可能我真係唔識教仔(長文)好沮喪

naigai
|
背景:大仔今年小一,細女3歲。女好愛哥哥,直頭當佢係偶像,哥哥都會同佢玩,但有時會蝦佢鬧佢。我一直覺得哥哥雖然有少少頑皮,情緒控制麻麻,但也是善良的,直到升小學後。。。

呢兩個星期我發覺哥哥越來越曳,成日講大話,又會指罵工人姐姐。

今日更加離譜,我一放工返屋企,姐姐立即投訴哥哥好曳,我未見過姐姐咁嬲,原來發生2件事。

一,姐姐去洗手間時,哥哥無端端話驚,妹立即去安慰哥哥,攬住佢叫佢唔好驚,之後哥哥就同妹攬埋一舊玩(CCTV睇唔到,只聽到過程),哥哥突然咬妹手臂,咬到少少流血。


naigai
|
二,姐姐發現哥哥突然有張$100,懷疑佢偷錢,哥哥上星期喺我放coins嘅杯已經偷過$,我已經好嚴勵話&罰佢,所以姐姐一見佢有$立即通知我。

我一入屋就先處理佢&妹,佢開頭話妹曳,壓住佢,佢太嬲先咬妹。我當然知佢講大話,所以俾CCTV佢睇。當我話佢時,妹妹走過來叫我唔好鬧哥哥,因為佢唔小心,我果刻真係好心痛,點解哥哥咁唔懂事,之後一輪訓話後,要哥哥幫佢貼膠布,再攬返妹妹。


naigai
|
然後,再處理偷$,我盡力控制自己,平心靜氣問佢張$100點得來,佢無講大話,話上星期喺我手袋拎,想小息買燒賣食,但又因為知道偷是錯,所以一直無用到。我用左半個小時去講偷$嚴重性,叫佢之後唔可以再做。

我無罰到哥哥,因為呢幾個星期,佢太太太曳,我狂罰佢,但發覺越罰越曳,所以知道未必work,所以我試下企喺佢立場去想,最後我仲同佢講,每個星期有$5零用錢,教佢點理財,希望從此建立佢對$正確觀念。


naigai
|
我呢幾個星期真的好攰,好無助,唔知點解個仔上小學後點解會甘大轉變,更加唔知我應該從咩方向教佢有冇jm有類似經驗,指點下


最後,請各位高抬貴手,我已經負能量爆燈,純粹揾個地方發洩一下,唔好惡言相向,唔鐘意請路過

appledai
|
本帖最後由 appledai 於 18-10-20 22:51 編輯

冷靜,我剛才都在想如果可以重來,我一定不生,可是,沒有如果。。。
向學校,社工求助。我就是在絕望的時候打電話學校求助,學校有輔導主任。現在有社工幫助遊戲治療。媽媽加油
mickeywinnie3
|
真的幾難教,同時亦比較聰明,只能說忍耐比心機教!
點評
wcpcelia    發表於 18-10-21 16:38
falalala
|
naigai 發表於 18-10-20 22:47
然後,再處理偷$,我盡力控制自己,平心靜氣問佢張$100點得來,佢無講大話,話上星期喺我手袋拎,想小息買 ...

我覺得你處理得好好,畢竟每個小朋友性格唔一樣,你好細心,亦好有耐性,加油呀
YuiYeeMa
|
本帖最後由 YuiYeeMa 於 18-10-20 22:57 編輯

小一如果學校有小食部應該每天都要給零用錢,每星期五元一定不夠,他可能因其他同學可以買零食而被取笑或孤立,才把學校的唔開心帶了回家發洩。樓主,先和孩子談談學校生活,先了解他的需要吧

littlecar
|
naigai 發表於 18-10-20 22:48
我呢幾個星期真的好攰,好無助,唔知點解個仔上小學後點解會甘大轉變,更加唔知我應該從咩方向教佢有冇jm有 ...

我好明白,因为每一個小朋友都獨特,其實無一定可行方法,有一個爸爸曾經同我分享自己細個係点教都唔聽,入咗男童院先識驚先知屋企好。 佢個仔似咗所以佢只係将男童院恐怖事講晒俾佢個仔知,之後佢就放手俾個仔自己行。 係好無奈,但佢話仔有時係咁,我地係女人未必明。
414928
|
問題應該從源頭做起,就係點解佢唔對你講真話?溝通出現問題?想買小食唔係問題,點解選擇偷都唔想直接問你取?大人好多時都用左大人做法去處理問題,咁小朋友除左怕之外就什麼都沒有,你多點企係佢角度想,亦叫佢多點企係妹妹角度睇,學懂互換角色睇事情,好多問題根本不是問題,放鬆一點,教仔無天書亦不止一條公式。加油!路雖慢長,但你不是孤單一人。
章太郎
|
naigai 發表於 18-10-20 22:48
我呢幾個星期真的好攰,好無助,唔知點解個仔上小學後點解會甘大轉變,更加唔知我應該從咩方向教佢有冇jm有 ...

