全職媽媽點減壓?

abc2015
|
自己一湊二,屋企無人幫,所有野都係一個人做,另一半係完全唔幫手,仲會不停叫你做野,拎依樣個樣,仲要成日淨係話你鬧你,大家之間唔會溝通,唔會傾計,一個3歲,一個就黎1歲,每日一起身好似打仗咁,晏就叫做同佢地訓一陣教,就忙到夜晚,細個個長期半夜大喊,每晚喊幾次,完全休息唔到,其實點樣先減到壓,真係好辛苦,同自己屋企人講又唔想佢地擔心,同朋友講又驚對另一半反感,唉,到依家做所有野都有心無力!
yubaba
|
同我好似。c6又係不斷點我做嘢,少少跟唔足又話我懶,小至丢張紙巾,大至裝修都推在我身,唔合心意就怨。我大女6歲,性格古怪難教,個女有乜唔合佢心意就話我唔識教. 細仔一歲,又係痴身,又係半夜哭幾次,每晚合共瞓不超過5小時,連續不超過3小時。本來認為伴侶係互相支持,但實際上不斷埋怨, 連個仔痴身都可以頼我埋身餵!
KaryLeung
|
abc2015 發表於 17-11-29 23:35
自己一湊二,屋企無人幫,所有野都係一個人做,另一半係完全唔幫手,仲會不停叫你做野,拎依樣個樣,仲要成 ...

我都係一湊二,一個2歲一個11個月,日日自己一個湊真係好辛苦好大壓力,老公唔會體諒唔會幫手,成日掛住打機訓教,我個仔又係夜晚成日喊,飲左七星茶都唔得 晚晚冇教訓,日頭又要湊住佢地, 想死
bosch
|
要解決點解小朋友半夜喊先,否則大人冇得訓真係人都癲。

係咪半夜肚餓?
appledai
|
我一時覺得家裡沒有外人好,將就下也搞得定,超忙和累時又覺得還是要請工人。
Solarflare
|
呢位jm你c6似乎比左好大壓力你。
我要減壓時會鬧人。尤其係c6比壓力我時。
我已經好大壓力, 唔需要佢再比extra壓力我。我仲會迫佢讚下我, 仲會話埋比佢聽點樣去讚。我需要既係稱讚唔係挑剔。如果仲係挑剔, 我會同佢坐底"傾"一小時問清楚佢既要求係點? 點解會有咁既要求? 可行性有幾高? 我做唔到唔會應承。做得到會盡量做。
當你咁樣做得多, c6就會少左挑剔你。因為佢要諗得好清楚件事合唔合理先會同你講。
睇你性格係點。呢個方法可能唔啱你用。
chocolatebean
|
abc2015 發表於 17-11-29 23:35
自己一湊二,屋企無人幫,所有野都係一個人做,另一半係完全唔幫手,仲會不停叫你做野,拎依樣個樣,仲要成 ...
你唔係我第一個見既FTM不被老公尊重, 我諗你要建立一個形象就係做FTM都有尊嚴, 你唔係工人.

我見唔少FTM常抱怨好忙, 冇時間, 仔女又難湊. 我諗你既 TIME MGMT 要做好D, 自己要有PLANNING, 分先後緩急輕重, 另外, 就係要同仔女建立好起居作息時間表, 亦開始培養建立好習慣

我係WORKING MUM, 星期六/日都係自己湊, 又冇呢D問題.

yrbaby
|
有能力既話,建議請姐姐
一來可以幫輕下你,一來可以同佢傾計
morechi
|
一星期會唔會有一日可以有屋企人幫手湊?
老公放假叫佢幫手睇陣自己出去透下氣,
因為長此落去唔係辦法

abc2015
|
morechi 發表於 18-6-9 00:04
一星期會唔會有一日可以有屋企人幫手湊?
老公放假叫佢幫手睇陣自己出去透下氣,
因為長此落去唔係辦法

大仔出左世之後都完全無休息過,我媽一個星期先放一日假,唔想佢無休息,依家細個個歲半,叫舒服左小小
hellomama2
|
會唔會試下請鐘點幫下手,好過無~ 我都係一湊二好明白你,最慘唔係做家務,而係2個一齊扭計發癲,嗰下真係忟爆。

