興趣嗜好

跳至

首頁

尾頁
   7


大宅

積分: 2644


發表於 18-8-10 22:16 |顯示全部帖子
城中選美盛事正進行得如火如荼, 一班年輕佳麗紛紛出嚟自我介紹.

聽講朋友嘅女今年都有份參選, 連傳媒都見埋, 而且被譽為大熱人選, 但點解望勻晒所有入選佳麗, 都見唔到小妮子嘅芳蹤呢?

一問之下先至知道, 原來大會要求佢簽下不平等條約, 不然嘅話就即時被淘汰, 連入圍門檻都冇資格.

基於唔想被合約綑綁幾年動彈不得, 只好放棄選美夢, 另謀出路.

原本一心藉選美跳板加入娛樂圈, 卻遇上阻礙, 寧願放棄都唔想無自由, 小妮子果然有性格.

其實而家選美節目, 與我細個時嘅矚目程度真係有天壤之別, 所以就算入唔到就罷啦, 冇乜損失.

嗰陣時, 一到播出當日, 會被視為城中大事, 市民會推卻所有非必要嘅應酬, 人人安坐家中, 準備喺電視機前對佳麗們評頭品足, 個個心目中都有自己心儀嘅冠軍人選.

在我嚟講, 當日心情會特別興奮, 因為夜晚可以睇選美, 所以好期待. 而我當然亦有鍾意嘅佳麗啦, 不過好多都冇得獎. (後來聽某啲記者爆料, 話高層一早已睇中會力捧嗰啲, 係唔會獲獎的, 以免因為要履行任務而無暇接劇. 咁講嘅話, 即係我尚算有眼光啦)

當時選美會分兩次舉行, 一次係準決賽, 三十位佳麗淘汰一半, 留待第二周嘅總決賽才分出名次. 所以喺準決賽尾聲時, 多數會見到十五位佳麗站喺台上, 讓台下記者嘅鎂光燈閃個不停, 拍下佢哋喜極而泣表情嘅畫面.

到總決賽當晚仲緊張, 因為會急切想知道邊個摘冠, 好多時都係眾望所歸居多.

得獎佳麗嘅照片就會成為翌日各周刊嘅封面, 各報章嘅新聞, 可算幾哄動.

而家除咗自家台嘅周刊才會出封面, 其他好似唔多覺, 所以邊個獲獎可以講唔係太多人知, 亦唔係咁有興趣想知. 由此可見, 小妮子嘅如意算盤未必打得響.

選美環節, 我覺得最感動係 : 由上屆冠軍先繞場一周, 幕後播出佢哋娓娓道來喺過去一年嘅感受, 然後才為新一屆加冕.

睇住佢哋由得獎時嘅青澀期, 經過一年歲月嘅洗禮, 變得更美麗動人, 都會驚嘆一年內無論化妝談吐儀容都進步不少, 應該下過唔少苦功.

儘管早期並唔似得近年, 大會會為每個佳麗拍攝大特寫並自我介紹, 讓觀眾甶留下印象. 但係當時選美出身嘅佳麗, 無論得獎或落選, 個個都各有特色, 而且亦都好靚, 令人留下印象, 可想而知當時嘅質素好高.

睇返近年嗰啲, 雖然不乏靚女, 但卻欠缺一種眼前一亮嘅光彩, 甚至連名字都叫唔出, 可見想藉此出名並唔係易事.

唉, 雖說青出於藍, 但好多嘢, 始終新不如舊.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-8-13 11:57 |顯示全部帖子
以前出席過嘅喪禮, 多數採用中式, 期間香火鼎盛, 主人家不斷圍爐燒冥鏹衣紙, 又有師父誦經唸咒, 加上不時響起誦經時所需嘅鈴鐺啲打..... 令到氣氛凝重場面悽愴, 因而每每引致在世親友泣不成聲, 令在坐者亦不禁為之動容, 甚至同聲一哭.

最近首次出席親戚嘅西式喪禮, 才發現與中式截然不同.

除咗場面較為肅穆, 氣氛亦非常寧靜平和, 雖間中有聽到主人家啜泣聲, 但真情流露乃平常之至, 並唔似得中式般呼天搶地令聞者心酸.

整個過程需時只係個多小時就結束, 而中式一般起碼要到晚上九點幾十點才離開, 有啲甚至要守夜至天光. 至於過程, 西式只係唱詩歌唸聖經, 聽吓牧師嘅安慰語. 詩歌柔和悅耳, 與中式嘈吵嘅破地獄儀式大相逕庭.

期間播放咗一段往生者在世時嘅連串相片, 望住相片嘅同時, 不自覺會回憶過往與之交往嘅點滴. 今日人已去, 雖不捨, 只會平靜地悼念或默默垂淚, 唔會悲慟哀號. 我諗如果喺中式"配樂"嘅音效下, 一定哭斷腸.

當家非常讚賞西式嘅平和寧謐, 又感慨假如自己過身, 一定冇乜相片播. 因為平時只會影人, 好少自拍, 加上我同吾兒又唔鍾意拍照, 根本冇乜全家福嘅相片可提供.

我話我哋又唔係教徒, 根本冇資格採用西式, 而中式又唔會有播相環節, 所以叫佢唔駛閉翳.

趁講開又講, 我哋嘅意願不約而同都係百年歸老之日, 草草了事就算, 千祈唔好搞甚麼大龍鳳, 勞民傷財.

以前諗過捲張蓆掉落鹹水海就算, 不過諗到會累及在世方被票控亂拋垃圾, 只好改為火化成灰後, 佢嘅骨灰撒入大海, 因為佢識游水. 我嘅就求其搵一處山頭撒下, 因為我唔識游水. (哈, 此後佢有佢快活, 我有我逍遙, 山水無相逢)

此舉不僅可省回骨灰龕, 春秋二祭亦毋須往拜祭, 乾手淨腳.

出世時兩手空空, 離世時兩袖清風, 繁文縟節, 不需矣!!
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-8-15 11:17 |顯示全部帖子
本帖最後由 cforchat 於 18-8-15 11:22 編輯

近來網上情緣騙案頻生, 成為茶餘飯後友儕間嘅話題.

