興趣嗜好

跳至

首頁

尾頁
   7


大宅

積分: 2644


發表於 18-11-11 12:10 |顯示全部帖子
本帖最後由 cforchat 於 18-11-11 12:18 編輯

鄰居有嬰兒出世, 每日呱呱啼哭, 聲音並冇造成滋擾, 不過每次聽到哭聲, 我就諗, 唔知係咪我家狗狗轉生, 藉着哭聲向我打招呼呢?

我將呢個天方夜譚嘅諗法話畀當家與吾兒知, 二人都話我諗得太多. 當家不置可否話 : 係都投胎喺有錢人家啦, 點會投喺平民百姓屋企呀.

我話 : 你估有錢人家咁易可以投㗎? 要修好多世嘅福, 先至可以含住金鎖匙出世㗎, 狗狗今世至做完狗, 邊得嚟咁快可以做富後代吖.

聽人講過, 如果主人善待狗狗愛護有加, 無形中可增加佢哋嘅福惠, 令佢哋下世投胎成人. 自問我哋對狗狗算係唔錯, 所以望都望佢可以做人. (可能睇得神怪戲太多, 個腦成日會幻想狗狗前世係人, 因為做錯某啲事而被判入畜牲道, 形體即時由人身變為狗身, 當受完懲罰後, 又由狗身變為人身. 諗法雖然詼諧, 但卻有種釋懷嘅感覺, 設想狗狗嘅離去, 只係功德完滿, 應該為佢慶幸脫苦海, 因此毋須太傷心)

之所以會諗嬰兒係狗狗嘅下世, 只係我主觀願望使然, 代入狗狗嘅思想, 因過於思念我哋, 又知道我無意再養狗, 更加知老蚌唔會生珠, 如旨意做吾兒嘅兒女, 又唔知要等到何年何月, 基於冇辦法再投入家中, 只好退而求其次做鄰居嘅小孩, 咁就有機會時常見到我哋, 等到再大啲, 可以自由活動, 隨時隨地由窗口望過嚟就得, 夠晒方便.

撇開以上荒誕無稽嘅念頭, 其實我哋都希望狗狗來生可以做人. 當日佢彌留之際, 我同當家不約而同叮囑佢, 下世要好好做人, 自己話晒事, 唔駛再受制於人. 不過如果要為口奔馳為生活頻撲營營役役過苦日子, 咁就唔好做人咯, 不如投主好人家, 繼續過吃飽瞓瞓醒散步, 集主人寵愛於一身嘅富貴生活好過.

畢竟做人太苦, 要經歷生老病死, 又要嘗盡七情六慾, 十居其九儘是不如意事. 所以如可以嘅話, 下世我都寧願做隻貓做隻狗不做凡人.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-11-14 09:54 |顯示全部帖子
本帖最後由 cforchat 於 18-11-14 10:18 編輯

偶然與吾兒一齊睇一個親子節目.....

節目係講關於育兒過程中所遇到嘅問題, 再由育兒專家傳授心得, 讓父母能改善親子之間嘅和諧, 唔駛湊到心力交瘁.

其中一段講一個小男孩時不時扭計, 無情情會大哭大叫, 餵佢吃餐飯猶如上戰場. 見到父母手足無措, 又礙於正在拍攝中, 有外人在場, 動不得氣, 因而面有難色唔知點算好, 睇見都戥佢哋尷尬.

可能為咗息事寧人, 想小男孩停止哭鬧, 於是唯有對之千依百順, 佢想點就點..... 結果就惹來專家們加以糾正並教授如何解決, 從而令雙方繃緊關係得以緩和, 達至兩全其美.

睇見片中嘅小男孩時時擘大喉嚨哭不停, 我就同吾兒講 : 好在你細個唔係咁啫, 唔係你一早就冇命!

自問性格暴躁又冇耐性, 要面對一個如此無故愛哭鬧嘅小魔怪, 就算唔掐死佢, 都誓必將佢送去保良局, 當冇生過.

哈, 都算佢識時務, 知道投生喺呢位阿媽家, 必須要醒醒定定, 不然一個不留神, 恐怕提早投胎去也. 所以可憐嘅吾兒, 一直含辛茹苦眠乾睡濕地被養大, 難為佢了.

事實上, 甚慶幸吾兒由細到大都好乖巧, 細個易湊, 又唔怕陌生, 令當時身邊唔想生B嘅朋友都以佢作為藍本, 明言如若生子如此就唔怕生. 每次聽到佢哋咁講, 我都感到飄飄然與有榮焉.

人家話兒女降生, 係為討債或還債而來, 雖未知吾兒係咪來還債, 但肯定唔係嚟討債, 所以非常感恩.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-11-16 10:29 |顯示全部帖子
自從睇咗"流星花園"之後, 我就好鍾意大S徐熙媛, 覺得佢娃娃面好靚, 好有性格, 聲音悅耳動聽.

不過雖然鍾意佢, 但又唔係睇晒佢所有演出過嘅戲喎, 因為覺得有啲劇情幾沉悶, 暫時未能提起興趣住, 或者遲啲睇吓會唔會挑起邊條筋, 到時先至睇都唔定.

得知佢嫁畀汪小菲, 當時覺得一定係男尊女卑, 因為男方予人一種花心多情唔定性嘅公子哥兒形象, 加上事業有成又係靚仔, 於是就被我主觀地定為大男人一個.

相反, 喺相識短短日子就結婚, 覺得大S係因為對方嘅外表而被吸引, 又由於佢一向畀我嘅印象雖然係個性硬淨, 看似倔強, 但內心係好溫柔體貼溫婉嫻淑小鳥依人, 儼如一個小女人, 肯定係被甜言蜜語蒙蔽理智, 遲早因了解而分開.

所以佢哋嘅結合, 一定係女嘅對男嘅千依百順, 男嘅對女嘅頤指氣使, 甚至諗得嚴重啲, 話唔定一言不合就對女嘅拳打腳踢, 而女嘅只能逆來順受......

直至睇完真人騷"幸福三重奏"之後, 就將自己之前對佢哋負面嘅諗法全部推翻.

估唔到汪小菲係一個暖男, 會照顧妻子, 會為佢下廚, 會順從妻子, 外表看似剛強, 但面對妻子間中耍嘅小性子時, 除咗哭笑不得之外, 更多嘅係遷就與包容. 佢對妻子嘅愛係屬於含蓄型, 唔會時常宣諸於口, 更加毋須整日親嘴來表示愛對方. 從佢看妻子嘅眼神中, 不難發現藏着欣賞憐惜要呵護一生嘅訊息.

大S雖偶有柔情似水一面, 但亦間中表現強悍, 最利害之處係撒嬌時帶着點點怒, 令受者唔只唔敢再造次, 亦會想方設法去賠罪 (唉, 如果我能學到女方呢招, 當家就唔會日日活喺水深火熱中), 無論大S是剛是柔, 汪小菲都照單全收, 以柔制剛, 以更柔制柔, 難怪睇完呢個節目後, 好多人對汪小菲另眼相看, 不僅讚賞佢窩心, 亦羨慕大S好眼光.

另外, 覺得大小S嘅姐妹情好深厚, 嬉笑怒罵收放自如, 窒中有愛, 愛中有窒, 默契盡現. 當佢哋進入亢奮狀態時, 旁人好難插入.

