吹水玩樂

時事理財

由家出發

媽媽天地

育兒教養

情報分享

意見反饋

聯絡管理員

我的中心

Baby Kingdom - 親子王國香港討論區 › 首頁 › 香港18區媽媽會› 74網2016-17升小血淚史

香港18區媽媽會今日: 0|主題: 156879

收藏本版

發帖

返回列表

跳至頁

查看: 52309 | 回覆: 85

[元朗區] 74網2016-17升小血淚史

[複製鏈接]

12 3 4 5

phoenix_y

民房

積分: 29

1^#

發表於 16-8-9 08:21 |只看該作者 |倒序瀏覽 |打印

來到八月，相信大部分九月升小一的同學都安頓落來。襯仲記得的時候記低自己細路升小血淚史，等有緣人(出年九月有細路升小一的爸爸媽媽)參考下。

首先呢，我係雙職媽，有兩個小朋友，今年九月阿哥升小一細妹升K1，住雞地，74元朗東校網。阿哥係大家叫做「元朗三大」的幼稚園讀書。由於老公同我唔buy贏在起跑線，三年來只要求阿哥跟到學校所教的中英數，課餘隨興趣學畫畫游水踢波等但無考過任何一張cert。一年前呢個時候開始認識升小遊戲，跟著先知道好大鑊。

首先，你要知道你想你小朋友讀乜野學校。如果係港九區神校，無論係直資定私小，sorry，你應該一早係小朋友考K1時舖定路。一年多前我問我中學同學，佢地分別係英X(直資)同聖芳X(私小)到教，學校未算最神，但都話撇除梗有的人事位，好多時都係收市區(如九龍塘)果幾間出名幼稚園的小朋友。一來果班怪獸家長底下叻的小朋友真係有好多揀，二來主觀上都唔想小朋友老遠係新界走出去返學。考慮過之後，一來我地阿哥唔會係最叻(從來無操)，同埋我地唔打算(唔想細路早出晚歸，又想住近爺爺嫲嫲)亦根本無能力搬去住市區樓，我地叠埋心水係元朗讀書。咁元朗有無神校？無。直資就得李宗德同宏信，私小就得激活(今年開始多左啟信)。我地當時就去了解兩間直資的教學模式同課程，不過發覺唔特別適合阿哥，又因為有細妹跟尾，決定區內官津小學係首選(即係要參加派位)，於是只報了激小諗住碰運氣做水泡，雖然最終係in唔成的。

時間過得好快，K3開學無耐就要交自行報名表，呢輪係可以係全香港網內外揀一間官津小學鬥計分，如同分就抽簽。老公同我細個係向港島同九龍讀書，我地唔想阿哥出去讀所以放棄左爸媽校友分，另外我地無任何辦學團體宗親會分亦無宗教分，所以只得首名子女連適齡入學共15分。74網市內學校有數得計：元小，光明英來，徐澤林，榮恩，鐘聲，真光。一年前的五六月即係K2下學期阿哥幼稚園搞左參觀幾間區內小學，老公去左鐘聲我去左光明英來，兩位校長晨早講明要一一一先有得叩門。跟著鐘聲話社會競爭激烈催谷細路難免；光明英來校舍大靚粤教中；另知道元小同徐澤林一向無話非一一一就不見，加上無宗教分如自行揀徐澤林覺得蝕章，所以最終填左光明英來。由舊年九月底交了自行報名張form, 開始好忐忑，到十一月底願望落空再捱到今年一月要填大抽獎份表，已經想死。

時間好快去到今年一月。一見到教育局最終放咗D咩學校同幾多學額加埋本身74網果六間的學額來俾74網的小朋友抽，暈左。我計過，74網張表總共有633個位，當中得263個位係市內六間。咁其他呢？有Comments稍為好D但已好遠的黄陳淑英同錦田聖若瑟，跟著就係新田八鄉等更遠的村校，再來就係天水圍絕非一二綫的小學(舉例果D天天天官天循伊正伊分全都無on list)，感覺上仲要係天水圍72網內越不受歡迎就越多位分俾74網抽，仲要有一間係以前被殺而家翻生只開辦七八九年的方潤華(都有成71個位)。如果你小朋友唔係果幸運的四成人，就唔知抽左去邊返學。

