QE順產(38週)經過

bunny_sze
|

20191123呢一串數字組成左我第一次生仔嘅經歷。
11月22日朝早去洗手間果陣見到護墊上面嘅分泌物有少少血絲,已經由37週6日嘅我諗緊,係咪即係生得呢?但又唔痛喎,冇穿水喎。之不過又睇左好多人記錄底自己生仔過程,有啲媽媽見紅之後好快就生得,前後不過幾個鐘時間,但有啲又話隔成幾日先生得,我會係邊種我真係唔知...打左個電話去QE,問下洗唔洗入去,佢地話總之分泌物有異常就要即刻入去!打比老公,食個烏冬,將走佬袋由側揹袋轉背囊,搭的士,出發!

去到B4, 等檢查,然後轉去第二個地方等運到...老公放公過嚟,我地仲喺度傾會唔會有機會第二日就出院,因為完全冇想生嘅意欲,仲話BB放流料~

點知去到夜晚11點左右,又見紅,開始真係陣痛,本來仲可以玩下電話做下自己野。果種M痛感覺就好似平時M到好辛苦,喺床曲埋個身休息下就得果種痛。點知去到大約凌晨2點左右,痛到開始頂唔順,一痛就掙啲行唔到,但我都去埋廁所,大個便先!

之後問姑娘有咩可以冇咁痛,佢比左部機我,有兩塊貼痴下背,有少少電流彈下彈下咁,可以由0度調教到40度。我就唔覺得特別止到痛,只係覺得用呢種電流嘅痛去分散陣痛嘅痛...姑娘幫我睇下開左幾多度,佢check完,話起碼聽朝先生得!我真係灰到一個極點...幾時先到聽朝...

跟住一路痛到好想叫又唔敢叫出聲,坐喺度舒服過瞓喺度,錬住床欄不停咁扭,我自己又不停咁個身扭左扭右,姑娘:「咁扭仲難生呀,你咁樣呀B點樣落去?呼吸,keep住呼吸!」於是我就一路好大力咁呼吸,盡量控制自己唔好再扭...

去到大約4點,姑娘再睇,話我可以去產房,叫我執定野,換紫色袍,打比老公。
自己過床,打比老公後就要熄電話,上去B4等生。

去到產房,諗住就生得,有一絲希望,開心左幾秒,見到好多姑娘整呢樣果樣,又等緊老公快啲嚟。我問姑娘有冇得無痛或者打止痛針(已經痛到唔知自己講乜野),姑娘話醫生冇話過我可以做呢樣野,心情又落返地獄...淨係比笑氣我聞。

姑娘話痛果陣先聞,咁我三角位痛到痴線,咪聞囉,大大啖咁吸。吸多幾下,姑娘話我呢啲都冇痛,唔比我吸。
我:「下?!好痛喎!」
姑娘:「邊度痛呀?」
我:「三角位痛呀!」
姑娘:「果度痛正常嘅,BB要出嚟啦嘛,你都未宮縮,宮縮先再聞啦。」

心情跌落10層地獄...

終於見到老公,上返一層地獄,捉實佢隻手,有咁大力捉咁大力!每次宮縮就聞笑氣,呼果下頂唔順,對住笑氣個罩尖叫!

有幾次因為完全頂唔住,就咁大叫出聲,姑娘入嚟問咩事,我話我鬼痛,生得未?
姑娘再check就話未生得,羊水都未穿,對腳伸返直,唔好尖叫,要呼吸,唔好用力疴,放鬆...同呢種痛嘅感覺同在...
我心入面無限個粗口,點放鬆到??!!!我淨係想快啲生咋!
其間一路聞笑氣,一路同老公講唔生,同埋叫佢結紮,咁我就唔洗再生!!!
去到大約5點幾6點,另一批助產士入嚟,set up晒,再check我生得未。佢整兩整,穿左羊水,好多好暖嘅水彈落我隻腳度。叫我擺好位之後,時晨一到就用力痾佢出嚟啦!痾左三次左右,姑娘話下爬頂心口,用力果陣把口唔好漏氣,pat pat少少吉高。
去到就嚟,終於生到....