題外話 : 片中大S幾乎不施脂粉, 但亦不失標緻可人, 濃妝艷抹倍高貴, 淡妝淺抹顯清純, 真箇美人胚子.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-11-18 12:03 |顯示全部帖子
本帖最後由 cforchat 於 18-11-18 12:07 編輯

近幾日我便秘, 當家肚瀉...... 唉, 可否唔好咁極端, 中和吓得唔得呢?

事緣自己一向鍾意食番石榴, 專揀極生極綠嗰啲至會買, 貪佢夠爽脆, 最唔鍾意食軟腍已熟透, 嫌冇口感.

每逢去街市見到做緊特價, 都會貪平買十個八個. 由於貪吃, 每次必定會吃上兩大個, 因發覺稍為放得耐, 未幾已變熟透, 所以盡量趁硬食, 因為每過一日就會較前一日軟稔, 日漸遠離我喜愛嘅口感.

而由細到大嘅習慣, 逢係一啲帶籽嘅生果, 只要籽核細唔太難咬, 我都鍾意連籽一齊食, 例如提子, 例如番石榴...... 雖然食緊嘅時候會發出格格聲, 而且咬到牙都軟, 但係連籽一齊吃感覺較為過癮.

由於年紀大牙骹冇乜力, 所以雖然仍繼續連籽吃, 但已冇乜耐性兼牙力咬到爛碎. 尤其是吃番石榴, 好多時求其咬幾咬就吞, 因為要徹底咬嘅話, 其實好難將啲籽咬得爛, 甚至可能根本咬都未咬過就連果肉吞下.

生果籽核本已難消化, 我每次都唔生唔食, 加上日常少飲水, 又唔戒熱氣嘢, 結果就形成便秘.

嚴格嚟講, 其實都唔算便秘, 因為夾硬谷係可以出, 不過勁辛苦囉, 搞到出口隱隱痛, 又唔知點解成鬼日放屁, 每放一次, 出口就被(臭)氣壓逼痛一次, 勁痛苦.

其實母親曾經告誡過, 生番石榴難消化, 會令大便秘結, 雖然屢試不爽, 但總抱住純屬巧合而己, 結果吃一次秘一次, 唔到我唔信.

而家要鄭重考慮, 可能要放棄番石榴 (要食軟腍兼冇得食籽嘅話, 我寧願唔食), 以免自討苦吃, 仲有就係日常要謹記飲多啲水. 至於熱氣嘢喇喎...... 嘻嘻, 慢慢嚟慢慢嚟.

我就話自己攞嚟啫, 咁當家又何以會肚瀉呢?

佢嘅腸胃一向唔多好, 呢頭入嗰頭出司空見慣, 以前佢講我都唔信, 心諗邊有可能未經胃腸運作就直落到肛門吖, 肯定老作! 後來有一次睇戲時買咗杏仁作為小食, 畀咗幾粒佢, 唔知係咪佢咬唔碎就吞, 定係杏仁實在太硬, 無耐就見佢入咗洗手間, 唔只連排幾次, 仲要排到出血, 佢話係被杏仁碎弄損出口喎..... 自此之後, 我先至信佢係直入直出. 所以我成日話, 唔駛畀好嘢佢食, 因為食乜都係嘥料, 未吸收已化為烏有, 搞到成日進出洗手間, 日排無數次. 可是又唔見佢瘦喎, 都唔知啲脂肪喺邊度嚟.

而佢之所以肚瀉, 可能係我煮咗海產類嘅餸, 令佢腸胃敏感瀉住咁出, 因為我同吾兒吃得比佢多都冇事, 可見唔關海產事.

春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-11-21 09:44 |顯示全部帖子
朋友傳來保羅拖住白姐姐手嘅相片, 並附言"似拖住阿媽".....

假如相片中人真係白姐姐嘅話, 對於佢忽然老咗咁多, 都咪話唔感到詫異.

唉, 自古美人如名將, 不許人間見白頭!

話晒白姐姐年輕時都係一位美人, 難以相信如今已美人遲暮.

不過話時話, 現今科技發達, 想凍齡並唔算難事, 所以我覺得佢可能係患病居多, 否則以佢一向注重健康容顏, 絕對唔容許老態呈現於大眾面前.

點都好, 祝福佢身體健康老如松柏.

跟住, 朋友再傳來一張梅媽嘅相, 附言"睇吓九十幾歲仲咁精神奕奕, 籌備擺大壽".

呢位梅媽嘅行徑又係令人搖頭嘆息.

本來兒女成群, 理應樂敘天倫享清福, 可惜無福被承歡膝下, 幾個兒女陸續離世, 還幸留下可觀遺產讓佢可頤養天年.

對於一般人嚟講, 佢每月嘅生活費, 等如人家一年嘅使費. 假如佢好好利用, 唔只生活無憂, 甚至可講得上過奢華日子都冇問題.

偏偏貪心唔知足, 要求多抱怨多, 又打官司又投訴...... 完全違背咗當初孝順女兒臨終前辛苦為佢安排好嘅一切, 令好多人慨嘆 : 如果個女知道, 肯定激到由棺材彈起來!

心中溺愛兒子, 女兒只為搖錢樹, 就算樹已倒了, 仍想盡辦法企圖悉數取走樹上所結的果實, 以供養兒子一家. 作為女兒, 奔波一生, 當是還債, 此後不拖不欠, 早走早着了塵緣.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-11-27 11:27 |顯示全部帖子
想當年我仲喺股場上實戰時, 思捷係我嘅愛股之一, 睇住佢嘅股價曾經上到過百, 而自己喺幾十嘅時候已經沽晒貨, 又唔敢搏更高, 只好望門輕嘆, 與佢分手得太早, 從此冇眼睇.

跟住佢嘅股價一落千丈時, 我已離咗場, 所以亦冇趁低吸納, 當然就唔再理會佢現價若干啦.

現今聽報導因業績欠理想勁蝕錢, 所以要裁員, 戥啲員工慘.

其實我都唔知點解會視佢為愛股, 真係要深究原因, 可能係曾經遇過當時仲係主席嘅邢生. 佢帶住大女逛商場, 雖然說話唔多, 但睇得出佢好錫個女, 不期然就加咗分.

當時身穿白色樽領衫加黑色外套嘅邢生雖然其貎不揚, 但舉手投足間散發着一股男性魅力, 令我忍唔住不時回頭望多佢幾間. 可能佢意識到有條友成日望向佢嗰邊, 所以就順住目光向我望過嚟, 二人四目交投, 雖然冇觸電感, 但係眼光令我有種親切感, 至此之後就愛屋及烏, 用行動支持佢公司. (嘻嘻, 所謂支持, 也只不過係買一兩手咁大把)

身為(一兩手)股東, 周不時到各分店巡視業務, 雖然當年自由行未普及, 但見店內好多時都人頭湧湧, 顧客中外皆有, 可見佢嘅招牌係幾咁值錢.

至於作為股東嘅我有冇光顧一份呢? 答案係有, 不過唔多, 因為對我嚟講, 佢啲產品真係好貴, 所以我多數買特價貨 (其實特價品都唔係平得去邊, 不過諗住話晒都係名牌, 咪忍(心)痛買一件半件囉), 正價我望都唔敢望.

後來, 我漸漸對行商場失去興趣, 就冇乜再前往巡店, 加上唔再沾手股票, 冇聽任何財經資訊, 連邢生幾時冇做主席都唔知, 淨係知佢嘅股價如吃咗瀉藥般係咁跌跌跌.