望住果張表，就算幾唔想填，始終都係要填。為左唔好浪費一一一，甲一乙一自然係光明英來。甲部得5%位實左太少，舉例你甲二放元小都注定食白果，因為一定有人甲一放元小而入滿，所以甲二三我留空亦賻乙一直去光明英來。填表一刻無錯係灰，但老實仲係心存僥諗住阿哥隨機號碼未必差同埋真係唔甘心晨早排天水圍學校先，所以乙二三係放雞地的徐澤林同榮恩(當然大抽獎有結果後就知道太賻命)，之後就陸續排下少位又排下多位的天水圍學校，跟著最尾係方潤華。

一月填表交表之後，充分明白到要四圍叩門的機會實在太高。於是農曆新年之後就物色同安排阿哥上面試班，一星期一堂，百幾二百蚊一堂，一直上到真係去叩門面試。呢幾千蚊係米物有所值好難講，但我覺得果兩三個月針對性執下阿哥D談吐舉止同埋預習下一D面試常考問題，都係好事嚟嘅。

與此同時呢，都叫做準備下如要叩門的子彈。例如唔同學校的叩門信，阿哥的portfolio等等。臨近放榜果一兩個星期，仲要住各間學校網頁公布申請叩門位的手續，甚至打電話去問。

時間又過得好快，終於到六月四日放榜，永遠都記得呢日…… 竟然係派左去排1X的天水圍學校。阿哥問我去邊間讀，我如實話學校係天水圍，但扮哂無事話間學校都好不過少少遠，嚟緊爸爸媽媽陪佢試下搵元朗小學。於是星期六當日同跟著的星期一就同老公分頭賻哂命咁去74網六間同73網元朗西絕大部分的學校交表，有D即場俾時間，有D就要返去等消息面試，有D最後係石沉大海 (鐘聲，真光，靈愛，校友會---鐘聲同校友會分別係家長會同申請表寫明一一一先見，真光同靈愛則班數少位更少。)睇翻之前的schedule:

11/6 商小: 所有交表都獲邀係11/6參加筆試。半小時做八頁紙，阿哥話佢只做到四版，有中英數填色，內容講唔到俾我知。過幾日都收唔到電話即係落選無得面試。

13/6 梁省德: 一家長陪報到後拎一本書一齊睇，跟住小朋友帶住本書，自己同另外五六個小朋友一組入班房，家長出面等。十分鐘左右老師帶返小朋友出來，有部分小朋友要留步嗌埋爸媽一齊去第二到唔知係見副校定主任，總之阿哥無份。我問阿哥課室入面做乜，佢話有工作紙，識哂(但內容又係講唔出)。再問老師有無同佢傾偈，佢話有D小朋友有老師行埋去但佢無。咁我問無野做佢有無乖乖地睇圖書？佢答我玩波子 (注: 面試之前真係要執筆袋。平時功課做得好我會獎波子，一定數目可以換禮物，阿哥鐘意收埋响筆袋到，我一時無收起就出事。)

15/6 榮茵: 交表時已知面試時間。經過商小同梁省德的挫折，阿哥開始明白叩門係咩一回事。入榮茵前佢同我講: 我要老師知道我好叻等老師想我係佢到返學，咁我米唔洗去天水圍咁遠囉 (我果一刻想喊)。面試完畢，阿哥又話識哂，但內容始終講唔到，不過佢特別提起老師有張紙有四格圖畫要佢講故事，佢話兔仔同烏龜開party(但我估果故仔其實係龜兔賽跑)。

16/6 元小: 報到之後係一班家長同細路係班房等。有張A4紙係印有元小校舍圖案要小朋友寫名油顏色陣間見老師交，另外有D小玩具小教具俾小朋友隨便玩。到我地面試係家長同小朋友一齊見兩位老師。老師拎左張寫有「身體」兩字的字卡叫阿哥讀阿哥識；跟著拎另一張咭(上面有三本書)問 \"How many books are there? \" 阿哥答 \"Three books\" (其實之前有教過佢用完整句字答問題不過好明顯發揮唔到)；數學問 \"4加幾多等如9\" 唔知點解阿哥答左 3 (老師有問 “真係？\" 但阿哥get唔到照話 3)；跟著有幅圖畫係bear bear 熊開生日會老師問熊仔同朋友做緊乜野又問阿哥有乜野生日願望。之後就係另一個老師問我認識學校有幾多同埋對小朋友有D咩期望等等傾咗一陣，跟著就in完。