與一位單身女性朋友閒聊, 講到呢個話題時, 見佢多次欲言又止, 八卦嘅我梗係連場追問, 想知道係咪有料爆.

經過我窮追猛打, 加上亦睇得出佢都想搵人傾訴, 件事就順理成章被娓娓道來.....

話說幾個月前, 佢喺網上一個討論區見到一個主題, 內容類似係單身人士俱樂部, 歡迎所有未婚男女加入吹水, 年齡不拘.

獨住嘅佢, 一向社交圈子狹隘, 除咗返工放工, 鮮有工餘活動. 所以放假嘅日子, 除咗返父母屋企打個照面, 就係留喺家中煲劇.

思想保守古舊嘅佢, 一向對電子產品冇興趣亦冇研究, 所以佢嘅手機係用緊基本只有打出打入, 其餘乜功能都冇嘅舊款型號. 後來經不起被我哋多番揶揄, 亦自覺聯絡上唔方便, 先至肯改為智能手機. 至於電腦亦係考慮到煲劇時睇大畫面舒服過細螢幕, 所以至肯掏腰包買入.

一旦有咗新玩物, 佢就日以繼夜地到處瀏覽遊蕩於電腦世界裡, 就係咁, 無意中被佢發現咗上述所講嘅討論區, 令後來發展成為一段人生中十大不想提嘅網戀.

喺討論區吹水期間, 佢覺得其中一位長期留言者言之有物學識淵博風趣幽默, 令芳心寂寞嘅佢不知不覺間被吸引. 又因為自己春心蕩漾, 每當對方暗喻一啲傾慕嘅說話, 佢就自行對號入座, 認定人哋係向佢示愛, 於是喺神女有心而唔知襄王是否有夢嘅情況下, 二人就開始私訊, 訊幾訊就相約出嚟見面.

俗語話姣婆遇着脂粉客, 應該可以套用喺二人身上. 兩個人年紀相若, 甫見面一拍即合, 彼此滔滔不絕暢所欲言.

臨分別時, 已約定第二次見面.

我先軋亂話柄, 好奇問佢, 第一次見面只限於交談? 以今時今日吃快餐嘅年代, 冇理由仲有純純的愛㗎喎?

佢叫我唔駛心急, 話第二次就來了......

所謂來了嘅意思, 係開始動口未動手. 口者, 吻也! 手者, 撫摸也!

喺邊度動口? 公園.

而家偷拍咁猖狂, 居然咁夠薑去公園偷歡? 所以對方不時四圍望, 以防被有心人拍下放上網.

我又問, 既然有咁嘅隱憂, 何不到酒店呢? 佢答, 第二次見面就到酒店, 未免過於猴急.

我取笑之, 明明芳心一早已被攻陷, 恨不得將身心盡快交出去, 根本就喺度暗自跺腳為何對方咁君子.

第三次見面, 喺一個提出一個和議之下, 好自然地就成其好事, 行其周公之禮.

此後一星期總會見上一面, 每次見面都係開房, 開完房就道別, 其餘節目欠奉.

睇嚟對方當佢只係洩慾工具, 得閒打場友誼波, 並無真愛存在其中.

不過如果兩個人都唔覺得冇問題, 當逢場作戲都無妨嘅.

但係遊戲都要對手, 當對手唔再玩, 講乜都冇用. 因為只係打咗三場波, 對方就藉詞離開, 此後冇再見面, 連討論區亦冇再出現.

朋友話受好大打擊, 幾乎崩潰咁滯, 原因並唔係失身, 而係失(初)戀. 問佢有冇金錢損失, 佢話冇, 所以好讚賞對方只騙色冇騙財.

難得佢咁睇得開, 認為身體唔算得係乜. 咁講即係對於只能飽餐三頓, 就要打回原形夜夜獨守空幃, 真係情何以堪了.

姑勿論佢將來能否搵到一位意中人, 但呢一次嘅經驗, 應該會藏於心內, 直到老死, 偷偷淒美.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-8-23 10:09 |顯示全部帖子
呢幾日驟雨頻密, 時而伴隨行雷閃電, 尤其是幾晚前, 瞓至朦朧間, 忽被轟隆巨響雷聲嘈醒, 弄致睡不安寧.

當時我唯一嘅念頭就係, 還好狗狗已不在, 不然的話, 佢一定嚇到騰騰震, 周圍搵窿捐, 我哋免不了要起身安撫一番.

回想當初每當見到佢被閃電雷聲暴雨聲嚇至魂不附體時, 我就會不期然對住佢講 : 唉, 你嚟到呢個世界, 要受呢啲聲響折磨, 真係難為你, 可惜我唔能夠為你承受呢啲苦楚, 未能為你分擔恐懼.

而家咪好囉, 靈魂已被釋放, 毋須再喺人世間活受罪.

至於當家被雷聲驚醒後就再難入眠, 索性起身出廳, 同樣亦諗起狗狗.

佢話諗起狗狗幼小時, 每遇行雷閃電, 全身不斷抖震, 於是佢就會將狗狗抱入懷, 藉以紓緩佢不安感. (不過三歲定八十, 由細到大, 就算身處溫室中, 狗狗依然冇乜歸屬感; 就算我哋幾疼惜佢, 每當遇到事, 恁地如何安撫呵護, 依然未能令佢心安, 真洩氣)

除咗緬懷狗狗嘅點滴, 當家亦諗起骨灰被撒在山上嘅佢, 唔知會唔會驚呢?

我話佢已經去咗另一國度, 唔會再被塵世嘅景象嚇親, 唔駛擔心.

春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-9-2 11:26 |顯示全部帖子
連續多日落雨, 搞到啲菜價貴晒, 不過如果再遇着一啲無良小販呃秤, 變相就貴上加貴.

平時光顧一間以平價招徠作為賣點嘅雜貨店, 除咗售賣一般嘅柴米油鹽之外, 亦有兼賣蔬果生菜.

見番薯都算便宜, 十蚊三磅, 而且好多人都在揀, 於是就幫襯.

埋首努力揀咗一大袋, 費事唔夠數又要再揀過, 所以就乾脆揀多幾個, 只想湊夠三磅就算, 假如有多都唔會要.

