[純分享]5年4個工人(有啲長篇)

kiit925
|
呢5年入面總共轉了4個工人,全部都係菲. 咁多個入面, 係第3個同第4個係最好的, 原因是佢地都曾經有個好mean的前僱主. 我係一個好hands on的僱主, 基本上請的時候已經講明我返工唔喺屋企, 工人就係In-charge. 有事匯報就得, 我只係會睇結果的人!我諗除咗第二個工人會覺得我好差之外, 其他都應該對我冇乜意見
第一個工人係被斷兩次約的, 當時第一次請工人(因為有NB), 冇理會過斷唔斷約, 只想有個有經驗湊NB的工人幫手. 因為冇陪月冇長老. 慶幸的係工人喺湊NB的經驗真係好好, 幫到我好多, 唯一的缺點係清潔差同唔自律. 最後呢個工人我用咗3年幾, 佢走的原因為去咗加拿大, 不過講真, 佢唔走我C6應該都會炒咗佢, 因為到後期佢的衞生程度真係超差而我亦都有第2個NB即將出世.
第二個工人係海外的, 原因係個個AGENT都話唔會有完約菲肯湊NB, 而當然, 我當其時都有搵過啲斷約的, 講真, 斷約果啲真係揀唔落手但佢地又覺得自己好掂. 最終呢位海外菲只係喺我度做咗8個月左右. 佢唔係辭職走或者我炒佢, 而係佢一早同我申請咗放假返菲一星期, 但最終冇返嚟, 搞到我又要寫信去入境處TERM佢,又要去勞工處追佢代通知金. 當然我知道佢冇可能會賠到代通知金比我, 但係手續上我一定要咁做去避免佢到時返香港告返我轉頭.之後有日見到對面屋個工人(都係菲), 佢同返我講, 話我第二位工人同佢講我的壞話, 話我好demanding, 因為我要佢湊住兩個小朋友買餸, 我聽完之後真係嬲嬲豬, 我當時大女上午要返學,我一直都係叫佢朝早買. 但佢要下午先買餸我都冇辦法. 不過我心入面其實係想佢走的, 因為到細B 6個月開始加固, 個工人居然夠膽唔煲粥仔淨比奶佢食, 被我發現就話唔記得. 一日到黑淨係匿喺房煲劇將大女放喺廳睇電視. 所以就算佢唔走我都應該忍佢唔住.
第三個做咗11個月 , 基於對上位海外菲搞到我對海外嚟的工人有戎心, 所以今次我係請本地完約的. 亦都好好彩, 因為請呢個工人時細B已經接近一歲, 而呢位工人的年紀亦都接近40, 可能年紀大冇乜人揀卦, 所以最終接受我地個OFFER. 呢個工人好勤力, 錫小朋友亦都煮得一手好菜, 雖然有啲好怪但都可以接受. 小朋友都好鍾意佢. 請到佢時只係感恩佢曾經有位好MEAN的僱主. 呢個工人本身都好有性格, 佢唔鍾意自己冇錯都比人話, 佢喺前僱主度做咗4年, 係佢自己唔續約的, 咁當然我唔會信晒佢講的嘢, 但係佢真係有比佢同前僱主的WHATSAPP我睇. 好多嘢佢唔使我叫佢都會做, 清潔,整齊,唔玩電話, 呢啲都係因為前僱主唔比做同埋要求高. 所以去到我度, 其實我冇要求所以佢都做得好開心! 而點解走, 都係因為加拿大福利同薪酬都太好, 又係輸比加拿大. 佢自己話係喺前僱主時已申請, 但當然我唔肯定佢講的係真定假. 不過佢真係好好, 佢臨走時幫我搭上搭搵到而家個工人, 令我慳返筆AGENT錢.
現任工人, 亦都係第四位, 我唔知佢可以做幾耐, 但係呢個工人係以往任何一位都比唔上. 佢夠後生, 有足夠的體力去應付我兩位小魔怪. 每日大女返到屋企會迫佢做晒所有功課(中文除外), 佢每朝已經好早起身做家務, 大女未放學就買埋餸, 總之係每日放工返到屋企, 佢已經係幫兩位小魔怪沖晒涼,食埋晚飯. 真係打得又抬得, 希望呢個工人能夠努力KEEP住唔變懶而又可以做到完約啦!
05suey
|
kiit925 發表於 18-12-20 14:20
呢5年入面總共轉了4個工人,全部都係菲. 咁多個入面, 係第3個同第4個係最好的, 原因是佢地都曾經有個好mean ...

好幸運,有個好幫手
kiit925
|
係, 所以我都好感恩. 第三位工人佢好好, 因為佢走咗都超過一個月第4位工人先到, 佢雖然遠在加拿大但仍然幫我keep住contact而家個工人
Powered by Baby Kingdom

隨時隨地瀏覽及討論更多親子話題

開啟親子王國 App
繼續瀏覽