產後自己坐月的心得,大家有無興趣?

mcesther
|
我係一個懶得打超長post的人,不過第一胎的自己坐月經驗,讓我有d心得和方法,想同大家share下,因為見到呢到好多JM唔想花錢請質素無保證的陪月,但又唔想亂攪的奶奶幫手,所以可能大家有
興趣知道下呢D心得。

另,亦想拋磚引肉,分享下自己的方法,亦引下大家講你們的經驗,互相交流下~~
不過,我的經驗只限頭胎,如果係第二、三胎,家中仲有一個幼兒的話,一個人坐月,仲要照顧大果件,
我就真係無經驗了。

好,若有JM表示有興趣知,我就明天花時間將心得打出黎啦!!!
無人有興趣,就算數了。
Yoayoa
|
mcesther 發表於 17-3-9 18:23
我係一個懶得打超長post的人,不過第一胎的自己坐月經驗,讓我有d心得和方法,想同大家share下,因為見到呢到好 ...

生完了,好可惜

RainCC
|
我第一胎,想知呀,好期待你分享
BREADWING
|
雖然我唔係第一胎,但係都有興趣睇下
kitty426
|
我都有興趣, 等你分享呀
ufoma
|
mcesther 發表於 17-3-9 18:23
我係一個懶得打超長post的人,不過第一胎的自己坐月經驗,讓我有d心得和方法,想同大家share下,因為見到呢到好 ...

我都諗住自己坐月啊,期待你既分享
Junjuncheung
|
等你分享、睇下我自己念個套同唔同你一樣先
mcesther
|
本帖最後由 mcesther 於 17-3-15 18:20 編輯

好,既然有jm需要,我就逐步分享我的經驗啦!!
先講我係人奶媽,未生前已好有決心餵人奶,經驗發現只要處理得好,
自己坐月,兼全人奶係無問題的,就好似以前古代的普通家庭婦女,
都係無陪月、全人奶,都可以坐月、湊b一腳踢,要比d信心自己。

坐月的工作可分為以下幾類:


A,照顧自己日常生活
B,湊初生BB
C,補身


先講A,照顧自己日常生活

由於媽媽剛生產,身體較弱,就算日常生活都有些要注意,最重要是不要讓身體過勞,保持個人清潔(尤其人奶媽要埋身餵奶)、唔好讓身體入風。以下方法可幫到大家。

1. 未生產前,炒定整定炒米茶
因為體弱,所以產後婦女建議飲炒米茶,飲普通水會容易引起身體水腫。
網上炒米茶製法介紹

剛生產完,建議加陳皮、元肉、杞子、南棗,若想補血,可將部分米轉用紫米(白米與紫米比例約6:4),全部用茶包袋包好,入院生產時帶10包,8包入院,用保溫杯焗水飲。

坐月時,用保溫杯焗水飲,味淡就換新茶包。保證水量充足,人奶媽先會奶量充足啊!


2. 買定即棄膠手套(無粉型)
因為坐月婦要盡量避免手濕水,防入風,但去廁所,整少少家務,換片,都要保持手的清潔,點算好呢?產前去藥房買定一、兩盒即棄膠手套(無粉型),唔係燒烤用薄薄易穿那種啊!!係有少少質感,靚D果種。好似$40-60/盒(100隻)每次去廁所、換片、做家務時戴上手套,整完戴住手套洗乾淨手套,脫下,放埋一邊吹乾,下次再用,基於環保,不是每用完一次就棄啊!!我每日大概用2-3對膠手套啦!既清潔,又保證手唔會常常濕水,好方便



2. 沖涼
要保持清潔餵奶,我一出院就沖涼、洗頭了,現代社會,保暖設備較古代好,只要做好準備,就不用怕冷親入風了。除了產前收集薑皮外,記得去藥房買定茶辣和桂枝,每樣買2-3兩已經可以沖到好幾次涼。每次用紗袋或茶包袋,裝半兩茶辣和半兩桂枝,再加一執薑皮(用袋袋好)放入大湯煲煲30-45MINS,就可以攞黎沖涼用。

但要注意,將煲搬入沖涼房沖涼,係要別人幫的,坐月婦唔好自己搬,會好危險。所以果時我係中午我自己在家無野做,就煲定茶辣和桂枝水,關火,到晚上家人返來,我想沖涼時,就開火整番熱,然後叫家人幫手搬入廁所,倒入大紅A膠筒內,我會適量溝凍水,調較水溫。

我的方法:先用熱水爐正常沖涼洗頭,然後用水殼「畢」茶辣桂枝水由頭淋到腳,全身會即刻感到熱烘烘,個頭皮仲會熱到刺刺地,但要小心唔好入眼啊~會刺痛的啊!!沖完即抹乾身,穿好衫,唔好冷親。
點評
lwkwan    發表於 18-8-27 12:32
靚Win    發表於 17-3-15 16:04
miumiu1013    發表於 17-3-10 11:13
mcesther
|
本帖最後由 mcesther 於 17-3-10 12:09 編輯

