我大概三個月前搵左間中介公司幫我搵印傭,俾左成九千蚊中介費(我覺得都幾貴),佢講明全包。上個月工人到了,我去接工人時,我問佢攞份僱傭醫療保險文件,佢只俾份宣傳單張俾我,話呢份已經係,跟住就引開話題……
然後講到出糧時,佢又提我每月出糧時,記得帶佢去便利店交費,我問佢交乜費,佢一尾只話係印尼個邊的費用,個個都要俾,我問佢係乜費,佢死都唔肯講,話費用唔使我俾,叫我唔使理……
上星期出第一份糧俾工人,個工人問我幾時俾返機票錢佢?......
(原來個中介叫個印傭自己出住先,話到港我會俾返佢…..) 但我三個月前已經俾左中介了……
跟住我問佢點解出糧後要去便利店交費,佢反而問番我轉頭,問乜唔係香港要交的費用咩?????
我叫佢攞張繳費單出黎俾我睇,一睇就嚇親,原來係財務公司數,係個中介用印傭個名,用我的地址,向財務公司借左成萬蚊,但個印傭完全唔知(因佢唔識睇中文)
當晚我打電話俾個中介問個究竟,佢竟然話係個印傭自已借,與佢無關(咁佢又叫我提佢交費…) 問佢點解無俾機票錢俾個印傭,佢竟然話合約只保證佢到港,無話包佢機票錢,所以唔會俾返個印傭……
再問佢份醫療保險文件呢?佢竟然話份文件正本已經俾左我,佢無留底,連收據都無,但當日佢係俾左份宣傳單張俾我only…..
結果係,個傭工損失左機票錢,無端端欠成萬蚊債,而我明明已經俾哂錢,結果連份醫療保險買左未都未知…..
呢間簡直係黑店,我真係想為個印傭討回公道,請問各位有乜辦法???