待產時，成日都上網睇D資訊同文章，當中睇過好多生產文，畀D心理準備自己。之後就發現果一刻來臨了但根本黎唔切反應，而家生完了，都分享一下過程，畀黎緊第一次既待產準媽媽參考。
37Weeks
足月就開始留意住所謂產兆：穿水，見紅，陣痛。除左個肚成日實左同大得好快，以至超水腫體重狂升之外，就係日日望住底底過活。
40Weeks
預產期到了，產檢個醫生畀左41Weeks入院催生期張紙我，望住有D驚驚地，聽（我細妹）講催生會痛D，呢個都唔係重點，重點在張紙寫催生會有可能唔成功有機會需要開刀（即係傳聞中的全餐）。之後就同樣地問自己，如果最終要開刀，點解唔一早就揀開刀？！算吧，生仔就係需要痛（差在順產前痛定開刀後痛）。
40Weeks4Days
天勤爸同我一齊去拎淘寶，佢講笑話個仔應該係等埋淘寶野到就出黎，因為我淘左D產後用品，散左陣步買埋今晚D餸就返屋企。
（分享一下）
*****中空孕妇屁股垫保健座垫（話明坐月，就係要日坐夜坐坐好多，平靚正，應該好過水泡吧）
*****产后盆骨带矫正带（迫開左盆骨痾完仔就緊係要夾返埋啦，patpat大左唔緊要，唔想以後盆骨會痛又或者郁唔到，人既支架盆骨好重要架！）
返到屋企照舊都係腰酸背痛（44吋巨肚負重+水腫當真唔係開玩笑😝每行一步都好辛苦），休息一下就去準備晚飯。
點知越煮越唔對路，本來都企到，之後腰酸到根本企唔到（原來呢種腰酸係產兆之一，都有民間傳聞陣酸比陣痛的產程會快D），要拎張櫈入廚房坐享到煮。搞下停下，幾經辛苦終於搞掂！
其實都已經腰酸到無乜胃口，食下停下，個肚又實下實下
天勤爸問：係咪要生仔？
我：鬼知咩，都未生過，畀我休息下先，可能今日行多左呢。
之後連飯都唔食，剩係坐波。
天勤爸問：係咪陣痛？係咪要生仔？
我：鬼知咩，都未係痛又未生過仔……
天勤爸：咁點算呀，洗唔洗去醫院？
我心諗：DLLM咁L多問題要答既？！
我：我都唔知呀，睇定D先，上網睇過D人話第一胎無咁快生而且都唔似果D產兆……不過醫生講過有咩唔舒服就即刻入院。
天勤爸：咁快D開個APP計下啦，應該係陣痛架喇。
咁咪拿拿聲Download個APP計下，天勤爸就著定鞋汁定行李。唔計由自可，一計發現每2分鐘實（因為未算叫做痛）1分幾鐘！！！！真係有規律架啵！！姐係傳說中既陣痛啦，咪拿拿聲衝入房畫返條眉（打算同BB出世合照個樣係咁衰，呵）再衝出門口。雖然話拿拿聲其實都好慢，平時行一分鐘既路程，咩住個巨肚變左行10分鐘，而家加埋每行2分鐘停1分鐘，我諗的用左20分鐘行。出。去。
終於行到去馬路截的士，我已經坐唔穩左右搖個肚又實，叫個司機慢D唔好咁登，哦完之後繼續好L登)#$*%(@&#%*!^幾經辛苦到左醫院！多謝晒呢程車，由陣實+酸變成真真正正陣痛了！大概用左5分鐘左右落車吧？！（即係由坐到企用左5分鐘，乜料啊！）天勤爸驚到手忙腳亂，都唔知入去好，叫人好，定睇住我好。幸好老遠急証室有個男護士（好似係）見到即刻推住架輪椅飛過黎，我又用左好一D時間坐上去……
男護士：首先恭喜晒，睇黎差唔多喇。下次唔好預咁遲，點解唔Call白車？
