眨眼就一年之聯合生產記

Hurstvillekay
|
本帖最後由 Hurstvillekay 於 18-12-13 23:22 編輯

好想記錄一下: 媽Mimi生產記

話說2017年12月9日晚,媽Mimi如常落街行下樓梯啦,行左32層就返屋企沖涼訓覺。果晚半夜2點幾就見紅兼有谷m感覺,媽Mimi就check 谷m到時間大概5分鐘一次,就走去沖涼洗頭啦,咁當時就諗.....如果冇痛冇穿水入左去都冇用,入去冇得訓冇得食咁我點生呢,所以就唔入,俾爸Bibi繼續訓啦。。。。。

到7點左右,媽Mimi叫爸Bibi起身落去買早餐一齊食,因為果刻見紅多左,谷m多左但未算痛所以決定9點先入院睇睇。

附件: 你需要登錄才可以下載或查看附件。沒有帳號?註冊
Hurstvillekay
|
12月10日早上九點入到去產房檢查,姑娘話冇咁快就掉左我上4b產前病房...我心諗 :咪啦,下午可以玩fitball就梗係玩啦!玩左兩轉好累。下午4,5點訓左陣晏覺就起身,咦?好似痛過今朝喎! 咪執輸,玩多轉! 諗諗下......都係唔好太狼死喇,留返第二朝先再玩啦。。上左床無耐開始有痛嘅感覺,但呢種痛,我用呼呼法就可以舒緩了,晚上6至8點晚飯時發現已經進展每隔10分鐘左右一次。。。當時心諗: 大獲啦!今晚唔駛訓。點都食哂成盒叉燒飯先! 。。。
Hurstvillekay
|
去到晚上10點11點已經係每隔5分鐘一次,我就同當值姑娘講,但講完佢只係聽下BB心跳mark簿就答我話冇咁快。 之後12點就五分鐘內痛一次,1點四分鐘痛一次,2點幾三至四分鐘痛一次。我次次爬出去講完佢都係做同一樣野,就係mark簿,聽心跳然後答我:幾好。 果一刻我知再同姑娘講已經冇用,冇人幫到我....去到半夜3,4點,我已經又痛又眼訓,一痛我又計時,我已經掌握到一痛嘅時候我只要數50聲就捱過左果一次嘅陣痛。所以每次痛,我心裡面都數50聲。。。。。。又痛又訓又數又痛又訓又數,去廁所再爬返上床,又痛又訓又數又痛又訓又數,再去廁所再爬返上床,唔知Loop左幾次之後開始天光了。。
Hurstvillekay
|
撐到12月11日嘅7點,我見到平時見開嘅姑娘,知我不嬲唔會亂叫乜都自己攪掂,見我拿埋一住開住計時器問我做咩事。我話我3分鐘痛一次左好耐好耐,同埋唔知係咪穿埋水。佢即幫我睇,原來真係已經穿左水兼且開左3度,即安排我等落產房。問我做咩穿水唔同佢地講,我話我半夜講左幾次幾分鐘痛一次都冇人幫我檢查,我講黎做咩喎,咪諗住等醫生囉…佢當時無奈地微笑。
Hurstvillekay
|
落到產房助產士幫我穿埋塊膜,等剩餘嘅胎水流出,再加左催生藥水,我正式開始失常。爸Bibi不斷見我抽搐,學物理治療師按摩幫我都冇用,我聞氣已經聞到好準但都好痛,什至有一度我聞到好wing直至有一小段記憶有點斷片,但果段時間過得好快直至點滴催生嘅份量減少,我再有返記憶。
Hurstvillekay
|
因為我成廿個鐘冇訓冇食,我痛又唔可以用下半身力真係好痛苦。醫院產房嘅姑娘幾好,撞正Lunch time, 姑娘竟然同時俾爸Bibi同婆婆入產房陪下我支持下我,但媽Mimi就算知道婆婆企喺身邊,但都再冇氣力開眼咁濟。。。。。自從落左產房果時知道自己3度之後,我根本就唔知自己開到幾多度,只知好辛苦就黎頂唔住,婆婆問姑娘而家開左幾多度,姑娘答佢佢地只會4個鐘檢查一次所以未知,要等一點時先會再幫我檢查...........下.................
Hurstvillekay
|
下午一點鐘我終於知道自己已經開到7度。。。。。。。之後我開始感覺到好清晰,因為我已經唔再吸氣,完全靠自己呼呼法捱過每次陣痛,冇落催生藥反而唔太痛但我感覺到小寶貝一下又一下好努力咁想出黎,而我只能係咁叫啊b唔好衝得太快,冇人會信我地第一胎開到咁快,冷靜啲唔好整到媽Mimi咁辛苦,心裡又叫公公保佑唔駛開刀順順利利。
Hurstvillekay
|
隔左又一段時間,醫生突然入黎話試下幫我生,教我點樣下巴貼心口,將扶手拉向自己,用力一下到底。一次,兩次,三次........我完全用唔到力一下到底,仲俾人鬧我patpat向下會跌,好危險.......
其實我真係好想問,扶手拉向自己嘅話,patpat點樣先唔向下移?..... 最後我又如驅魔人一樣,一用力就向左噴射式嘔吐,再用力又向右又噴射式嘔吐。。。。醫生見媽Mimi依然發唔到力,就建議我用咬腰法,拱橋式可能好啲,試過係好啲,但都係唔夠氣.............之黎聽到有人同爸Bibi好急咁講而家要助產,有機會會有咩危險,要佢望住我簽名。
Hurstvillekay
|
成間房突然之間變得好緊張,聽到有醫生,助產士,護士喺我出力時大家都大叫我: 用力! hold住!唔好放! 試左兩下唔得,再黎! 吸大啖啲!用力! hold住!媽媽妳就得架喇!黎緊! 唔好放啊! 可以架啦!頂住! 呢個時間其實大聲到我有啲耳鳴,但好起到鼓勵支持作用。 醫生又再叮嚀我,如果我唔一下到底BB會整親,如果我都仲係生唔到,我就會有需要剖腹了。

就係果一刻,我心諗: 我一定要努力Hold住! 我一定要生得出!! Bebe 你一定要出黎啊!
Hurstvillekay
|
果一秒中我彷彿聽到一下喊聲,我回一回神聽到醫生叫我唔駛用力住,我就知道“你”出世啦! 然後再用多下力,一股暖流隨即出黎,同時再一次聽到“你”第一次,一下一下蘇蝦式叫聲。 (emoji)


一團暖粒粒嘅“你” 喺我心口上郁下郁下,果一下感覺我相信我永遠唔會忘記。
Hurstvillekay
|
之後姑娘將你抱走清潔,檢查,打針....但媽Mimi視線離不開你...最後你先被送上房,媽Mimi需要處理傷口及觀察....

返上病房第一件事係試餵奶,細細隻暖粒粒嘅B你郁郁下好可愛咁訓喺我隔離。非常自動自覺地啜起奶奶,我地第一個全貼身接觸令我非常感動,感動到不停流淚,真係好開心!我一定會好好記住!
Powered by Baby Kingdom

隨時隨地瀏覽及討論更多親子話題

開啟親子王國 App
繼續瀏覽