亞仔對自己完全無自信~!~_~

Chunbbmum
|
仔仔今年一年級,佢對自己完全無自信心,做任何事都話自己實唔得,次次都話:我做唔到架啦媽咪,算數啦!我都係唔要奬勵,都唔會做得到。

聽到佢咁講,我都唔開心,我不停鼓勵佢,叫佢努力,盡咗力,做唔到都唔緊要,下次再努力過,只要唔放棄一定會有一次成功。

但每一次一只會講:我唔得,做唔到架啦!

究竟有咩方法令亞仔增強自信心呢?
titanlow
|
獎勵唔好做到先有,係獎佢肯嘗試。

佢覺得自己做不到,你係咁講「你得嘅,你試下先,盡了力就得」之類,係不停否定緊佢呀!你下次試下企係佢個角度,答:你無信心做到呢件事/你覺得呢件事情對你來說太難,媽媽明白喎,有時我都會遇到老闆俾我做d好難的事,我都好怕做不到。你做唔到係咪會好唔開心呀?如果你試了但唔成功,咁係咪比唔試開心d呀?

一步一步去明白佢的感受,咁先「connect」到佢然後引領番佢去正面咁諗個結果,建立動力去試。

Chunbbmum
|
titanlow 發表於 17-11-22 22:54
獎勵唔好做到先有,係獎佢肯嘗試。

佢覺得自己做不到,你係咁講「你得嘅,你試下先,盡了力就得」之類,係 ...

多謝你啟發咗我一樣野,就係要佢諗得正面啲,佢諗野係從負面諗起架!做任何事都會講咗「唔得」「無可能」「其他小朋友先做到」等等。。

我就是無從入手,可以令佢思想「正面啲」呢?

其實我都唔係成日話做到就獎勵佢的,因物質從來都吸引唔到我仔仔,有時我會話帶佢去食好野,帶佢去玩黎令佢對自己有信心啲去做。但都改變唔到佢!無奈。。

點解會咁呢?
Chunbbmum
|
titanlow 發表於 17-11-22 22:54
獎勵唔好做到先有,係獎佢肯嘗試。

佢覺得自己做不到,你係咁講「你得嘅,你試下先,盡了力就得」之類,係 ...

其實我都有企係佢角度諗。有「connect」到佢感受。因為佢係做得到架!

好似默書咁,我都唔會問佢攞幾多分,只會問佢你識唔識呀?佢就會即刻一堆負面野出曬黎。。「我唔識呀!」「我全頁都被老師打交叉」「我錯咗好多」「我好似剛剛合格多少少啦!」。。其實我沒有再講或再問任何野,為何完全沒有自信呢?(重點佢係有溫書有努力)我會同佢講唔緊要下次小心啲,就唔會錯啦!
titanlow
|
每個人對自己的睇法都好唔一樣,你看到「佢係做得到」同「佢覺得自己做不到」就係gap。你connect佢的感受,但又覺得佢做得到,咁其實係咪connect唔到?因為佢正正為到自己覺得做不到而心灰意冷啊!你提到佢會話默書唔識,咁實際派回來的分數是否反映其實佢係識?如果係,我想他可以在生活中好多範疇都無信心,連帶做得到的東西也會變得負面。

嘗試回想下過去數年,咩環境事情塑造這個「他」,從小到大就是如此悲觀?還是有甚麼事發生後才變得這樣?