我諗：黎到醫院咪得囉
天勤爸：一時醒唔起……
男護士：白車有配套嘛。
去到急証室分流站叫天勤爸畀張預先準備好的VIP產房直通卡個姑娘，之後就用9秒9直飛我上B4產房！產房既姑娘，姐姐，醫生果然名不虛傳咁很惡，心諗我黎生仔姐，得罪左你地D乜？！（當然都有1,2個正常少少，不過聽我媽講以前一直產房姑娘都係咁惡。要服務好就去私家醫院啦，10萬蚊服務費唔方唔好，但問題係，就算公立醫院都係有出糧而唔係義工，但又有邊份工過癮得過有得出糧又可以D9人，不過就係血腥左D……）
一入到產房就有個姐姐就算你痛緊都不繼催你行去度高磅重，76KG～我的人生歷史上最可怕的數字記錄！之後就係要去Check宮頸，上網睇過D人話好痛，（Check宮頸係腳板對腳板，然後申兩手隻入去做個勝利手勢✌️V撩下轉下去度）我唔覺痛，可能因為腰酸陣痛緊，只係感覺唔舒服。
唔知係姑娘，助產仕定醫生就話：直接入去啦，宮頸已經軟左。
同我度高磅重果個姐姐就的左我去廁所，叫我盡量痾清D尿先入去，佢就走左去隔離間房拎衫（紫色後面開空果D衫），之後就的我行入去產房。
原來（而家既）產房係一間獨立房間（我阿媽話以前係好似6人病房果D咁，完全聽到晒隔離點生仔……），一入去就有個洗手盤，有張BB床磅，有BB箱有燈，一堆儀器度BB心跳度宮縮度血壓等等，一張床，床對住個鐘，電視，埋邊仲有個分娩波，我無時間坐波，最快速忍痛除晒D衫就畀個姐姐的左上床，然後有幾個助產仕張我五花大綁，個肚checkBB心跳宮縮，一邊手打豆豆，另一邊手臂量血壓，手畀左個罩我吸氣，助產仕話：痛就大啖大啖吸止痛氣，唔痛就拎開，等我地整埋晒D野就叫你先生入黎啦。（開頭都無乜點吸，覺得罩住透唔到氣，呢D所謂止痛氣體個人覺得唔會止痛，只係令人WingWing地同記得呼吸唔好閉氣）之後話都無咁快，清晒人，剩得我一個綁享張床到等……
*****天勤爸回憶錄
享產房門口等下，見到有另一個準爸爸享度等，就同佢吹下水，原來佢老婆早產，而家已經等左十幾個鐘，煩惱緊唔知點算因為請左果個陪月唔可以早返工
（如果我再有機會生B，何止請陪月，如果有好似台灣既月子中心，幾錢都一定要去，真係無享屋企咁麻L7煩！女人真正可以休息！阿B真正有人照顧！男人真正可以放心！！）
拎住個走佬袋享產房門外等，因為產房外無櫈，天勤爸坐左享頭先推上黎果架輪椅到，直到又係個姐姐出黎叫入去。
一入去換好果套紫色衫套裝（帽，衫，口罩），去廁所。
姐姐：痾尿呀
天勤爸：痾左丫
姐姐：再痾清D，入左去唔會隨便畀你出黎架
天勤爸：哦（都話痾左囉……）
有人入黎我間房，原來係姑娘帶左天勤爸入黎。
講真，享呢一刻我覺得有種莫名奇妙的感恩，有人陪產對個綁左享張床到陣痛既女人原來好重要！
（孕前期問佢話怕血一定唔會入產房，中期都話怕血唔想入產房，後期就十五十六，最後享產房門口，姑娘問都無問佢想唔想入，就喝左佢入產房。）
開頭雖然痛（都係每2分鐘痛一次）但都仲可以同佢對到話。
姑娘畀左個”止痛”氣罩天勤爸拎住，話我痛果時就畀我吸。
有咩事噤個鐘仔叫姑娘。
天勤爸問：唔知一陣會去邊到生呢？
