尋答案 - 點解自己總係唔得?

csir3290
|
本帖最後由 csir3290 於 19-2-17 12:42 編輯

呢個論壇其實真係一個好好嘅地方,既可以抒發吓教仔女嘅感受,當遇到困難嘅時候又可以嘗試下喺呢度搵唔搵到解決辦法。呢個論壇嘅家長亦都好願意去分享自己嘅教仔方法,希望可以幫到遇到困難嘅家長。我明白當遇到困難嘅時候,大家都好希望盡快可以搵到答案亦都想可以好快解決咗個問題。但係要明白細路仔行為出現問題,唔係好似屋企嘅電器壞咗咁,好容易搵人就可以修理到。細路仔行為出現問題,就好似一個病徵咁,未必係真正問題嘅原因。好似我哋睇醫生咁,我哋好多時都只係將自己感覺到嘅唔舒服話畀醫生聽,醫生要經過好多嘅化驗經過好多嘅了解然之後搵到個原因先至可以藥到病除。教細路仔一樣,佢哋嘅問題並唔係一朝一夕發生,好多時當個地察覺到個問題嘅時候其實個問題已經係累積咗好耐,好似當家長發覺細路仔成績唔好嘅時候,其實係唔係突然發生嘅,好可能係家長喺小朋友細個嘅時候冇幫仔女養成一個良好嘅學習習慣慢慢日積月累而發生。細路仔好多態度嘅問題,習慣嘅問題,價值觀嘅問題,去到我哋家長覺得忍受不了出現咗問題嘅時候其實呢一啲嘅習慣可能已經養成咗好耐。
當家長察覺到呢啲問題出現嘅時候當然希望可以好快趣搵到答案解決。當你嘗試喺呢度搵答案嘅時候好多家長都會好願意分享自己嘅感受同埋睇法。當家長照任使用呢啲方法嘅時候,試咗又好似冇乜效或者仲有好多原因覺得做唔到。我覺得唔係呢啲方法無效,我相信喺度分享得嘅家長其實佢用嘅方法都係有效嘅,只不過教細路仔其實係要講整個嘅配套同埋長時間嘅實行。要改善細路嘅問題尤其是係態度或者價值觀嘅問題,一定要用好多嘅時間同埋耐性。問題出現咗累積咗咁耐要改善嘅話自自然然就需要用返更加多嘅時間同埋耐性去處理,冇方法係可以一次搞掂。有啲家長就係缺乏咗呢份耐性,我明白佢哋出現問題嘅時候,佢哋覺得好煩惱好心急好想即刻解決,但係佢哋更加要知道嘅係問題發生唔係一朝一夕,其他家長得可能其他家長自細就開始培養,有成個配套一齊去做。 要改善呢啲嘅問題其實最重要係要搵到問題嘅原因,有啲家長就忽略咗要去搵原因,淨係想搵答案。其實咁樣只不過係頭痛醫頭腳痛醫腳。 我成日都講細路仔個個初出世嘅時間都係一張白紙,只不過係家長點樣係呢一張白紙上面書寫。 所以出現問題,家長就需要反思究竟問題出現咗喺邊度,只有知道問題嘅原因先至會比較容易去搵到處理方法。

我覺得我哋做咗父母之後好多時都會忘記咗自己曾經做過細路仔,只有當我哋肯真真正正明白細路仔嘅諗法嘅時候 ,我哋先至會更加容易去處理細路仔嘅問題。另外作為家長我覺得我哋真係時刻都要去反省自己做嘅決定其實對仔女有啲乜嘢影響。當出現問題嘅時候,其實更加需要去反省或者去深思自己教仔女嘅方法,嘗試去搵出出現問題嘅原因用耐性用時間去處理問題。 因為好多時仔女出現嘅問題其實就係家長導致問題。我哋知道方法總比困難多,但係知道方法容易,要用耐性堅持實行就困難好多。每一位喺呢度分享自己教仔女方法嘅家長佢嘅方法一定係得嘅 , 只不過問題係大家有冇真真正正搵到問題嘅核心,有耐性有恆心去堅持呢一啲嘅方法。 千萬再不要希望頭痛醫頭腳痛醫腳,如果咁樣問題只會沒完沒了地發生。

Powered by Baby Kingdom

隨時隨地瀏覽及討論更多親子話題

開啟親子王國 App
繼續瀏覽