興趣嗜好

跳至

首頁

尾頁
   7


大宅

積分: 2644


發表於 19-2-17 15:54 |顯示全部帖子
單身男友人同我講, 最近有傳越南嘅女仔, 只需付港幣十萬就可以娶回家, 所以佢現正積極儲錢, 希望趕快抱得美人歸.

唔知十萬係咪包埋畀女家嘅禮金同埋婚禮所需嘅使費, 定係只夠畀中介費呢, 咁包唔包申請新娘來港嘅費用? 友人話詳細資料唔知, 反正人哋話只要十萬, 就先儲十萬, 當係入場費, 其餘雜費到時先算喎.

唔先計定條數, 到時萬一失預算, 落得人財兩空嘅結局咁點算呀, 真係吖!

通常呢啲婆乸數, 係女人仔先會計, 男人做大事, 只着眼於大數目, 所以乜都唔理唔諗, 等煮到嚟先食.

我問佢識唔識講越南話, 佢話只識得兩句, 一句係"北鬧棟nine", 另一句係"pho".

唓! 呢兩句我都識啦, "北鬧棟nine"係請注意; 而"pho"就係越南河粉吖嘛.

得呢兩句, 都唔知點同靚女溝通.

我想像假如有朝一日, 二人面對面時嘅情景......

男 : 北鬧棟nine!

女 : ...... (以含情脈脈兼期聁目光等待對方進一步發言, 唔知要自己注意啲乜呢?)

男 : pho!

女 : ...... (滴汗!)

哈哈哈, 諗起都覺得搞笑.

其實要學某一種方言, 上堂固之然有幫助, 如果能夠喺當地活學活用, 就更加事半功倍, 否則未能學以致用, 就算學得幾流利, 亦會好快生疏淡忘.

我諗如果真係成事, 呢位友人嘅越南話應該大有躍進, 話晒有個私人導師日夜教佢.

講起外語, 最近睇咗一套西班牙片集"紙房子", 原以為一向睇嘅外語片只限於英美兩地, 對於其他國家嘅語言恐怕唔會接受. 點知聽落唔只唔覺突兀, 甚至幾順耳㖭, 日後睇戲/劇又可以多個選擇嘞.

"紙房子"嘅劇情有啲似"越獄", 節奏明快與鬥智鬥力場面連連, 令人心急追看進展如何. 亦由於只有兩季, 總共得廿幾集, 所以好快就煲完.

題外話 : 我好鍾意佢哋套制服, 好醒神.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-2-21 11:40 |顯示全部帖子
本帖最後由 cforchat 於 19-2-21 11:46 編輯

曾經喜歡睇"泥土的清香"嘅Youtube, 而家經已好少睇, 可能係因為之前覺得影片充滿純樸嘅鄉土味與鄉土人情, 逐漸變得流於點點商業化, 與當初欣賞嘅原因不可再同日而語, 因而失去新鮮感. 雖然頻道幾乎日日更新, 但除非對於介紹嘅食物有興趣, 不然都唔會入去瀏覽.

其實之前都有睇開另一個頻道, 不過當時只係間中睇睇, 但而家就會熱切期待快快更新, 每次新視頻一出, 我就會特登放喺得我一人在家用膳嘅時間才播嚟睇, 因為我覺得呢段時間係我最輕鬆最享受嘅時段, 配合視頻既溫馨又舒服嘅內容, 令我用餐時倍加愜意.

講緊嘅係"田園美食時光", 同埋"田園生活分享".

顧名思義, 前者大部份以煮嘢食為主, 後者則主要係分享日常生活點滴, 間中亦加入少許烹調過程.

視頻早期, 多數都係田園姐出鏡, 後期就加入咗樵夫大哥亮相, 兩夫妻非常合拍, 一唱一和, 琴瑟和諧, 鶼鰈情深....... 羨煞幾許旁人.

我較喜歡生活分享, 因為介紹咗唔少佢哋所在地---加拿大嘅日常與風土人情, 市集與街道嘅景觀, 亦帶我"參觀"佢家中與周圍環境, 令我雖安坐家中卻猶如已到當地一遊, 趣味無窮. (搞到我心思思都想移民去加拿大)

仲有就係佢哋嘅愛犬"Happy", 又名"皮皮", 最近更有另一名稱---妹妹. 呢位妹妹乖巧聰明, 又懂性又識唱歌又靚女, 難怪集萬千寵愛在一身, 畀着我有犬如佢, 都會愛到佢入心入肺.

田園姐與樵夫大哥對待皮皮嘅疼愛程度, 令一直以為對狗狗已經好好嘅我簡直自愧不如, 使我多次萌生一股衝動, 想再養多一隻狗狗, 藉以仿傚田園姐佢哋嘅愛心, 將之灌注喺新狗狗身上, 彌補之前愛得不足.

之前睇田園姐, 由於只介紹食物煮法, 好少講生活, 加上硬朗嘅外表, 畀我嘅印象係大女人一個. 直至後期製作咗好多視頻, 先至加深咗認識, 原來內裡係一位小鳥依人溫柔得很而且好嬌嗲嘅賢妻. 當然, 能有一位如此美嬌娘, 背後少不得一位值得倚靠嘅肩膀與一顆懂得欣賞嘅心, 否則空有一腔賢良淑德熱誠, 也無從發揮.

儘管樵夫大哥有份出鏡, 但睇得出佢頗為低調, 唔會喧賓奪主, 只間中在旁補充一下, 大多數時間都係讓田園姐發言. 雖然佢好少講嘢, 但每次講嘢, 言之有理之時, 間中亦引人發笑, 呢啲先至可愛.

因為鍾意, 所以我會一直支持佢哋.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-3-1 12:08 |顯示全部帖子
曾經同過一位親戚到內地做過義工, 面對一群待人伸出援手嘅無助者, 自覺能夠盡點綿力去幫助, 感到好有意義.

但礙於路途遙遠, 唔可以成日北上, 只好退而求其次, 喺本地尋找機構, 希望喺工餘時間繼續進行義務工作.

我以為只要願意就一定大把機會大把選擇, 原來現實唔係嗰回事, 因為我根本搵唔到途徑點樣加入義工行列.

於是上網搜尋, 得知要先到有關部門登記, 咁我就抽時間前往. 登記後我又以為佢哋會因應我嘅要求而作出配對, 每當有合適嘅義工崗位就會搵我. 原來唔係喎, 佢話我要自己去搵, 之所以要登記, 係為咗將來有乜義工獎勵計劃, 而我嘅時數又達標的話, 就會頒發感謝狀之類或舉行頒獎禮時會邀請我出席喎.

我嘅本意只係想幫人, 而唔係為咗得到咩獎章, 早知登記只係為咗呢啲, 又如果早知佢哋唔會幫我搵義工, 我就唔會嘥時間上去登記.

既然所求非人, 唯有自己周圍上網摷資料.

其實好多機構成日請義工, 但大多數都係賣旗籌款居多, 我連買旗都唔想, 更何況賣旗呢, 而其他我有興趣參與嗰啲又冇乜, 所以無形中就少咗好多選擇.

終於分別見到兩三間機構啱我心水正在舉辦講座, 而時間剛好可以就到放工後, 即刻趕緊報名參加.

陸續聽晒佢哋講座, 有啲免費, 有啲要付行政費. 全程我都好畀心機聽, 亦不時發問, 表現得充滿熱誠. 當有小組討論時, 我亦以佢哋所教嘅技巧應對. 而每當要填可以履行義工時段時, 只要冇影響我正職時間, 就全部都填上, 包括每日放工後嘅時段, 公眾假期全日...... 我以為我將所有時間奉獻, 亦跟從佢哋所教嘅溝通方法, 應該獲用嘅機會好大, 所以信心滿滿地等佢哋電郵回覆.

一等到回覆日就急不及待地打開電郵, 當見到 : We are sorry to inform you....... 我就唔睇落去, 好明顯我已經落選.