你也可以考慮下帶小朋友去做下遊戲治療,讓他內在的負面情緒、擔憂清空一下,而家人也要學習下正向管教,幫他建立信心!
titanlow
|
回覆 Chunbbmum 的帖子

他的思想負面或許來自本身自我要求高/有很多「他認為」沮喪失敗的經驗累積下來,咁就要從生活中入手,家人都要少講「唔得唔可以」,也要戒掉比較(例:係街上見到別人可坐定定食飯時,不要說:你睇下人地)。想他做的事,先訂一個低一點要求,做到時要肯定他的能力,例:我睇到XX可以自己打開個食物盒。不要說「o拿,你做到啦,媽媽都話你做得到啦!」這樣其實繼續令他挫敗,係媽媽覺得他做到,而不是他自己做得到。就是這樣,在生活中常以正面的說話,不帶批判的,平和的覆述他的能力,潛而默化地灌輸番正面的想法。

mandybbcc
|
可能佢要做既任務太難啦, 你試下俾D容易D既任務佢做, 做完之後就讚佢: 係咪呀? 我都話你做到架啦!
之後先慢慢將難度提高, 等佢慢慢建立自信
cakii
|
講哩啲說話嘅小朋友,好大機會怕做唔到最後又令你失望,不如報定案,唔畀希望大家,最後就唔洗失望。我係你,每次佢做唔到,失敗,又唔得呀之後,會表現得連自己都唔介意亦無為意,佢想做想及揮嘅野,就算自己覺得幾無用,對學術一啲幫助都無嘅野,都會支持及鼓勵佢做。一個人覺得自己無用,係因為佢做唔到自己鍾意嘅野,但日日都被其他人要求自己做啲佢無能為力嘅野,咁又點會覺得自己有用呀,對嗎?
Chunbbmum
|
回覆 titanlow 的帖子

其實佢每次講完「錯晒」「比老師打晒交叉」。。。。等等,但回來的點書成綪係好好架!有九十幾分,但佢都會唔開心,因為佢係家長簽名個位度畫左個唔開心嘅公仔,到我要簽名時,我發現在個公仔,我會同亞仔講:「好叻啊!好高分呀!」但佢只會講:「我覺得好渣,一啲都唔叻,都無一百分!」
所以我估佢對自己要求十分高!

若要回想由細到大嘅成長,可能係在幼稚園時,佢都係比老師認為係頭幾位叻的小朋友,但而家上到小學就變得成日都講呢啲說話,無晒自信。唔知關唔關事。
Chunbbmum
|
回覆 titanlow 的帖子

其實平常係屋企,因有個細佬,好自然地有時我也會那細佬跟他比較,比如細佬係一個愛吃的小朋友,每次食飯十五分鐘內必定食完,但亞哥要成一個鐘都未食完,我都會同哥哥講:「你睇細佬食完啦!快過你幾多,你快啲食啦!」
佢又好快咁講:「我食唔到快架!細佬叻啲,佢食野一定快過我!」
我就會話:「你試下食得快過細佬呀今晚。。。」
佢又講:「唔得架!我做唔到!」

無奈。。。。加無言。。。。。



titanlow
|
回覆 Chunbbmum 的帖子

看來你的孩子未完全適應小學的生活,與細佬的相處可能都有點事情'click'住喎, 建議你帶他去做下遊戲治療,幫到他好多呀!
我細囡的能力係好過家姐,但我們不會比較的,她自己卻在比較,覺得自己唔叻,結果,我帶她做了遊戲治療,解開她的心結,她現在學會了多看自己的能力和所擁有的,過於同學們和家姐有的。


Chunbbmum
|
回覆 mandybbcc 的帖子

其實平常我都無給他任何高難度的事情給他做,只係平常食飯,做功課,玩。。。但佢啲說話同想法真係完全無自信心,連老師都有跟我說,佢對自己缺乏自信(如舉手答問題,老師話佢無信心舉手,要肯定100%正確先會舉手答問題。)聽完老師講我FEEL到亞仔好驚會答錯。

只要佢一開口,你就會FEEL 到佢嘅負面說話。


真係好難改變佢嘅諗法同自信心,要諗諗計。。。

Chunbbmum
|
回覆 cakii 的帖子

講得好啱,十分認同,我都覺得亞仔唔想我地失望,所以佢寧願講到最壞嘅地部,等我地無期望。
佢真係好似好介意自己做唔到或做得差,因為佢有時曳的時候,我會話;「亞仔媽咪知道你可以好乖,可以做得到嘅!」佢又會同我講:「我控制唔到自己,我真係好曳,我覺得自己好無用。」