16/6 南元小: 見完元小係立即飛車過去南元小的。禮堂報到後，家長係到等而小朋友一組組跟老師走大約半個鐘小朋友返回來禮堂。阿哥又係話識哂但講唔到內容。

玩到呢日其實已經好謝。由六四開始斷斷續續咁返工請假一返工又OT跟著又超黑仔撞正細妹唔舒服，真係發哂癲，但重中之重係17/6。

17/6 徐澤林: 呢間好特別，家長交表時係要交埋份爸爸或媽媽填的問卷，例如問你放假同小朋做D乜，花幾多時間同小朋友睇書同埋睇乜野書，對小朋友同學校有D咩期望等等。我唔知道問卷係米重要，但係我花左好多時間同心思去填，有D問題仲係同阿哥一齊傾添。好好彩，有得in。

到in果日，先上一個課室報到。學校預備咗可以拎本圖書同小朋友睇。等咗陣，聽到名就一家長同小朋友入課室。老師會叫小朋友拎本書自己睇一陣老師要同媽咪傾計。我個百厭哥拎本書就走左去課室最後排坐，我就係前排同老師傾(一路傾的時候一路擔心唔知阿哥向後面有無搞搞陣)。老師都係問下我點解想讀呢間學校，諗住點樣輔助小朋友學習，平時玩乜睇咩書等(感覺上佢地好重視閱讀)。老師同我傾完就請我係課室外稍等。佢就一對一同阿哥面試。後來問阿哥傾左D乜，又係唔點講到，不過有考錢銀題目同埋要將幾張英文字卡排返成句子。呢間學校俾我同阿哥的感覺非常好。由門口嬸嬸書記老師都好好笑容好好禮貌，有理由相信係一間愉快關愛的學校。

17/6 光明英來: 去完徐澤林，跟著去光明英來(本來中間要去光明in，但太趕，放棄左)。報到後，係有兩個高年級姐姐拖著阿哥手小行樓梯去課室in，家長就响果演講廳到等。十幾分鐘後，兩個大姐姐帶返阿哥去廳到，跟著就走得。問阿哥考乜，佢話識哂，我再問即係考乜野，佢就發忟嗌好攰，咁我就無再出聲。不過咁樣幾粒鐘趕兩場，都明嘅。返雞地附近茶餐廳食紅豆冰的時候，終於電話到，其中一間有offer。果刻先放下心頭大石，亦決定18/6惠州同20/6陳榮根唔去in了。過多唔夠兩個星期，六月底前有另外兩間offer, 總算打贏呢場叩門戰。

回顧整個歷程，有呢D想分享：
一）你絕對可以唔谷小朋友，但有心理準備叩門會輸蝕。我去每一間叩門，阿哥的對手每次講緊上百人，見有D拎住筆記簿而上面的生字係個個都aeroplane咁長，而每一間頂盡得十個八個叩門位。咁我地嘅細路憑乜野脫穎而出，真係要諗。

二) 如果你唔谷開小朋友，叩門呢個遊戲真係可免則免(有教師老友話阿哥學術水平同課外活動唔特別標青，有幾間offer除左阿哥面試時如有神助也可能係學校揀家長：我係MNC做HR而老公係紀律部隊，佢地會歸類呢D家長為會理下小朋友但又唔得閒煩學校嘅)。六月份果大半個月，真係大人細路都超大壓力。咁點樣先可以輕鬆叩？即係就算派得唔好都唔好激差。咁即係點？首先如果係租屋嘅不如租住73網果邊先。果到除了一間特別不受歡迎其他任何一間唔死得人，而且唔駛去天水圍or村校。如果焗住74網，填表真係唔好咁賻。我聽咁耐除左有街坊話佢係第二志願入到榮茵其他全部第一志願入(咁我聽極十靚廿個，希望有其他爸媽分享下)。咁即係話大家可能要將天水圍不是最闢最差的放翻前少少。如再將戰線推前，有世襲or母校分就唔好隨便放棄喇(我有兩個朋友，因阿哥讀緊果間好谷細佬就唔跟阿哥讀，結果派左方潤華但又對學校無信心，而家叩左去屯門。另一個老豆堅持唔俾阿女讀母校(又係話太谷唔想阿女步後塵)，結果派左天水圍唔知邊間，不過好彩叩翻73網。而如果真係要叩門，我有諗過唔知當時如甲二甲三擺73網的靈愛同校友會唔知會唔會有機會見。(但如果咁做，一個唔覺意入左甲二或甲三跟著無左乙一45%又點呢？我唔知點諗好。)

