要獎,要罰

csir3290
|
本帖最後由 csir3290 於 18-12-16 11:38 編輯

上次講雙面人嘅時候提到小朋友隨便發脾氣其中一個原因係已經唔再驚罰。其實我覺得教適當嘅獎同埋罰係非常重要,如果運用獎罰得宜,小朋友自細就會明白承擔後果嘅重要。我自己就更加覺得如果係細個嘅時候家長懂得用適當嘅處分等佢承擔後果,對小朋友將來長大做嘢要諗清楚更加重要。
喺我做緊小朋友嘅時候,上一輩嘅家長其實對罰嘅定義好簡單通常都只係打同埋鬧。但係我自己就覺得其實經常嘅打同埋鬧,只會令到個效果越嚟越低。試想像一下除非你越打越犀利或者越鬧越犀利,如果唔係細路仔個適應力咁強對佢嘅作用只會越嚟越低。到去到佢連打同埋鬧都唔驚嘅時候其實已經冇野可以再罰佢。如果去到一個地步就係小朋友冇嘢再驚或者係冇嘢罰到佢,咁基本上佢就已經控制咗家長。我自己基本上係唔會打對仔女,就算係喺佢細個嘅時候最多都係罰企同隔離佢哋。

我覺得最重要家長係要做到講得出就罰得到。我見到好多嘅家長好多時都係得把口成日話罰,但係有時家長就怕麻煩淨係得個講字,又或者驚破壞個關係所以只講不罰。正正係因為我覺得講得出就要罰得到,所以講點樣罰之前真係要諗一諗先至講,例如唔執嘢冇得出街,喺我對仔女細個嘅時候就真係試過留低佢唔帶佢出街淨係同另一個出街。佢哋開頭真係以為我哋只係講吓,但係當時我真係留低佢,第一次可能唔深刻,但係第二次之後佢執嘢嘅速度真係非常快。又試過好細個嘅時候喺街發脾氣,話咗會即刻返屋企同埋要罰企。就試過真係即刻帶佢返屋企仲要冇得玩同罰企,自此真係冇試過喺街度發脾氣。如果講得要罰,當佢哋犯錯就真係一定要罰,但我唔會喺街度鬧佢哋,因為咁樣好傷佢哋自尊心。但係我亦都唔會講咁多嘢話咗點罰就即刻帶佢哋返屋企罰。其實只要你罰得公平同埋合理,亦都顧全佢哋嘅自尊心,就唔需要怕損害同佢哋嘅關係。因為只要自細奬罰得宜,當佢哋慢慢長大犯錯嘅次數都唔多。好似我對仔女咁其實到而家我哋已經好少會話要罰。罰佢哋嘅原因無非係要佢哋知道做錯決定會有後果,凡事要諗清楚。而且更加重要嘅係每一次罰完佢哋當大家冷靜落嚟之後其實大家要再傾返件事,等大家都明白點解會有咁樣嘅後果。

至於長獎方面,其實我好反對話細路仔做到啲乜嘢就買啲乜嘢禮物畀佢哋。我同我老婆都唔鍾意用物質嘅嘢獎佢哋,我哋覺得一啲正面嘅鼓勵或者一個擁抱,其實呢得比物質更重要,細路仔細個嘅時候如果得到父母嘅認同其實比買乜嘢禮物都來得重要。所以我哋覺得要提升佢哋嘅成功感同自尊感,所以我哋成日都會鼓勵佢哋讚賞佢哋,未必佢哋要達到好高嘅成就或者做到好多目標又或者要次次默書都攞九十幾分以上。哪怕係一啲好少嘅進步我哋都會經常揾嘢讚佢哋,因為我哋自己都做過細路仔,有邊個唔想俾父母讚呢!細細個其實想就係得到父母同埋老師嘅鼓勵同埋讚賞,所以呢個就係最容易成為細路仔做好嘅推動力。細路仔喺細個嘅時候經常獲得父母嘅讚賞同埋鼓勵,慢慢就會將呢啲內化成自己心入面嘅推動力去令自己做好 。不過當然我唔係話完全唔會買禮物買玩具畀小朋友,而係我覺得兩樣嘢應該係分開。小朋友做好唔應該係為咗一啲物質上面嘅嘢,當物質嘅效力減退嘅時候。佢哋嘅推動力就會減低,但係得到人嘅認同同埋讚賞係每一個人都渴望嘅。

作為家長我覺得要識得獎更加要識得罰,小朋友愈細個開始懂得要承擔後果,同時家長要懂得幫佢哋建立自尊自信, 當佢哋一路長大嘅時候情緒管理就會做得好好多。

Powered by Baby Kingdom

隨時隨地瀏覽及討論更多親子話題

開啟親子王國 App
繼續瀏覽