懷孕前後今日: 50|主題: 329736

收藏本版

發帖

返回列表

跳至頁

查看: 3467 | 回覆: 33

分享瑪嘉烈生產過程(超長長長篇) [複製鏈接]

2cute_baby

大宅

積分: 4337

1^#

發表於 16-4-3 00:39 |只看該作者 |倒序瀏覽 |打印

剛剛BB滿月了，我係2月份喺瑪嘉烈生嘅，我未生之前喺度都好想要睇下其他已生產嘅jm分享生產過程，所以自己都想要貢獻返下，分享自己嘅(超長分享)。

我今胎係第3胎，第一胎順產，第二胎開刀。

今次生嘅過程都叫好順利呀，今胎順產，我係凌晨5點開始有規律陣痛，4分鐘痛一次，入院前仲見埋紅，當時係39週5。

但最攪笑係去醫院，到產房無晒啲陣痛，所以最後被安排去左產前病房。

我喺產前總共住左4日，一時有啲痛，有時又無晒反應咁。

期間我有不斷咁行，仲有同一病房產前嘅2-3位媽媽一齊排隊乖乖輪住玩fit ball, 連啲姑娘都話我地勤力又乖。

仲有我地幾個媽媽仲一齊約埋走去行樓梯，行完一轉休息15分鐘再行過，諗住話行樓梯多啲生快啲。
(我地嘅一轉係喺產前病房2樓行上6樓，再搭電梯落地下再行上2樓為一轉)
點知我地幾個媽媽行返去病床時嘅言談被姑娘聽到，就話我地做危險動作，仲要比佢地聽到，哈哈，真係好好笑，接住姑娘梗係叫我地唔好再行樓梯啦，話暈底一件就幣啦，無人救到我地。😂😂😂😂

其實我喺產前住左兩日後(當日係星期六)，醫生話如果我星期一再無反應就會同我book手術室開刀生，醫生話因為我上胎係開刀生，加上我嘅case係唔用得催生，怕催生藥令子宮會突然有好強嘅收縮反應而有機會爆傷口，令子宮大出血，所以唔可以催生，要開刀。

到星期一零晨開始又有規律陣痛，突然有一下，好似比阿女一野大力撐，之後就有水流出嚟，我有去廁所睇，我覺得應該都到我了，當時已係早上六點幾。
我記得當時對面兩個病房都有分別兩個產婦要落產房。所以我唔想打擾佢地住，就等佢地攪掂晒先叫佢地check...一check之下，真係穿左水，就駁機駁到11：30左右啦，就被推落產房了。

穿水後陣痛愈來愈加劇，由當初可以用呼吸法去舒緩，去到產房嘅開初都勉強用到呼吸法，到下午12：30左右，我見駁住check我宮縮嗰部機個波愈來愈密，同埋愈來愈高(我記得個指數係由最底4，最高12)，痛到我自己要求要用笑氣。

我記得我生第一胎時，好拒絕用，因為覺得用左笑氣後，個人感覺好奇怪。但今次非用不可，我其實都好忍得痛，但都忍不了。

記得主要嚟幫助我嘅助產士好好，好nice又顧及產婦感受。

我記得有段時間我痛到㩒鐘，入左嚟一位助產士係比較粗聲氣啲嘅，問我點樣呀，剛剛1個鐘前先check完，你個指數十中未痛得夠密，痛耐啲先Check啦...當時應該係1：00左右，接住那位好nice嘅助產士入左嚟，佢有幫我check，但好可惜佢話：「未開」，當時心諗「死啦，痛到咁密，痛到爆頂(下下都到12度)都仲未開，我會唔會痛死㗎？」

之後，痛多40分鐘左右啦，其實我當時都痛到無晒時間觀念，只知道係咁痛痛痛痛，其實亦覺得啲時間好似過得好快但又好慢咁。。。

那位好nice嘅助產士入左嚟，見我痛到標屎咁嘅樣，就嚟幫我check, 一check就話：「嘩，你開晒啦喎，忍住呀，我去預備啲野，唔好痾住呀」，佢就行出房嗌話：「X號房開晒，生得，搵人嚟幫手呀」我同時好粗聲氣咁話：我唔得啦，忍唔到呀，我要痾啦。(其實係痛到用唔到有禮貌嘅聲音)

最後佢地好快set好啲野，叫我用力生，我出力push左兩下，用力到我老公同啲助產士話：「隻手支鹽水豆爆返啲水出嚟，成邊扶手濕晒」助產士同我講話：「你真係好勁呀」當時我只係好專心一痛就用力，全身其實痛到發軟(又發軟又用力，真係好矛盾)。
助產士話：「要瞓返上啲，如何唔係阿B出唔到嚟呀」
我話：「我唔得呀，做唔到呀」最後係要老公「的」我瞓高啲，好在我老公夠大隻，如果唔係都幾難「的」咁重嘅我。
用力時，老公都有從後托一托我背隻，等我易出力啲。

最後push左3下左右，好有感覺咁感覺到阿女個頭出左，之後再push，感覺到個膊頭出埋，之後就全身出晒嚟。。。。

嘩！呢胎痛到我不得了，同生大仔嘅感覺完全唔同！生大仔到可以生時，已經無痛嘅感覺，亦感覺唔到佢出到邊個位置(頭，膊頭，全身)。

今胎，我無剪會陰，只係爆左少少，聯針都聯得好快。不過聯針時，我都有吸住笑氣，因為有左生大仔嘅經驗，聯針時綁結位都會感覺到痛。
老公今次亦有剪臍帶，全過程睇晒！

可能我大痛時，起勢咁索笑氣，索得太勁，中間有斷時間索到無晒氣，要換氣樽嗰幾分鐘，痛到我簡直非筆墨所能形容。
加上生時又太用力，生完個人迷迷糊糊咁，講野都無晒氣無晒力，連睇野都無咩焦點咁。
助產士抱阿B比我睇，問我男定女時，我都機乎答唔出。

聯針前，有個助產士(較粗聲氣那位)問我影唔影全家幅，我想話：「影」，但都回應不了；同時間，那位好nice嘅助產士話：媽媽睇嚟依家太攰太攰，等佢休息下先再抱返BB嚟影啦。。。

今次老公陪產陪得比第一胎耐好多，聯針都有喺度，聯完針喺產房休息時都有一直陪住，不過就辛苦老公了，全程企喺度，無櫈坐。

整體嚟講，我好滿意瑪嘉烈產前、產房同產後病房嘅所有服務，大家其實都可以放心。

分享完畢。祝大家生產順利。