其實業績大不如前, 身為主席責無旁貸, 尤其是而家咁多商店進駐, 要平有平, 要品質有品質, 咁多競爭者湧現, 仲墨守成規繼續沿用十幾廿年嘅價格與質量, 唔識與時並進, 根本好難有競爭力, 難怪分店愈來愈少, 因為過門而不入, 多都冇用.

近幾年來, 邢生深居簡出, 鮮有露面, 已經好耐冇見過佢, 唔知佢而家變成點呢?
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-11-30 11:18 |顯示全部帖子
雖然冇工作在身, 但係又唔願落街, 每當要落街嘅話, 即係代表家中糧食將近斷絕, 所以局住要去街市入貨.

除咗一般食品, 亦會因應店商時不時會推出一啲特價貨而酌量都入返啲貨, 對於點樣煮幾時煮用咩材料配搭等等嘅問題, 當時係顧不得考慮, 總之買咗先算, 入咗平貨放在自家, 心理上會覺得充實啲又滿足啲.

其實入貨時, 理性話我知, 雪櫃已放唔落, 但係感性卻告知, 唔趁平嘅時候買定, 到真正用得着嘅時候就唔係咁嘅價嘞, 買啦買啦, 唔買走寶呀..... 結果唔只先買而後矣, 仲要買多啲.

好嘞, 買時痛快, 打開雪櫃就閉翳, 你會發覺喺有限空間要放無限食物, 係一件好頭痛嘅事. 因為好多都唔係即食, 雪藏會較穩陣, 否則放室溫怕容易壞, 於是就盡量將啲食物上推下塞左拼右湊, 務求解決到大前提------- 將所有食物安置入內, 其餘會否引致因過於擠壓而變形或令雪櫃因負荷過盛而有可能導致製冷功能失靈等等未可知嘅問題, 都唔理得咁多.

每次順利將所有食物塞咗入內之後, 我就有種滿足感, 因為原本係一項不可能嘅任務, 我居然可以完成, 除咗抹一額汗之外, 亦要讚自己有咁嘅毅力, 次次都勇於挑戰雪櫃嘅極限.

當然, 任務間中都有失敗時, 始終雪櫃嘅空間已固定, 係得咁大, 又冇彈性, 塞極都會有飽和嘅一刻, 就算嗰刻畀你關到門, 未幾就見佢自己彈開, 明明門間嘅設計係有自行黏實功能, 居然會令佢自動開啟, 可想而知內裡情況係幾咁惡劣.

但係, 如果要減輕雪櫃嘅容納, 非得將食物取出不可, 如果可以取出, 就唔駛放雪櫃啦, 所以最後冇辦法之中嘅辦法, 就係用膠紙黏合雪櫃門, 每次取物就搣開膠紙, 完成後就黏回...... 係麻煩㗎, 不過總好過門長開.

除咗自尋以上煩惱, 仲有另一樣又係好苦惱, 就係我話過, 買嘅時候純粹貪平, 根本未知點煮, 於是就一直存於雪櫃內置之不理, 日子一耐, 發覺有啲已變壞要扔掉; 未壞嗰啲就要動腦筋諗諗點煮, 好多時都係將貨就煮, 但明明當時並唔想食嗰款.

正常情況下, 汲取以上經驗, 好應該有所改善, 我亦唔例外, 當好不容易清晒存貨後, 我就同自己講, 以後每日都落街市, 即諗即買即煮, 除咗新鮮, 又唔駛囤積, 亦可保養雪櫃, 等佢鬆一口氣, 況且貪平買買埋埋, 結果壞咗要扔, 計起條數可能反而仲貴, 根本唔划算.

我想講嘅係, 心, 係咁諗嘅; 行動, 卻唔聽使喚. 每當見到平嘢, 又係失控地買到不亦樂乎. 雪櫃如果有靈有性, 佢就會對我嘅諗法嗤之以鼻 : 哼! 近年來, 你有邊次唔係餵到我飽一飽吖, 連想打個嗝嘅空間都冇, 以為你攞吓煮吓可讓我稍為休息吓啦, 點知呢頭至舒服得幾日, 嗰頭又塞到我爆一爆, 搞到我每日都疲於奔命不斷忙碌地製冷, 唔製又驚你以為我死咗而扔棄, 幾命苦呀. 你仲好意思話自己辛酸, 我比你更辛酸呀, 嗚~ 嗚~

自己知自己事, 所以平時盡量少落街, 咁就見唔到平價貨, 就唔會入貨啦. (雪櫃又對我翻白眼 : 最弊你一落親街, 又會買回幾日嘅份量, 咪一樣滯死我)

好啦好啦, 我唔買咁多就係啦, 不過唔敢保證, 盡量㗎咋吓.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-12-2 12:19 |顯示全部帖子
本帖最後由 cforchat 於 18-12-2 12:22 編輯

無意中發現咗本書 : "此生未完成", 作者 : 于娟.

內容係作者記述自己患癌時期所經歷嘅遭遇與感受.

其中一段講佢體內嘅癌細胞已入侵骨骼, 導致每次接受治療都痛徹心扉..... 一邊睇, 我就諗起自己曾經都受過此痛嘅折磨......

話說有一晚外出歸家前, 忽然覺得左邊頸項至肩膊位置有少少痛, 開頭不以為意, 因為平時偶而都會有此情況, 只係一般肌肉痠痛, 過幾日就冇事.

返到屋企, 發覺痛楚好似愈來愈甚, 當時適值農曆七月, 心諗唔通喺街上中咗邪風?

不過都只係諗嚟自己嚇自己啫, 當然唔會搵高人幫我驅鬼逐邪啦, 更何況我都唔知去邊度搵呢啲高人.

於是我就當自己唔知幾時扭親卻未為意, 梳洗完畢就叫當家拎支跌打酒幫我搽.

以往有此情況, 搽完之後都能紓緩痛楚, 奇怪今次唔只一啲用處都冇, 反而感覺更加痛, 我就怪責當家一定係平時受我唔少閒氣, 趁此機會報仇咁報, 所以出手咁重, 佢梗係大呼冤枉啦.

翌晨瞓醒, 痛到冇辦法轉頭, 明顯地係落枕, 即係俗稱瞓厲頸, 所以當時我就好似機械人般, 連身體一齊才可以轉頭.

之前亦試過多次落枕, 但都係一日比一日好啲好啲, 大約四五日就可以完全康復.

呢次唔只冇好嘅跡象, 甚至痛楚仲不斷加劇, 莫講話想隨意轉頭有難度, 連行路時嘅步伐稍為大啲, 只要震動到身體, 左頸就痛到標眼水.

日頭還好, 痛極都仲可以忍受到, 到咗晚上先至大鑊.

先講上床, 平時一嘢就倒落去, 當時要先坐喺床沿, 跟住慢動作地先後將雙腳提起, 再雙手撐床, 然後徐徐躺下, 全程頸項以上位置都不能郁動半分.

轉身仲攞命, 平時唔駛一秒就可輕而易舉轉左轉右行動自如, 當時係每轉一次身, 都要出盡九牛二虎之力, 因為一定要極慢極慢, 否則牽一筋就會痛到哭喊, 每每要花費十分八分鐘才能成功轉身. 唔轉又唔得, 因為固定一邊瞓好攰, 所以就算辛苦極, 都要轉轉身, 轉完之後猶如大戰一場汗流浹背淚如雨下.

