興趣班

csir3290
|
本帖最後由 csir3290 於 19-2-23 21:21 編輯

早幾個星期同阿女去考羽毛球考試,準備緊嘅時候聽到後面個家長同個女喺度埋怨緊點解考試嘅地方咁隔涉,然之後就同個女講如果學校收咗你就考埋今次唔考。咁啱畀我個女聽到呢句說話,連我個女都問我乜羽毛球考試對考學校有幫助嘅咩。呢個問題其實我都唔知點答我個女好,因為從來我個女都係當羽毛球係一個興趣。 每年暑假阿仔阿女都會跟教練練一個暑假嘅羽毛球,暑假之後就變成我同老婆每個禮拜同佢哋打一次羽毛球。每年跟教練打波嘅時候我哋都會畀個目標佢哋,就係練完暑假之後嗰個年度可以試吓考到高一級嘅羽毛球考試。咁暑假之後就變成每個星期我哋一家人打一次羽毛球,到咁上下我哋就會問阿仔阿女有冇信心,如果有信心嘅話我哋就會幫佢哋報考試。講真不論學羽毛球又好學琴又好,學畫畫學游水都好,一切都係以興趣為先,從來都唔會逼佢哋考試或者迫佢哋學,所有嘢都係問清楚佢哋有冇興趣想唔想學先學,有冇信心報考試我哋先至會幫佢哋報。我成日同對仔女講我哋好唔鍾意係我哋要佢哋學啲乜嘢興趣班,因為所有嘅嘢都係佢哋自己想報所以佢哋就要自己畀心機去學。總之我同我老婆都會知道勉強冇幸福。
其實我有時好唔明有啲家長嘅諗法,就係點解要啲細路去學好多樣唔同嘅興趣班呢? 好似阿仔阿女咁一個禮拜學一次游水 一次彈琴,阿仔仲要學多一節畫畫,我哋成家打一次羽毛球,我都已經覺得佢哋好忙,嗰陣時我老婆話 想搵啲時間畀佢哋學其他嘢都好似已經搵唔到,因為我哋都擔心佢哋冇時間做功課同冇時間玩。我成日都覺得興趣班就係發展佢哋興趣,乜嘢叫做興趣呢就係你要鍾意嗰樣嘢願意放時間同做得開心,如果興趣班變成係父母逼嘅或者係個細路仔根本唔鍾意嘅咁又點會有興趣呢! 更加重要嘅係興趣係需要培養,父如果母只係放咗小朋友去參加一個禮拜一次嘅興趣班就算數,以為就可以培養出興趣,咁係咪真係咁就有興趣呢? 究竟小朋友學興趣班嘅目的係為咗滿足父母既虛榮抑或人有我有唔好蝕底呢?為咗搵學校抑或為咗真係培養佢哋嘅興趣呢?如果小朋友已經咁功利,要教佢哋報興趣班係對佢哋第時搵學校有幫助,咁嗰樣係咪真係佢哋嘅興趣呢?點解小朋友會俾部手機吸引咗而冇其他興趣呢?其中一個原因咪因為玩手機父母唔會迫考試,冇壓力又唔洗同人比較。所以要對抗手機嘅吸引,就要襯小朋友仲細時開始幫佢培養真正的興趣,等佢唔洗靠手機解悶。
Powered by Baby Kingdom

隨時隨地瀏覽及討論更多親子話題

開啟親子王國 App
繼續瀏覽