我痛過左之後答：下？你咪入左產房囉……
天勤爸：下？姐係呢度生呀？
我：應該係啦，如果唔係點會綁我享度……
天勤爸：下？間房唔似喎，仲以為係單人病房。
佢就一邊手畀我搾，一邊手拎住個罩。
（溫馨提示：個罩要吸實邊邊無空位先可以吸到氣的，就咁放享面上有空隙係吸更加透唔到氣，隊友們要注意啦，之後我係搶返自己拎，因為痛緊又唔好閉氣一吸差D焗死……）
40Weeks5Days
00:00
醫生帶住一隊助產仕衝左入黎，唔知Check咩，又問左一堆問題，我吸到WingWing地而家唔多記得問題細節了，應該都係咩名，身份證，有無敏感，唔好亂痾之類吧，個個帶住手罩都唔知邊個又同一時間講緊野又問問題，不停喝9我
：醫生問你問題呀，你應下人啦！
：姑娘問緊你野呀！
：隻手唔好郁，唔好用力，量緊血壓呀！
：唔好亂痾唔好亂叫，留返D力！
：痛都要答人架，生仔係痛架啦！
等等等等……
*#@&%*#@%@）#$^@我幾L時有唔答呀？！$*幾個人一齊講野聽得呢個又答得邊個呀？》*@#（$%&&完全係撩交打Feel！（**（$#
陣痛過了，就拉住天勤爸講：冷靜D，唔好嬲……
見到佢眼火已經爆晒出黎lu
之後醫生（應該係，因為著白色制服）同幾個助產仕唔知邊個就話：未穿水開左2度
享下面撩幾撩：而家同你穿水。
就有堆暖苙苙既水衝左出黎，都幾多下。
醫生：胎水有D濁……………………
陣痛黎到吸氣好似聽到又記唔到佢講過乜，搞完一大輪，好快又一隊人走晒出去，熄埋燈咁有氣氛，間房又剩返我同天勤爸。
繼續痛下吸下氣，Wing下Wing下，每次痛過一次就再更加痛一次，個肚實都不能再實，天勤爸話每次陣痛，個肚都變形！開姑慢慢：丫～～～～～慘叫起來，哈哈，已經盡量細聲啦，但真心控制唔到。果種痛係個肚越來越實腰越來越酸，實到一個點既時候條腰酸到硬晒梗晒，頭不由自主地向上拉，個身就不由自主咁扭（好似抽筋咁嗱到實晒），然後有種強大力量同隕石墜落地球一樣向下撞撞撞撞撞……
（網上D人又話似100倍M痛/超級嚴重搞肚痛/去到十級痛就＝十條骨同時斷，完全唔係果回事！）
難為左天勤爸隻手畀我扯扯扯扯扯……
又不斷享隔離錯晒拍子咁重複叫：吸氣……呼氣……吸氣……呼氣……
（可能睇得劇集多。）
02:00
唔經唔覺掙扎左兩個鐘，有個助產仕走左入黎check下穿完水之後開左幾多度，就走左。（連想問係幾多？既機會都無……）
我繼續享床上面掙扎搏鬥，果種向下既撞擊硬度同力度不斷加大，每次墜落都控制唔到咁：丫～～～～～～～！！！
過左唔知幾耐又有個助產仕入黎又唔知Check D咩就順勢問下，
助產仕：頭先度過好快開左6度，做得唔錯呀，繼續放鬆就會開得快D。
！）%&@#$&%*真係想請指教……如謂放鬆！#&$！@*$！%）@_^&#%$
我：仲有幾耐？
助產仕：之前產前講座咪有講過囉，第一胎基本1個鐘頭開1度丫嘛。
之後又走左去……
我，肚裡面既天勤同埋天勤爸繼續享呢間咁有氣氛既房繼續努力。
03:00
已經越來越重擊了！其實最難頂既係無止境咁等落去，你唔知等到幾時。