嗰兩晚煎熬, 幾乎冇得瞓, 一來痛, 二來轉個身都要搞咁耐, 仲邊有時間瞓吖, 但日頭又可以照返工喎, 真係佩服自己嘅忍痛能力.

捱咗兩日, 都冇諗過要去睇醫生, 因為一直覺得只係比以往較嚴重嘅落枕個案, 實會自行痊癒, 只係時間會較長罷了. 不過都想盡快減輕痛楚, 所以就決定去中醫處針灸.

平時會步行, 礙於非常痛楚, 有諗過豪一次搭的士, 快快睇快快好. 可是又驚行車時顛簸不定, 會痛到呱呱叫而嚇親司機. 搭巴士仲衰, 肯定上落車皆要慢動作, 累其他乘客久等唔在講, 費事畀佢哋以為我扮緊淑女裝儀態蓮步跚跚阻住晒而被踢落車先至慘吖嘛. 所以最後都係行路, 自己可以控制步伐, 中途又可以唞唞.

針灸過後, 再加上心理作用, 覺得痛楚減輕咗唔少. 我問醫師點解落枕會咁嚴重, 佢答如單純落枕唔會咁痛, 我係加埋感冒一齊爆發出嚟先至咁犀利. 唔怪得啦, 平時作感冒都伴有周身骨痛病徵, 咁啱又落枕, 難怪痛成咁.

另外醫師又解釋, 之所以日頭頂得到, 夜晚卻感覺劇痛加倍, 係因為日頭屬陽, 晚上屬陰, 陽氣盛自然有抵抗力, 陰氣重容易招病. 嗰刻我才明白點解每逢作病, 多數都係瞓到半夜先至覺得頭重鼻塞喉嚨痛, 原來係處於陰時份.

嗰次一役, 係我咁大個女首次明白何謂痛不欲生, 亦感受到點解有啲遭受病痛纏身嘅患者, 會選擇結束生命嚟終止無了期嘅痛楚煎熬. 因為我當時, 都閃過呢種念頭, 可想而知徹骨之痛係會將意志力和生命力磨滅得消失殆盡.

不曾經歷過痛苦的滋味, 是不會懂得身體健康才是王道, 請好好愛惜血肉之軀.

(在此向呢位比我當時還要痛上豈只十倍八倍而依然樂觀面對接受治療嘅作者, 致以萬分敬意)
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-12-9 10:13 |顯示全部帖子
天氣轉冷, 係時候又要喺床下底摷出棉被與大褸.

猶記得往年, 每當打開床下底時, 狗狗總會跳上床攪攪震趁熱鬧, 時而憑窗睇街, 時而大模斯樣坐喺度, 要等佢玩夠或被我哋多番催促或用零食引誘, 先至肯乖乖落床, 讓我哋繼續進行未完成嘅工作.

今冬, 一如既往, 只是過程中已沒有狗狗在旁讓我們嬉笑怒罵了......

打開包裝袋, 以往總會第一時間先為狗狗經常流連嘅地方鋪上軟墊, 例如窗台床邊廳中一角, 以免令佢置身冰冷處唔好受....... 當軟墊再度映入眼簾, 百般滋味在心頭, 狗狗頑皮搗蛋嘅身影又在腦中浮現.

雖然之前仲未算係好凍, 但係已經吃過兩次火鍋. 其實當家提議打邊爐時, 我下意識地唔多想, 因為自知又會諗起狗狗.

先講以前偶一為之即興出外吃, 總會先烚熟一啲肉類, 預備帶回家畀狗狗品嚐, 而家都冇此需要, 自然就冇動力出外光顧.

如若喺屋企, 過往要買火煱材料時, 都會專登買一啲狗狗可以進食嘅嘢, 令佢喺冬天吃得飽飽, 才可抵禦寒冷. 圍爐時, 佢靜靜守候喺我腳邊等吃, 有時又會心急地喺我與當家之間走嚟走去討吃...... 我就係怕憶起此情此景, 所以遲遲未肯和議當家.

我知道思念還思念, 始終要向前看, 所以最後都面對現實, 而且仲要連打兩次咁多.

或者因為之前為咗狗狗, 次次只能以清水作為湯底, 而家唔駛再遷就, 可以肆無忌憚用麻辣湯, 因而惹味致欲罷不能.

但其實, 如果可以揀, 我寧願一世都係清水底, 意味著狗狗長伴我一世.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-12-14 11:57 |顯示全部帖子
朋友最近失業, 臨過年至被請吃無情雞, 由於佢平日大使慣, 因而冇乜積蓄, 雖然話有老公養, 但都想賺吓私己錢, 所以就唔願停下來, 繼續搵工.

佢見某酒店請房務員, 由於近佢屋企, 又包膳食, 加上要輪班, 即係放假嘅時間大多會瞓覺, 咁就唔駛成日出街消費, 可乘機收心養性儲吓錢.

當佢喜孜孜話我聽已獲聘, 我就一邊恭喜佢時一邊恫嚇佢, 講吓我都客串過一日嘅經驗畀佢聽.

嚴格嚟講, 我並唔係做房務員, 我只係做房務部嘅文員.

話說好耐之前, 另一位朋友見我放假總係屈喺屋企咁嘥, 適逢旅行旺季, 佢在職嘅酒店大量缺人, 於是問我有冇興趣做吓炒散. 老實講, 如果係房務員, 我一定唔會應承, 因為聽人哋講係勁辛苦, 好似話一個鐘唔知要執拾幾多間房, 通常要限時間嗰啲工種, 我一定唔會做, 無謂畀自己有壓力嘛. 文員就唔同, 話晒都係文職, 唔駛執房, 只係做吓一般文書工作, 應該冇壓力. 而且話明炒散, 即係得閒就返工, 唔得閒就唔返工, 咁自由, 去邊度搵吖, 梗係連聲答應啦.

除咗可讓我喺放假日秘撈之外, 最吸引我嘅地方, 係佢包膳吖嘛, 而且仲唔係特定只吃一餐, 係早午晚餐, 只要當值時都可以去食, 甚至連宵夜都包埋. 話晒五星級酒店, 肯定好多好嘢食, 所以令當家與吾兒都羨慕不已, 有錢落袋仲可以任食酒店食物, 簡直係筍工.

由於有朋友做盲公竹, 所以心情都唔太緊張, 做嘢方面手板眼見工夫, 都幾沉悶. 大多數都係接電話, 房客來電嘅要求來來去去不外幾款 : 花洒漏水, 冷氣唔凍, 清潔房間, 攞枕頭, 要多幾包咖啡伴侶....... 每接完一個電話, 就要即刻通知有關負責所屬樓層嘅房務員去查看..... 我心諗, 成日要人哋咁頻頻撲撲, 會唔會遲啲當我係仇人㗎? 雖然我都係受客指使, 但中間人嘅角色往往最唔討好.

我以為, 所接嘅電話會另類, 例如房間有鬼, 電視自行開着, 水喉流出紅色水, 半夜有人敲門, 電話響卻冇聲, 窗外有影晃動等等, 跟住我就要致電捉鬼敢死隊去調查...... 唉, 與我嘅原意沾不上一丁點邊.

終於等到最期待嘅時刻..... 吃飯!