當然, 一間落選, 我仲未氣餒, 依然繼續尋找義工的故事.

但係, 當一而再再而三都見到 : We are sorry to inform you 嘅時候, 亦令我一再地遭受到挫敗感, 於是就正式告別尋找義工的日子.

朋友話我聽, 大多數機構都想請一啲平時能夠分擔工作嘅義工, 而我只能工餘場, 好多人都可以, 所以少我一個唔少, 咪唔受我玩囉.

唔理朋友講嘅係唔係機構嘅諗法, 總之對我嚟講被拒諸門外就係事實, 令我對義工意興闌珊. 所以恁地而家當家驚我悶, 提議我去做吓義工, 我都寧願賦閒在家無所事事, 從無再萌生做義工嘅念頭.

有時啲嘢都要講timing, 若然我呢個自由身時候先至對義工工作產生濃厚興趣, 正正就係機構需要嘅日常時段, 水到渠成嘅機會就大大提高, 咁就各有所求, 皆大歡喜.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-3-5 11:12 |顯示全部帖子
朋友上個月先至報喜, 話搵到一份兼職, 係喺學校做文職工作, 當時佢仲嫌人哋係合約制, 話驚約滿後唔同佢續, 因為佢覺得份工好好, 想做到退休為止, 萬一人家唔同佢續, 佢就會好失望云云......

我當時仲安慰佢, 話如果佢做得好, 人哋點會捨得放佢走吖, 除非佢嘅崗位唔需要人啫, 否則同佢續都續唔切啦, 你估重新請個合適嘅人咁容易㗎咩.

點知呢頭至令佢稍為安心, 嗰頭就聽到佢話唔做.

吓!? 又話做得好好, 忽然來個大逆轉? 真係估佢唔到.

原來佢話開頭覺得個個都好似好好人咁, 做落先發現, 個個都有心病. 甲唔妥乙, 乙唔妥丙, 丙又唔妥甲乙, 總之每次被安排到一處地方工作, 總會聽到某某講某某嘅不是, 又睇到唔少互相推卸責任嘅場面, 作為新人, 好似一張白紙, 所以每一方都好似想將佢收歸旗下咁嘅款, 令佢不勝其煩, 唔想加入戰團.

其實之前喺網上都睇過一啲喺學校做工嘅討論區, 講述學校是非多, 人事複雜等等嘅題材, 我以為只係個別事件, 未必間間學校都有同樣問題, 而家聽朋友親身體驗所談, 才了解天下烏鴉一樣黑.

我單純地以為, 學校話晒係作育英才嘅地方, 處身其中, 應該感覺和平安寧, 樂也融融, 愛心滿瀉..... 何以竟然與一般職場無疑, 又係表面平靜, 內裡卻暗藏你虞我詐嘅局面.

由於未過試用期, 只需七日通知, 所以朋友暫時仲十五十六, 未正式遞信, 但就已經放咗聲氣畀高層知, 聽講高層現正游說佢繼續留下, 所以最終何去何從, 而家仲係未知數.

佢問我意見, 我只能好表面同佢分析. 首先, 人哋嘅是非有冇辣着佢? 如果自己嘅角色純粹只係做聽眾, 咁聽完咪算囉. 其次, 工作上吃唔吃力, 能否應付到? 再者, 與說是道非嘅人相唔相處到? 會否因為唔加入旗下而藉故留難?

經佢一番思考後, 覺得份工工作量唔重, 而同佢講是非嘅人對佢又冇乜嘢, 至少表面上客客氣氣, 至於背後有冇講佢壞話, 起碼佢聽唔到, 就阿Q地當冇.

聽佢咁講, 佢最終留低嘅機會好高, 始終未殺到埋身, 只係為咗避是非而請辭就划不來.

出來社會做事, 從來最難處理嘅就係人事, 只要超出一個人, 就會有是非. 而是非, 有啲係自招, 有啲係唔招都會無情情送上門. 所以入得職場, 就免不了有是非纏身, 根本防不勝防.




春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-3-14 11:49 |顯示全部帖子
近幾日, 教師喺校園自殺嘅新聞日日都有報導, 於是我就八卦地問喺學校做兼職嘅朋友, 有冇試過被逼害, 辭職嘅真正原因有否苦衷.....

佢輕描淡寫話雖然成日聽埋啲是是非非, 亦都知道每個人都各懷鬼胎, 不過整體上尚算和諧, 所以唔覺有被逼害. (都係嘅, 若然真係做得唔開心, 以佢嘅性格係寧願冇飯開, 都唔會為保住飯碗而委曲求全)

順便問佢係咪已決定留低, 佢話當佢遞信當刻, 高層叫佢再考慮一下, 佢亦聽話地暫時唔遞住, 但就悄悄地搵工, 心諗一旦搵到一份合適嘅就即刻遞信.

果然畀佢搵到一份啱心水嘅工, 人工高啲, 不過路途就遠啲, 佢唔理咁多, 二話不說就寄履歷表.

好嘞, 對方打電話約佢面試, 佢口頭答應會前往. 收線後, 佢開始盤算約得面試, 即係有機會被錄用啦, 一旦真係請佢, 會唔會做呢? 雖然人工比呢份高, 但係工種係屬於做到冇停手嘅職位, 咁條數咪喺返度? 而且路途偏遠, 時間都係金錢, 計落其實冇乜着數.

仲有就係, 當佢收線後, 居然萌起對而家份工嘅留戀, 明顯地唔捨得, 所以思前想後, 佢最後都推咗新公司, 繼續留喺度.

佢又話, 其實經過深思熟慮後, 佢覺得自己並冇非走不可嘅理由, 只不過係一時衝動耳仔軟, 聽人哋講幾講就唔做, 又睇唔過眼高層偏幫某某同事, 但明明好多事都唔係太過涉及佢, 所以佢都怪責自己自挖墳墓自尋煩惱, 亦後悔有搵過另一份工嘅舉動.

雖然知道係佢本身杞人憂天導致咁嘅局面, 不過我又冇理由踩多佢一腳㗎嘛, 所以就安慰佢, 話多得佢搵過另一份工, 才發現原來最好嘅就在眼前.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-3-23 17:02 |顯示全部帖子
本帖最後由 cforchat 於 19-3-24 11:33 編輯

最近同朋友返咗國內打掃佢間屋, 跟住無所事事周圍去睇樓.

我以為祖國樓應該平過香港好多, 原來稍為睇得上眼, 配套設施稍為好一啲, 地點稍為旺一啲..... 樓價只係比香港平少許, 當年返國內做皇帝支歌仔冇得唱咯.

雖然貴, 不過以咁嘅價錢, 喺香港係絕對買唔到, 只不過我嘅思維仲活喺上世紀, 以為人民幣好好使, 所以至大驚小怪.

其實計起上嚟, 依然算係抵, 尤其是管理費, 九百幾呎單位都係收百幾蚊, 聽到不知幾咁羨慕. 仲有一樣恨到我口水流嘅, 就係幾乎戶戶都有個大露台, 對於成日為晾衫而惆悵嘅我嚟講, 如果有個咁大嘅露台, 就唔駛擔心明是天晴有陣雨而影響外出心情.

最初, 我哋只係諗住喺附近睇吓啲新落成嘅單位, 但又礙於唔係間間可以自行入內觀光, 所以只好搵地產經紀轉介. 我哋列出一啲條件, 例如想睇幾大單位, 主要以附近為優先, 點知帶吓睇吓, 最後竟然帶到我哋去冇雷公咁遠連睇多間, 一時召的士, 一時話屋住係佢朋友, 所以就揸車接送...... 全程熱情招待, 搞到我哋鬼咁唔好意思, 明明一心係嚟混吉㗎嘛.

為咗唔再加深自己嘅內疚, 去到最後, 就算經紀依然熱心地為我哋到處搜尋筍盤, 我哋不得不婉拒, 推說要趕住回港, 唔得閒再睇, 否則真係有可能由天光睇到天黑.

