SDM,小公主,王仁曼學跳舞經歷

newboy
|
以下係小女呢幾年學跳舞嘅歷程,希望能幫到正在找跳舞課程嘅家長們作參考:我女自小好鍾意跳舞,每次經過商場SDM,都會停底睇佢哋嘅表演服,數個月後,就報咗SDM。
1.SDM: 試堂後,就一次過報咗好多堂,之後有堂家長觀課,睇到課室好大,有好多學生,但老師顧唔到咁多個,亦只顧住某幾個,所以有部份小朋友跟唔到老師嘅指示,但都無人理佢。之後,我就無再報讀。
2.小公主:同一商場,有另一間舞蹈學校小公主,咁我就比女試堂及報讀,我女喺度跳得好開心,成日都會好期待去上堂,好鍾意個老師,亦因為有商場表演嘅機會,我睇到我女由第一次在台上有點膽怯,到之後嘅表演充滿自信,亦更熱愛跳舞。

3.王仁曼:後來要搬屋,我女亦好愛跳舞,就報咗頗多正面評價嘅王仁曼,試堂時職員及老師熱情有禮,當時我仲同職員講希望可跟呢位老師嘅班(後來先知老師好惡),女每堂都會匯報上堂點滴,分別跟過4位老師,其中兩位好有愛心,上佢哋嘅堂好開心,老師有要求,公平,亦會説笑逗學生開心。但另外兩位好惡加好忟,説話呼喝單打責駡、堂上公審學生、偏心考試成績高份的同學、提學生要縮肚時,用自己嘅手指篤向學生嘅肚,由下而上,學生落堂時發現肚上紅咗一隻手指印咁大嘅位置。等接放學時,出嚟放學嘅學生數説今日邊個被責駡。家長觀課時,校長會同場坐著,指指點點啲老師,老師比我的感覺係好驚個校長,校長講一句,老師就即時去指導個學生,而老師當日嘅説話語氣、用詞、態度,相當抑制,當然同小朋友平日匯報嘅係完全不同。有位職員會呼喝學生,若個家長喺度,佢就唔會咁做。
個人感受:
1.口脾可作為選校嘅參考,但真係要經歷過,先至知間學校係點。
2.所謂正統嘅芭蕾舞,唔一定教好每一位學生。
3.老師對教學嘅熱誠及愛心,比起間學校對學生嘅嚴謹制度更為重要,遇到好老師,學生嘅潛能得以發揮,遇到厭惡自己工作嘅老師,學生連興趣都會無咗,仲會大大打擊自信自尊。
4.最了解自己小朋友嗁係家長,只要細心觀察,總會找到合適小朋友嘅好學校,好老師。

chocolatebean
|
newboy 發表於 17-7-29 23:48
以下係小女呢幾年學跳舞嘅歷程,希望能幫到正在找跳舞課程嘅家長們作參考:我女自小好鍾意跳舞,每次經過商 ...
興趣班又好,學校又好,最重要其實係個老師。名校都有唔掂又唔教書既老師
tommyxsarah
|
我女去普通中心學左3 年芭蕾舞

同樣都有考英國個試

個老師好好 對個個小朋友 好有愛心

個個小朋友次次笑住上堂放學

有幾多同學都係sdm 轉黎

所以學校名氣真係唔係最重要 師資最重要


Angelice-BeBe
|
我覺得小朋友要開心,享受課堂,先會有學習嘅興趣。同番學一樣,學校老師多比鼓勵,關愛學生,學生亦自然會學到野,會進步。

fungwongphie
|
1.我以前都有試過堂。試堂當中,家長竟然俾員工趕,跟住,無意間偷聽到其他家長們傾計,一個月轉咗3個老師

2.冇試過。

3.上課地點唔多方便。

小朋友如果好細個開始學,我去試堂基本上係去觀察間學校同老師。如果是旦一樣唔多掂,無謂勉強。
dirtygal2046
|
LM
SandyKL
|
我阿女係毛妹習芭蕾舞已10年有多,由K2至依家中三。

我自己都有跳芭蕾舞,所以知道想學好芭蕾舞,唔可以求愉快學習,係一個好刻苦嘅興趣活動,想愉快就唔好諗住能獲得好成績。

阿女呢10年都跟住2個老師輪流教授,呢方面我頗滿意,因為轉太多老師對學生唔係一件好事。阿女有同我呻老師專執佢錯,其他同學做同一樣動作就唔出聲,好似針對佢,我解釋佢知因為老師覺得佢可以進步到頂峰至執,如果根本明知水平唔到,執嚟做咩?

佢快考AF勒,考完佢話唔再學,因為付出太多時間,佢呢個暑假日日跳,預備一個比賽、一個表演,仲有嚟梗嘅考試,絕對好大壓力。佢想俾返多啲時間係學業方面,冇所謂吖,將來再跳返都冇問題。

芭蕾舞對小朋友係耐力考驗,想玩吓就勸唔好屣錢係呢項活動上。性格公主都唔適合。
Maggie28
|
newboy 發表於 17-7-29 23:48
以下係小女呢幾年學跳舞嘅歷程,希望能幫到正在找跳舞課程嘅家長們作參考:我女自小好鍾意跳舞,每次經過商 ...

本帖最後由 Maggie28 於 17-7-30 01:59 編輯

我細個跟過王仁曼學左好多年, 睇完你既分享發現佢既學習模式咁多年係無變過,我仲好記得細個好驚校長, 佢既教學生方法係舊式方法。咁你問我有無效,舞蹈方面係好專業,但以做呀媽角度,未必現今個個小朋友可以接受。

我現在仍然未送個女(3歳)去學,希望呀女係發自內心喜歡才報名,以免將自己的期望,投射落佢身上。

kenlau806
|
本帖最後由 kenlau806 於 18-7-25 18:28 編輯

想跳得開心, 就唔好入王仁曼見到囡囡有天份才去讀會好D
和一般名校無異, 你成績好, 就會有較多資源分俾你, 有表演/比賽/精英班/專業試/獎學金
跳得一般的話, 綠葉都不如, 乜都冇

而且基本上和老師近乎零溝通, 太多學生, 唔照顧得咁多


fmf903
|
newboy 發表於 17-7-29 23:48
以下係小女呢幾年學跳舞嘅歷程,希望能幫到正在找跳舞課程嘅家長們作參考:我女自小好鍾意跳舞,每次經過商 ...

我認同嚴師出高徒。
正如有Jm 所講,芭蕾舞係好刻苦,並不是愉快學習。我細個學樂器都係好刻苦,我認同要認真學到有成績,係要嚴厲的,並不是興趣班。
english1221
|
我細個學,都係好刻苦的,唔係愉快學習,不過我自己都喜歡嚴格的老師,因為基本功好重要,打錯個底補唔返
Powered by Baby Kingdom

隨時隨地瀏覽及討論更多親子話題

開啟親子王國 App
繼續瀏覽