一入到飯堂, 個心就涼咗大半截, 一大桶白飯, 一大桶似係水嘅湯, 一大兜魚柳..... 吓!? 係咁多咋?????

我忍唔住到處張望, 心存希望, 會唔會有啲食物放喺啲唔當眼嘅地方, 但朋友告知只有眼前而已.

我以為, 五星級酒店嘅食堂喎, 就算唔過百款, 起碼都有幾十款任攞任食, 點知一隻手都唔駛就數晒, 完全始料不及.

隨意地盛咗啲白飯, 加幾塊魚柳, 湯水都冇意欲去盛, 就草草解決一餐. 唯一嘅安慰獎, 就係見佢啲香蕉幾靚, 就連隊三根, 叫做好過冇.

我同朋友講, 我只炒一日就散, 唔會再嚟, 因為連最重要嘅期望都落空, 我寧願繼續在家發呆.

雖然返一日都有錢, 但係扣除車資, 扣除時間, 扣除急趕而去失望而回嘅心情, 應該所賺冇幾.

啊! 慢着! 仲未計要專登買對全黑皮鞋作為制服鞋喎, 扣扣埋埋仲要倒蝕㖭呀.

雖然得個桔, 不過都叫做還咗個心願, 因為以前每逢見到類似職位招聘, 都會好想嘗試, 難得朋友讓我了卻好奇心, 此後可以唔駛諗.

至於將會做房務員嗰位朋友, 我叫佢姑且去嘗試吓, 話晒未親身經歷過, 唔可以憑我個人嘅片面之詞與感覺而卻步, 始終大家價值觀唔同, 話唔定佢會做得好開心.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-12-18 10:43 |顯示全部帖子
十幾廿年前國內樓大行其道, 幾乎每個星期都喺香港搞展銷會, 電視廣告亦賣到街知巷聞, 所以當其時, 有較富裕嘅家人亦唔執輸, 夾份買咗兩個相連單位作投資之用.

通常大熱過後, 自然就會冷卻, 若干年後, 國內樓嘅熱烘烘已過, 就算再有新盤推出, 要買嘅以前已經買咗, 剩下嘅就係冇諗過買嗰啲, 既然銷情不再, 漸漸地鮮有新樓盤廣告出現.

而當初諗住大炒一筆嘅家人, 原以為可以趁勢賺個滿堂紅, 點估到市面貨源充足, 新樓尚且滯銷, 更何況佢哋持有嘅已經淪為二手樓, 更加無人問津. 最後只好作為渡假屋, 每逢假日就會相約去住一兩日, 揼吓骨食吓嘢, 當短線旅行.

後來冇咗新鮮感, 加上子女亦漸大唔再同行, 於是返去渡假嘅次數愈來愈少, 最後因唔想繼續丟空, 唯有蝕放, 兩個單位賣出嘅價, 都唔夠當初買入一個嘅價錢.

而朋友G亦喺差不多同期買咗一個單位, 佢買嘅原因好單純, 好奇之下去展銷廳睇吓, 被人山人海嘅場面震懾住, 見好多人買佢又趁熱鬧買, 其實買嚟都唔知做乜.

後來冷靜過後先至識得驚, 唔知會唔會爛尾, 於是去實地視察環境. 好在見到正在大興土木, 地點又喺旺區, 才放下心頭大石, 不過依然覺得當日係中咗邪.

等咗幾年終於順利收樓, 最初都有諗過賣出賺一筆, 不過因為供過於求, 根本炒唔起, 所以同樣地將之作為渡假屋, 間中返去小住幾日.

可能心態唔同, 所以期間就算睇到自己屋苑嘅價跌到變渣, 再由渣升到賺倍, 好多地產紛紛叫佢開個價, 佢都不為所動, 所持嘅態度係一動不如一靜, 唔想煩.

有時佢講開間渡假屋, 會話係食之無味棄之可惜. 因為近呢幾年已經好少返去, 但又唔想賣, 始終有間屋喺內地, 幾時心血來潮去住一頭半個月都唔錯, 好過住酒店. 可是每當念及唔住之時, 管理費雜費等等依然要繼續付, 佢又唔多想.

嗱, 佢呢啲心態我就最清楚不過, 正如我平時成日貪平買買埋埋啲嘢, 其實好多都唔等使, 但又諗可能有一日會用得着, 所以一直都唔捨得扔掉, 搞到有時都好煩.

哈, 人哋煩緊嘅係六位數嘅磚頭, 而我煩嘅只不過係三位數嘅平價貨, 雖然價值唔同, 攞嚟比較太不自量力, 之但係煩惱兩個字咪都係一樣.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-12-23 10:16 |顯示全部帖子
朋友約茶聚, 臨時帶埋個女朋友一齊, 佢自己又成日掛住講電話唔得閒理人, 為免有冷場, 令新朋友覺得好似搭檯, 所以有時要夾硬摷話題, 都幾為難.

見朋友去洗手間, 我又準備諗吓同佢講乜, 輪到佢做主動, 問我婚姻狀況.

於是我咪照答囉, 佢聽完就笑笑口話好吖.

佢口中嘅好吖係咩意思? 係結咗婚好, 定係生咗仔好, 抑或係兩樣都有好呢?

禮尚往來, 跟住我又問返佢, 點知佢嘅答案係 : 我未結婚!

當堂窒一窒, 原以為佢問得我咁嘅問題, 係想打開話匣子, 乘機講吓佢家庭瑣碎事, 而大家又年紀相若, 大安旨意佢應該都係已婚兼有兒有女, 邊度會知佢竟然未婚啫.

下次要記住, 未清楚對方底蘊時, 千萬唔好懶醒, 否則又要烏鴉過場.

為免佢感到尷尬, 唯有打圓場, 學佢講 : 好吖!

佢睜大雙眼不解望住我, 我繼續講埋未講完嘅說話 : 唔好以為結咗婚一定好, 其實未結婚都有未結婚嘅好, 如果有得㨂, 我都想好似你咁, 一個人自由自在唔駛煩.

佢聽完後笑笑口冇出聲, 可能以為我只係安慰緊佢, 所以不以為然.

其實一半係安慰佢, 一半亦都係我有感而發嘅心聲.

諗起被當家無時無刻激到生蝦咁跳, 而佢完全唔知所犯何事先至係致命傷, 知道嘅都話可以避忌吓, 免得惹起我把火, 最攞命係佢根本唔知自己邊度出咗問題, 呢樣先至係最大問題. 話佢又唔聽, 聽咗又唔改, 今次改下次又犯, 周而復始鑊鑊甘, 十年如一日不斷重複又重複循環又循環地傷害我身心 (成日嘔血好傷身㗎), 令我日日游走於人間與地獄. 套兩句內地劇對白 : 這日子甚麽時候才到頭, 還讓不讓人活呀?

有時諗, 到底前世我哋係咩關係, 而呢種恩怨又未至於要置對方於死地, 只會以折磨形式讓人求生不得求死不能, 身心皆疲. 唔通佢係阿爸我係囡, 成日忤逆激佢, 所以今世調轉頭佢嚟激我, 等我嚐吓箇中滋味. 又可能佢係聰明夫我係愚鈍妻, 今生變成聰明妻對愚鈍夫, 償還前世愚昧無知令對方頭痛不已所種下嘅果.