回程, 返去佢間地產舖, 落車後不斷向佢道謝, 跟住話別, 點知佢仲客氣地招呼我哋入內, 仲即時沖茶畀我哋, 實在熱情得過份, 有見及此, 我哋唯有扮到好心急不斷睇錶話趕時間先至甩到身.

唉, 有時被招呼得太好, 都會有種無形壓力, 係咪算犯賤呢?

好嘞, 睇完樓跟住去醫肚, 沿途一路行一路睇吓有啲咩特色餐廳.

喺一間已坐滿人嘅食肆前駐足, 正在猶豫不決等唔等位時, 一位店員即時上前招呼, 原來內裡仲有位.

睇圖點菜後, 店員就拎一個漏沙斗嘅物體到來放喺檯面, 我哋不解地望住佢, 佢就解釋 : 這個是讓我們計時, 如果裡面的沙漏完....... 人哋都未講完, 我就急不及待問 : 是不是如果沙漏完, 我們還未吃完, 你就會趕我們出門? (當下心諗, 如果呢間食店有咁苛刻嘅規矩, 我哋就即刻走) 店員聽我問完之後, 佢都忍唔住笑, 一邊笑一邊講埋未講完嘅說話 : 如果沙漏完, 而你們點的菜還沒來齊, 那遲來的菜就免費, 不收你們的錢.

哦, 原來是這樣......

結果, 因為漏斗窿太細, 而沙又幼且多, 所以未漏到一半, 所點嘅菜已經全部送到, 店員點算後, 即時取走漏斗. 冇獲得任何優惠, 真可惜!

春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-3-29 08:48 |顯示全部帖子
我同當家係嗰種心直口快嘅人, 遇着一啲事, 就會咇哩巴啦口水多過浪花, 而且仲唔識揀時候, 總之想講就講, 完全冇諗過是否合時.

好似今早, 二人一早起身, 因為言語上涉及一啲問題又喺度高談闊論, 佢一言時我一語, 我發表意見時佢又暢所欲言...... 講到七情上面眉飛色舞, 根本冇理過天仲未光, 四周依然萬籟俱寂嘅情況下, 就算只係以平日嘅聲調都好應聲.

結果, 吵到吾兒要起身, 帶住睡眼惺忪兼帶點唔耐煩兼有少許黑面嘅語氣 : 咁早都有咁多嘢講, 真係要向你哋鼓掌.

聽完後, 兩老即刻噤聲, 我先至醒悟, 係喎, 掛住喺度講講講, 都唔記得有人仲喺度瞓緊覺㖭.

有時, 我哋自以為已經將音量收細, 其實喺外人聽來, 根本仲清晰可聞, 難怪有時母親與我講悄悄話嘅時候, 成日話我大喉嚨, 叫我細聲啲. 但在我嚟講, 明明已經好細聲㗎喇喎, 可見講到興起時, 就會不知不覺提高音量, 所以同我講悄悄話嘅人, 最慣常嘅動作就係提示我細聲.

至於當家, 我懷疑佢根本就有少許撞聾, 所以唔覺自己講嘢大聲. 好似有時佢喺家中播歌時, 會調得好大聲, 對佢嚟講啱啱好, 對我哋嚟講就過於吵耳, 令吾兒要不斷提醒佢細聲, 以免遭鄰居投訴.

好嘞, 冇得炸機, 佢就索性戴耳筒, 一旦戴上耳筒, 就彷如置身世外境界, 完全聽唔到我同佢講嘢. 有時我唔知佢戴住耳筒, 照平時同佢講嘢, 見冇反應, 我就知佢去咗世外, 於是加大分貝, 又冇反應, 再加大, 依然冇反應, 搞錯呀, 我嗌到拆天都聽唔到, 就上前大力拍佢, 佢先至回到現實. 每次我怪責佢開得咁大聲, 一來聽唔到人講嘢, 二來對耳仔亦唔好, 佢總係否認, 話已經好細聲喎..... 咁都叫細聲, 明明戴住耳筒㗎嘛, 但我可以清楚聽到佢播緊咩歌喎, 如果唔係開得大聲, 點可能聽到呢, 佢推說話係個耳筒太過傳聲喎.

佢諸多藉口, 無非都係唔想承認自己撞聾啫嘛.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-4-4 10:33 |顯示全部帖子
有一次企喺路邊等過馬路, 見有架大旅遊巴準備轉彎駛過來, 於是就諗住等埋佢駛過至過馬路.

但係架旅巴遲遲未駛過, 只因本身路面狹窄, 再加上路邊被遺下一個狀似垃圾筒嘅竹籮, 搞到架旅巴唔夠位轉入直路. 眼見因為咁樣阻滯而形成一條唔大唔小嘅車龍, 我就二話不說, 動手將個竹籮推埋一邊.

旅巴司機以及導遊即時喺車上向我投來致謝手勢, 嗰刻我覺得自己都幾見義勇為.

喺旅巴徐徐喺身邊駛過時, 我不自覺望向車內, 見到成車乘客專注地望住導遊講解, 唔知點解, 腦海忽然萌生起對導遊行業嘅興趣, 好想加入佢哋嘅行列.

於是即刻走去工聯會查詢, 睇吓有冇一啲關於導遊培訓嘅課程.

結果唔只有, 而且如果合資格報讀, 仲有津貼㖭. 有得學又有錢袋, 條數好划算, 搞到一向性急嘅我勁想即刻就開班.

十劃都未有半撇, 我已經幻想定有一日身處旅巴內, 耐心地向遊客介紹香港嘅景點時, 見到遊客們全神貫注聽我講解嘅畫面...... 一定非常有滿足感.

不過, 當我再三睇清楚教學嘅內容之後, 就漸漸洩氣, 因為不僅要背熟香港歷史又要熟悉街道方向...... 對一個早已經放下書本兼冇乜記性嘅人嚟講, 考試肯定肥佬, 唔駛旨意攞到導遊牌. 冇牌就自然冇得加入行列, 咁即係冇得被遊客聽我講歷史, 咁我咪冇咗份滿足感囉, 嘥氣.

呢個時候, 一位做校車保姆嘅朋友出現, 佢同我講 : 其實做導遊同做校車保姆差唔多, 都係對住一班人講嘢, 分別嘅只係一班係大人, 一班係細路啫嘛, 你想搵滿足感, 易啦, 嚟緊我有兩日唔得閒要搵替工, 不如你幫我頂啦, 一來我唔駛周圍搵人, 二來亦正好畀你感受吓另類導遊嘅滋味.

都好喎, 反正工作形式一樣, 仲唔駛我講歷史又唔需要認路, 而且對住小朋友點都應該好過對住遊客吖, 前者話晒年紀細容易控制, 後者三山五嶽人馬龍蛇混雜乜都有齊, 一個處理得唔好就大件事, 所以都係唔好搞.

未開工前, 我幻想企喺校巴內, 為咗驚啲小朋友悶, 我就會攞住支咪對住佢哋輕聲細語講吓故事, 玩吓小遊戲....... 車廂內一定洋溢住天真無邪夾雜住童稚笑聲嘅溫馨場面.

事實上係, 就算開住咪, 聲浪都蓋唔過幾十隻生番嘅聲浪, 可能佢哋喺校內已經守足規矩, 一旦冇老師監場, 仲唔如甩繩馬騮般依嘩鬼叫大玩特玩咩. 最終我支咪嘅用途只得一個, 就係叫佢哋安靜. 而我設定好嘅故事遊戲環節則胎死腹中, 我想像嘅溫馨場面變咗恐怖樂園.

可能我將失望心情寫喺臉上, 所以司機望一望我, 就安慰 : 係咁㗎嘞, 難得冇王管, 邊度叫得聽吖.

小朋友尚且如此, 大人世界更加難搞, 經此一役, 我完全放棄做導遊嘅念頭.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-4-9 11:05 |顯示全部帖子
喺朋友未做學校兼職前, 喺佢未講咁多校內嘅點滴畀我聽前..... 曾經, 我對學校嘅工都有憧憬, 以為話晒係學校, 工作環境應該好和平, 人事之間應該好單純...... 點知, 親歷其境後, 先至知道根本與一般職場冇分別.

