔出問題,偏偏佢就係唔肯相信自己已經到更年期,果年佢應該係54歲,佢以為自己未生過會比較容易過渡,點知玩咗佢一個全年M,果陣佢逢人就鬧,同事都怕咗佢,後來佢離職我就冇再見過佢,唔知佢最後點樣。
花旗太太生活在花旗國,留意時差,你問我未必即時答到。