天勤爸見到我咁，開始唔知講咩，連吸氣呼氣都唔識講，可能見到我扭曲到咁講黎都無用。
去到呢刻，記憶已經好模糊……
我：難怪……咁多人……寧願……捱一刀，都要……避開陣痛……真係……好難頂……
天勤爸：加油💪吸氣，呼氣，吸氣，呼氣……
過左一段時間
真係好重！好重！就黎頂唔順啦……
我：幫我問下姑娘打止痛針（因為爬過文，好似有止痛針）
天勤爸：下？
！（@$&@#（&＊！*$（@&%！*#$@）*
我：幫我叫姑娘……
天勤爸：哦。
助產仕入左黎（好在係難得比較溫柔果個），問我咩事
我：可唔可以打止痛針？就黎頂唔順啦……
助產仕：頭先度過已經開左6度啦，都唔會用，岩岩1,2度就會用。
我心諗：唔L早講……
我：咁而家幾多度？
助產仕：咪都係6度囉，第一胎基本1個鐘頭開1度，之前係開得快，唔＝而家開得快，再忍耐一下啦，已經做得好好啦，繼續放鬆D就開快D。
之後又走左去……
過左一段時間
重擊！重擊！無止境的重擊！
忍唔住捉實天勤爸講：我！想！死！
天勤爸畀我捉住：加油💪吸氣，呼氣，吸氣，呼氣……
過左一段時間
醫生又帶左一隊人入黎，Check下機又Check下我。
醫生：呀太太！唔好再亂痾喇，仲未痾得架，BB頭仔有D腫喇。
乜我有痾B咩？！！！！！我係感覺到向下重擊，但係已經盡量防守…
即係你攪肚痛，都要忍，所以我唔知自己有痾啊？*#$&%！^$*！&@*
Check完一輪唔知咩野，又再放尿（係，之前應該放左1次，呢幾個鐘總共放左3次，但係我唔多記得時序，就係記得見到醫生一隊人就會放尿……）
醫生：BB仲未夠低，再等下。
助產仕對住天勤爸講：你見佢開始失控，發晒癲咁就噤鐘仔啦。
之後成隊人走左去……
04:00
都係天勤爸講返我知，因為當時我已經無晒時間觀念，雖然個掛鐘就係我對面
我：已經頂唔順啦！！
丫～～～～～！！！！！！！
一野超重超長既陣痛，我仲以為自己已經死L左！！襯個痛岩岩過，回都未回氣，拿拿聲叫天勤爸：……叫……姑……娘！
天勤爸：下？哦！係咪噤果個鐘呀。
*@#（%^@*（#$%呢一刻，我真係好想好想好想死，你地再快D切開我拎阿B出黎好好養大去。@#&^$！$（*&
我：係呀！
兩個助產仕入左黎：咩事噤鐘仔？
天勤爸：佢話頂唔順喎。
丫～～～～～！！！！！！！
助產仕：你真係咁想痾，而家畀機會你痾喇，痾2次唔到就繼續等。
講完之後就將張床變形，享床下半變出兩個腳踏，兩個手柄，然後就等陣痛過既時機拿拿聲埋位！
（好在之前唔算筋太梗，簡單黎講個動作就係亞洲蹲，不過瞓享到做，早講啦，咁就產前運動唔做深蹲，而做亞洲蹲！然後我就明白之前睇過D片入面個女人點解行行下都可以痾B，全靠由細練到大既亞洲蹲！）
助產仕：你要聽好指令，腳放呢到，搾實個柄撐起手㬹，下爬貼近心口，一陣開始陣痛既時候就要用力好似痾屎咁痾，一口氣起碼要痾10秒以上！一粒聲都唔可以出，專心痾！
心諗是旦啦，你地想點就點喇，目標只得一個：阿仔快D出世！
陣痛黎啦，痾～～～～～～～～～～～
唔覺以”En～～！”左一粒聲，即刻畀助產仕鬧………………
*#&$*#^%!@$&!*@%^!(&$@