縱使喺好多討論區見過唔少對學校工作嘅評論, 但始終唔熟悉討論者, 唔知佢哋嘅性格, 係屬於吹毛求疵吖, 抑或係撩事鬥非, 定係少見多怪..... 因為唔同性格, 處事嘅態度亦唔同, 所以好難以佢哋個人嘅評論而作出客觀嘅推測, 一日自己未親自領略過, 都唔敢妄下結論.

後來, 朋友入職後, 斷斷續續爆啲料畀我聽, 雖然都相信佢講嘅嘢, 不過我都係嗰句, 針未拮到肉唔會知痛, 我可以理解佢部份諗法, 但未至於百份百完全明白佢感受.

適值一次佢學校搞一個大型活動, 需要大量義工, 本來學校嘅義工, 多數都係學生家長擔任, 但礙於一啲涉及學校內部嘅資料, 唔想畀家長知道, 以免有利害衝突, 所以就要搵一啲與學校冇關嘅人, 結果朋友就搵咗我呢個閒人.

我呢類義工嘅需求唔多, 只需兩三個, 做嘅都係關於活動前夕嘅預備工作, 大約兩三日就搞掂. 由於只係義務性質, 所以校內各人都對我哋客客氣氣, 氣氛尚算融洽.

可能義工嘅工作範圍簡單輕鬆, 唔會被寄予重任, 所以有好多空餘時間畀我冷眼旁觀, 去留意一下佢哋嘅工作情況, 係咪正如朋友所講嘅咁複雜.

事實證明, 朋友所言非虛......

校長明顯地包庇某位同事, 就算某位同事受盡千夫所指, 校長都要眾人息事寧人大事化小小事了了.

訓導主任看似對事件抱打不平, 但只係一隻冇牙老虎, 除咗無奈之外, 睇唔出可以做到啲乜.

副主任雖然口話要公平, 但係處事手法, 一啲都唔公平.

大部份老師尚算客氣, 只有少部份係眼睛長在額頭上.

文職之間面和心不和, 你唔妥我我唔順你, 偶然都做得幾出面, 否則都唔會畀我睇到.

原以為校工大家咁高咁大, 理應互相照應分工合作, 點知唔係喎, 因為一兩個練精學懶諸多計較, 令致其他人不藉其所為而按章工作, 大家互不理睬各顧各, 所以與佢哋共事時, 周遭彷似被一股怨氣籠罩住.

最終總共做咗四日, 朋友問我做後感, 我話間中客串吓無妨, 長做就咪搞嘞, 要長期處身於一個咁嘅工作環境中, 身心又豈會康泰吖.

唔經歷過, 都唔知看似應該人事簡單嘅學校, 竟然比一般公司更似戰場.

喺我未接觸某些行業前, 就以表面嘅風光而好想入職, 而喺機緣巧合下, 又可以畀我入到類似嘅職場喎, 例如導遊, 例如學校.....

但係, 當親自感受過嘞, 才發覺與自己天真嘅想法唔係同一回事, 導遊如是, 學校如是..... 你睇好嘅背後, 其實係有好多陰暗面, 同埋一啲不為外人所知嘅辛酸.

試過就算, 以後唔會再諗關於導遊同埋學校嘅工作.

唔知嚟緊, 我又有乜行業想入㗎呢? (當然只限於我夠資格嗰啲啦, 例如醫生律師會計師...... 梗係冇我份啦)
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-4-16 09:58 |顯示全部帖子
上次去朋友間學校做義工, 學校有提供午餐, 正諗緊唔知點咩餐好嘅時候, 朋友細聲同我講, 無論點咩餐都係一樣....... 咁難食.

細問之下, 先至知原來唔係叫外賣, 係要求學校嘅飯商加多幾個飯盒.

照計畀得學生食, 理應營養豐富, 賣相吸引至係㗎, 點會唔好食呢? 以前吾兒都係因為覺得飯商嘅飯好味, 所以就算有自家飯盒都唔帶, 係都要光顧飯商, 仲話到而家都仲好回味.

朋友居然嫌難食, 一定係佢要求高..... 我喺心裡暗忖.

當飯盒遞到我面前, 未打開蓋時, 我用手約略秤一秤, 輕飄飄嘅, 內裡係飯定係餸呢? 點解飯與餸要分開呀, 咁咪嘥多一個盒囉. 於是我唔打開住, 諗住等齊先至一齊開嚟食.

跟住朋友坐嚟我側邊, 準備同我一齊開餐, 佢問我做乜仲唔食, 唔駛等埋佢咁客氣喎..... 佢一邊講, 一邊已揭開佢自己盒飯, 我一見到, 即刻嚇一跳, 唔係嘛, 原來輕飄飄飯盒內已隔開一小撮飯一小塊肉同埋一小束菜, 全部的的骰骰, 唔怪得咁輕啦, 咁嘅份量食得飽咩?

朋友叫我唔好咁快下定論住, 食咗先講.

我將信將疑, 難道此飯盒與五餅二魚同樣有神奇力量?

食咗幾小口之後, 我就明白朋友講緊乜, 全盒飯冇一樣好食, 根本冇辦法可以食得晒, 因為實在難以下嚥.

朋友見到我對住盒飯皺晒眉頭, 陰陰嘴笑 : 係咪冇講錯呀, 你仲嫌份量小, 畀多你都食唔落.

以為冇外在美, 斷估應該有內在美啦, 點知兩樣都欠奉, 早知我自己帶麵包啦.

朋友話基本上除咗學生之外, 其他同事都唔再吃飯商嘅飯, 而就算訂飯嘅學生, 好多時一盒飯都食唔晒, 所以點解份量唔多, 就係唔想浪費.

既然咁難食, 點解唔轉飯商呢? 朋友話內部嘢佢唔多知, 所以無從稽考.

臨收工嘅時候, 見工友攞住幾個飯盒行過, 我多口問佢拎去邊, 佢話攞去扔, 因為有啲學生臨時請假又冇事先通知, 所以剩下幾盒飯, 問我要唔要.

為免浪費, 亦可以省回一餐唔駛煮, 我當然樂於接收幾盒飯啦.

雖然難食, 但以當家一向好有食德嘅性格嚟講, 任何食物只要唔太硬唔太辣, 佢都欣然照單全收.

攞住幾盒飯返屋企途中, 見到有一個執緊紙皮嘅大叔, 我就拎咗一個飯盒出嚟畀佢(雖然有啲尷尬, 不過我以做義工去派飯嘅心態克服咗), 最初佢滿心歡喜, 跟住望到盒飯就婉拒咗. 就算我多次強調盒飯係乾淨未食過, 佢依然唔要. 唉, 估唔到食都未食過, 只望吓外盒就已經唔吼.

其實沿途我不斷搵吓有冇一啲喺垃圾桶摷食物嘅流浪漢, 我相信佢哋既然連被掉棄嘅垃圾食物都唔介意, 我呢幾個飯盒, 對佢哋嚟講簡直係美食. 可惜行勻晒垃圾桶嘅設置處, 都見唔到一個半個身影.

仲諗住派得出去就全部派晒去㖭, 點知最後都係要攞返屋企.

不出所料, 當家全部解決掉, 不過就一路食一路彈 : 飯太乾肉冇味菜賣相似垃圾...... 以一個對食嘢冇乜要求嘅人嚟講居然成為百彈齋主, 可想而知呢個飯商都幾失敗.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-4-24 09:28 |顯示全部帖子
以前每逢行超市, 大多數都係因為想睇吓有冇一啲自己鍾意嘅零食類做特價, 一旦發現, 就會瘋狂入貨, 從來唔會諗就快到期或食唔食得晒或好唔好食, 總之就買咗先算.

