hugoma2015 發表於 18-9-17 04:38
我對套戲的結局只有2個要求:
1、男女主唔好勉強響一齊,勉強無幸福。
2、楚王唔好為女主放棄皇位。
你講中我其中一D觀點,我唔鍾意人設,楚王確係有D怪,但呢個怪係劇本咁安排定坤哥自己要咁演譯,不得而知,楚王性格乖僻我可以理解成細細個冇咗母妃,之後又冇咗三王兄,再俾自己父親困咗八年不見天日,陰沉、不茍言笑、喜怒無常我都可以接受,我甚至覺得楚王而家個角色太天真,一個經歷咁多陰詭咁多出賣咁多冷漠嘅人,何以會對鳳知微呢個底細擺明係敵對嘅人咁唔錫身?後面我可以明白佢遇番母妃時嘅表現,坤哥甚至可以演到寧奕忽然變番八歲果種感覺,但之前解甲,好似你話齋,唔多合理,佢應該心知肚明,冇權冇勢係冇可能保護到自己同其他佢想保護嘅人,特別係母妃,一次又一次見到個衰老豆點坑D仔,佢仲會以為自己係要脅到老豆果個?根本個老豆就係最唔想佢消失果個,寧奕走咗邊個幫佢抗衡老七,甚至老十?個老豆根本個個都唔信,寧奕要求解甲更加令佢起疑啦。
鳳知微呢個角色一D都唔強,或者衰過原著添,反又冇心反,要天下清明佢又冇大志,來來去去成班都係得把口,復國做咩?以前都係太差至會滅國,四王子不堪造就,鳳知微一樣冇樣得,文治才智做魏知時還好,變番知微就完全跌晒watt,幾個男人爭佢一個都唔知有咩咁特別。
顧南衣比起飛流,武功唔見好得,天真又不足,變成傻唔傻,叻又唔叻,成個角色好插科打渾咁。袁弘、王鷗兩個角色可有可無,冇幫助推進劇情,無端端出場,無端端就死咗(其實冇交代清楚,當佢地死咗架啦),燕懷石、寧澄比對琅琊榜嘅黎剛、甄平差幾皮,辛子硯算好D,起碼都唔係咁低智,佢都有建樹,同楚王互動唔只係為炒CP,趙立新同陳坤都交足戲,反而我覺得係編劇同導演俾唔足發揮機會。
你講得冇錯,成套劇主旨係咩?奪嫡?又未算係精彩,因為有時太容易,套路都太清楚,反而細節唔應該咁忍晦,搞到要靠估。鋤奸?舖墊太少,入面睇唔到點大奸大惡,點傷天害理,太子都有情有義,老七其實都係由自保開始,常家都冇點講民怨民憤有幾緊要,全部靠講,唔得囉。父子不和的家庭倫理?都係嘅,但講來講去都係皇帝自己衰,幾兄弟聯合整佢落台可能就可以大家兄友弟恭,唔駛死完一個又一個,仲要有D死得好唔抵。相愛相殺的狗血愛情?拜託,根本講唔到點解可以相愛,相殺都好牽強,夾硬俾幾班人擺上枱,係都要佢地相殺咁,而且好多根本係誤會,但唔明點解唔解釋,於是你以為我,我以為你,就咁玩死自己。
花旗太太生活在花旗國,留意時差,你問我未必即時答到。