遞畀小販秤時, 我顧住望眼前其他菜類, 望完後, 猛一抬頭望向小販, 就喺嗰一剎那, 見到原本抽起咗一嚿番薯握在手嘅佢, 見到我望住佢, 即刻將嚿番薯放回袋中, 然後言詞閃縮似自語亦似話我知 : 啱啱好!

明眼人一睇就知, 佢原意根本就係想抽起一嚿, 然後將袋遞畀我, 收錢. 因為就算少咗一嚿, 對我哋嚟講都唔多覺, 而且亦唔會要求佢再秤過, 以證實是否足秤, 況且就算你有咁嘅要求, 佢亦可以扮作惱羞成怒話你麻煩, 寧願唔做你生意, 叫你過主.

試過買咗一排雞蛋, 回家後發覺好幾只裂開蛋白溢出, 如果攞去換佢實睬你都儍, 於是喺下次買時, 就要求佢畀我睇吓表面有冇裂先至付款, 結果被佢噴到一面屁, 叫我去第二度買.

我真係聽佢講, 以後就去第二處買.

雖然唔買雞蛋, 不過會照買其他嘢, 冇計啦, 有啲嘢佢真係平嘛, 作為慳家嘅師奶仔, 冇理由同錢作對㗎嘛.

就好似番薯, 佢算係平通整個街市....... 假如唔呃秤的話. 不過如果呃秤, 又唔同講法咯, 每次都呃一兩嚿, 其實根本冇平到.

好似有一次, 見到一個大嬸買咗半邊芋頭, 秤完後被告知兩斤幾. 我瞄一瞄嗰嚿芋頭, 唔係呀話, 我喺第二間買一整個都係兩斤幾, 最多係細少少啫, 呢半邊嘅重量都係兩斤幾? 呃得都好明顯喎.

難怪大嬸一邊不斷用手估量袋芋頭, 一邊疑惑地質詢 : 真係有兩斤幾咁重? 我陣間去街市嘅磅秤吓, 如果唔夠秤我實返嚟搵你.

最初小販仲以好肯定嘅語氣答大嬸, 絕對冇呃秤, 一聽見佢話會返嚟, 即刻改口風 : 就算呃都係一角幾毫啫......

基於佢做生意嘅手法太唔老實, 日後除咗一啲明碼實價嘅物品之外, 只要涉及要秤嘅嘢, 就算幾平都好, 我都唔會再光顧.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-9-9 10:27 |顯示全部帖子
自問係個保守之人, 雖然知道投機市場可獲豐厚利潤, 可惜眼光唔獨到, 亦欠缺運氣, 每每買乜輸乜, 為免血氣少唔受得刺激, 所以會將辛苦積蓄嘅血汗錢做定期, 好過丟落鹹水海.

由於每間銀行不定時會有唔同定期優惠, 所以到時到候, 就要留意邊間利率高而轉銀行, 因而開咗唔少銀行戶口.

可惜銀行多多, 資金卻有限, 做得呢間時, 另幾間就冇錢, 有時連續幾期同一間嘅利率都高過其他, 好自然就一直喺同一間續存又續存, 變相其他銀行戶口就成為不動戶.

有啲銀行服務好好, 會寄信通知, 戶口結存不足, 提醒你要有所行動, 否則就要收取手續費或凍結戶口. 每次收到呢啲信, 我一係取消, 一係入錢.

我以為, 所有銀行嘅做法都係一樣, 一旦要挪動你戶口嘅錢, 一定會先出警告信, 假如冇任何反應, 先至有所行動, 到時就冇得怨. 就算先斬後奏, 扣咗先通知, 起碼我可以及時前往交涉, 討個豁免.

所以我就大安旨意, 一日冇任何信件寄來, 代表我銀行戶口安全無恙.

一日突然心血來潮, 諗住將銀行戶口盡量縮減, 因為之前喺高息期陸續開咗好幾間, 隨住優惠期結束, 我就轉投另一間, 久而久之好多間已經一年半載冇乜郁過.既然係咁, 不如就取消佢, 費事要人哋浪費資源去服務我哋呢啲極少額嘅客戶.

每次我撤走資金去第二間, 都唔係連本帶利全部撤走, 諗住人哋話晒畀過高息你, 而家財息兼收就去投奔他行, 而且仲要一毫子都唔留低, 似乎有啲過橋抽板, 所以總會留低幾百蚊喺度, 唔想做得咁絕.

由於當家嘅戶口都係由我全權操控, 所以情況一樣, 見佢反正要行經銀行嘅方向, 於是就叫佢順道去取消戶口, 仲同佢講戶口有幾百蚊可以取回.

點知佢來電告知, 戶口一毫子都冇.......

吓!!!!! 冇晒????? 晴天霹靂中.........

假如係扣手續費, 點解我從未收過任何通知信?

職員話佢哋銀行唔會出信, 總之如存款不足最低額, 佢哋個個月就喺戶口扣手續費, 直至扣到冇晒錢為止.

嘩! 咁好在只係幾百蚊啫, 萬一有一萬幾千, 而我又大安旨意佢郁唔到我嘅財產, 就算郁都要話我知嘅情況下, 月復月日復日時光荏苒, 戶口一早已歸零依然蒙在鼓裡. 銀行呢個做法, 完全不人道, 對我哋呢啲無知婦孺毫無保障.

咁多間銀行, 係呢個先至咁衰, 無聲無息食咗你都唔知, 唔差在我都取消.

兩個人加埋被食咗幾嚿水, 真係肉都赤, 事隔咁耐, 亦冇得追究, 怪只怪自己當初思想迂腐, 如果將錢全部撤走, 就唔會咁肉痛.

經此教訓, 明白到銀行嘅政策時常朝令夕改, 平時會出信嗰啲, 難保一日為省行政費用, 唔再通知而自行扣手續費. 所以下次如只為定期而開嘅戶口, 一旦要過檔, 就一個仙都唔會留低, 由得佢扣無可扣凍結罷就.

我唔信下次再以高息招徠我投入資金, 佢會唔解凍戶口而拒我於門外囉.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-9-21 22:17 |顯示全部帖子
朋友介紹咗一份兼職畀我, 恁地我話要慢慢搵, 佢依然周不時彈啲工畀我揀. (我一定係畀佢覺得等錢使, 所以咁熱心為我籌謀)

公司係做出入口, 我嘅崗位係負責資料輸入.