三) 阿哥係虎年出世。好似話跟著的兔仔同
龍仔仲大獲，兼且未截雙非。如果係咁，真係建議大家好D步署。除左策略性填統派張表，大家不妨多D去認識(e.g.開放日)唔同小學。我諗翻果堆叩門信，真係仲難寫過求職信，對學校有D概念會好寫好多同到肉好多。

四) 最後呢，亦係最重要嘅，就係大人同細路的心態。就算派得激差，唔好令細路覺得世界末日(最終真係可能要讀)。到叩門時，千祈唔好放棄，一來盡人事聽天命，二來每一次筆試面試，都係經驗。我阿哥就係越戰越勇的。

分享到呢到差唔多。祝大家入到心儀的學校。

點評

SiuBBee

發表於 16-8-11 20:07

0 1 0

私人傳訊

0030

侯爵府

積分: 24971

認識瑞士牛牛第二回認識瑞士牛牛第一回

2^#

發表於 16-8-9 10:20 |只看該作者

我大女都係今年9月升小一，都系參加自行-大抽獎，但相對你的經歷實在小巫見大巫

私人傳訊

crazyoct

大宅

積分: 2243

3^#

發表於 16-8-9 10:34 |只看該作者

多謝樓主無私分享.
你的分享好有用.
只要思想正面, 唔放棄,最後都會成功.
相信你兩個小朋友都會學習到.

我9 月要揀學校了, 仲心大心細揀緊.
我諗我都要提早操下我小朋友 d 中英對答.... 安排下面試班. 申請私小.面試當練習下個模式 .

私人傳訊

minglam49

大宅

積分: 2357

4^#

發表於 16-8-9 11:22 |只看該作者

回覆樓主:

楼主，恭喜叩到学校。見你都好盡力，叩到边間門，啱哥哥嗎？

私人傳訊

hellovenus96

大宅

積分: 2455

5^#

發表於 16-8-9 11:46 |只看該作者

叩門過程的確好辛苦,我今年都同樓主一樣經歷了

私人傳訊

kanhan

男爵府

積分: 9720

6^#

發表於 16-8-9 11:52 |只看該作者

樓主分享得好好

小朋友好叻叻

私人傳訊

phoenix_y

民房

積分: 29

7^#

發表於 16-8-9 13:24 |只看該作者

回覆：74網2016-17升小血淚史

大家唔洗客氣，都係分享下啫，因叩門堅攞命。
最後係一間官小兩間雞地，讀邊間唔講了。

私人傳訊

csksandy

別墅

積分: 799

8^#

發表於 16-8-9 13:30 |只看該作者

本帖最後由 csksandy 於 16-8-9 13:33 編輯

多謝樓主分享. 我既小朋友下年升K2, 住緊74校網,開始睇學校. 我母校係大熱門亦心儀,但係位於另一個地獄屯門71區. 下年打算搬走, 但為了方便屋企照顧,不能搬太遠,最多考慮73/70區.請問以下那一個CHOICE較好? THANKS~
1) 自行和甲部抽母校, 大抽獎搬去73/70區抽乙部
2) 搬去73/70區,放棄母校, 選本區小學3條1叩門

私人傳訊

kklemon

別墅

積分: 965

9^#

發表於 16-8-9 13:49 |只看該作者

回覆樓主:

我的情況同樓主差不多，又係唔谷小朋友，但派位派到的學校又唔係理想的，叩門時阿囡又唔夠人哋叻，7月中當諗住認命時，奇蹟竟然出現了，收到第一志願的通知話有一個學位吉咗出嚟，真係開心過中六合彩，因為第一志願的中學派位都幾好，又近屋企，再加上妹妹係龍年出世，就可以穩陣少少入到家姐學校一齊讀。有時會覺得真係社會環境因素迫使家長變成怪獸，派位彩數好，自然派到心儀學校，運氣唔好就要家長及小朋友面對叩門的壓力，試想想小朋友那麼小小年紀就要面對好似見工面試的過程，有時睇到都心痛。

私人傳訊

ccyxfr

別墅

積分: 925

認識瑞士牛牛第一回畀面勳章

10^#

發表於 16-8-9 14:51 |只看該作者

謝謝樓主無私分享, 實在非常詳細..
同時間.. 都非常得人驚..

我都要早早預備了.

