點樣讚先啱?

csir3290
|
本帖最後由 csir3290 於 17-11-5 15:10 編輯

做咗家長之後發覺除咗心急之外,另外一個特徵就係好容易睇到錯處。所以除咗學唔好咁心急之外,仲學緊點樣多啲欣賞多啲讚賞對小朋友。唔知點解總係覺得鬧人好容易但係要讚就好似好難咁。以前都冇諗過讚人係咁難嘅,但係而家真係發覺讚人其實要讚得好同埋要讚得準確其實有時都幾難。其實我明白想小朋友學嘢學得好,係需要多啲正面鼓勵,但係到要讚嘅時候就總係覺得唔容易做到,究竟點樣讚先叫做好呢? 我諗講到讚,我哋最多用嘅就係讚佢你好叻呀或者你好乖呀之類嘅說話啦! 但係發覺咁樣讚錢又唔係好讚到個重點,因為你想佢做好邊一樣嘢,你就要好明確咁話畀佢聽所以就要讚嗰個動作,即係要讚得具體。 好似我想佢哋學執好嘢,所以每次佢哋肯自動自覺執好自己啲嘢,就算係少少都好,我就會讚佢哋乖肯執嘢,重點係你唔可以淨係讚佢乖仲要講佢乖咗邊一樣嘢佢先知嗰樣係好行為。又好似佢哋做功課做得整齊,我就會讚佢哋同佢口哋講我好開心佢哋啲功課做得咁整齊。 總之唔可以淨係讚佢哋乖同叻,必須要講埋嗰樣好行為,佢哋先至會知道嗰邊一樣好行為受到讚賞。 第二就係唔可以讚得敷衍,好多時我對仔女都會因為做咗啲好行為想話畀我哋等我哋讚佢,我哋真係要認真咁讚,唔可以我用得喇得喇,或者好叻喎咁樣就算數。跟住仲要讚得細心,好多時雖然係好細微嘅嘢,甚至係小朋友根本應該要識做嘅嘢,我哋會好容易忽略咗,但我哋都要好細心咁見到佢做到啲好嘅嘢我哋就要讚,因為咁樣可以加強佢嘅好行為。其實開頭成日用讚都總係覺得唔自然,但係慢慢做耐咗,其實要搵嘢讚都真係唔係咁難!尤其是當知道讚比鬧其實更加有用,鬧只可以收到即時嘅作用令佢哋驚而停止壞行為而冇正面加强好行為,但係讚賞就係欣賞緊佢嘅好行為而嗰種嘅作用係可以長期發生,因為人人都想繼續俾人欣賞到。唔知點解喺日常生活入面我哋鬧人就好容易,但係要讚人唔知點解真係咁難。 所以我都成日提住自己唔好咁易發脾氣,要有多啲耐性經常要正面啲去睇事情,自然就會多啲欣賞對仔女。另一方面睇其實對仔女都係學緊我哋正面啲去面對事情。
講咁多要讚賞,係咪完全唔鬧唔罰呢?當然唔係,不過要適可而止,多讚少鬧,咁當你要用到鬧同罰,咁佢哋先更加知道嚴重,先更有效果,吓吓都又鬧又罰,除非一次比一次嚴重啦,唔係鬧慣咗咪當耳邊風囉!
點評
JD930    發表於 18-3-21 14:51
JD930
|
Noted with thanks
Plummy_chu
|
我都係咁讚仔仔: 你好落力去執你啲玩具喎/ 你執嘢仲整齊過我呀/ 你個B字嗰條直線好直呀(可能个"3" 肚腩係唔靓,都唔好理)最尾我會問一句: 你覺得呢份功課係咪ok? ok就交畀老師幫你改。

邊幾個字你覺得寫得靚㗎? 我就覺得呢幾個。

但係……同时我對住我老公……我真係……讚唔到口…
csir3290
|
回覆 Plummy_chu 的帖子

我都好少讚我老婆,唔知點解越親近嘅人好似越難開口讚!
SophiaMomMom
|
回覆 csir3290 的帖子

Thanks
Powered by Baby Kingdom

隨時隨地瀏覽及討論更多親子話題

開啟親子王國 App
繼續瀏覽