見工時, 老細畀我嘅印象幾好人, 好似好明白事理, 因為我同佢講, 我已經一段日子冇做嘢, 需要啲時間適應, 好多以前做過嘅經驗, 已經唔太記得.

佢話梗係唔會要求我即刻上手啦, 至少會畀兩三個月等我熟習運作, 現階段只需先專注一瓣, 等我完全熟晒嘞, 先至會畀新嘢我.

雖然佢預我要兩三個月先至成為熟手技工, 但我並冇因而鬆懈, 反而更加努力學習, 每次都記下要點, 以防萬一忘記時可以重溫.

公司規模唔算大, 連埋老細都係得小貓幾隻, 仲要返工時間唔正常, 有啲返晏, 有啲返單日, 有啲返一陣就收工......

老細叫其中一位職員教我做嘢, 點知對方答唔得閒, 叫老細自己教......

以上情況, 看在我眼裡, 未免感到有點詫異, 一來覺得公司冇制度, 二來好奇點解員工可以用咁嘅態度同老細講嘢.

不過事不關己, 我做好自己本份就算, 其他與我無關.

老細親自教我做嘢, 我更加打醒十二分精神, 無論是否重點, 都一一記下, 方便萬一忘記時可以自行查看重溫, 唔駛成日打擾老細.

一邊摸索一邊翻閱筆記, 基本上算係已經上手, 只要再做多幾次, 應該都可以叫做熟手技工, 到時就可以學新嘢.

一直默默做呀做, 發覺有啲位模稜兩可, 於是就問老細, 佢以一種唔耐煩嘅語氣答 : 上次咪講咗, 呢度應該打呢個吖嘛..... 我查根問底 : 但係我嘅筆記寫住係嗰個喎. 佢答 : 咁你改返呢個啦....

我改返唔係問題, 問題係佢當初教我一套, 而家又講另一套, 咁我嘅筆記有咩意義? 即係有機會係錯㗎啦, 仲睇嚟做乜? 既然唔睇, 即係遇上唔明就下下要問, 每次問佢就唔耐煩答 : 之前咪講咗囉.....

仲有, 明明佢之前講得好好聽, 話等我做到滾瓜爛熟至畀新嘢我做, 但係當我一樣正開始準備上手時, 佢已經逼不及待畀另一樣我, 於是我又要學新嘢, 喺新嘢未熟時, 佢又加另一款新嘢, 當勉強做完新嘢之後, 回頭時又唔太記得原本嗰樣嘢......

本來, 假如佢肯畀啲時間我消化, 對我嚟講都係多啲嚟密啲手啫, 問題係我根本知其然而不知其所以然嘅時候, 佢已經放下一大堆文件要我知上文而推斷下理, 大佬呀, 我連乜頭乜路都未摸清, 點做呀?

請教其他同事, 佢哋都奇怪點解老細冇畀齊所需資料就要我做, 因為資料唔齊, 根本入唔到數據, 結果只得交白卷.

面對如此老細, 就算返工時間幾啱我, 最終都要毅然辭職, 我實在頂唔順佢一時好似幾和顏悅色善解人意, 一時又顯得假民主講一套做一套.

我成日喺求職欄內見到佢公司不時請人, 所請嘅職位名稱都唔同, 但係工作範圍卻大同小異, 好明顯仲未請到合適人選.

老實講, 今時今日, 仲邊有打工仔肯受呢啲閒氣白眼吖, 年青一代睬你都儍, 年長一輩例如我呢啲, 求嘅係開心錢, 要受氣就敬而遠之.

難怪無論佢請年輕定年老, 職位依然長期懸空.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-9-23 10:58 |顯示全部帖子
由年頭到年尾, 總有幾個節日係會有傳統嘅應節食品, 農曆新年嘅煎堆油角年糕蘿蔔糕啦; 端午節各類口味嘅糉啦; 中秋節嘅月餅啦...... 全都係為中國人以難得一年一度嘅觀念而設嘅產品, 所以無論價錢幾貴, 都毫不吝嗇大灑金錢, 送禮自享兩相宜, 為嘅就係跟傳統.

從來不依牌理出牌嘅我, 由細到大, 可以話係毫無呢啲概念, 所以好少從俗, 尤其是人大咗, 對呢啲思想更會嗤之以鼻, 百姓勞民傷財, 無形中令商家賺到盤滿缽滿.

好似糉呀月餅呀, 材料費有限, 但係賣價奇高, 只因捉住人們一年一度有幾可吖嘅思想, 無論賣幾錢一樣有市場, 所以年年漲價依然其門如市.

呢啲應節食品當中, 尤以月餅價格唔合理, 以傳統一盒四個嘅蛋黃白蓮蓉為例, 目測覺得每個嘅尺寸比以前細咗, 價錢卻要三百幾. 以我粗略計算, 假如全部材料都如商家所講嘅選料上乘, 蛋黃+蓮蓉+砂糖+油+麵粉+雞蛋+人工+包裝+廣告費+燈油火蠟等等, 加加埋埋嘅成本貴極有限, 毛利肯定超出倍幾兩倍, 真係賺到笑.

仲有就係而家嘅包裝盒, 以前沿用嘅鐵罐, 大多已被設計精美唔同形狀嘅硬紙盒代替, 係靚嘅, 不過成本咪又係轉嫁畀消費者. 而呢啲包裝盒都有個共通點, 就係大大個, 令人錯覺內裡嘅餡都係大堆頭, 當打開之後先至發現只係小人國, 當堂發出唓一聲, 暗自慶幸好彩唔駛錢, 唔係就真係呃錢.

印象中, 我自掏腰包買月餅已經係廿幾年前嘅事, 當時正值冰皮初面世有新鮮感夠特別, 加上我又鍾意食綠豆蓉, 所以最初兩三年都會大破慳囊買幾盒, 自享之餘亦送畀父母. 後來覺得冰皮容易黏手, 而且唔太好食, 如果為咗只係食內餡嘅綠豆蓉而要花百多元, 實在太唔值, 所以此後就冇再買.