我覺得首先要放棄一啲無迫切性嘅家務,等自己抖下,我初初日日吸塵拖地洗廁所抹塵,發覺唔對路,連坐嘅時間都無,個人又忟憎,成日鬧佢地,之後開始調節下,唔趕住做就遲啲先做,有得抖心情好咗,佢地啲心情又好似好咗。有時真係攰就會開啲卡通片俾佢地睇下等自己有得休息。

老公方面,我覺得佢都有責任照顧佢地,所以我會間唔中自己出下街等佢試下一湊二有幾happy, 佢明白咗就唔會咁易有怨言。同埋都係要溝通下,如果唔係就得個做字…
jellybeanbean
|
同老公慢慢傾吓要一齊照顧小朋友啦。我大仔出世頭三個月都係老公湊。我地同佢分房訓但係cam係放老公果邊,佢餵夜奶。家務都係老公做,我有時會幫助吓洗。我仔細果時晚晚等daddy返黎幫佢沖涼。

都而家大左都係daddy送返學,平時打波都係老公車佢。仔放假佢地兩個會一齊做運動。

如果小朋友開始大可以做家務呀。我老公係大仔幾歲開始教佢。所以放碗碟落洗碗機,洗手乾衣都係佢做。我訓到10點幾自然醒!

黎緊細仔出世我老公都會教佢湊bb不過佢地會相差9年所以大仔會幫到手

有時唔洗比太大壓力自己,唔洗樣樣野都做到最好。
不理不理
|
真係仲辛苦過返工呀
EudyptulaMinor
|
abc2015 發表於 17-11-29 23:35
自己一湊二,屋企無人幫,所有野都係一個人做,另一半係完全唔幫手,仲會不停叫你做野,拎依樣個樣,仲要成 ...

我都係一湊二,我會趁兩個小朋友都瞓左晏覺就會快手做家務,做左急既先,唔太急唔太污糟可以留返星期六日做,爭取沖杯茶飲睇下書又好睇下電視都好的時間,每日算係有半個鐘左右私人時間,萬一兩個小朋友冇同時瞓,咁我會等老公返黎食左飯,同老公講想入房休息一下半個鐘一個鐘都好,老公就湊住對仔女先
abc2015
|
EudyptulaMinor 發表於 18-10-25 23:39
我都係一湊二,我會趁兩個小朋友都瞓左晏覺就會快手做家務,做左急既先,唔太急唔太污糟可以留返星期六日 ...

依家好小小,因為佢地係同一時間訓晏教,我就會跟住一齊訓,到佢地夜晚訓左,就係我自己時間休息,食下野睇下野
babyfung61
|
我都怕呢種情況。但更討厭的是,先生會以返工辛苦為藉口而唔去一齊分擔湊小朋友嘅責任。連男方家人都幫住曬佢,話好多男人都係搵錢辛苦唔鍾意湊細路。但我講,湊或養育小朋友唔係只屬於一個女人嘅責任(單親除外),大家係女人,都做過人阿媽,應該知道全職照顧小朋友係24小時無停,隨傳隨到的。如果有得返工,不如掉轉,比你啲男人試吓呢份Job, 餵奶餵食、陪玩、氹瞓、做家務、煮飯⋯真係要等到全家人瞓曬,自己先最後一個瞓,又係最早一個醒起身。個細路半夜一嘈又要走去處理,日日唔夠瞓,日日生活如是,個個星期望禮拜日去飲餐茶嘅日子,但遇著落雨就唔出街,隨時困在家連續十幾日。我都覺好疲累。
babyfung61
|
回覆 abc2015 的帖子

如果可以隨時瞓到就梗係好。以我為例,個人唔易瞓,所以有時就算個B瞓一個鐘,實質我都只可以喺果個期間瞓20分鐘左右。不過都算可以抖一抖囉。唉。
Powered by Baby Kingdom

隨時隨地瀏覽及討論更多親子話題

開啟親子王國 App
繼續瀏覽