小甜甜其中一段, 講小甜甜做咗護士, 佢以愛心周旋於病榻中, 悉心照顧病者, 令病者心理上得到安慰時, 亦減輕不少痛楚.
一邊睇, 我一邊幻想, 假如我係醫生或護士就好嘞, 除咗醫病人嘅心, 仲可以醫病人嘅身, 非常之有意義.
可惜現實中, 我既沒資格做醫生, 更加冇本事做護士, 所以一切嘅幻想, 亦只能化為夢想, 發夢才可以想也.
或者係因為咁嘅原故, 所以就諗住退而求其次, 專業人士做唔到啫, 可以喺一啲診所做護士, 雖然與實際嘅白衣天使相差九萬里, 只係做吓登記探吓熱聽吓電話幫吓醫生做吓下把手, 甚至連清潔都要做埋, 我都唔介意.
我一心嘅理念係, 上得門光顧, 一定係身體唔妥, 我希望能以愛心, 能令佢哋唔舒服稍稍得到紓緩, 咁我就可以發揮到小甜甜嘅精神.
於是, 我就留意招聘欄, 睇吓有冇一啲附近嘅診所請助護, 最緊要係冇經驗要求, 否則我嘅夢想就冇得實現.
皇天不負有心人, 終於畀我發現一間準備新開嘅診所, 正在聘請兼職助護, 雖然寫明經驗優先, 我係冇經驗, 不過唔代表冇機會㗎嘛, 所以都厚住臉皮打電話問詳情.
接電話嘅係醫生本人, 我首先問佢係咪一定要有經驗, 如果係肯定, 咁我就會收線, 無謂浪費佢時間. 佢嘅答案幾模棱兩可, 話之前有幾個打去嘅應徵者都有經驗, 不過又唔係必然, 要視乎邊個時段有冇人肯做至決定, 因為好多都唔肯做星期六日同埋公眾假期.
我二話不說就話樂意做人哋唔肯做嘅時段, 反正住得近, 要做咩鐘數都冇所謂, 佢聽完我咁講, 就好滿意話 : 非常好!
跟住佢又問, 如果有病人例如一位婆婆發脾氣, 投訴等咁耐仲未輪到佢, 我會點應對? 我話 : 我會將心比己, 本身已經唔舒服, 仲要等咁耐都未能見到醫生, 心情一定唔好, 所以, 我就會以溫柔嘅語調加以安撫, 婆婆, 醫生要詳細為每個病人睇症, 所以會阻遲少少, 輪到你時, 一樣會咁細心為你檢查㗎. 要你等咁耐真係唔好意思, 不如我斟杯水畀你飲吖好唔好呀? ...... 我諗, 對方應該會稍為消消氣.
醫生聽完我嘅答案, 似乎亦好滿意, 同樣講 : 難得你咁有同理心, 非常好!
全個對話約莫有廿分鐘, 雙方言談甚歡. 整體上, 我覺得佢對我幾滿意, 所以好有信心能圓夢, 並已經同當家吾兒單聲, 日後嘅假期, 我將會好唔得閒.
等呀等, 日子一天天過去, 可是卻未收到醫生任何訊息. 最初, 我還自我安慰, 人哋都未開張, 急咩啫? 但係, 隨住開張日漸漸臨近, 依然音訊全無. 就算對我滿意極, 始終只喺電話交談, 又唔知我乜頭乜樣, 點都要見吓面啩? 連見都唔駛見, 好明顯我已經落選啦.
我以為, 醫生打開門應診, 係想請一啲嬌俏可人嘅後生女, 讓病人未治已療好一半, 所以我不被選乃屬正常. 於是我喺開張日就八卦諗住去診所裝吓, 睇吓啲靚女嘅質素如何高.
去到時, 診所未開門, 但係就有幾位貌似應該係助護嘅女士企喺度, 因為我聽見佢哋互相問大家住喺邊度, 之前做過未. 當中有鄉音未除者, 有師奶者, 有面容少許瑕疵者...... 有見及此, 我唔再為落選而耿耿於懷了.
有時間中會經過, 望入內, 見到只有一兩位病人在等候, 但係更多時, 偌大嘅候診區只得一排排空櫈, 一個人都冇.
罪過! 我竟然有少少幸災樂禍嘅心態. 哈, 假如我喺度做, 恐怕會好忙, 忙住拍烏蠅. 仲有, 咁嘅情況, 應該唔會有老人家投訴等得太耐而發脾氣. 而我, 姑且都要執定包袱, 以備醫生以生意唔好要縮減人手而裁之.
春有百花秋有月, 夏有涼風冬有雪, 若無煩事掛心頭, 便是人間好時節.