我的懷孕經歷 – 各位子宮頸短媽媽要加油呀!

RL1717
|
本帖最後由 RL1717 於 18-12-10 15:19 編輯

BB而家3個月喇, 一直都想上黎分享下, 而家終於有D時間, 希望幫到各位打氣啦!
第一次懷孕, BB係19週6離開左我地, 當時情況好突然, 前一晚宮縮多左密左, 到第二朝起身見紅就立刻去見醫生, 醫生當時已經話宮頸開左要立刻入院, 入到醫院聽醫生解釋到BB出黎只不過係短短幾個鐘, 當時個腦一片空白根本都唔知咩原因會冇左BB。

過左3個月後我同老公重新出發, 好好彩係一個月後BB返番黎喇!當時心情好興奮, 但又好擔心, 好驚又會再一次發生, 咁我地都係第一時間去睇醫生啦, 當時就搵左一個睇開既女醫生, 有同醫生講返上次既經過, 醫生幫我檢查, 話暫時見到正常, 但因為都係5週既關係, 所以都會KEEP住睇下有冇變化, 另一方面我都有返威爾斯覆診, 睇過所有化驗結果都係正常, 暫時搵唔到原因點解會發生上次件事. 係呢段期間我同老公上網搵左好多資料, 我地都覺得我個情況係宮頸短, 但由於第一次我都冇乜去特別檢查過宮頸, 所以一直都證實唔到我既疑問, 於是我地決定轉睇出名睇宮頸既孫醫生.
第一次見孫醫生係12週, 當時都係講返個情況比孫醫生知啦, 佢聽完都話個情況幾肯定係宮頸短, 仲好嬲咁話上次點解個醫生會冇留意, 佢話每次聽到有媽媽冇左BB佢都好心痛……由果刻開始我就好相信佢會幫到我喇, 之後我地就開始檢查啦, 去到做陰超既時候, 孫醫生話我宮頸而家係2.3CM,如果有2.5以上既話佢會比我返屋企諗下加唔加托, 但我既情況佢話唔會比我選擇, 而且要我唔可以返工, 一直訓床到生為止, 因為BB會越黎越重, 唔加既話只會係同一樣既結果,於是我就係好驚既情況下加托. 當時除左每兩個星期見一次孫醫生, 另外每兩個星期都要返威爾斯做產檢, 所以基本上係每個星期都要睇醫生, 咁諗住咁樣一定會萬無一失啦, 結果去到19週呢個心理關口時我宮頸又短左去到1.9CM, 咁當時係有D唔開心同擔心既, 但都覺得應該會頂到足月啦, 咁一直繼續HOME OFFICE同孫醫生威爾斯兩邊睇啦, 到23週時我宮頸得返1.3, 不過最灰既係BB個肚圍細左3週, 醫生話由於我長期訓床既關係,血液循環會差D, 可能影響到臍帶供養比BB, 咁就會影響到BB安危, 之後要抽血檢查睇下有冇凝血問題, 結果係Fail,所以由23週開始,我要每晚係肚皮上面打一支薄血針直到生為止, 當時係診所醫生幫我打果時已經話支針係粗針, 會有D痛, 我想話唔係有D, 係超痛. 醫生打果時其實係捉住我老公隻手教佢打, 因為之後要老公每晚幫我打, 頭果一個星期佢打前都會喊, 因為佢唔想見到我咁辛苦, 不過為左BB幾痛我都會忍, 其實果時真係好驚, 以為宮頸短應該加左托會冇事, 冇諗到仲有咁多問題.
到27週時我宮頸得返0.8cm, 孫醫生話BB隨時出黎, 薄血針轉兩日打一次, 叫我唔好再返威爾斯睇, 因為要做佢既都已經做左喇, 去政府睇冇乜意思, 唔想我再走黎走去咁辛苦同影響宮頸, 我聽完之後果下真係喊左出黎, 點解去到呢一步做左咁多野BB都頂唔到足月. 當時我連HOME OFFICE都唔敢, 立即停工, 除左食飯沖涼全日都訓床, 其實訓床既心情一D都唔好受, 我諗有訓過床既媽媽會好明白,另外我仲租左輪椅用黎覆診用. 每日都提心吊膽, 好唔容易頂到32週, 孫醫生已經冇再幫我CHECK宮頸喇, 佢話放鬆心情, 頂多兩個星期就好安全架喇,聽到之後輕鬆返D. 終於到左34週, 可以BOOK私家生喇, 因為一心就諗住係用無痛妢娩,不過一日未足月一日都唔可以掉以輕心.
就咁樣一路去到37週畢業拆托喇, 拆果下又係勁痛, 孫醫生話我好叻, 終於頂到, 仲問我想唔想呢兩日生, 想就同我鬆下個宮頸, 咁我當然話唔駛啦, 我都想BB留耐D吸收多D先出黎, 不過醫生都有講就算唔鬆都好快會生得, 叫我做好準備, 仲有終於可以唔駛打針喇.
咁又過左一個星期38週又做產檢, 又冇乜特別動靜, 我都有諗過會唔會去到40週呢?點知睇完醫生兩日後, 果日起身之後覺得BB好似郁少左, 觀察左一朝早後就WHATSAPP醫生同佢講, 點知醫生叫我拎埋走佬袋立即去診所, 咁當然我又好唔聽話地冇拎到就去左診所啦, 一去到診所登記後姑娘已經叫我即刻入房見醫生, 孫醫生一入到黎就好緊張咁睇下BB有冇心跳, 睇完之後佢都鬆左口氣話好彩冇事, 跟住就話叫我而家入院今晚生, 果下我呆左, 點解咁突然架, 同我想像中作動穿水飛的咁入院好有出入喎, 孫醫生就話今年佢有個媽媽就係因為咁遲左睇醫生結果BB冇左心跳, 佢話我都去到呢一步唔想有咩差池, 而且見到胎心機BB心跳一宮縮就慢左, 叫我唔好等, 咁我同老公就立刻飛的去醫院啦, 6:30去到醫院, 登記完7:00就入產房喇, 咁老公就去食飯啦, 護士7:30幫我穿水, 7:45老公就食完飯入黎, 咁就開始有陣痛啦, 咁姑娘都擺左支笑氣係度叫我一痛就吸, 當時我就問護士長我要打無痛呀, 點知佢就話你呢D宮頸短既好快生得架, 麻醉師過得黎你都生左喇, 我又呆左, 我係私家生都係為左打無痛, 點解唔比我打喎, 咁我唯由繼續聞笑氣啦, 而我老公一邊安慰我一邊好專心咁睇緊愛回家%$#*&^! 果下真係嬲左, 一路聽到隔離產房媽媽係度慘叫, 自己都好緊張, 去到8:30左右就開左5-6度, 護士開始SET場, 去到9:00終於開晒, 孫醫生都黎到, 咁就開始生啦, 護士話見到一宮縮BB心跳就慢, 話懷疑BB比臍帶纏頸, 當時我都好擔心BB有事, 同BB出黎果刻真係比臍帶纏左一圈, 我同老公都好擔心, 直至到聽BB喊聲我地先定返落黎, 果刻老公感動到喊,而我就全身冇曬力喇, 清潔好BB後孫醫生就幫我地影左好多靚靚全家幅, 而延禧攻略就岩岩做完, 護士長冇呃我, 真係唔駛兩個鐘, 同埋宮頸短生B真係有另類優勢呀!
呢個BB真係得來不易, 由發現有到生, 每一日都好難忘, 之前每一日都望住個日曆數幾時生得到而家連去廁所都冇時間. 我希望我呢個經歷會帶比各位準媽媽一D正能量, BB一定會收到媽媽既信息, 痴實媽媽! 記住有懷疑要立刻搵醫生. 最後好多謝孫醫生一路既幫忙同支持, BB先可以健健康康咁出世! 各位媽媽加油!!
paperclips
|
RL1717 發表於 18-12-7 18:18
BB而家3個月喇, 一直都想上黎分享下, 而家終於有D時間, 希望幫到各位打氣啦! 第一次懷孕, BB係19週6離開左 ...

