意料之外的反應

csir3290
|
本帖最後由 csir3290 於 18-9-16 15:12 編輯

上星期阿女仲放緊暑假咁啱我又攞咗假喺屋企睇佢做嘢,通常朝頭早起身食完早餐佢就會自動自覺完成我畀佢做嘅練習然後先玩。嗰日我畀咗個數學練習佢做,都有成40幾題差唔多六頁,其實我自己都覺得有啲多,但係總係覺得應該要全個練習完成,所以都係叫阿女一次過做曬。 阿女一見到有成六頁紙咁多嘅練習都已經有啲唔開心,已經話點解要做咁多。佢話平時都係四頁今日特別多。可能我已經講咗要做曬,所以阿女咁講我都冇理佢。阿女一向都係好聽話嘅小朋友,我叫佢做雖然佢可能會有唔開心但係佢都係會照做。一路做其實阿女都係苦口苦面,我又冇特別留心佢自己睇書睇報紙。後來望下阿女做下做下做到好似想喊咁。我自己諗可能都真係畀得太多,所以開聲叫阿女行過嚟。阿女開頭唔係好敢行過嚟可能佢以為行過嚟我就會鬧佢啦,所以佢一聽到我叫佢行過嚟嘅時候佢啲眼淚即刻標出嚟。佢可能真係好驚驚我會鬧佢,因為過往亦都真係試過 佢啲嘢做得唔好而俾我話。點知嗰次其實我真係冇諗住鬧佢因為我自己都知道嗰日畀嘅練習係真係多咗,我行埋去拖住佢,我冇鬧佢之餘仲即刻攬住佢,可能我呢個反應佢真係預料唔到,因為佢可能只係預咗我會鬧佢,所以佢即刻喊出嚟。喺嗰刻我冇鬧佢之餘仲反而同佢講係咪覺得啲練習好多好難做,佢即刻點頭。跟住我同佢講不如分兩日做啦!我同佢講今日先做四頁淨低嘅就聽聽日做啦。 如果做完四頁之後你想繼續做就繼續做咁你總言之做曬呢六頁,聽日就唔使做啦。如果你做完四頁覺得攰就聽日先至做。佢聽完我咁講佢即刻點頭跟住我仲同佢一齊去抹眼淚,之後佢就笑住咁返埋位繼續做。其實我知道6頁嘅練習係比較多,但係其實入面當中有好多題目都係好簡單只不過係因為頁數比較多,只要阿女一路做佢就會發覺其實當中有啲題目係非常之簡單好易做,做吓做吓就唔會覺得好多。 終於果然阿女做吓做吓一次過就做曬啲練習,佢自己之後都同我講話原來入面有啲題目真係好簡單所以不知不覺就自己做曬。 喺呢個時候我梗係即刻讚佢啦!我同佢講我好欣賞佢堅持做曬所有嘅練習,連佢自己都話原來做下做下都唔覺得好多,亦都唔覺得好辛苦。
其實小朋友我哋由細凑到大,根本好多時佢哋都已經預咗家長嘅反應會係點。好似呢一次件事咁,阿女其實預咗我係會鬧佢嘅,如果我真係鬧佢可能大家仲會僵持不下,佢可能都係會做但係佢會一路做得好唔開心,而且要用好多時間先至做得曬。正正係因為今次我畀咗一個佢意料不到嘅反應佢,佢由預咗畀人鬧都冇畀人鬧反而仲支持佢,佢由唔開心即刻變成開心,笑住咁去做練習。 一個意料不到嘅反應就化解咗一個可能會互相僵持嘅危機。正如我之前都講過,好多時家長嘅所謂堅持都係一啲無謂嘅堅持,與其搞到大家都唔開心,不如諗下嗰一啲嘅堅持係咪真係咁需要呢。好多時同仔女發生嘅衝突正正就係因為家長用咗第一個反應去處理問題,因為仔女唔聽我哋嘅說話或者對我哋嘅決定有異議嘅時候,家長就覺得自己嘅權威受到侵犯,咁我哋第一個反應就係唔開心,其實如果家長都識得停一停諗一諗先至做決定嘅時候,可能可以化解到好多唔開心嘅問題。 其實我今次處理阿女呢個問題可能都係有啲好彩,因為我叫阿女自己做嘢自己行咗去睇書同埋睇報紙,正正就係因為咁畀咗一啲時間自己去諗問題去思考一吓處理嘅方法,所以我都要提醒自己有陣時都要發嬲嘅時候都係要停一停諗一諗,然後先至俾反應。有陣時畀一啲仔女意想不到嘅反應正正就係化解問題嘅關鍵。
lhzgigi
|
好好嘅提醒
Powered by Baby Kingdom

隨時隨地瀏覽及討論更多親子話題

開啟親子王國 App
繼續瀏覽