§ 自家坐月飲食答問坊 § 【"飲食表及注意事項" 設於首頁,自行 d/

曳媽咪!
|
好慶幸承蒙咁多位靚媽們既支持!

為令大家方便,現開闢呢個 "答問坊" 黎發問有關問題,各靚媽們就算有疑問及要查閱都方便 d 集中 d 丫。同時,大家如有 d 岩用又 ㊣ 既資料一樣可以舖上黎比大家參考同交流架!!

各位現可隨時隨地前往以下既網址 download:~

曳媽咪部落格 — 曳媽客廳【 曳媽咪自家坐月飲食注意事項 】
" 歡迎大家到來曳媽客廳作客!"


【注:請各位不要再留 email 於此房,正如大標題所講,呢度只係提供傾計及發問既答問坊黎,是不會回覆任何既電郵及 pm ,是絕不受理的,敬請注意,多謝合作!】

cheers,
曳媽咪!

[ 本帖最後由 曳媽咪! 於 09-4-30 03:18 編輯 ]
曳媽咪!
|
等我將我早前係 "坐月食譜"房內所答既坐月部份資料舖過黎呢度,等大家都可以參詳參詳一下!

炒米茶比開水有益有米氣落肚,可以暖胃,好好多架。生完就飲得架啦。
查實做法好簡單架咋:—
將 d 乾米用白鑊炒到佢黃色,可以一次炒多 d 放入個玻璃樽度存放都得。
每次飲時都可以用個煲仔放一手份量既炒米,加一片薑,再加水(濃淡隨意),滾左就可以倒入暖壺度口喝囉黎就得架了。 其實都可以飲水,但唔好飲得太多就唔大問題。
另外,可以隨意加 d 紅棗(十二朝前唔好太多粒)、龍眼乾(即桂圓肉)、杞子、黨參(十二朝後)一齊煲黎飲都得架。

… … … … … … …
至於生水 (指無煲滾既水) 就真係盡人事都可免則免了,咁平時抹面洗手咁點呢?係可以用薑水架 (刷牙除外!哈~)。
做法亦係非常簡單:—
只須拍扁几舊大薑,放入一大盆水度煲滾就得架啦!
可以攤凍放入廁所度作平時抹手抹面用,唔洗擔心話凍既有冇問題,你試過就知好奇妙架啦,凍既薑水用完都會興合合架!哈哈哈哈哈~~~

… … … … … … …
而食 d 咩,最緊要均衡,但涼性既瓜果菜都少食好 d。

煮時就反而要注意:—
1. 作法為蒸、燉、烚最好,清淡得黎亦可保原汁原味。
2. 用麻油代替普通油,極少用鹽,糖用紅糖(即食豆腐花時加果 d 糖),同埋薑黎調味。其他既盡量唔好用了。
3. 肉類為瘦肉、無肥膏既豬肉、雞肉、魚肉 (桂花、鱸魚、鯇魚都 ok),但牛肉就最好到第三個星期後先好食了。

十二朝前:—
~ 最緊要清淡,可以煮黑木耳 (或普通木耳都 ok),可以幫助排清惡露。用黎一齊蒸豬肉、雞肉等都得。
~ 薑同紅棗都可以用,但唔好用太多,十二朝後先慢慢加份量。
曳媽咪!
|
[size=medium]我係呢度回答 "五更飯" 係乜東東黎啦!

查實如大家有睇孕媽媽呢本雜誌既話應該會知道的。

其實 "五更飯" 即係以前既早飯,係清晨時份 (即第五更-5~7點) 所食既飯而已。
以前無錢買補品補身,但一起身食到碗飯係可以增強氣力、幫助身體吸收營養,可補中氣的。

用料真係好平民化架,但奇在可以好補身!同食隻雞既效用可比美!
材料:蛋、薑茸、豬肉,頭 2 個星期可另加入木耳。
煮飯同一般煲飯既方法就得,仲意既加麻油炒佢 2 炒又得!
材料既份量因應個人須要而自行調較。

最主要係一起身後食到呢碗飯,就既可補身又可補氣。
至於減肥呢個問題…… 留到坐完月打好個身體机能後先再唸囉!呵呵呵呵~~~~

[size=medium]而 "紅糖粥" 同 "桂圓粥" 又點做呢?

製法非常簡單:—
《紅糖粥》
紅糖 = 食豆腐花時所落既糖,有活血祛瘀既作用,所以產後 頭 2 個星期食用就最岩不過。
只須好似平時咁煲白米粥,滾後加入紅糖拌勻就 ok 了。

《桂圓粥》
將桂圓(即龍眼乾)與白米同煲成粥即可!

[size=medium]至於黑豆飯又點做呢?