睇到我好緊張... 最尾直頭有啲想喊
你好叻呀!
係咪正常婦產科醫生都識check 宮頸短架?
cyming
|
RL1717 發表於 18-12-7 18:18
BB而家3個月喇, 一直都想上黎分享下, 而家終於有D時間, 希望幫到各位打氣啦! 第一次懷孕, BB係19週6離開左 ...

我都睇到眼濕濕,媽媽你好叻呀! 祝BB健健康康、快高長大~
KarenC
|
睇完好感動,媽媽好偉大,不過睇到話老公睇愛回家嗰度笑左。

祝福你們一家開開心心,健健康康。
RL1717
|
KarenC 發表於 18-12-7 19:24
睇完好感動,媽媽好偉大,不過睇到話老公睇愛回家嗰度笑左。

祝福你們一家開開心心,健健康康。

多謝你呀
RL1717
|
cyming 發表於 18-12-7 19:12
我都睇到眼濕濕,媽媽你好叻呀! 祝BB健健康康、快高長大~

多謝,睇住bb一日一日咁大真係好開心,咩都抵呀
RL1717
|
paperclips 發表於 18-12-7 19:08
睇到我好緊張... 最尾直頭有啲想喊
你好叻呀!
係咪正常婦產科醫生都識check 宮頸短架?

