讀書係開心，唔洗諗生計，同輩之間友誼好純情。但唔開心在要不斷爭分數，少一分都跌 10 個名次。有時候明明已經做得好好，但父母為求更好，會畀多 d 練習，上多幾堂補習班，星期六日完全唔屬於自己。打工仔放工返到屋企可以乜都唔理乜都唔做，但學生返到屋企要做功課溫書，有時候仲遲過父母「放工」。偶爾發脾氣發洩情緒仲會畀人鬧，亦冇得揀放棄自己唔鍾意嘅科目，唔洗讀書料都要繼續讀。
工作係辛苦，要不斷煩生計追業績，亦會去擔心飯碗不保，更擔心公司有乜冬瓜豆腐會炒人。有時候要 OT 夜放、有時候又要驚背黑鍋。但份工係自己搵，自己爭取，亦有糧出。如果呢間公司同事、老闆都相處得唔好，都叫做可以另覓其他公司。但學生同老師、同學相處得唔好，轉校比轉工難得多。辦公室自由得多，想去廁所就去，肚餓可以食野，衣著雖然會講究但都算寬鬆，鍾意幾時著夏季衫、冬季衫、幾時著裙著褲都得。我最記得，冬天手凍，戴手套寫字，老師即刻叫我除，話除非有病，否則唔畀戴手套寫字。之後要換夏季衫，我臨到最後一日都發冷，一換就即刻病。仲有如果真係工作得太過火，影響健康，可以辭工休息一下。但學生大壓力，都唔可以退學，只可以繼續頂硬上。
發表於 
返回列表