如果以我而家嘅心態回到未嫁時, 離遠見到當家, 我一定掉頭走, 避免相遇, 就可逃過一劫. 雖然我亦會遇上當時嘅所有男朋友仔, 當中有我好鍾意好鍾意嘅, 但卻唔會視佢哋為結婚對象. 因為正如小說所講 : 刻骨銘心嘅係一個人, 與之結婚生子嘅又係另一個人. 既然結婚嗰個唔係最鍾意, 咁結嚟做咩呢? 況且結完十對有九對變怨偶, 與其走入圍城然後衝出嚟, 不如一直喺圍城外欣賞風景仲好啦.

結婚對象免談, 怕怕! 但會尋求毋須朝夕相對, 卻能心靈相通嘅靈魂伴侶, 可惜呢個伴侶, 比知己更難求.

唉, 諗咁多做乜吖, 都改變唔到事實, 不如面對現實啦.......

OK, 冇當家就冇我親愛嘅吾兒, 呢個係佢唯一存在嘅價值, 講完!!
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 18-12-29 18:23 |顯示全部帖子
本帖最後由 cforchat 於 18-12-29 18:24 編輯

去醫務所睇醫生, 見有個磅喺度, 順便秤一秤體重.

一上磅, 比上幾個月足足重咗幾磅有多, 頓時晴天霹靂!!

其實食量大至上冇乜分別, 都係正餐食得唔多, 副餐(垃圾食物)依然狂擦, 應該只有多唔會少, 加上特別嗜甜, 每日總離不開甜點.

既然都係食嗰啲種類, 何解卻會令體重上升呢又?

um..... 歸根究底, 我諗係因為而家少咗出去散步.

以前狗狗在世時, 每日總會喺飯後同佢去散步, 有時早餐後, 有時午餐後, 有時晚餐後. 通常一行親起碼一至兩小時, 雖然心肺活動量唔算太大, 起碼叫做有運動吖嘛.

但係而家早午晚飯後, 一係飯氣攻心大覺瞓, 一係攤屍咁攤喺沙發煲劇. 雖然一日三餐一樣會照煮, 但係因為雪櫃長期囤積食糧, 所以好幾日都唔駛落街, 變相就唔駛點郁動.

就係咁, 腰間嘅肥肉愈積愈厚, 以前着落仲有鬆嘅褲頭, 搞到非繫皮帶不可, 不然就有鬆脫嘅危機, 不知不覺間已變成而家想搵啲空間插支針都冇嘅狀態嘞. 勉強扣上褲鈕唔係唔得嘅, 不過要用九牛二虎之力先至可成事, 成事之後仲會氣喘吁吁囉. 而扣上之後, 將肥肉唧咗出嚟, 形成一道士啤軚, 所以都唔敢着貼身衫, 因為會令肥肉無所遁形.

為咗對自己有所警惕, 我唯有繼續辛苦地穿上舊褲, 至少肥極都有個譜. 如果因為貪方便而換過一批大碼褲, 我怕好快就要換上加大碼, 到時就欲救無從嘞.

聽人講, 女人去到我呢啲年紀, 最好有啲肉地, 咁先至夠珠圓玉潤喎. 其實我都知, 有肉會襟老啲, 太瘦嘅話, 會畀人一種又乾又柴皮嘅感覺吖嘛.

唉, 最弊我一向肥身唔肥面, 如果連塊面都要有肉地嘅話, 睇怕下身一定肥到痺, 變成豬圓肉潤咯.

其實講嚟講去, 只要我肯犧牲吓唔食咁多, 根本好快就可以收復失去嘅褲頭. 問題係我真係忍唔到吖嘛, 唯有每次食緊嘅時候, 同時亦升起一股罪疚感, 令我稍為食少啲啲啲啲啲啲啲啲啦.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-1-5 13:21 |顯示全部帖子
吾兒睇中咗一套影音器材, 但因為覺得價錢昂貴(萬幾蚊), 所以遲遲未下定決心扑鎚, 但又念念不忘, 整日掛喺口邊.

有見及此, 儘管倆老已經不斷游說佢買, 話錢係其次, 千金難買心頭好嘛, 但係佢依然因為貴, 加上驚自己只係一時衝動, 仲有就係唔肯定係咪真係用得着咁靚而還在猶豫.

眼見佢連日來一時興沖沖話決定買, 為表支持, 倆老就舉腳贊成, 連隨慫恿佢立即行動, 連錢都攞定. 但係冇幾耐, 佢又表現得懶懶閒, 話要再詳細考慮清楚先, 畀佢玩死.

既然佢有咁多隱憂, 我都唔方便阻礙佢思考, 始終用嗰個唔係我, 等佢自己揸主意算嘞, 費事做到皇帝唔急太監急咁款.

喺吾兒心大心細十五十六嘅時候, 我同佢講 : 當年油炸鬼仲賣緊一蚊一條嘅時候, 你老竇已經買DV, 話畫質靚喎, 當時嘅攝錄機只係幾千蚊啫嘛, 佢竟然用多兩三倍價錢買DV, 你話佢幾敗家吖. 而今時今日油炸鬼已經賣緊十蚊一條, 你買嘅都係萬幾蚊, 相比起你老竇, 你已經算慳家㗎嘞.

提起當家當年嘅行徑, 我仲記憶猶新. 講真, 假如我一聲話唔畀買, 佢就唔會買, 係我自己衰心軟, 諗住如果阻止, 佢一定唔開心, 既然能力所及, 佢想買就買啦, 但其實買咗之後, 都唔係用咗好多次.

類似事件時有發生, 好多朋友話我太過縱容佢, 或者係啦, 但係每次我都係將心比己, 設身處地諗若然自己遇到心頭好卻不能擁有, 肯定茶飯不思, 所以咁多年來, 幾乎佢想買乜都如願.

對當家如是, 對吾兒亦如是, 所以佢話想買嘅嘢, 除非佢自己改變主意, 不然嘅話, 最終都會成為囊中物.

好慶幸吾兒相當生性, 每次買嘅嘢, 全部經過深思熟慮, 認為有需要先至買, 所以買完之後, 大多數都會物盡其用.

當然, 佢哋所有嘅心頭好, 全部都係能力範圍之內, 能力以外嘅嘢, 發吓夢好嘞, 如果唔係, 賣血都唔掂.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-1-9 11:45 |顯示全部帖子
本帖最後由 cforchat 於 19-1-9 11:46 編輯

煮飯嘅時候, 順便蒸咗一底包作為午餐.

飯煮好後, 焗咗起碼一個鐘至揭開飯煲蓋取包, 因為想焗耐啲, 確保啲包夠熟, 然後就調配一杯洛神花茶作為飲品.

過咗幾個鐘頭, 開始感覺個肚唔舒服, 赤赤痛, 周身唔聚財.

唔通個包蒸唔熟? 又唔通係洛神花茶出問題? 當家同我食一樣嘅嘢, 我問佢有冇乜唔妥, 佢話冇, 即係我自己嘅問題啦.

我唯有當自己腸胃唔好, 諗住第二日大解完就會冇事, 但係完事後, 依然覺得腹部位置隱隱作痛.

唉, 女人真係麻煩, 月事前同月事中/腸胃唔舒服, 痛嘅位置幾乎相同, 所以都分唔清究竟係咩原因, 不過因為痛楚伴有放屁, 只好視作唔關婦科事, 應該係屬於腸胃科, 腸作祟之故.

於是就自行服食腸胃藥, 期望好快有便意, 跟住去清晒就冇事.