當家成日話我係嗰種旨在先擁有, 其餘問題都係後話嘅人, 所以直至今日, 依然成日會為囤積嘅存貨而大費周章, 亦會為要清存貨所吃下嘅零食而產生罪惡感..... 雖則如此, 但仍舊不時逛超市, 只為想搜刮更多, 冇得救!

自從開始睇片學製作一啲平時鍾意嘅食物之後, 行超市嘅時候, 就少咗好多期望, 唔會再好似之前咁, 想有驚喜發現至愛買之而後快, 反而唔想見到, 費事個心十五十六, 買又唔係唔買又唔係.

想買嘅原因當然係為咗食啦, 唔買嘅原因係只要上網就可以識整, 無謂嘥金錢.

而家好大部份都係唔買居多, 一來好少再有特價, 二來就算所謂特價, 相比起以前已經貴咗好多, 一啲都唔划算.

其實好多次, 我已經狠狠地將之放入購物車內, 諗住一次半次無妨嘛, 但係計吓條數, 自己整嘅成本平成一大截, 而且仲較為健康啲㖭..... 最後, 臨到收銀櫃位前, 幾乎已全部放回原處.

就係自恃自己識整 (識整同好食係兩回事), 所以已經好耐再冇買零食, 慳埋唔少額外消費.

又, 我以為自己真係會的起心肝整嚟食, 結果係一次都未整過, 即係又慳埋唔少累腸胃要額外消化嘅負擔.

所以呢, 有時懶都未嘗唔係一件好事, 除咗唔想整嘢食之外, 就算整都係為填肚而唔係為滿足口腹之慾.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-5-2 11:09 |顯示全部帖子
安心事件哄動一時, 雖然已經算過咗一段落, 不過都等我乘機抽吓水先......

事件被廣泛流傳當日, 聽講好多人一早就知, 直頭係呢頭影片被上傳, 唔夠五分鐘已經一睹為快. 梗係啦, 佢哋成日喺網上平台流連, 平台出名轉載快, 當然快人一步啦.

而我要去到當晚睇電視, 見到螢幕好多鎂光燈閃過不停, 根據以往, 通常係即場開記者招待會先至有咁嘅場面, 於是好奇地望吓電視, 見到男方一把鼻涕一把眼淚...... 我問一早已伏喺電視機前嘅當家發生咩事, 佢話唔知同邊個發生咩車廂事件喎..... 唔知邊個? 跟住佢就講咗女方個名, 話好似係講緊佢, 總知佢都一嚿雲啦.

佢一直睇緊都話一嚿雲, 何況我半途先至出現, 更加唔知咩事, 只係乍聽女方個名之後, 即時反應係 : 吓!? 佢哋有"啦lung"咩? 係咪聽錯呀? (我唔知佢哋曾經合唱過歌, 亦唔知佢哋成日喺網上平台有互動, 只單純地認為一個係歌星一個係藝員, 又未曾合作過, 簡直九唔搭八, 何來會傳緋聞呢)

既然一知半解, 我就叫當家上網睇吓有冇人發片, 佢開頭堅持認為就算有片都被有關人士刪除, 以免破壞雙方形象, 我雖然都覺得有啲道理, 不過都姑且搜尋吓, 話唔定有啲漏網之餘呢.

結果真係發現有喎, 於是就由頭睇到尾......

最初從影片所見, 男女雙方似乎飲大咗, 因為有少少口齒不清. 但係睇睇吓, 又發覺醉極都有三分醒, 至少仲識得指揮行車方向, 而且二人又甚有默契地打發同車朋友走, 又口徑一致地講出下一個目的地, 好明顯係有備而至.

以旁觀者角度睇, 男方一直處於被動, 其實未至於罪大惡極, 始終靚女主動投懷送抱, 邊個男人會抵擋得住吖. 你話如果雙方角色互調, 男嘅飛擒大咬, 女嘅處於被動, 咁家室男肯定被世人唾罵, 事業一筆清, 從此消失於娛樂圈.

相反, 女方卻表現進取, 多次作出挑逗撩弄手口並用, 男人唔抗拒係一回事, 佢嘅所為, 足以被冠上水性揚花兼淫蕩之罪名, 睇怕將要永遠離開水銀燈下了.

所以有時啲嘢, 冥冥中自有主宰, 姑勿論私底下如何男歡女愛, 只要喺呢程車內, 女方稍為矜持吓, 男方稍為放恣吓, 咁劇情就可能會被改寫 : 男嘅妻子下堂求去, 女嘅就會以受害人姿態被群眾以弱者身份愛護有加平步青雲, 男友亦可能會因憐愛而娶之回家.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-5-5 12:03 |顯示全部帖子
安心事件之所以引起外界譁然, 因為雙方與另一半都係知名人士, 男方亦都係有婦之夫, 兩夫妻經歷多次離合才走埋一齊, 點知輕易就被女方擒獲, 加上女方係以乖乖女形象入屋, 誰知真面目竟然如此開放, 所以事件先至咁大迴響.

假如男未婚女未嫁, 就算已有拖友, 坊間都會以佢哋未搵到對的人, 因而要尋尋覓覓, 作為開脫嘅藉口而放佢哋一條生路.

可惜事實唔係咁樣, 所以偷食方被原諒嘅指數相對降低. 男方還好, 始終係被動, 若干日子又可大模斯樣出嚟面對群眾. 至於女方, 如無意外, 娛樂事業應該止於此.

呢件事令我諗起自己卜卜脆嘅時候, 曾經亦對一個有婦之夫有好感, 不過一知道佢已成家立室, 我就即時卻步, 從來冇諗過有發展空間.

認識佢之前, 我有一段初萌芽但過程像霧像雨又像花嘅感情, 或者係因為摸不透對方到底想點, 搞到心如鹿撞嘅我不知情歸何處時, 忽然遇到一個與對方有八成相似嘅有婦之夫, 一時意亂情迷之下, 以為上天對我咁我, 得唔到一個, 卻賜畀我另一個, 於是不自覺地_就想將感情投放喺佢身上. 點知相識唔夠一個鐘, 就聽到晴天霹靂唔只已婚仲有兒有女嘅消息, 當堂個心碎到一地, 硬生生將本來想投投地嘅感情抽出嚟.

其實我對佢有心之時, 亦感覺佢對我都有意, 我以為只係自己一廂情願諗多咗. 直到一次, 一位共同朋友話我知, 人夫搵佢把酒談心, 言談間透露如果唔係已成家, 一定會向我熱烈展開追求攻勢....... 我又何嘗唔係咁諗吖, 如果早於佢成家時就認識而一拍即合, 我就唔駛被一段多次死灰復燃嘅霧水情纏繞多年欲斷難斷.

唉, 大家喺錯嘅時候遇上對的人, 只能嘆句相逢恨晚.

哈, 而家諗緊個畫面, 當年假如我好似安心嘅女方咁主動, 趁人夫駕車載我回家時強吻佢, 結果會點呢?

1. 欣然接受.....

2. 推開我.....

3. 初時接受, 跟住推開......

4. 反客為主.....

um..... 我覺得應該會係1. 話晒正值血氣方剛, 而且又唔係討厭我, 應該會正中下懷, 可能仲想嚟個世紀長吻㖭, 留個紀念都好嘛.

至於2.3.4. ...... um.... 喺佢心目中, 我係純情乖乖女, 正常情況下, 應該唔忍心拒絕/傷害我, 費事我心靈受創嘛.

不過呢, 我又知道, 1.2.3.4.任何一個之後, 大家應該唔會再見, 因為一時衝動之下而打破之前愛在心裡口難開嘅局面, 一定會感到尷尬, 逃避係最好嘅方法.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-5-17 10:12 |顯示全部帖子
喺街上被一位好耐冇見嘅狗友捉住, 問我點解咁耐唔見我帶狗狗去晨操, 我話畀佢聽狗狗已經先行一步, 佢話唔怪得咁耐唔見我哋啦.