私人傳訊

701003

水晶宮

積分: 60348

畀面勳章

11^#

發表於 16-8-9 15:10 |只看該作者

回覆：74網2016-17升小血淚史

果然有汗有淚

多謝分享!選擇權在父母手!唔好太易動搖!其實唔想谷就唔好谷啦！入三線小學又未必係絕路!我一直唔buy谷小朋友，所以小一只求輕鬆就近

升中又係貪競爭少，升大學更係子女自己話事!又係果句，有能力讀書，咩學校都讀到!
新一屆家長都要立定決心，選擇啱自己的方向，努力!

私人傳訊

Ksy229

大宅

積分: 4675

認識瑞士牛牛第一回

12^#

發表於 16-8-9 15:31 |只看該作者

9月到我玩呢個遊戲, 真係好擔心.....唉

私人傳訊

piglet0529

子爵府

積分: 13006

好媽媽勳章醒目開學勳章畀面勳章

13^#

發表於 16-8-9 17:43 |只看該作者

引用：來到八月，相信大部分九月升小一的同學都安

原帖由 phoenix_y 於 16-08-09 發表
來到八月，相信大部分九月升小一的同學都安頓落來。襯仲記得的時候記低自己細路升小血淚史，等有緣人(出年 ...

恭喜晒！總算叩得番元朗, 74區真的很慘情, 其他區的人話派寶校都冇我地咁慘! 係派到又遠又多雙非, 我小朋友是對上一屆, 叩門過程也差不多, 當中比樓主更辛苦係in完第一間之後小朋友在幼稚園染上感冒, 之後幾間禁住燒來in, 好彩最後都叩到元朗, 小朋友狀態真係話唔埋架!

birth 5.3lbs
1M 7.9lbs ; 2M6D 10.8lbs ; 3M4D 11.5lbs ; 4M8D 13.78lbs ; 1Dto5M 14.7lbs ; 6.5M 16.2lbs ; 9M 16.5lbs ; 10M 17.8lbs ; 13M 19.2lbs

私人傳訊

2bmrsyau

大宅

積分: 1501

14^#

發表於 16-8-9 19:04 |只看該作者

phoenix_y 發表於 16-8-9 08:21
來到八月，相信大部分九月升小一的同學都安頓落來。襯仲記得的時候記低自己細路升小血淚史，等有緣人(出年 ...

多謝你嘅分享，睇到我都想喊！

私人傳訊

kiukiu1016

子爵府

積分: 13541

15^#

發表於 16-8-9 22:54 |只看該作者

謝謝，下年到我喇，樓主係咪甲1-3都填滿呀？

私人傳訊

dickmamyan

大宅

積分: 3583

16^#

發表於 16-8-9 23:50 |只看該作者

回覆樓主:

我住73區。當初就系驚光明商會南元小機會微(其實有讀緊的同學媽咪對前二間反映都非常麻麻)，所以我選了校友會。第一輪唔中，第二輪都系穀住要校友會(希望111有機會in),心諗竟爭最強的學校填二三，咪浪費一個位，所以就填了惠州第三。結果就派到惠州。之後也系立馬安排上面試班，寫中英信，整理證書，一疊疊擰住去拿報名表面試，希望校方會望下，多個機會。最後的校友會面試結果出來，落版。真的喊出來。第日一早拎住的嘢去學校，但被校工擋住唔俾見校長。唔死心的我連夜寫著封英文信俾校長，第日一早托校工轉交校長。跟住就開始暗無天日的等，終於等到校長的電話

而家阿仔讀的很開心，成績也名例前矛，呢段經歷諗起真的全心塞！各位媽媽加油！(有同學光明排第三竟然抽中，填表真系有技巧)

私人傳訊

phoenix_y

民房

積分: 29

17^#

發表於 16-8-10 08:36 |只看該作者

回覆：csksandy 的帖子

首先呢，我對屯門區或70網無乜認識，亦唔係升小專家。但簡單睇母校雖然係屯門但既然心儀點解自行唔揀左先呢？分唔係人人有或者自行已計贏或同分抽贏呢，咁就唔駛玩大抽獎甲乙部啦。如路程遠就再諗搬屋，特別係你都好似有搬屋的計劃。同埋聽聞一般而言屯門區中學好過元朗？自行唔揀母校的損失只係無咗三條一，而三條一永遠只得一間小學，除非係話三條一就實收啦，如果唔係只係損失一個叩門機會，係機會㗎咋。假如自行衰左要玩大抽獎，咁大抽獎前搬去70定73網好抽D，我就答唔到喇。祝順利。

私人傳訊

phoenix_y