有d醫生未必會同你check,或者係肚超時睇,不過唔準,最準check陰超,有需要可以同醫生講呀
Stephanie323
|
睇到好緊張呀。。恭喜您呀。。呢個bb真係得來不易!祝bb快高長大!健健康康!辛苦你了
yy516
|
RL1717 發表於 18-12-7 18:18
BB而家3個月喇, 一直都想上黎分享下, 而家終於有D時間, 希望幫到各位打氣啦! 第一次懷孕, BB係19週6離開左 ...

好勵志啊
我都宮頸短,不過係19w時發現同時立即上托
同即時訓床,我都好驚會再宮頸短
同埋有時會有宮縮

我睇到你篇文,希望我都可以足月(emoji)(emoji)(emoji)(emoji)(emoji)(emoji)
mochimama
|
多謝分享
littletwinZ
|
RL1717 發表於 18-12-7 18:18
BB而家3個月喇, 一直都想上黎分享下, 而家終於有D時間, 希望幫到各位打氣啦! 第一次懷孕, BB係19週6離開左 ...

我係由6w開始每2週睇孫醫生,到26w時宮短,即時加托訓床,薄血針我都有日日打呀。我都好感恩我係揀到孫醫生,唔係佢我諗我好早就早產左,因為我係孖胎媽咪,個肚會勁重。我依家都挨到就快35w,我都希望bbs可以挨到足月我都有識其他媽咪係宮短睇孫,我地都有互相打氣
Cherrylsx
|
RL1717 發表於 18-12-7 18:18
BB而家3個月喇, 一直都想上黎分享下, 而家終於有D時間, 希望幫到各位打氣啦! 第一次懷孕, BB係19週6離開左 ...

睇到我好緊張,你真係一個偉大的媽媽!
RL1717
|
Stephanie323 發表於 18-12-7 20:17
睇到好緊張呀。。恭喜您呀。。呢個bb真係得來不易!祝bb快高長大!健健康康!辛苦你了
...

多謝你呀! 真係得來不易! 之前未生真係覺得賺得一日得一日!
yy516
|
我都係睇孫醫生架
RL1717
|
yy516 發表於 18-12-7 20:36
好勵志啊
我都宮頸短,不過係19w時發現同時立即上托
同即時訓床,我都好驚會再宮頸短

你要加油呀! 放鬆心情好緊要!心情好休息夠就少d 宮縮! 我果時同自己講訓床出唔到街唔緊要,就當放暑假! 自從出左黎做野都未試過放咁長假期!
yy516
|
RL1717 發表於 18-12-7 21:11
你要加油呀! 放鬆心情好緊要!心情好休息夠就少d 宮縮! 我果時同自己講訓床出唔到街唔緊要,就當放暑假 ...

你果時帶左托之後有無宮縮呀?
係喇,咁大個女都未試過放咁長假期,雖然係無薪
RL1717
|
littletwinZ 發表於 18-12-7 20:49
我係由6w開始每2週睇孫醫生,到26w時宮短,即時加托訓床,薄血針我都有日日打呀。我都好感恩我係揀到孫醫 ...

孫醫生真係好好!我覺得佢係真心想幫媽媽!如果唔係佢咁緊張嚇我,我諗我未必咁乖訓床唔出街唔番工!
littletwinZ
|
RL1717 發表於 18-12-7 21:14
孫醫生真係好好!我覺得佢係真心想幫媽媽!如果唔係佢咁緊張嚇我,我諗我未必咁乖訓床唔出街唔番工!
...

我係知宮頸嚴重性,一知道我就好乖訓床,最多老公放假出街偷食下
RL1717
|
yy516 發表於 18-12-7 21:13
你果時帶左托之後有無宮縮呀?
係喇,咁大個女都未試過放咁長假期,雖然係無薪:tooc ...

我由12週開始食抗宮縮藥同帶托都有宮縮! 可能我keep 住係屋企做公司野! 直至27週後真係唔做野之後就好少宮縮!
RL1717
|
littletwinZ 發表於 18-12-7 21:16
我係知宮頸嚴重性,一知道我就好乖訓床,最多老公放假出街偷食下
...

我真係完全無出過街除左覆診!
Powered by Baby Kingdom

隨時隨地瀏覽及討論更多親子話題

開啟親子王國 App
繼續瀏覽