其實狗狗未走時, 由於後期行得好慢, 已經有一段時間冇行經佢嗰邊, 只係喺屋企附近散吓步就算, 所以對佢嚟講就覺得好耐好耐.

佢仲想問多啲狗狗離開嘅情況, 但可能礙於聽到我聲音開始哽咽, 佢就識趣地總結 : 他日狗狗走咗之後, 都唔諗住再養, 以免傷心....... 跟住大家就揮手道別, 各自去買餸.

之前天氣冇咁熱嘅時候, 曾經諗過去踩單車, 但係每每念及以前每一次踩單車, 都有狗狗同行, 假如再踏上單車徑, 已冇狗狗嘅身影, 恐怕會觸景傷情, 所以最終都係不了了之.

而平時帶狗狗行過嘅地方, 除非非走不可, 否則都盡量繞道而行, 以免眼前盡是與狗狗同行時嘅片段.

可能若干時日之後就可平伏睹景思狗嘅情懷, 可能.......已經冇可能.

以前帶狗狗去散步, 佢都健步如飛, 每當放繩後就隨意走動, 左聞聞右嗅嗅, 只係間中回頭尋找兩老, 見到我哋尾隨住, 佢就放心地繼續自由行.......

狗狗臨走前幾日, 依然帶佢去同一個地方, 可是今非昔比, 雖已放繩, 但步履卻不穩, 亦辨不清方向, 兩老就充當左右護法, 以防佢離隊.

當家自言自語 : 哈, 三個老嘢行街街!

聽完佢咁講, 我個腦浮現咗個畫面 : 我喺左, 狗狗中間, 當家喺右...... 就好似拍戲咁, 狗狗先消失, 中間位置空咗.

咁...... 下一個是誰?
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-5-22 11:23 |顯示全部帖子
本帖最後由 cforchat 於 19-5-22 11:34 編輯

關愛共享4000蚊, 有人已收到錢, 有人依然等待中.

當初因為手續繁複而引來怨聲載道, 又要遞表又要回郵又要地址證明, 搞到有啲人嫌麻煩而放棄申請.

好似有個親戚, 因為住喺公司嘅宿舍, 但係一切有關銀行信嘅地址, 全部都以阿媽嘅地址登記. 以佢嘅情況, 係應該要同時出示出世紙, 證明佢同阿媽嘅關係, 然後才能用阿媽嘅地址. 親戚係一個好怕麻煩嘅人, 知道要出示咁多證明, 就晦氣地話唔申請好過, 反正又唔係多錢.

後來政府順應民意, 申請人只要填上地址, 毋須附上證明, 銀行資料亦可有可無, 手續寬鬆好多, 親戚至肯遞表申請.

每當財政報告庫房水浸, 市民第一反應就係希望政府派錢, 仿傚鄰近澳門, 與民共享.

幾年前首次派六千蚊, 只要年滿十八歲香港居民人人有份, 當時曾引來一片喝采聲, 好多人紛紛喺社交平台留言, 盤算如何利用呢筆突如其來嘅意外之財.

但係喺喝采聲嘅背後, 亦有唔少抱怨聲, 埋怨政府處理欠周詳. 因為如果滿十八歲就有資格, 即係連嗰啲富豪一樣有得派. 對富豪嚟講, 六千蚊根本唔係錢, 與其令佢哋收到錢後嗤之以鼻, 不如將佢哋嗰筆分埋畀有需要嘅市民仲好.

有見及此, 政府今次就多行一步, 挪用公帑展開調查, 研究方案, 定立派錢界別...... 好嘞, 終於盼來令市民引頸以待嘅消息公佈與實行.

結果引來嘅唔係歡呼聲, 而係叫苦連天聲, 搞到政府又要急急更改應變措施, 才令聲音稍為平靜下來, 乖乖地跟程序申請.

經過一段漫長歲月, 經過篩選過濾, 最後才有資格被派錢, 不過唔好開心得太早, 因為未必可獲全數. (好似早前個案, 又填表又影印, 擾攘一番後, 最終只獲得幾蚊雞, 真係多謝晒!)

假如上次冇人怨, 唔排除今次依然會傳承首次嘅做法, 只需喺銀行登記戶口過數就得, 方便簡單快捷. 唔駛因要經篩選合資格者而要填表填資料, 費時失事.

與此同時, 又有不滿聲音出現, 投訴政府不善理財, 寧願大洒金錢用於行政調查上, 都唔將嗰啲錢派埋畀市民云云.

嗱, 今次富豪冇份嘞, 弊在亦連帶好多市民都冇份囉. 唔知當年抱怨嗰班人有冇份呢? 如果依然有, 證明佢哋真係屬於有需要嘅一群, 如果冇, 係咪可以同佢哋講 : 呢啲咪就係得一想再, 貪字得個貧嘅後果囉.

有感以上兩個方案, 得到嘅迴響都係毀多於讚, 所以我覺得站在政府立場, 其實都幾慘, 無論點做, 都係順得哥情失嫂意, 做乜都唔討好.

始終幾百萬人口, 真係冇可能滿足晒所有人嘅意願, 只望話事人本着良心做決策, 以大眾市民需求為大前提.

至於不滿嘅小眾, 只得兩個選擇 : 接受與不接受!

接受者, 順其自然; 不接受者, 繼續怨天尤人.


春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-5-26 18:48 |顯示全部帖子
從吾兒嘅口中得知, 佢有好多同學仔已經拍緊拖, 我問幾時輪到佢, 佢語帶無奈 : 唉, 冇架嘞!!

喺每個阿媽眼中, 自己嘅兒女一定係標青, 我亦唔例外, 覺得吾兒雖不及潘安(其實潘安究竟係咩嘢樣我根本唔知, 亦未見過, 只係古人總係以潘安嘅容貎嚟形容靚仔, 所以我又拾人牙慧搬潘先生出嚟), 但尚算五官端正, 何以居然一把年紀仲未有拖拍呢, 唯一解釋就係佢奄尖揀擇, 因此我成日提醒佢唔好咁高要求.

雖然為佢乾着急, 但係我亦知道緣份嘅嘢強求不得, 係你嘅自然會屬於你, 唔係你嘅就算而家擁在懷裡, 最終都會另投他人懷抱. 所以對於能否飲到新抱茶, 能否抱孫, 我只能順其自然.

一日, 吾兒甫回到家, 第一句就講 : 媽媽, 我失戀呀!!!

由於佢語氣平淡, 加上平時鍾意講笑, 所以我即時嘅反應係 : 哈! 你唔好玩啦!!

跟住佢乜都唔做, 坐咗喺張櫈度一本正經講 : 係真㗎, 我真係失戀呀!

見佢唔似係講笑, 我亦當堂收起取笑佢嘅表情, 聽佢細說從頭.

佢話剛啱失戀, 冇心情講得咁詳細, 留待日後再補充, 只係約略講少許......

最初係女方主動示好, 由於事出突然, 佢就同對方講, 自己未有心理準備, 女方唔介意, 話會一直等佢預備好後至開始.

經過一段短時間嘅相處, 吾兒開始接受女方, 點知呢個時候, 女方又話唔玩喇喎 (乜現代愛情故事咁兒戲㗎?), 所以咪搞到吾兒嘅心唔上唔落, 未曾相戀已失戀, 未曾深愛已無情囉.

回顧吾兒嘅所謂嘗試拍拖期間, 面相冇特別甜蜜, 外出嘅次數冇特別多, 言談舉止唔覺有何差別..... 難怪兩老一啲都覺察唔到佢當時正在拍拖中.

所以我忍唔住問佢 : 人哋拍拖成日去街㗎喎, 但係你都冇, 你哋神交呀?

佢話間中有約出嚟見, 不過唔算多, 所以我哋唔為意.

其實嚴格嚟講, 咁邊算失戀吖, 根本戀都未戀過. 不過對於吾兒嚟講, 話晒都係首次接觸情呢個字, 點知卻慘遭滑鐵盧, 心情難免戚戚然, 所以都要加以安慰.