以往, 只需服下一兩劑就見效, 但係今次連服幾劑, 個肚依然間中咕咕響, 雖然如廁正常, 但係並冇改善隱隱痛同埋間中放屁嘅情況. 唔通唔關腸胃事, 係傷風感冒菌入咗腸所致?

於是就改服感冒藥, 結果慢慢有改善, 腹痛與放屁漸漸減少.

原來真係感冒, 等我仲無端端服咗咁多腸胃藥, 唔只傷身, 仲嘥咗啲藥.

講開痛, 有時寧願轟轟烈烈明刀明槍咁痛, 最怕就係痛吓唔痛吓時痛時唔痛, 未至於會痛死, 但又間中奄一奄, 搞到行又唔係, 企又唔係, 瞓又唔係..... 呢種痛最難頂.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-1-17 20:45 |顯示全部帖子
讀書嘅時候, 隔離位嘅同學係亦舒迷, 幾乎所有亦舒小說都會買, 間中亦會喺課堂上同我討論邊本書邊個主角吸引, 有時講到得意忘形, 就會發現黑板處有道冷光射過嚟...... 向光望去, 見到老師嘴裡讀緊書本內容, 眼光卻睨視過嚟, 我哋就會縮一縮頸, 伸一伸舌頭, 然後立即噤聲, 收拾舒情集中精神於課本上.

每當同學談及亦舒小說, 我就會打蛇隨棍上向佢借閱, 唔睇過又點同佢討論內容呀, 所以佢都樂於借出書籍, 但就多番叮囑要小心翻閱, 以免弄皺弄髒, 所以我每次都睇得小心奕奕, 亦盡量睇快啲以便歸還, 費事停留多一日喺我處, 就多一份壓力, 因為如果唔愛惜書本, 驚佢以後唔再借畀我.

當時我哋談論得最多嘅, 就係"玫瑰的故事". 佢買呢本書嘅版本, 封面係一個女孩真人嘅相片, 代表佢係主角黃玫瑰. 同學好唔滿意, 話黃玫瑰嘅樣貎, 應該由讀者自行想像, 而唔係以一個真人嘅樣貎代入, 咁樣就冇咗想像空間. 可能佢太過投入, 所以愛之深責之切, 對我嚟講就冇乜所謂, 只係封面啫, 唔望咪得囉, 依然可以自行想像.

除咗封面唔滿意, 對於將之改編成電影, 與原著內容相去甚遠嘅劇情, 佢一樣有意見. 嗱, 唔只佢, 連我都覺得離題萬丈, 有乜理由黃玫瑰嘅阿哥會鍾意自己嘅阿妹先得㗎. 原著身為阿哥, 只限於愛錫痛惜阿妹, 從未有過超出兄妹關係嘅感情與思想, 況且佢本身都有愛人. 電影就係冇咗阿嫂嘅角色, 阿哥就單思阿妹, 搞到不倫戀咁款, 冇眼睇. 雖然周潤發同張曼玉係我所喜歡嘅演員, 但因為劇情實在不堪, 所以咁多年來, 都冇重睇嘅價值, 就算要睇都睇原著好過.

最近我重睇"朝花夕拾"呢本書, 跟住睇埋電影, 呢齣就好嘞, 大部份都同原著差不多, 所以雖然舊片畫質好差, 不過我都耐心地睇晒.

戲中男主角叫方中信, 係由方中信主演, 原來佢就係拍完呢部戲, 索性就改方中信作為藝名. 因為咁, 每當喺戲中被稱作方中信時, 一時間有少少混淆, 唔記得係現實定戲中.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-1-27 15:36 |顯示全部帖子
一位做警察嘅朋友早前退咗休, 除咗一次過攞咗六位數字嘅公積金之外, 每個月仲有五位數嘅長俸, 真係恨死隔籬.

本身係孤家寡人嘅佢, 忽然間多咗一大嚿錢, 唔知會點使呢? 會唔會做啲小本生意仔, 又或者來個豪華版環遊世界八十日...... 諗落都戥佢覺得寫意.

點知答案竟然係 : 着草!!!

吓!? 你係警察唔係盜賊, 因乜解究要着草? 唔好撚化我好喎.

原來佢話幾十年嘅職業生涯裡, 多多少少都得罪過黑白兩道, 經佢手送入獄嘅大不乏人. 以前自恃有皇氣照住冇有怕, 一旦退下火線, 再冇皇冠護體, 恐防被有心人頒下江湖追殺令報仇, 因而唔能夠長期停留喺一處地方, 以免被伏擊. 假如搬來搬去居無定所未免大費周章, 唯一令行蹤飄忽嘅辦法, 就係周圍去, 不定期出現喺某個地方, 咁樣先至會令對方摸不清底蘊而萌生放棄念頭, 佢就可偷生於人世. 亦因為咁, 佢先至唔敢成家立室, 費事禍及妻兒.

佢講到煞有介事咁款, 都唔知有冇誇大成份. 在我嚟講, 警察只係盡除暴安良維持社會秩序嘅職責啫, 做壞事嘅人, 預咗受牢獄之懲, 食得鹹魚抵得渴, 報咩仇呢? 如果個個警察退休都會被尋仇, 仲有可能累及全家, 咁仲成世界? 仲邊有人敢入行?

計我話, 都唔知係咪佢在位時有風駛到盡, 得罪人多稱呼人少(即係寸寸貢 : 阿sir做嘢唔駛你教嗰款), 所以樹敵無數, 搞到人退休佢退休, 人哋退休生活係安享晚年, 佢就要浪跡天涯有家歸不得.

佢實係唔認架, 辯稱自己一向揸正嚟做, 着草只係以防萬一, 冇證據顯示一定會受狙擊咁話喎.

姑勿論係佢太過小心行事定係驚弓之鳥自己嚇自己, 都希望佢出入平安吉人天相.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-2-4 09:35 |顯示全部帖子
每逢農曆年前幾日, 街市嘅景象非常壯觀.

為咗滿足市民爭相搶購年貨, 於是檔主們會將貨物擺埋喺店門前售賣, 令本身已經狹窄嘅行人道, 只剩下一小條縫仔讓人通過, 好多時因為人太多而要被逼行出馬路, 真係畀條路嚟行吓都唔得.

可能一年只得幾日係咁嘅情況, 所以平日不時會上前干涉檔主要將貨物盡量放於檔口範圍內嘅市政人員, 亦會隻眼開隻眼閉, 只要唔太過份, 都由得佢哋超越臨界線. 始終中國人講求意頭, 人哋一年到尾都係望能喺大時大節賺個盆滿缽滿, 若然有人唔識趣阻住搵食, 真係殺人都有之, 所以市政們通常都識做㗎呢.

節日於我如平日, 所以任何應節食品, 統統冇入貨, 只係買定啲肉類菜類雞蛋等一般食材, 以備煮飯或煮麵可用嚟作為配料.

雖然都係買平時嘢, 但已經令一直已被擠得水洩不通嘅雪櫃更加雪上加霜苦不堪言, 真係難為兼辛苦晒雪櫃老兄嘞. 放心, 我會好努力地煮煮煮, 務求盡早騰出啲空間讓你舒一口氣.