姑娘有問我剪唔剪會陰,我問返佢:「唔剪唔係會菊花咁咩?」我因為BB細粒,所以應該夠位就咁出世,但都唔排除會有撕裂出現。心諗,搏一搏,單車都變摩托,最後冇剪,入面要縫針,外面冇事,去第一次洗手間都唔多痛苦,係好事~

然後幫我檢查下體,檢查係痛過縫針囉,不過我唔肯定佢有冇打止痛,我睇唔到,但一路可以繼續聞笑氣。

喺產房等多個幾鐘左右就可以上返去。笑氣可以話有少少用,幫到2成左右,但生完之後好想嘔,不過嘔唔出。

我就迷迷下咁瞓左一陣,之後就抱住呀B 比人推去E2。

由於未到探病時間,老公買左少少野比我食,執一執啲位之後就要走,等探病時間先嚟得。

總結:如果生完之後有得比一位屋企人24小時留低幫手就好。剛生完,咩力都冇,跟本冇力照顧BB,特別係夜晚。第一日我話想休息,請姑娘幫我照顧一晚,第二晚我自己照顧返。由於未上奶,呀B唔夠食,12點開始搵食,佢食半個鐘,瞓半個鐘,再食半個鐘,瞓半個鐘...直到5點左右,都係咁嘅pattern...姑娘見到我咁,我問佢可唔可以比奶粉我,我完全冇瞓過...佢就話幫我睇佢一陣...然後交完更,另一個姑娘好有效率咁比返呀B我。

其實生完頭兩日真係冇咩力氣去自己照顧BB,休息唔夠更加上唔到奶...如果可以安排到比屋企人嚟幫手,會好好多....
Chinghsc
|
謝謝分享,我之後都係QE 生😉
多多168
|
bunny_sze 發表於 18-11-28 03:00
20191123呢一串數字組成左我第一次生仔嘅經歷。
11月22日朝早去洗手間果陣見到護墊上面嘅分泌物有少少血絲 ...

想問下,我本身喺廣華覆診,想轉qe ,我住石硤尾,係吾係qe 都會收我
bunny_sze
|
多多168 發表於 18-12-9 12:45
想問下,我本身喺廣華覆診,想轉qe ,我住石硤尾,係吾係qe 都會收我

呢層你真係要打去問下先知
我都唔清楚⋯
多多168
|
bunny_sze 發表於 18-12-10 06:48
呢層你真係要打去問下先知
我都唔清楚⋯

好的,謝謝你
Mariobobo
|
謝謝分享.助產士同醫生nice嗎?
我嚟緊都係QE生
bunny_sze
|
Mariobobo 發表於 18-12-25 00:46
謝謝分享.助產士同醫生nice嗎?
我嚟緊都係QE生

一啲啲㗎咋
我咁啱生嘅時間橫跨兩批助產士
上左產房老公嚟左陪我,佢地set up完,講啲野都係正常程序嘅野,乜鬼呼吸呀,放鬆呀等等,就出晒去,得返老公喺度。
到我大叫到佢地覺得驚,因為出面都聽到,就有一位入嚟睇下我咩事,見我未夠度數,又叫我唔好大叫,佢又出返去。
過左陣又一批人入嚟,語氣上同用詞上係覺得人性啲同埋好人啲(可能佢幫我穿羊水,救我脫苦海,所以覺得佢好人掛⋯)。

其他房啲姑娘都幾好,好helpful 嘅。
dorisma9588
|
恭喜曬媽媽
不過年份是2018
bunny_sze
|
dorisma9588 發表於 18-12-25 07:57
恭喜曬媽媽
不過年份是2018

我都唔覺打錯字添(emoji)(emoji)(emoji)
kiikiiching
|
我都係QE生呀, 好驚呀
bunny_sze
|
kiikiiching 發表於 18-12-27 12:10
我都係QE生呀, 好驚呀

叫你唔好驚都冇用
因為我果陣都好驚
119ching
|
bunny_sze 發表於 18-12-27 16:12
叫你唔好驚都冇用
因為我果陣都好驚

我嚟緊都係QE
希望唔使痛好耐
Powered by Baby Kingdom

隨時隨地瀏覽及討論更多親子話題

開啟親子王國 App
繼續瀏覽