兩老咪同佢講 : 大多數人都要經歷幾段情先至遇到對的人, 所以唔駛為一段失去嘅情而傷感. 話唔定呢個女仔, 係為咗要成就你將來另一段情而出現喺你生命中, 讓你學習一啲嘢嘅其中一位過客, 所以你唔好嬲佢, 反而應該要多謝佢.

每當吾兒偶有失落時, 都鍾意我喺身邊陪伴, 所以雖然極睏, 都盡量陪佢秉燭夜談, 直至倦極而睡.

呢段玩泥沙之戀, 好快就煙消雲散, 吾兒表面上亦回復正常 (內心係咪依然在淌血我就唔知).

事件淡咗之後, 當我哋八卦問佢關於與女方嘅相識經過相處點滴時, 佢居然食言唔肯透露半句. 可惡! 明明當時佢話事後會話畀我哋聽㗎嘛, 過橋抽板!!
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-5-30 10:23 |顯示全部帖子
尋晚睇電視, 其中一段講有位工人姐姐去街市買餸, 見到雞檔有兩隻小唐狗屈喺雞籠內怪可憐, 於是向檔主查詢, 檔主索價$150/兩隻, 工人姐姐唯恐會被其他人買下而有可能傷害狗狗, 於是二話不說急急付款, 將兩隻狗狗帶回家.

難得工人姐姐咁好心腸, 所以主人亦將事件嘅始末向採訪人員道出, 並希望能為兩隻狗狗搵到一個溫暖嘅家, 讓狗狗快樂健康地生活.

當時見到報導, 我問當家, 如果佢遇到相同情況, 會唔會畀錢買狗, 佢話會, 只因出發點同樣都係諗住先救下狗狗才算. 我亦相信自己都會咁做, 而且會要求檔主借埋雞籠畀我運載狗狗回家才歸還.

狗狗回家後, 我諗都會順理成章收留佢哋. 只係屋企突然多咗兩位成員, 一時之間肯定難以適應. 唔只因為地方淺窄而感到擠逼, 仲有就係未來十幾年又要負起照顧佢哋嘅責任,最重要係, 當佢哋先我哋而去時, 又要經歷一場死別嘅依依不捨而傷心難過.

另外, 再度養狗嘅話, 就意味住未來日子, 想一家人去旅行就冇可能, 點都要留個人喺度照顧狗狗. 而就算只係外出逛吓街購吓物食吓嘢, 都會人在外而心繫家中嘅狗狗, 搞到出街都出得唔盡興.

又, 之前狗狗離去嘅同時, 為免睹物思念, 已經將佢所有嘅用品畀得畀扔得扔, 而家又要重置一切狗狗物品, 而且仲要打孖, 雖然有猶豫, 不過都唔算係大問題.

最關鍵反而係, 基於個人偏好, 我較為喜歡狗仔, 狗女唔係咁鍾意. 假如救回家嘅係仔就最好不過, 萬一兩個都係女, 又或者係一仔一女, 咁我都唔知點做好. 要仔唔要女我又做唔出, 兩個女都要, 我又唔多願意.

唉, 可見我根本唔係有愛之人, 否則應該係有愛無類, 而唔係要仔唔要乸.

至於兩位新成員嘅名字, 我同時都有諗過, 為咗紀念狗狗, 新成員將會以狗狗嘅名字拆出嚟. 例如狗狗叫COCO, 兩位成員就分別叫CC同埋OO. 又例如叫ROCKY, 咁一個就叫阿ROC, 一個就叫阿KY. 如果係中文就拆字或部首. 例如阿卡, 就一個叫上上, 一個叫下下. 又例如旺財, 就當然係一個叫阿旺, 一個叫阿財啦. 若然係一仔一女, 旺財兩個字始終係男仔名, 咁就男嘅照舊叫阿旺或阿財, 女嘅就取諧音, 汪汪或CHOYCHOY或阿彩 , 就算兩個都係女仔, 一樣用得着........

哈, 只係睇咗短短數分鐘嘅報導, 我個腦已經千回百轉無限想像, 假如真係成為事實, 怕且會死好多細胞顧慮多多.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-6-4 11:29 |顯示全部帖子
本帖最後由 cforchat 於 19-6-4 11:33 編輯

細個時, 好鍾意睇"小甜甜"卡通片, 嗰陣時逢星期日早上八點就會播半小時.

由於放假, 本想瞓晏啲至起牀, 就係為咗要追看, 成日都要早啲起身. 又因為冇鬧鐘, 只能盡量提高意識, 希望到時到候會知醒, 點知好多時唔係瞓到八點幾至醒, 就係瞓到九點幾先起身, 結果真真正正能夠睇到一整集嘅機會唔係咁多, 斷斷續續冇頭冇尾, 所以對劇情發展知啲唔知啲.

早幾年, 喺一個偶然機會下, 買咗成套劇集嘅光碟嚟慢慢煲, 果然有好多好多段都未曾睇過.

我覺得以前嘅卡通片都畫得好靚, 除咗"小甜甜"之外, 仲有"仙女下凡", "人魚公主", "淘氣小雪兒".......

其中又以"小甜甜"最多男角, 安東尼, 迪理斯, 阿枝, 歐拔先生...... 個個都好靚仔, 所以好羨慕小甜甜, 能得到咁多男仔青睞同埋照顧.

喺電視睇, 係配上廣東話, 聽同學講, 配安東尼把聲好老 (嗰陣我完全冇機會睇到有安東尼出現嘅場口), 完全破壞晒後生靚仔安東尼嘅形象, 總之安東尼嘅聲音被彈到一文不值. (後來有段時間喺下午重播, 雖然都係睇啲唔睇啲嘅情況, 但係終於都見到安東尼, 果然係一把與安東尼唔多夾嘅聲音, 怪怪的)

還好我買嘅光碟係日語配音, 若然係國語或廣東話, 都唔知買唔買好, 始終原裝係日本, 如配上其他語言就顯得突兀.

小甜甜雖然出身喺孤兒院, 又成日遭到同伴欺負, 但佢依然活潑開朗堅強面對, 所以佢大部份時間, 都係笑容滿面, 充滿正能量. 而身為觀眾嘅我, 亦都好少為佢洒下同情淚.

除咗以下兩幕 : (由於年代久遠, 好多都印象模糊, 只係約略記得咁上下嘅內容)

佢與少時玩伴(唔記得叫咩名)再度重逢, 小甜甜歡喜若狂, 但玩伴礙於被收養後身份已今非昔比, 所以只能冷淡對待小甜甜與之保持距離. 小甜甜亦明白玩伴身不由己, 只能憶起以往同玩同生活嘅片段而傷心難過......

有一段時期, 小甜甜與迪理斯讀同一所學校, 本來近水樓台, 卻遭人一再破壞拆散. 結果二人先後為對方而離開學校. 後來二人不約而同回到小甜甜成長嘅地方, 互相思念互相懷緬. 天意弄人, 喺同一地點, 卻擦身而過緣慳一面.....

以上兩段, 唔只小甜甜哭, 我都睇到淚流滿面. 人生, 實在太多遺憾.

我亦好鍾意片頭同埋片尾曲, 前者輕快後者憂傷, 就好似每次興高采烈開嚟睇, 結尾卻大多以傷感告終.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-6-8 12:52 |顯示全部帖子
小甜甜其中一段, 講小甜甜做咗護士, 佢以愛心周旋於病榻中, 悉心照顧病者, 令病者心理上得到安慰時, 亦減輕不少痛楚.

一邊睇, 我一邊幻想, 假如我係醫生或護士就好嘞, 除咗醫病人嘅心, 仲可以醫病人嘅身, 非常之有意義.

可惜現實中, 我既沒資格做醫生, 更加冇本事做護士, 所以一切嘅幻想, 亦只能化為夢想, 發夢才可以想也.