原以為從此會與月餅絕緣, 點知後來有客戶年年送畀我兩盒, 咁我就將一盒送畀父母, 一盒自己食, 所以咁多年來, 我都冇再買過月餅.

自從公司結束, 當然亦冇客戶送餅啦, 咁點呢? 唔買囉, 我直頭同父母講到明, 我唔會買月餅, 有人送我就轉送畀佢哋, 否則就冇得食. 不過就算我唔送, 都有人送畀佢哋, 所以少我嗰份都冇所謂.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-9-29 11:11 |顯示全部帖子
間中都會食熱氣嘢, 日積月累, 身體內已熱力四射, 如一個不留神患上感冒, 咁就大件事, 所有積存於體內嘅熱氣如兵敗山倒般蜂擁而至, 令本來可能只係輕微小病, 如及時服藥就可遏制快速痊癒, 奈何因體內實在積熱過盛, 致令變成嚴重大病.

其實一直都能與熱氣並存, 大家相安無事, 只要一日唔發出嚟, 我就繼續吃吃吃.

直至一晚被當家激到半死, 於是大聲剷咗佢一輪, 當晚睡至半夜就感覺喉嚨勁痛.

根據過往經驗, 一旦半夜吞口水覺得喉嚨痛, 代表準備作傷風感冒, 只要把握黃金發病兩小時, 立即服藥, 基本上都可㩒到, 翌晨起身毋須再服藥. 但係由於先前劈大喉嚨狂抦當家, 我咪以為純粹只係嗌傷喉嚨, 痛都係正常, 所以就冇乜理.

如果只係喉嚨痛咁簡單, 只要稍為講少啲嘢, 其實好快就唔痛. 而我痛咗成日, 即係唔只傷喉嚨, 同時亦患上感冒, 亦因為錯過咗黃金服藥時間, 結果就令病情一發不可收拾.

熱氣本身已經傷身, 加上同時又感冒, 所以連服幾日藥, 中西合壁, 依然唔太見效, 唯有暫時忍忍口, 唔沾任何熱氣食物, 希望快啲好返.

還幸暫時未感覺氣管灼熱, 否則就弊弊都冇咁弊, 因為會惡化至乾咳兼失聲, 自已都感覺到體內如火燒般滾燙.

母親話齋, 病來如山倒般快, 病去如抽絲般慢, 連日食咗好多清熱食品, 依然未有好轉, 好辛苦呀.

唉, 邊個叫自己饞嘴之故, 終日熱氣辛辣食物不絕於口吖, 而家咪要承受苦果囉, 活該!
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-10-2 11:29 |顯示全部帖子
近幾年來, 發覺喺街上見到好多孖生小兄弟/小姐妹, 無獨有偶, 佢哋父母嘅年紀看似頗大, 所以我主觀地認為, 呢啲孖生小朋友, 大部份都係經過人工受孕而面世.

朋友嘅細佬就係其中一個人工受孕而誕下雙胞胎嘅例子.

講起呢位細佬, 本身已經冇乜積蓄, 再喺內地聚咗一位太太之後, 二人世界更加無拘無束, 兩個人都好大使, 幾乎餐搵餐食餐餐清.

忽然一日, 唔知挑起邊條筋, 想要傳宗接代, 於是急急造人. 點知天不從人願, 唔係你想就想, 都要配合機緣巧合.

歲月如梭, 日子一天天過去, 兩個人嘅願望依然冇聲冇氣, 於是四出訪尋名醫, 又本港又內地, 檢查一輪再一輪, 欠下一屁股嘅醫藥費, 肚皮仍然未脹起.

最後經過人工受孕, 順利懷上胎兒, 基於受孕數目視乎培植嘅質素而定, 好好彩, 佢哋有兩個細胞雙雙跑出, 於是就順利佗上雙胞胎.

以佢哋嘅收入, 養一個已經捉襟見肘掹掹緊, 何況額外來多個, 人算不如天算, 令佢哋財政超出預算, 生活頓時陷於拮据.

以我角度, 如果未能為小朋友提供基本生活所需, 就唔應該孕育下一代. 好似朋友細佬嘅情況, 一直都係月光族, 忽然要負上為人父母嘅責任, 唔只佢哋辛苦, 連帶要喺生活上支援佢哋嘅親人亦受累, 更要克制孖女日常開支, 咁又何必呢, 倒不如繼續享受二人世界吃喝玩樂算啦, 傳咩宗接咩代吖.

最重要一點係, 佢哋年紀唔細, 到孖女長大最需要用錢時, 佢哋已經退休, 到時怕且又要步上綜援之路.

有時真係唔明, 富裕嘅人唔生養/生得少, 反而貧窮線下嘅就愈生愈有, 世界真的反轉了.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-10-7 10:37 |顯示全部帖子
踏入秋高氣爽季節, 不期然又諗起狗狗.....

記得上年同樣都係乾燥天, 狗狗喺屋企總係行到跣吓跣吓, 見佢咁樣, 一方面好驚佢會扭親腳仔, 另一方面又後悔點解以前裝修時唔順便換上地毡, 咁就唔駛好似而家嘅地板因乾燥而失去磨擦力, 令狗狗失去平衡. (又係莫須有嘅自責, 當初裝修時, 狗狗都未出現)

由於乾燥氣候快將過去, 所以暫時亦冇刻意要作出任何補救, 只係諗定下年乾燥天氣臨近時, 要如何改善情況, 唔駛狗狗行路變溜冰. (當時仲奇怪點解以前唔多覺佢有咁嘅情況, 事後當然知道係因為年老雙腳無力, 致使未能好似往年般就算地板乾燥都可以輕易穩住步伐, 唔會跣住去)

當時滿腦子已計劃定, 一踏入秋天, 就要開始作準備, 一係買幾塊地毡鋪上狗狗主要會行到嘅地方, 一係就買防滑鞋仔畀佢穿...... 又由於以前頻頻行山路, 日子耐咗, 已將佢趾甲磨平, 腳掌周圍嘅毛亦冇乜. 後來行山嘅次數寥寥可數, 令佢趾甲同埋腳掌毛陸續長出, 唔多唔少都影響佢抓地能力, 所以亦諗定要同佢剪甲剃毛.....