我聽完,個心都唔舒服,唔知點回應佢。。。。
Chunbbmum
|
回覆 titanlow 的帖子

請問你帶囡囡去邊度做遊戲治療架?可以給我資料嗎?我都想帶佢去試下,我都覺得係佢自己內心不停對自己有要求,不停用自己同別人比較。希望能改變到他負面諗法同埋增強對自己嘅自信心。
mandybbcc
|
Chunbbmum 發表於 17-11-23 11:06
回覆 mandybbcc 的帖子

其實平常我都無給他任何高難度的事情給他做,只係平常食飯,做功課,玩。。。但佢 ...
唯有做父母既要做多D野引導下佢, 等佢知道樂觀去面對, 無論答錯定啱唔重要, 最重要係肯去試我個仔有時都唔肯試新野, 我會主動同佢一齊做, 咁佢會願意接受D, 做做下就會肯自己主動去做架啦
小小C9
|
本帖最後由 小小C9 於 17-12-19 17:24 編輯

可能佢比較完美主義,怕人失望,一時之間好難靠鼓勵改變到情況,多俾佢知道自己長處係邊,知道家人對佢既支持同愛唔係睇佢叻唔叻做唔做到,應該會好d
cakii
|
教小朋友唔好用太多太極端言詞形容,例如: 曳,乖,叻, 渣,肥,瘦,高,矮,勤力,懶....好有被label嘅感覺,好似呢個世界得成功同失敗咁,無100分就=要再努力,咁唔通得到70分就只有被期望下次要再努力? 定還是可以討論點解錯咁少都會扣咁多分? 或者傾下原來要攞到100分或90分以上係咁難,令佢知道你明白佢嘅情況有幾難係好重要,因為小朋友若果知道媽媽明白自己,會好開心。佢會知道你相佢, 體諒佢,佢會好有安全感,自信就會慢慢被建立。
Chunbbmum
|
回覆 mandybbcc 的帖子

對。我會嘗試比佢感受下就算落後咗或失敗咗,唔緊要,最重要係點樣正面樂觀咁面對,唔好諗得以後都會落後或失敗,要佢自信啲行返去前面。我諗我要推動多啲佢正向嘅動力。


因佢嘅負面無信心嘅能量太強,有時我都比佢感染到,攪到我無晒方向去引導佢,攪到我都由得佢繼續負面諗法繼續講無信心嘅野,我寧願唔出聲,等佢發洩晒算數。
Chunbbmum
|
回覆 小小C9 的帖子

可能佢比較完美主義,怕人失望,一時之間好難靠鼓勵改變到情況,多比佢知道自己長處係邊,知道家人對佢既支持同愛唔係睇佢叻唔叻做唔做到,應該會好d

我都有諗佢係咪完美主義者,所以對自己要求甚高。佢有長處架,就係會好專注自己喜愛做的事,當佢鐘意做一樣野,佢就會變得好專注(可能佢想做到最好)。
好讚同你講的"支持同愛",可能比讚同獎勵更有用。
Chunbbmum
|
回覆 cakii 的帖子

感激你令我更加清楚自己做媽媽應該要留意嘅地方!
這些極端詞語我諗我已經講咗無數咁多次,真的要改改口,尤其"曳"係經常掛在咀邊。


我明白讀書係唔可以用分數去衡量同目標咗係分數上面,所以亞仔一升上小學我已經,沒有用分數來討論佢嘅努力成果,我只會用你識唔識來跟他溝通,若然佢答唔識我會叫佢再比心機或下次默書做卷小心點。


我好想去明白佢點解咁無自信心,但我搵唔到原因(我覺得佢自我要求太高),亦唔了解到佢內心點解咁負面諗法。可能佢真係無安全感先會缺乏自信。
Powered by Baby Kingdom

隨時隨地瀏覽及討論更多親子話題

開啟親子王國 App
繼續瀏覽