或者係因為咁嘅原故, 所以就諗住退而求其次, 專業人士做唔到啫, 可以喺一啲診所做護士, 雖然與實際嘅白衣天使相差九萬里, 只係做吓登記探吓熱聽吓電話幫吓醫生做吓下把手, 甚至連清潔都要做埋, 我都唔介意.

我一心嘅理念係, 上得門光顧, 一定係身體唔妥, 我希望能以愛心, 能令佢哋唔舒服稍稍得到紓緩, 咁我就可以發揮到小甜甜嘅精神.

於是, 我就留意招聘欄, 睇吓有冇一啲附近嘅診所請助護, 最緊要係冇經驗要求, 否則我嘅夢想就冇得實現.

皇天不負有心人, 終於畀我發現一間準備新開嘅診所, 正在聘請兼職助護, 雖然寫明經驗優先, 我係冇經驗, 不過唔代表冇機會㗎嘛, 所以都厚住臉皮打電話問詳情.

接電話嘅係醫生本人, 我首先問佢係咪一定要有經驗, 如果係肯定, 咁我就會收線, 無謂浪費佢時間. 佢嘅答案幾模棱兩可, 話之前有幾個打去嘅應徵者都有經驗, 不過又唔係必然, 要視乎邊個時段有冇人肯做至決定, 因為好多都唔肯做星期六日同埋公眾假期.

我二話不說就話樂意做人哋唔肯做嘅時段, 反正住得近, 要做咩鐘數都冇所謂, 佢聽完我咁講, 就好滿意話 : 非常好!

跟住佢又問, 如果有病人例如一位婆婆發脾氣, 投訴等咁耐仲未輪到佢, 我會點應對? 我話 : 我會將心比己, 本身已經唔舒服, 仲要等咁耐都未能見到醫生, 心情一定唔好, 所以, 我就會以溫柔嘅語調加以安撫, 婆婆, 醫生要詳細為每個病人睇症, 所以會阻遲少少, 輪到你時, 一樣會咁細心為你檢查㗎. 要你等咁耐真係唔好意思, 不如我斟杯水畀你飲吖好唔好呀? ...... 我諗, 對方應該會稍為消消氣.

醫生聽完我嘅答案, 似乎亦好滿意, 同樣講 : 難得你咁有同理心, 非常好!

全個對話約莫有廿分鐘, 雙方言談甚歡. 整體上, 我覺得佢對我幾滿意, 所以好有信心能圓夢, 並已經同當家吾兒單聲, 日後嘅假期, 我將會好唔得閒.

等呀等, 日子一天天過去, 可是卻未收到醫生任何訊息. 最初, 我還自我安慰, 人哋都未開張, 急咩啫? 但係, 隨住開張日漸漸臨近, 依然音訊全無. 就算對我滿意極, 始終只喺電話交談, 又唔知我乜頭乜樣, 點都要見吓面啩? 連見都唔駛見, 好明顯我已經落選啦.

我以為, 醫生打開門應診, 係想請一啲嬌俏可人嘅後生女, 讓病人未治已療好一半, 所以我不被選乃屬正常. 於是我喺開張日就八卦諗住去診所裝吓, 睇吓啲靚女嘅質素如何高.

去到時, 診所未開門, 但係就有幾位貌似應該係助護嘅女士企喺度, 因為我聽見佢哋互相問大家住喺邊度, 之前做過未. 當中有鄉音未除者, 有師奶者, 有面容少許瑕疵者...... 有見及此, 我唔再為落選而耿耿於懷了.

有時間中會經過, 望入內, 見到只有一兩位病人在等候, 但係更多時, 偌大嘅候診區只得一排排空櫈, 一個人都冇.

罪過! 我竟然有少少幸災樂禍嘅心態. 哈, 假如我喺度做, 恐怕會好忙, 忙住拍烏蠅. 仲有, 咁嘅情況, 應該唔會有老人家投訴等得太耐而發脾氣. 而我, 姑且都要執定包袱, 以備醫生以生意唔好要縮減人手而裁之.
春有百花秋有月, 夏有涼風冬有雪, 若無煩事掛心頭, 便是人間好時節.


大宅

積分: 2644


發表於 19-6-17 12:20 |顯示全部帖子
我諗當初立"逃犯條例"嗰班人, 誓估唔到會造成如今呢個局面.

對於我呢啲無知無覺嘅人嚟講, 條例係針對犯事嘅人, 若然行得正企得正, 駛乜驚呀? 直至聽完各方面嘅分析之後, 先至知背後可能存着某啲陰謀, 我才恍然大悟.

雖然政府口口聲聲話已因應民意, 將條例一改再改, 又刪除咗好幾條方案, 意思即係已經將原本只屬輕罪犯就要移交, 改為極度重犯才會交畀有關方面審理.

法例通過前就梗係話乜都得乜都有商量乜都可修改, 一旦通過後, 就關人鬼事, 理得你係真入罪定係莫須有啦.

就好似歷任特首, 競選政綱拍晒心口話會點樣改善民生, 點樣聽取民意, 結果一個二個在位時都搞到七國咁亂, 唔只未能令市民安居樂業, 仲令到民怨沸騰.

其實一早都知, 只要係委任, 唔係經民意選出嘅話, 無論邊個做特首, 都猶如燙手山芋, 死路一條. 我善意咁諗, 可能佢哋嘅初心, 真係想香港好, 奈何做落之後, 先至發覺只係傀儡, 好多事情都唔由得自己作主, 只擔任接收訊息後而實施行動嘅中間人, 即係所謂嘅兩面不是人. 奈何背後辛酸冇人知嘅所為, 唔及外表風光位高權重嘅光環吸引, 所以就一直願意"忍辱負重"下去.

從來都覺得男人從政, 如肯當機立斷嘅話, 真係可以帶領子民共創繁榮, 可借見過咁多個, 一係就有心無力, 一係就小男人, 一係就優柔寡斷.

我唔係太鍾意女人當權, 做校長如是, 做老闆如是..... 因為通常處事手法好極端, 一係婦人之仁情緒化, 一係好大邀功卻毫無建樹, 一係心狠手辣逆我者死.

當我喺電視機畫面見到無論係市民或警方人員, 當被襲時, 我第一時間係覺得心痛, 設想受傷嘅人係我嘅子女, 每個被父母捧喺手掌心呵護嘅子女, 卻血流披面臉容痛苦, 我簡直唔忍心睇落去, 因為真係覺得好心噏.

特首卻竟然毫不動容無動於衷, 可想而知幾咁鐵石心腸.

我相信, 就算喺最前線要負責執行武力嘅人, 心情都唔好受, 但係又礙於受朝廷奉祿, 點唔想都要繼續職務, 所以當下只好頂硬上, 當退下火線後, 可能都好痛苦.

有朋友嘅仔, 之前雨傘運動係黃絲一員, 近年加入警隊, 雖然依然心繫黃絲, 但係外在己經要與之前嘅戰友壁壘分明.

或者有人會質疑, 既然咁有熱誠, 點解要加入政府呢, 我只能講, 當兩餐不繼時, 理想都要放喺一邊.

當初首位女特首誕生時, 好多人都寄予厚望, 希望之前幾位失敗嘅政績, 唔會發生喺佢身上. 但原來, 又一次證明一任不如一任, 之前雖然都民怨載道, 遊行示威依然不絕, 不過未至於好似今次咁大陣仗. 記憶之中, 好似只得當年八九六四事件發生, 先至引發大規模上街, 跟住之後嗰啲, 只係小巫而已.

如果唔係想爭名逐利, 根本唔應該從政, 因為偶一失誤, 就會被罵至體無完膚, 自己受都算嘞, 卻要累及家人, 值唔值只有當事者最清楚.

不過, 如果可以重來, 佢哋寧願選擇大是大非時喺屋企剝花生, 定係依然繼續玩權力遊戲, 就算拋個身出嚟受靶都在所不惜呢?
春有百花秋有月, 夏有涼風冬有雪, 若無煩事掛心頭, 便是人間好時節.

首頁

尾頁

跳至
你需要登錄後才可以回帖 登入 | 註冊