離預產期仲有2星期左右,好緊張呀(>﹏<)

win_ryo
|
因為第一胎咩都唔識,想問下有經驗既媽媽,到底臨生前幾日有冇咩徵兆架?
我個走佬袋已經ready, 最近覺得個肚好墜住墜住,三角位又開始痛,行街都覺得辛苦左,聽人講生前幾日對腳會好腫,係咪真架?
我呢個星期覺得自己好似大食左好多,唔知係咪要開始準備生BB 所以身體開始要我食多啲儲能量。
同埋係咪真係要多行樓梯先會易啲生?
屋企住舊樓,後樓梯無窗,所以我唔prefer行屋企既樓梯,怕焗親暈低到時無人知,有冇方法係屋企做啲運動當行左樓梯架?
希望有經驗既媽媽可以解答一下,謝謝!
Siuying211
|
我第一胎生之前幾日,個人情緒會唔知點甘嘅感覺,行路辛苦左,跟住第三日我就見紅穿水,第二日就生b啦。不過個個經歷不同,妳不用擔心。
我果時上產前運動班,姑娘建議不宜行樓梯,所以我通常行公園,個人會輕鬆些。
fansub
|
加油呀!(emoji)(emoji)我仲有3w,好緊張!我都想知有咩徵兆
喺屋企做多d深蹲丫
win_ryo
|
Siuying211 發表於 18-9-18 00:36
我第一胎生之前幾日,個人情緒會唔知點甘嘅感覺,行路辛苦左,跟住第三日我就見紅穿水,第二日就生b啦。不 ...

今日有去瑪麗產檢,醫生話摸到BB頭仔已經落左盤一半,我諗佢可能都準備好要出黎,醫生千叮萬囑我有有作動跡象就要即刻入院,約埋40週做產檢話如果呢兩星期都無作動跡象就要安排催生啦
其實呢個星期行路已經覺得無之前咁輕鬆,感覺係唔同左好易攰,你果陣行公園行幾耐呀?
到生時生得快唔快呀? 好驚要陣痛好多個鐘呀
win_ryo
|
fansub 發表於 18-9-18 19:12
加油呀!(emoji)(emoji)我仲有3w,好緊張!我都想知有咩徵兆
喺屋企做多d深蹲丫
...

大家一齊加油! 我覺得去到最後一個月真係又緊張又期待,去到依家38週真係會日日諗住佢會幾時出黎,好想快啲見到BB, 但又會覺得好忐忑不安
Siuying211
|
win_ryo 發表於 18-9-18 22:21
今日有去瑪麗產檢,醫生話摸到BB頭仔已經落左盤一半,我諗佢可能都準備好要出黎,醫生千叮萬囑我有有作動 ...

我每次行15-20分鐘公園左右,不如果妳攰就不要勉強,慢行一陣好啦,始終隨時生,要注意安全。我果時係上午落催生藥,開始陣痛,愈來愈痛,差不多痛左6個鐘,之後夠度數就生左一個鐘。
所以,好好期待bb出世呀(emoji)(emoji)
win_ryo
|
Siuying211 發表於 18-9-18 22:42
我每次行15-20分鐘公園左右,不如果妳攰就不要勉強,慢行一陣好啦,始終隨時生,要注意安全。我果時係上午 ...

我依家有時係屋企會做下孕婦瑜伽,希望對生時有啲幫助,可能學下你食完飯搵老公同我落樓下公園行下
你都生得算快,好叻呀!7個鐘成績好好啦我希望自己都可以幾個鐘搞得掂
我諗去到陣痛都只能同自己講好快見到BB,催眠自己會過既,幾痛都會過,到見到BB 我諗再痛都值得

haha748494
|
你可以系屋企附近散步。臨盤前,我行兩步就覺得好攰。
RubyYu07
|
我臨產前都做唔到運動,因為肚比較大,辛苦啊。飯後散步當運動了
常綠葉
|
我果時38週落晒盆,子宮開左一指,39週開左兩指,都無咩感覺,但個肚又真係會覺得墜。唔洗特別行樓梯,但又真係要行多d,可以考慮行d暗斜平路。記得要練定呼吸法,生時用力push時記得個下巴要貼胸口,唔好張大個口push。要好似BB開大谷poopoo咁,hold住d氣push。陣痛時唔好浪費力係度大叫...我果時低聲呻吟左5小時,咁就生左lu。Push時係唔痛既,但生完會勁口渴!我生完立即飲左3支寶礦力

