除咗自己做功課之外,另一個我覺得好重要要培養嘅係小朋友閱讀習慣。小朋友鍾意睇書同會自己揾書睇比起佢懂得任何課外活動都重要,因為鍾意睇書嘅小朋友已經懂得自己去揾學習的資源。但要培養小朋友鍾意閱讀,爸爸媽媽伴讀我覺得最緊要。所以自細開始,每晚臨訓前我哋一定會同小朋友睇故事書講故事。講故事唔係就咁照住本書讀,而係要講得吸引啲等佢哋覺得吸引。另外,我哋會買一啲好多圖畫嘅書俾佢哋睇,唔識讀啲字咪剩係揭書睇圖畫都唔緊要,最重要係肯睇。到呀女讀N班開始,每晚除講顧事時間外,都會喺晚飯後一齊睇半小時書,開頭我會讀俾佢聽,跟住下一步就係請佢跟住我讀。然後慢慢開始見到啲成日見嘅字就請佢讀俾我聽等佢可以認多啲字。到佢開始都讀到啲字,跟住就開始請佢讀句子,再之後就同佢玩對話,我同佢分別做故事書入邊嘅角色,增加趣味。到後期就可以請佢自己睇,我哋座喺旁邊,佢唔識啲字可以即刻問我哋。到而家呀女可以自己睇書,但係佢都仲鍾意我哋講故事書同佢一齊睇。
不過,除咗一齊睇書呢個習慣之外,都仲要有啲嘢配合。首先,當然要開少啲電視啦,所以我哋都犧牲咗好多節目無得睇。其次係每兩個星期去一次圖書館借書,不同種類總之要圖畫吸引,每次都借盡16本書,然後每晚睇一本中書一本英文書,保持差不多每日都有不同嘅書睇。另外好重要係放書嘅位置,一定要越就手越好,千祈唔好放書櫃,個位置最好方便過佢哋攞玩具。另外,要習慣我哋返咗工就唔可以開電視,咁佢哋就算玩到悶都可以隨時揾書睇。每一次見到佢哋自己攞書睇都要讚佢哋。就算呀仔有時同我哋講佢剩係睇書入邊嘅圖畫都唔緊要,都要讚,因為我鍾意佢哋會自己拎書睇,睇得多自然會認到字。仲有一樣我覺得非常重要,就係我哋要一齊睇書,父母唔鍾意睇書點樣要求仔女鍾意睇書呢?到而家,我哋都仲係習慣晚飯後熄電視,一齊睇最少半個鐘頭書。
我覺得要培養佢哋鍾意睇書,伴讀真係好緊要。小朋友一定鍾意玩具多過睇書,家長所以開頭要同佢哋一齊,等佢哋習慣。如果家長對住小朋友都係掛住玩電話或者睇電視,把口就成日叫啲仔女睇吓書啦!啲小朋友會唔會鍾意睇書呢!另外,平板或者手機咁吸引,咁細個點會唔鍾意玩呢?咁緊係唔鍾意睇書啦!所以做父母真係要諗清楚乜嘢先對小朋友最重要呢?另外,習慣係需要時間養成,所以千祈唔好心急,一齊睇書同講故事係樂趣嚟唔應該係負擔。