本帖最後由 章太郎 於 18-10-21 01:51 編輯


點評
appledai    發表於 18-10-20 23:21
littlefunpig
|
YuiYeeMa 發表於 18-10-20 22:55
小一如果學校有小食部應該每天都要給零用錢,每星期五元一定不夠,他可能因其他同學可以買零食而被取笑或孤 ...

我都覺$5 一星期太少
一日$5差不多
我細個講緊廿幾年前都$1日
呀仔返到學校睇住人地有得買野食自己on居居坐下行下又無得同其他小朋友分享零食,實好唔開心
little_monkey
|
我覺得你處理方法唔錯喎。可能小朋友需要時間去理解和接受。媽媽加油!
leecnine
|
本帖最後由 leecnine 於 18-10-20 23:17 編輯

上小一係一個小轉變,我都明白男仔好難教,鬧之餘,我會揾日同佢去食麥當勞,或者佢好鍾意食的餐廳,同佢傾計,輕鬆d,問下佢嘜野原因偷錢,叫佢大膽d講,講明一定唔會鬧佢罰佢,等佢肯同你講真心話。當然聽左之後唔好怪佢鬧佢,用平常心,平和語氣,跟佢講道理。
努力呀jm,老人家講得岩,學壞3日,學好3年,迫不得,同仔相處,真係要成日傾計,比佢感覺,你信得過,建立信任,日後,有嘜事,佢都會同你講。
tutik
|
我又覺得你處理得好好喎!男仔係不斷有啲衰嘢激下你,提意比啲任務佢,例如出街時保護妹妹,幫媽媽買嘢時格價慳錢。。。
rex13
|
naigai 發表於 18-10-20 22:47
二,姐姐發現哥哥突然有張$100,懷疑佢偷錢,哥哥上星期喺我放coins嘅杯已經偷過$,我已經好嚴勵話&罰佢, ...

我自己都學習中,但有冇了解過系學校同同學相處既情況,會唔會有啲咩唔開心既事,又冇同你講?而自己又唔知點應付,就發洩左系阿妹度?哥哥未上小一前同妹妹既關係系咪咁樣?
另外,一星期5蚊又真系小左啲⋯可以了解下佢系學校小息鍾意買咩食,去衡量下每日比幾多錢佢
mmk
|
你處理得唔錯喇,但5蚊真係太少,唔係每日都要買零食但5蚊一星期先食到一次,你仔都係曳,但你而家開始多啲溝通了解佢思想,唔好沮喪,加油
小鈴鐺
|
就咁睇, 哥哥同妹好比較, 哥哥頑皮D, 妹妹乖D?
2個小朋友, 大人會照顧細果個多D, 對大果個要求嚴D,
但係, 在小朋友眼中, 就會覺得大人錫細果個多D,
又會諗同一件事, 阿妹做就無野, 自己做就俾人鬧,
為左吸引大人注意, 可能就會更曳.
今年上小一, 各方面要求高左,
佢本身都可能有D情緒.

試下多D抱下佢錫下佢,
俾佢感受下你係錫佢既.
同佢解釋下點解對佢同妹妹既差別待遇.
(我仔7歲, 女5歲, 前2年我問阿仔,
知唔知媽媽最鍚邊個? 佢會答阿妹)

至於偷錢, 其實佢都無咩機會使錢,
可能真係小息見人買野食, 自己都想有D錢,
想買既話可以買.
(亦唔排除人地有錢買, 佢無,
所有有D俾人比下去的感覺,)
俾D零用錢應該有幫助,
不過$5/星期可能太少, 試下問下佢夠唔夠用,
如果唔夠試下問佢覺得幾多好?
同佢商量下. (我覺得$2-3/日好D)
happybebebe
|
本帖最後由 happybebebe 於 18-10-20 23:30 編輯

我小朋友小五都未有零用錢
從來沒有帶零食
我諗增加零用錢可能未咁適合(年紀小,好易以零用錢同同學比較、在小息吃太多,午餐就無胃口)
我諗先停止帶零用錢回校,零用錢只限在你可觀察的情況下使用,例如儲起買文具。改為自帶零食,同埋叫佢唔好用咁多時間排隊買嘢食,小學小息好多嘢玩(借書、玩呼拉圈、學校活動....)先習慣校園生活先

chillimom
|
佢好明顯係上了小一,大轉變,有壓力啊媽媽!
Powered by Baby Kingdom

隨時隨地瀏覽及討論更多親子話題

開啟親子王國 App
繼續瀏覽