如果你發現多左好多分泌,咁就會係果幾日生架啦⋯⋯坐多d瑜伽ball好有用,同飲raspberry leaf tea 。但呢個tea應該37週開始飲...祝你一切順利,大小平安
我要做媽媽
|
我成個產程腳都唔腫,可能都係個人情況既
rose0826
|
win_ryo 發表於 18-9-18 22:21
今日有去瑪麗產檢,醫生話摸到BB頭仔已經落左盤一半,我諗佢可能都準備好要出黎,醫生千叮萬囑我有有作動 ...

你生咗未丫
hamsterma
|
win_ryo 發表於 18-9-17 21:11
因為第一胎咩都唔識,想問下有經驗既媽媽,到底臨生前幾日有冇咩徵兆架?
我個走佬袋已經ready, 最近覺得個 ...

我第一胎36週落盤行路都唔係幾舒服,結果推遲一個星期
bonbon18
|
常綠葉 發表於 18-9-19 17:06
我果時38週落晒盆,子宮開左一指,39週開左兩指,都無咩感覺,但個肚又真係會覺得墜。唔洗特別行樓梯,但又 ...

開左一指/ 兩指即係開左度數? 咁唔會穿水咩?
luv_miyuko
|
常綠葉 發表於 18-9-19 17:06
我果時38週落晒盆,子宮開左一指,39週開左兩指,都無咩感覺,但個肚又真係會覺得墜。唔洗特別行樓梯,但又 ...

唔係到生先開度數架咩?會早一兩星期開架咩
freshrose
|
我去到39W 6 都無咩感覺, 可能我B 無咩點落盤, 我臨生前2星期仲要日日行3個鐘

去到39W4 開始見紅同有D 子宮頸分泌, 我無入院, 39W 6 去產檢醫生仲話我子宮頸唔熟, 約左我2日後先催生, 點知產檢返到屋企就無端端穿水, 即刻入醫院, 係預產期果日生左喇
win_ryo
|
rose0826 發表於 18-9-19 20:56
你生咗未丫

未呀,仲等緊,不過呢排多左好多分泌呀,希望佢可以39週左右出世啦
win_ryo
|
常綠葉 發表於 18-9-19 17:06
我果時38週落晒盆,子宮開左一指,39週開左兩指,都無咩感覺,但個肚又真係會覺得墜。唔洗特別行樓梯,但又 ...

本帖最後由 win_ryo 於 18-9-20 13:27 編輯

咁快就開左1指啦,我以為陣痛開始先會開始開度數
我前日去產檢佢都係摸下個肚,度下BB心跳咋,都無同我做其他檢查,不過38週後個肚真係會墜好多,行路又慢
後日私家都會做產檢,唔知醫生會唔會話到我聽佢早定遲呢,好緊張呀
我依家放假每日都係得我一個係屋企,夜晚先會有人返黎,諗緊見紅、陣痛係咪可以等埋老公返到黎先入院,不竟第一胎,應該無咁快,但穿水係咪要自己入院好啲,唔好等老公返黎
win_ryo
|
我要做媽媽 發表於 18-9-19 17:24
我成個產程腳都唔腫,可能都係個人情況既

我好早就開始腫啦,啲手同腳都腫,但有啲媽媽係臨生先會腫,或者好似你咁完全無腫過,可能呢啲都係因人而異
win_ryo
|
RubyYu07 發表於 18-9-19 16:27
我臨產前都做唔到運動,因為肚比較大,辛苦啊。飯後散步當運動了

真係行陣都覺得攰啦,想快啲卸貨呀,希望佢唔好逾期居留啦
Powered by Baby Kingdom

隨時隨地瀏覽及討論更多親子話題

開啟親子王國 App
繼續瀏覽