可是, 變數往往比計劃來得快...... 唉!!!
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-10-12 10:28 |顯示全部帖子
呢兩日全城嘅熱話除咗施政報告, 就係股市瀉千點.

前者對我而言, 只屬於聽吓就算, 因為好多都與自己無關, 得個知字而已.

後者卻關乎好多親朋戚友嘅利益, 不免會較為留意關心一下.

喺股票價位高企時, 好多人都唔執輸, 諗住一日走幾轉, 低位入高位放, 於是跌幾個價位就買, 升幾個價位就放, 日日疲於奔命, 賺嘅只係蠅頭小利.

以為只要唔貪心, 執少許就走, 應該冇乜大風險, 所以就算當時股價已喺高位, 依然照買如儀, 點知一個跌浪冚埋嚟, 即刻就將之打入浪中.

由於唔甘心止蝕, 一心等再升之日, 只好喺股海載浮載沉, 盼有一天能到家鄉, 雖然唔知呢一日幾時來臨, 總好過即時放即時唔見錢.

唉, 原本諗住短期投機, 被逼變成長期投資.

結果由年頭等到年尾, 再由年尾等到年頭, 春去冬來花開花落.....

若干日子後, 眼見人哋紛紛上晒岸, 自己仲在水中央, 難道要等十年八年才能返家鄉? 或是返家鄉已無望? 於是只好壯士斷臂, 咬咬牙當冇買過, 斬纜去也.

以上情況, 對於初涉股場卻又一知半解兼聽信人言嘅人包括自己嚟講, 着實歷歷在目, 因為進貢過唔少血汗錢畀股叔, 學費高昂血的教訓.

而我呢, 前前後後斬斬埋埋, 又豈只兩臂, 簡直斬到身首異處, 才不得不放下屠刀, 離場而去.

此後就可笑看風雲, 股市升升跌跌, 再沾不上心間.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-10-14 17:59 |顯示全部帖子
唔知係咪近來連追幾套宮廷劇, 居然連發夢都關皇宮事.

話說皇上命令我去攞嘢畀佢飲, 我根本唔知佢想飲乜, 但又驚問多句會被責罰, 於是入咗御膳房求其攞支飲品出嚟畀佢, 佢攞起支水仰頸就飲.

第二次又叫我去攞嘢飲, 我又唔知佢實際想飲乜, 於是又求其攞, 攞到佢面前, 今次佢臉現懷疑之色, 我急急話呢支就係乜乜溝乜乜, 係你想飲嘅嘢, 佢聽完就將支水用個漏斗漏出嚟飲. (我諗如果再叫第三次, 應該會被處以欺君之罪, 杖打至死)

跟住聽見企喺旁邊嘅欽天監望住個天好感慨嘆道, 天色昏暗烏雲密佈, 似風雨欲來之象..... 我亦抬高頭望天, 係喎, 啲雲走得好快, 似就快落雨, 弊嘞, 我今日洗咗衫晾咗出外, 萬一趕唔切出宮收一定會淋濕, 唉, 早兩日好好太陽又唔洗衫, 偏偏揀今日至嚟洗......

當我醒咗之後, 望吓個天, 雖然冇乜太陽, 但亦未至於會落雨, 可以唔駛收衫入嚟住.

講起宮廷劇, 內容大多離不開勾心鬥角爾虞我詐, 你陷害我時我又算計你, 樣樣都要防, 事端無日無之, 身處當中實在太累.

又好奇想知道, 史實上真正嘅皇宮生活到底係點㗎呢? 皇帝皇后與妃嬪們嘅相處係咪融洽呢? 係咪大部份都想成為一國之君一宮之母呢? 是否如劇情般除咗頤養天年嗰啲唔計之外, 一旦有人猝死, 如有皇子公主們夭折或早逝, 一定涉及人為呢?......

我普遍相信只係做戲至咁誇張, 實際情況唔會太糟糕, 只要唔同人爭寵, 鋒芒不露, 安安份份過日子, 應該可安享晚年.

當家卻持相反意見, 佢認為喺一個唔係你死就係我亡嘅地方, 就算避得遠遠, 只要有人覺得你存在有威脅, 一樣走唔甩. 所以才逼得個個爭榮爭寵而拚個你死我活, 因為只有得到天子嘅眷顧, 才能保得平安.

若然事實與劇情雖不中也不遠, 伴君如伴虎, 一入宫門深似海, 榮華富貴嘅背後, 一個不留神令龍顏大怒, 不僅換來悲慘下場, 亦可能累及滿門族人, 苦哉苦哉.

猶幸我唔係生於當朝代嘅人, 不然以我得罪人多稱呼人少嘅性格, 肯定一早被k.o., 怕且連被皇上寵幸嘅日子都未嘗過, 就已經一命嗚呼, 死咗都唔知咩事.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-10-19 11:14 |顯示全部帖子
本帖最後由 cforchat 於 18-10-19 11:36 編輯

剛煲完"如懿傳", 最後一集, 如懿坐喺廊前與容珮閒談......

緬懷與弘曆兩小無猜;

結伴到杭州遊歷;

憶起與自己鬥到你死我活嘅皇后妃嬪們, 全已陸續逝去;

感慨如果大家可和平共處, 話唔定如今會坐埋一齊談笑風生.....

最後佢自言自語道 : 對這一切還念想嗎? 沉默咗一陣才再道 : 不念了!

說來無不唏噓.......

我亦聽到眼濕濕.

若然我係如懿, 三番四次遭到自己嘅少年郎怪責多疑冷待甚至掌摑, 無論之前對佢幾愛慕依戀, 亦已被種種遭遇消磨至殆盡. 哀莫大於心死, 相見猶如不見, 就算最後皇上回頭, 也淡然對之, 只引用蘭因絮果作為道別, 暗喻年少情懷已盡了, 花開花落自有時, 惋惜也是徒然.

或者就係對佢再無半分念想, 所以遺書亦冇提到佢, 只與兒子道別, 並因已獲得自由而感到欣慰.

最後唔知皇上係賭氣, 定真係成全如懿拒再受皇后嘅銜頭, 將佢以皇貴妃嘅身份安葬, 當係求仁得仁.

