幾時先肯放低部手機

csir3290
|
本帖最後由 csir3290 於 18-11-11 11:29 編輯

無論幾忙都好,每一晚都盡量會返屋企陪老婆同埋仔女一齊食飯,因為食飯時間真係一個好好嘅溝通機會,大家可以乜嘢都講。間中都會一家人一齊出街食飯,我哋一家人食飯嘅時候不論喺屋企又好喺街都好,都會好多嘢講,所以有時真係好唔明有啲家長嘅諗法,因為好多時喺出街食飯嘅時候都會見到其他人就算一圍枱圍埋一齊,大家都唔講嘢,各自揸住部手機。細路就睇youtube 或者打機,大人可能睇facebook或者打機。呢個情況多數都會發生喺啲比較後生嘅家長身上,有啲家長可能會話細路仔唔肯食飯,如果唔畀部機佢睇嘅話佢就會扭計,慢慢細路仔就一定要手機餸飯先至肯食。成餐飯就細路有細路睇,家長有家長睇。多數會講嘅只係叫啲細路快啲食或者聽話啦!除此之外就好似冇乜嘢講咁。有時連去到書店或者圖書館,好多時都會見到啲家長叫啲仔女去睇書,而自己就坐埋一邊玩電話。好似只係想搵處地方安頓咗小朋友就唔洗阻住自己咁。其實我真係唔明啲家長點解要放棄啲咁好嘅溝通機會,唔好話食飯時間,有啲家長連返到屋企都係揸住部手機。乜手機真係重要過同仔女溝通咩?有啲家長當仔女大咗嘅時候發覺仔女唔同自己講唔同自己溝通,但係其實呢啲家長有冇諗過根本就係自己喺仔女細個嘅時候唔盡量同佢溝通盡量同佢傾先至會有今日嘅結果。最唔好嘅就係 仔女想同你溝通嘅時候你就嫌佢阻住你打機或者玩電話,到你想同仔女溝通嘅時候,你就話啲仔女唔理你唔同你溝通。甚話知乎話啲仔女只係顧住睇電話玩電話,但係用手機嘅習慣究竟係邊個幫啲細路仔養成嘅呢?邊個畀部手機細路仔㗎,其實做家長有乜嘢緊要得過自己嘅仔女,成日掛住用手機嘅家長,你幾時先至肯放低部手機真真正正同自己嘅仔女好好哋咁溝通呢?緊記今日嘅因就係明日嘅果呀!
peckykoo
|
你篇文好長, 有冇分段又冇隔行, 睇死人



Powered by Baby Kingdom

隨時隨地瀏覽及討論更多親子話題

開啟親子王國 App
繼續瀏覽