繼續講

B,湊初生BB

1. 換片
先在家設置一個換片位,有舒服的墊,旁邊放好尿片、一杯仔熟水、棉花片,地下放個小型垃圾桶。另,仿照醫院,我整左幾張紀錄紙,方便剔低幾時小便、大便、食奶,因為初生要每日數夠濕片,而返健康院姑娘係會問小便、大便、食奶次數的,晚上家人回家幫忙時亦可以繼續記錄。另外,剛生產完,個人的記憶力真係會好差的,加上有時BB猛長期密密食奶,自己連幾時餵過,上次餵那一邊都亂到暈(所以我會寫低埋餵左,定餵右),用紙記好就可以減低腦力使用了。
張記錄紙好易整,用EXCEL整,分四個欄: 時間(E.g.1:00-2:00)、小便、大便、餵奶,響相關位置剔就得了。務求令到換片程序最方便簡單,媽媽唔駛抱住呀b走黎走去。



提醒:初生男BB超易響換片時,請你「飲茶」,趁你打開片,新鮮熱辣地屙尿,攪到你成面都係之餘(呀B自己塊面都會中招,飲尿啊!)最慘係成身的衫濕曬, 你一個人在家要獨力幫佢換曬D衫、褲,簡直想連衫帶B一齊丟曬落垃圾桶啊!!!面對呢個問題,可謂各施各法,而我的方法時,攞多一張大塊D的棉花片,一打開尿片,就用黎蓋住呀B的「小烏」,等佢就算「開花灑」都唔會攪到四圍都係,然後快手換片,包新片。

另,人奶B的屎較稀,量多時好易爆片上背脊D衫,所以放定幾件衫仔響換片位附近,亦能方便處理。

2. 處理污穢衣物

坐月婦唔好自己手洗衫啦!!留番體力餵奶、休息好過。但初生B超易「爆片」、嘔奶,D污穢衣物怎算好?總不能就咁放響到。所以產前最好去買定一個有蓋水桶, 每日注定一半水,加兩匙梳打粉,每有污衣、紗巾,就放入桶浸住,儲好一日,待晚上家人回來,就幫忙倒入洗衣機洗(稍隔左D污水啦!)梳打粉處理屎尿的能力好強,浸左大半日,D污漬都丟得七七八八,再開機洗一次,已經乾淨如新。

我有好一段時間,係比個仔用尿布的,日日一堆Dirty尿布,我都係咁樣處理的,基本用左好耐尿布都keep到潔白如新。不過初生首一、兩個月不建議轉尿布, 因初生便便數量超多,尿布量超大,坐月婦都係唔好將時間用響洗尿布上較佳。雖然唔環保,但坐月時,還是用尿片吧!乾手淨腳。

以下呢款食用梳打粉最抵用、易買, 去咩咩棧、一盒都係$6-7,浸衫又得、浸菜、生果都得,產前買定十盒、八盒在家旁身吧!!


點評
stbella    發表於 19-1-10 15:53
lwkwan    發表於 18-8-27 12:33
lo94602611    發表於 17-11-5 23:43
lo94602611    發表於 17-11-5 23:41
miumiu1013    發表於 17-3-10 13:14
mcesther
|
Junjuncheung 發表於 17-3-10 10:25
等你分享、睇下我自己念個套同唔同你一樣先
你都分享下你的方法啦!!集思廣益,交流下~~


ac_tpyaa
|
Thanks for sharing! Useful information
lee5132000
|
好有心機去share ar~~~可惜我黎緊9月中係第2胎...要湊多個2歲9個月剛開學的...真係未研究倒點搞
mcesther
|
lee5132000 發表於 17-3-10 12:58
好有心機去share ar~~~可惜我黎緊9月中係第2胎...要湊多個2歲9個月剛開學的...真係未研究倒點搞 ...
其實我五月尾都會生第二胎,所以一個人真的攪唔掂,未有經驗,
不過現在家有姐姐(第一胎初生時未請)
所以就是姐姐攪掂大仔,甚至帶出公園放電,
我可以安心處理細b
lee5132000
|
mcesther 發表於 17-3-10 13:17
其實我五月尾都會生第二胎,所以一個人真的攪唔掂,未有經驗,
不過現在家有姐姐(第一胎初生時未請)
所以就是 ...
有姐姐唔同講法~點都輕鬆DD GE~到時大B幾大?
mcesther
|
lee5132000 發表於 17-3-10 13:32
有姐姐唔同講法~點都輕鬆DD GE~到時大B幾大?
到時大仔只係27個月,兩歲3個月,但同你一樣,呢個暑假,佢要開始返學,返N班,大仔,又要面對新妹妹,又要適應新學校,希望佢頂得順啦!!
lee5132000
|
mcesther 發表於 17-3-10 13:41
到時大仔只係27個月,兩歲3個月,但同你一樣,呢個暑假,佢要開始返學,返N班,大仔,又要面對新妹妹,又要適應新學 ...
我預産915, 但上胎糖尿大B早2星期生,所以都怕今個要早D~咁就9月1,2咁就撞到開學正一正.....
FIONMS
|
分享好有用呀!!!!!大推大推請繼續........

moka_bebe
|
Thanks for sharing
elmoelmoelmo
|
多謝你分享呀,好有用,我地大家都要加油呀!
tiftiffany
|
多謝你用心分享~~好有用呀
Powered by Baby Kingdom

隨時隨地瀏覽及討論更多親子話題

開啟親子王國 App
繼續瀏覽