我以為太后會向皇上陳述 : 當初如懿之所以肯接受做皇后, 並不是為了名利權勢, 而是一心只想能和你合葬一穴. 唉, 如今她這個心願怕要落空了.

誠然, 如懿當初嘅願望的確如此, 就算數十年過去, 依舊不變. 可是隨住一顆真心一而再地被掏空, 初心不再亦理所應當. 佢多次推回后冠, 其實亦預咗唔同皇上同葬.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-10-23 12:11 |顯示全部帖子
喺求職欄內, 見到一份從字面上覺得幾有趣嘅職位正在請人, 於是寄履歷表去應徵, 好快就收到回音.

見工過程順利, 以為大機構要過五關斬六將, 估唔到即時就被錄取.

話晒太耐冇返全職, 驚會唔慣, 不過如過做得好, 應該好快會適應, 假如唔啱做, 最多劈炮唔撈, 反正雙方都係試工階段.

一大早返到公司, 先去攞制服, 收到制服嘅時候, 心已涼咗一截. 制服一啲都唔靚, 唔只係我勁唔鍾意嘅質地, 而且款式老土, 穿上後照吓鏡, 幾近老咗十年.

好啦, 唔滿意制服都算嘞, 居然連儲物櫃都冇得提供, 咁我換下嘅衣服擺去邊呢? 問咗有關人士後, 先至隨手畀條鎖匙我, 並提醒係幾人共用, 叫我唔好遺失.

以為幾個人一齊分, 應該空間好大, 點知仲細過公共泳池嘅一半有多, 見到都冇心機. 只好求其將啲衫連同私人物品放入自攜嘅膠袋內, 再塞入儲物櫃, 心諗好彩冇大安旨意以為實有私人儲物櫃提供而帶定大量用品, 唔係都唔知點安置.

雖然硬件部份唔太滿意, 不過唔可以因為外在因素而萌生去意, 要睇埋工作範圍先再下定論.

入到工作室, 人頭湧湧, 幾乎冇人得閒理我, 要我企喺度一陣, 再連番揚聲, 先至有人睬我.

貎似應該係我主管嘅人, 首先攞咗張膠櫈畀我, 然後安排我坐喺一個女仔身邊跟佢學嘢, 睇吓佢點做, 因為呢個時段非常繁忙, 冇人得閒教我.

一兩個小時過去, 我依然係呆坐喺度睇人做嘢. 當時我有個衝動, 想立即起身走人. 轉念一想, 如果而家走, 肯定冇人工, 豈不是白白做咗兩個鐘義工? 唔嚟都嚟咗, 幾大都做夠一日, 出埋糧至走.

雖然話點都要頂埋落去, 不過真係好難捱.

首先, 坐緊嘅膠櫈通窿又冇靠手靠背設計, 唔只坐到腰酸背痛, 連籮柚都唔好過, 所以去到後來, 我直頭要郁身郁勢, 藉以讓腰背臀乘機鬆一鬆.

其次, 同事之間零交流, 冇人作介紹, 亦冇人自我介紹, 就算主管已多次問我嘅名字, 依然繼續阿邊個邊個咁叫我.

再者, 就算我長做, 都唔會有一個固定位, 每日要視乎邊個位置騰空就坐邊度. 對我嚟講, 完全冇歸屬感, 就算細極, 都希望有自己嘅一小個私人空間, 可以放自己嘅物件, 坐喺自己嘅位好好工作.

整日裡, 我都腦交戰地苦苦考量, 到底以上嘅問題, 係唔係令我要放棄呢份工嘅原因呢? 有冇其他因素令我繼續做, 睇多幾日至再決定呢?

終於捱到收工, 被通知要交還換下嘅制服, 翌日再攞. 吓!? 制服冇寫人名又冇標記, 即係第二日著嘅唔係今日呢套? 咁咪日日都要同人撈亂著? 之前邊個著過唔重要, 既然而家我著咗, 唔係今後應該係我㗎咩?

本來仲十五十六未諗好, 因為制服問題(唔靚+唔係自己專屬), 令我去意已決, 第二日唔會再返工.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 4096


發表於 18-10-24 16:34 |顯示全部帖子
cforchat 發表於 18-10-23 12:11
喺求職欄內, 見到一份從字面上覺得幾有趣嘅職位正在請人, 於是寄履歷表去應徵, 好快就收到回音.

見工過程 ...

有冇攞番一日人工


大宅

積分: 2644


發表於 18-10-27 11:39 |顯示全部帖子
回覆 ARS_fans 的帖子

梗係攞返人工啦, 唔係就枉費我捱咗一日如坐針氈嘅時間.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-10-27 12:52 |顯示全部帖子
原以為休養生息咗一段長日子之後, 會靜極思動, 先至立心搵份長工投入全職市場, 點知試過一日辛勞嘅工作之後, 才發現自己唔再適應朝九晚六嘅工時, 因為對我嚟講實在太冗長, 就算勉強入職, 都唔會做得長.

好似上述需著制服嗰份, 工種幾有趣, 係唯一令我有少少想留低念頭, 但係一諗到日日要坐成九粒鐘, 除咗去洗手間同埋食飯, 其餘時間臀不離櫈, 只好連唯一留下嘅理由都不得不放棄.

除咗工時長, 制服都係其中一個離去嘅因素, 唔靚係其次, 主要係著住制服做嘢, 總感到束手束腳, 唔似得自己嘅牛記笠記咁舒服自在.

有朋友問係咪政府工, 當然唔係啦, 政府工咁難入, 假如臨老至畀我入到, 幾大都做到退休, 點捨得只做一日就放棄咁暴殄天職吖.

其實都有諗過做政府部門, 就算大多已經外判, 唔再如以前嘅鐵飯碗都冇乜所謂. 不過綜觀我有興趣嗰啲, 大部份都係全職, 而且又要輪班, 更加唔知會被派去咩部門. 聽講唔同部門唔同人事唔同工種, 好彩嘅就遇到好人好事, 唔好彩嘅就只能自求多福. 自問遭遇多數唔好彩嘅我, 唔想日日返工都要祈福.

而且而家嘅所謂政府工, 除咗紀律部隊之外, 好多都係合約制. 對我嚟講, 好似好冇保障, 唔想每隔一段時期要另外簽約, 萬一不被續簽, 就等如失業了.

