本帖最後由 babyfung61 於 18-6-29 16:12 編輯
新手父母求救!!
奶粉BB就快滿月，起初連續十幾日BB凌晨食了一餐奶後都可瞓天光，如12am, 3am, 6am咁食。期間好好湊，餵完掃風抱一陣就瞓著，再放落床仔就一覺到下一餐。但日間扭眼瞓定唔知咩原因總有連續4-5個鐘唔瞓，即橫跨兩餐奶之間都唔瞓。
最近一星期則變成日間食得好瞓得好，夜晚就由11pm一直持續到3-4am都唔瞓或瞓唔到。我地唔識分，究竟係扭眼瞓定肚仔仲有風定係腸痛而唔瞓…已肯定唔係食唔飽、濕尿片問題，肚仔又按摩過了…
佢一路爆喊邊打喊怒、又間中會一路喊一路放屁、fing手fing腳好爆燥、好難令佢收聲、點抱都唔舒服咁，用返日間湊佢嘅方法好似都無效咁。我地好無助，變成大人同BB只可以眼光光等時間過，等BB眼瞓先可以放落床。如果未令到BB入到深層睡眠，佢就一放落床無耐即又再喊過…又要再抱返，重新再進行安撫…
上網睇有D父母提議有得BB喊飽就會瞓，但呢個方法適用於初生未足月BB嗎? 阿B可以喊咳到上氣唔接下氣咁，怕咁樣喊法會有問題或反效果…
又有父母話日間同BB玩多D，唔比佢瞓咁多，呢個方法都已試過，但都無用。日間同佢玩，玩多陣佢已扭眼瞓。
到底點做好呀? 晚晚無覺可瞓事少，怕日後BB慣左就更難修正。
係唔係多數初生BB每日都總會連續幾個鐘唔瞓架?
請問有無朋友有相同經驗可以分享點應付?
另外，如果有呢方面嘅肓兒問題，除左母嬰健康院之外，
有無其他政府機構有相關資詢服務提供? 請大家指教。謝謝!!
-----------------------------------------------------------------
29/6(更新): 多謝大家既回覆!! 咁我諗都係因為BB唔識分日夜而出現問題。
請問，如果訓練唔成功, 咁BB大概需多少時間先自動識得分日夜呀? 因為我發覺日間時要整醒佢係幾難既，佢一係就點都唔肯打開眼，一醒就喊，我地只可以繼續比佢瞓或提早餵奶。夜晚佢就眼光光或扭眼瞓但點氹都入睡唔到。
係唔係正常每個初生BB於日間都會連續幾個鐘唔瞓架? 定係一般佢地只係「食&瞓」不斷24小時內接住重覆，而沒有空白時間架? 即是有些BB係唔會扭百蘿、百日哭，而係好穩定地似機械人一樣重覆食&瞓? 請有經驗父母話我知。謝謝!!
發表於 
返回列表