當家每年見我買咗嘅食材卻對住冇乜空間嘅雪櫃極度惆悵時, 都會話我唔駛買咁多, 因為街市年初一已經開檔, 你估仲係以前全市休息幾日乜都唔開咩. 我梗係知會有個別檔口全年無休啦, 不過價錢會較平日貴吖嘛, 又未必係我買開嗰幾間開喎, 而我又唔想特登落街, 所以咪要買定嚟看門口囉.

雖然新年畀人喜氣洋洋一家團聚嘅感覺, 但對於我嚟講就一啲都唔鍾意.

細細個, 每到新年就要幫手做呢樣嗰樣, 又大掃除又整多款食物又要去街市買嘢搬嘢, 眼見其他同學只係玩樂, 而我就忙到一頭煙, 因而意識裡非常抗拒過年. 所以成家後, 作為女主人理應喜孜孜為過年張羅一切有關事宜, 我就全部欠奉. 除咗吾兒小時, 會刻意為佢裝身之外, 其餘免得過就免.

可能習以為常, 所以我們這一家, 節日除咗可以放假之外, 幾乎毫無任何意義, 甚至連生日都忘記. 不過對於吾兒嘅生日, 我梗係唔會唔記得啦, 話晒係自己嘅受難日喎, 所以點都會乘機出去吃餐飯, 當慰勞佢不幸降生嚟呢個家之時, 亦慶祝我能得此子.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-2-7 22:12 |顯示全部帖子
通常冬至熱, 農曆年就會凍.

喺剛過去嘅冬至, 氣溫猶如夏天般熱, 於是好多人都預測新年一定好凍. 有見及此, 我亦做定心理準備, 將會迎接一個嚴寒嘅新年假期.

點知現實完全唔係嗰回事, 唔只唔凍, 而且仲頗為熱, 真係估佢唔到.

如果有得我揀, 我梗係想熱多過凍啦, 因為熱極最多都係廿幾度, 比夏天涼快, 但又比冬天和暖, 對怕凍嘅我嚟講就啱啱好.

記得多年前嘅新年假, 天氣極寒冷, 凍到我騰騰震, 搞到整日瑟縮於被窩內, 除咗煮飯吃飯上廁所之外, 幾乎足不踏地, 連最愛嘅零食都提唔起意欲, 彷如一隻頹廢的豬.

結果等到假期結束要返工, 先至局住起床梳洗出門去, 若然放多幾日假, 怕且全身會長出霉菌.

其實只要肯行出第一步, 出去曬吓太陽活動吓筋骨, 讓血液循環, 根本唔覺得凍, 問題係夠唔夠堅定從暖烘烘嘅被窩爬出嚟啫, 肯離開張床, 就算唔出門, 已經可以唔駛咁頹了.

雖然唔凍, 但係由於應承咗雪櫃大哥要盡快令佢消滯, 所以邊度都冇去, 連日來喺屋企吃住家飯, 煮足幾餐之後, 終於可以騰到少許空間出嚟, 仍需繼續努力.

之前都講過, 從來唔注重繁文縟節, 所以拜年呢家嘢, 咁多年嚟都唔多願做, 無論男家或女家都一視同仁, 更加謝絕親友到來串門. 因為我唔想去人哋處要人哋招呼, 又唔想人哋嚟我處要我招呼, 拜年手信禮尚往來, 派利是又你來我往, 煩也!!

儘管我知道, 背後難免遭到種種非議, 但我一於少理, 貫徹始終我行我素本色.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-2-9 11:26 |顯示全部帖子
本帖最後由 cforchat 於 19-2-17 15:56 編輯

母親每星期都會上髮廊洗頭恤髮, 幾十年來風雨不改, 真係佩服佢有咁嘅毅力.

我同佢恰恰相反, 最怕去髮型屋, 除非髮型要進行大改造, 不然一年到尾, 鮮有前往光顧. 所以髮型一直保持住容易打理, 盡量唔駛大執, 如純粹修短少許咁簡單, 就會自行動手不假外求.

不過愛美與善變一向係女士嘅天性, 當一款髮型已保持咗一段長時期之後, 就會覺得有點厭而想更換一下形象, 讓自己與友儕有耳目一新之感.

我都唔例外, 咁多年來, 頭上青絲不定時會周期性地轉換, 直想曲, 曲想直, 長想短, 短想長....... 隨住思想轉變, 髮型亦不斷輪迴.

早前將留咗已有一段時間嘅長髮引刀一快剪至及肩, 隔咗冇耐索性剪短如男仔頭, 當期時正值夏天, 覺得清爽又涼快洗頭又方便.

不過爽快嘅背後, 係要付出代價的, 就係每隔一段時間, 就要上髮廊修剪, 因為男仔頭嘅短髮係有層次, 除非本身有耐性兼有技術就可以自己嚟, 否則一個唔覺意修到一忽忽就肉鬼酸. 基於咁嘅原因, 唯有到時到候乖乖上門光顧.

本身係天生曲髮底, 可是曲得又唔勻循, 總係一邊曲一邊唔多曲, 而曲嘅一方會顯得篷鬆, 看似好厚; 唔曲嘅另一方又好貼, 看似好薄. 剪到好短嘅時候就唔多覺, 當稍為長少少, 曲嘅地方與唔曲嘅地方就好明顯, 又係勁肉酸. 如果只係長少少就要消費幾拾蚊, 不如自己嚟, 只要將曲方偷薄剪碎少少, 驟眼睇平均啲就得啦, 咁又慳返幾拾蚊.

有時逐少逐少修, 卻總係覺得唔順眼, 曲方依然顯得厚過唔曲方, 於是就會落重手, 一大忽修薄, 只要自我感覺良好, 望落去覺得幾好, 就算實際髮量唔勻稱都唔理得咁多.

到正式去髮廊嘅日子, 紙包唔住火, 理髮師臨落剪前先撥亂我嘅頭髮檢視, 跟住問我係咪曾經自己修過, 點解會剪得咁薄咁碎. 我梗係唔會從實招來, 話因為想慳錢所以唔搵佢啦, 只好一口咬定係佢上次應我嘅要求所以至剪得咁碎. (但其實每次當我叫佢剪碎時佢多數都拒絕, 因為佢話太碎唔適合喎. 所以我都唔知佢信唔信我講㗎, 我姑且博大霧, 話晒每日客流量咁多, 每個客又有唔同要求, 幾個月前嘅事佢邊記得吖)

一如以往, 當佢剪得八八九九時, 我亦準備起身, 點知佢二話不說, 拎住把鉸剪再喺我頭頂位置剪呀剪呀剪呀...... 我心諗, 搞乜鬼呢? 平時好少可會動我頭頂㗎喎.

我不禁心虛, 弊嘞, 唔通佢識穿我嘅謊言, 知我屈佢, 所以發晦氣並且心諗 : 哼! 你話係我剪碎吖嗱, 好, 而家就剪畀你睇, 有咁碎得咁碎.

亦可能係佢信以為真, 所以就延續上次嘅手勢, 繼續幫我剪碎, 以免被我知道上次佢係因為失手至會聽我講幫我剪碎.

唉, 無論係邊個理由, 最受害就係我...... 嘅頭髮, 因為佢今次真係修得好短好碎, 短到連頭皮都見到. 所以返到屋企, 吾兒已經第一時間問我做乜剪得咁短.
春有百花秋有月, 夏有涼風冬有雪, 若無煩事掛心頭, 便是人間好時節.

首頁

尾頁

跳至
你需要登錄後才可以回帖 登入 | 註冊