吾兒得知我唔太喜歡做合約工就揶揄 : 唓! 你份份工唔係做得一日就係幾日, 未滿約你都冇影啦.

哈哈, 雖然被窒得好應, 但又確係事實喎.

如果雙方冇合約束縛, 僱傭關係又融洽, 我梗係希望可做到天長地久啦, 有合約制嘅話, 中途如有人事變遷, 較為容易不被續約吖嘛.

當然, 喺冇合約嘅公司做都有機會被辭退, 但至少可獲得賠償, 唔似得合約期滿就兩不相欠, 猶如貨銀兩訖般咁失落.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-10-30 11:13 |顯示全部帖子
成日覺得自己身體嘅結構異於常人.......

人哋吃得多, 自然排得多, 而我卻相反.

狗狗離去時, 因極度傷心致茶飯不思, 冇乜點食嘢, 每日所排嘅數量卻出奇地多, 而且好暢順. 可能就係入少出多嘅關係, 所以嗰段日子唔只外人睇我瘦咗, 連自己都感到身輕如燕.

真係唔明體內啲廢物喺邊度衍生出嚟, 莫非係之前食食埋埋所累積, 平時因忙於清埋新入口嘅(垃圾)食物, 唔得閒兼顧囤積已久嗰批廢料, 難得幾日冇嘢落肚, 於是趁此機會清理舊物. (難怪有啲人每隔一段時間就會進行辟穀療法, 不飲不吃, 藉此讓腸胃休息, 唔單只可清理腸胃, 亦有減肥作用. 但係, 如果要強逼自己奉行呢種療法, 我應該做唔到, 因為一旦有餓意而又冇得吃, 我就會同自己講, 都嗰頭近啦, 食一餐少一餐, 再唔食, 瓜咗就冇得食嘞, 於是就會心安理得地繼續吃吃吃)

而當飲食回復正常, 卻排得唔多, 出入完全不成正比.

有時當家會話我, 平時食得咁少又咁清, 冇乜油又冇乜肉, 梗係冇得去啦, 要有啲油份滋潤吓條腸, 咁先會跣住咁出㗎嘛, 試吓食多啲, 包你源源不絕. 於是就聽佢講, 大吃大喝一番, 唔只有油份有各種肉類, 蔬菜水果亦唔少, 營養豐富纖維十足, 今次仲唔出突? 點知事後竟然係一啲去意都冇, 咁食咗嗰啲去咗邊? (呢啲情況唔係偶一為之, 而係每次大食過後都係冇所出, 真吹脹!)

大部份女性都唔可以吃喝一啲例如綠豆西瓜涼茶等寒涼食物, 否則會頭暈, 有時甚至話會暈低, 所以佢哋盡量避免入口, 以免唔受得. 但係呢啲寒涼食物, 對我卻如普通糖水飲品, 周不時吃喝, 每當我同佢哋講起, 佢哋全都用一副難以置信嘅目光問 : 怎麽可能?

而如果受得寒涼, 多數唔受得熱氣, 偏偏我又可以照單全收. 日常中嘅煎炒焗炸熱氣辛辣食物, 就算濕熱嗰啲食物飲品, 一樣冇有怕, 多啲嚟密啲口, 暗瘡都冇粒. (不過食埋咁多熱氣, 一定要小心唔好着涼患上傷風感冒, 否則會將體內積聚已久嘅熱氣濕氣統統誘發晒出嚟而令病情一發不可收拾, 後果比一般人嚴重, 有排我受, 正正應咗句 : 有咁耐風流時就有咁耐.....)
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-11-7 12:02 |顯示全部帖子
藍潔瑛猝逝, 好多人都話感到惋惜, 慨嘆命途多桀, 紅顏薄命.

無疑, 五十幾歲仲算壯年, 突然離去的確好可惜, 不過對於一個無人無物, 生活拮据嘅人嚟講, 早啲離開塵世, 未嘗唔係一件好事.

個人覺得, 喺佢風華正茂, 貎美如花, 行為舉止正常, 從靚絕五台山嘅美譽, 最後落得四大顛王嘅渾號, 才更令人為之扼腕稱悲, 質疑造化弄人, 上天何以如此對待玉人.

報導話佢之所以變得精神彷彿語無論次, 除咗失去雙親, 亦抽離唔到角色, 更加因為被性侵, 致使整個人陷於不能自拔瘋瘋癲癲嘅境地.

其實, 發生咁多事雖然不幸, 但係如果當事人能夠振作, 我相信過一段日子之後, 應能撫平傷痛重新出發, 未至於搞成咁. 況且睇佢過身前嘅相片, 與常人無異, 以而家影視界咁鍾意請舊人復出, 假如佢肯重出江湖, 相信一定有市場, 到時就可以藉着工作忘記不快事, 好好過日子. 不僅令支持佢嘅觀眾可透過螢幕再次一睹佢嘅演技, 亦可令一直關心愛錫佢嘅朋友感到欣慰.

可惜, 一切已經變成空談, 佢嘅身影, 快將化為輕煙, 向天國飄去......

得悉電視台為咗紀念佢, 將會重播"義不容情".

首先, 紀念佢當然好啦, 問題係佢喺"義不容情"嘅戲份只得頭幾集, 雖然演技精湛, 但係如果唔係由頭帶到尾, 算咩紀念呢? 其次, "義不容情"都重播過無數次啦, 到底係貪就手求其攞套, 定係懶得花時間心思去摷倉底貨? (所謂倉底貨唔係冇人睇, 而係好耐好耐都未重播過, 所以一直擺喺倉底不見天日)

計我話, 應該播佢領銜主演嘅"家有嬌妻", 劇內佢做梁朝偉嘅嬌妻, 溫柔嬌嗲樣子甜美 (當家話都想有咁嘅嬌妻, 可惜事與願違, 想錯佢嘅心), 由頭帶到尾, 唔明點解唔播呢套.
春有百花秋有月, 夏有涼風冬有雪, 若無煩事掛心頭, 便是人間好時節.

首頁

尾頁

跳至
你需要登錄後才可以回帖 登入 | 註冊