第一次試痾唔成功，要等下一次陣痛，呢個時候發現果個醫生已經入左黎，間房由兩個人多左唔知幾多個人……
第二次試痾，都唔成功！嗚呀！好驚丫，因為聽到BB心跳果部機享痾果時聲音弱左……！
醫生：BB位置唔夠低，你痾唔到，下次陣痛吸氣過！
幾個助產仕又一齊講野，我完全記憶唔到……醫生睇住D儀器，助產仕又放尿，今次佢地無一隊走左去，我估應該差不多啦。
放完尿，過左幾次陣痛之後，再一次埋位痾！
痾～～～～～～～
頂！痾左幾次都痾唔到！開始有D唔夠氣啦……
醫生：BB仲係唔夠低，但係要盡快出黎，要用吸盤，會陰切開。
幾個助產仕即刻好忙，首先的左天勤爸出去，又拎左D野黎簽名，又用布遮住下半身，又check呢樣，又走黎走去，我都唔知搞緊咩，因為換左個助產仕畀氣我吸，完全無空隙，吸到Wing下Wing下……
醫生大叫：下次陣痛，用力向呢個位置痾！唔準痾出聲！一口氣10秒以上！
陣痛黎啦～～～
見到醫生拎住個銀色吸盤，個Size直經大概好似可樂罐咁大！
痾～～～～～～～～～～～
同一時間感覺到左邊被𠝹（唔算太痛）左一下，再塞（呢野仲痛又凍冰冰）個吸盤，幾個助產仕享到推個肚，又你一句佢一句咁講野，都係聽唔晒佢地講乜野，又係果D用力，唔好出聲，一口氣繼續痾等等……
同一次陣痛未過，第一次未痾得出，即刻深呼吸一下，再痾！
痾！！！！！！！！！！
助產仕：BB出世，5點20分！
一大舊暖笠笠又滑劣劣既野放左享我肚上面，但好快就畀人抱走左。
終於……所有重擊陣痛即時完結，個人鬆晒。
助產仕拎住天勤過黎，用雞雞對住我，問：BB係男仔定女仔？
我：男仔……
醫生：繼續吸氣，見暈出聲，而家要止血縫針。
我拎住個罩，望住近門口BB位果邊，助產仕同兒科醫生都忙緊，我好努力集中精神對焦住天勤，10個月過去，終於同呢個最熟悉的陌生人見面，其實呢一刻感覺仲係好唔真實。（唔知係咪吸氣吸到WingWing地有關）
助產仕走過黎對資料，話BB要去兒科病房。之後天勤就入左箱仔推走左……嗚哇！一面都無見過（剩係見過雞雞……😥）無得抱抱，無得同阿仔合照……
助產仕不停問我有無暈，開頭都唔知咩事，原來係我失左好多血，醫生止血搞左好耐，終於搞左個幾鐘終於搞掂，期間搞左咩我都無乜印象，吸氣吸到WingWing地……
0700
終於成隊人走下一個走下一個，間房無晒人，而我就要留享產房到觀察。
佢地放返天勤爸入黎陪我，觀察到12點，無再失血先放返上產後病房。
12:00
上到產後房，好辛苦忍住痛過床，唔多唔少都有傷口，仲有子宮收縮痛，之後就畀人不停催我痾尿（要清一清，唔好漲住阻住子宮收縮）。原來生完仔個人真係會好虛……
住院呢幾日，都無落過地咁濟，輸左4包血，姑娘都唔畀我落床怕我暈，眼見其他媽媽生完果D個個都抱BB，而我個仔又享箱，我又唔落得床……辛苦天勤爸兩邊走，有影相拍片我睇！
直到出院果日，我先第一次餵奶！
發表於 
睇完你篇文章令我諗起嗰種刻骨銘心嘅痛楚 ，我都係公立醫院順產嘅， 不過我有少少唔同就係我胎位不正我要不斷屙番岩bb個頭仔位置先可以畀我順產,我痾左2個鐘姑娘先比我正常生個仔
返回列表