黑豆於白鑊中炒至豆皮稍為爆裂時贊下清水,煮15分鐘後撈起於白米一同煲熟即可。唔須要額外去皮的。
Kitchu
|
曳媽咪,

唔該晒! 多謝你, 我先唔洗驚坐月. (因我屋企啲老人家..都唔識)
taurus_bb
|
曳媽咪,

謝謝你
pochi
|
天使兒
|
曳媽咪,
我想問下呢煲薑醋d皮可以晒乾之後用黎煲, 但係咪都係一手薑皮就夠呢?
另外, 煲水沐涼用bb個盆得唔得呢? 因為我覺得浴缸好太過... ?-(
小靈靈
|
唔該哂啊,曳媽咪 :mrgreen:
不過我仲問多樣野,糯米酒係點做同埋有d咩用架??
wavivienla
|
曳媽咪,

雖然我仲未收到你的email(好期待)


我有聽人講過用紅米炒米茶效果會更好, 唔知係咪?

wavivienla
TeddyMaMa
|
thank you 曳媽咪

日後坐月有問題都唔驚lu
fishkar
|
請問餵人奶可不可以飲糯米酒及雞酒?我媽媽還叫我飲'波打酒',佢話可以幫助排清惡露。
曳媽咪!
|
ok:
1. 你係可以用薑皮黎煲水用架,但一手執薑就未必夠一日用了,似乎淡左少少丫,起碼都要 2~3手執既份量就差唔多。同埋建意你將 d 薑皮放入湯袋後先煲,否則煲完你都要花 d 工夫先囉到 d 水黎用唷~~哈哈哈∼∼
你用薑皮煲水確實係物盡其用,但相比之下當然拍扁几舊大薑黎煲水會方便 d 丫。
2. 你用咩器皿黎裝水沖身都無咩所謂,用盆沖 d 薑就會見洗 d,哈~ 好似以前 d 人咁用個 "不" 黎淋身同用毛巾黎洗刷皮膚就 ok 架了。
同埋如你個浴缸係白色,我相信你沖左几次後就會發覺個浴缸會變左黃黃地色架啦!哈!@[email protected]~

… … … … …
小靈靈:
1.糯米酒做法唔太難,但造酒時既步驟反而要注意既野就好多!同埋須時起碼要 4個月至半年以上,所以亦都唔易。
而我份資料內所用既係黑糯米酒黎,係超市都買得到架了。
2. 而黑糯米酒既作用係可以益氣補血,都係會行血架,所以十二朝前主要用黎調味,去到惡露去淨後就可以直接飲少少黎補身。另外做雞酒都係好好架,同埋唔洗一定要坐月先飲得,往後我地 "m" 黎完都可以飲少少黎補補身補補血都唔錯架!

… … … … …
fishkar:
1. 餵人奶係可以飲雞酒糯米酒等既酒類架,不過就最好安排係食完 bb 後先飲,同埋相隔下一餐飲奶既時間最好要 3~4個鐘左右。但亦須要留意BB的反應,如面紅紅、面出粒粒、大便有沒有困難等,咁就要減少飲用既份量或停一停啦。
2. 坐月飲波打酒我都聽過,因我呀麻都有同我講過下~ 哈~
波打酒都有補血既作用架,不過酒精成份就高 d 同有氣,同埋多數都係凍飲,唔凍既真係好鬼難飲架!哈~~~

… … … … …
wavivienla:
紅米一樣可以炒黎飲用,但味道如何我就未試過。纖維質同營養價值比白米仲高 d 忝,相信係可以減少便秘既問題。
fishkar
|
thank you 曳媽咪!!
taurus_bb
|
一個好傻0既問題:

炒米茶其實可以用淡0既玄米茶代替嗎?
曳媽咪!
|
@[email protected]!!!!
係完全 2 樣野黎架啵!! 哈哈哈~~

玄米茶係綠茶類,但炒米茶只係一堆炒至黃黃地色既白米而已!! 係無茶葉架!
做法你可以睇返呢度既頭几個舖屎丫。
曳媽咪!
|
依?!!
點解無啦啦會自己彈左上黎咁頭既?!
仲要係被大頭釘釘實左!?! ?-( ?-(
spellinbee
|
曳媽咪!請問開刀係咪頭一個月唔補得嫁?
janet
|
曳媽咪!:

我發覺自己真係好多問題問呢!!希望你唔會覺得煩啦!!

將 d 乾米用白鑊炒到佢黃色,可以一次炒多 d 放入個玻璃樽度存放都得===>請問可以放幾耐呢??同埋係醫院時,每次最多整一個暖水壺,咁咪唔夠飲囉!!同埋其實每次用既份量係幾多到呢??要幾多水呢??

五更飯===>係唔係一定要落雞蛋??同埋麻油,係唔係抄到咁上下先落呢??有咩功效呢??

麻煩晒呢!!
taurus_bb
|
曳媽咪! 寫道:
依?!!
點解無啦啦會自己彈左上黎咁頭既?!
仲要係被大頭釘釘實左!?! ?-( ?-(


因為呢個topic實在太正...所以我私下要求版主把題目置頂方便查閱....希望你唔好介意 :wink:
evainnerv
|
Kitchu:

我都係好多野唔識, 我自己一個嫁去台灣, 奶奶係原居民, d生活習慣同我應該唔係好相同, 所以食方面我諗都係要自己搵食譜囉. 不過好彩有老公煮, 唔洗咁辛苦. :mrgreen:

另外好多謝曳媽咪咁有心, 開呢個咁有用既topic. 如果唔係都唔知要問邊個囉 :wink:
點評
tinporee  .  發表於 13-6-4 12:48
Powered by Baby Kingdom

隨時隨地瀏覽及討論更多親子話題

開啟親子王國 App
繼續瀏覽