聯合醫院60小時無痛分娩分享

Ziyumami
|
本帖最後由 Ziyumami 於 19-3-2 16:26 編輯

我係第一胎,由有左開始我一直都好擔心生既時候到底係點一早拎左前4星期既產假一心以為B女會早出世
點知等下一個星期 等下又一個星期 最後過晒預產期都未出世

終於有一日我覺得好似開始陣痛,就入左院,結果原來唔係陣痛,留左一晚就出左院
姑娘個時同我講,真係陣痛既痛除左好似M痛咁下面痛之外
係會胃下面個個位連埋M痛咁成個肚一齊拿住痛,收縮緊咁先至係真既陣痛
未生既媽媽可以參考一下


之後我都打定輸數要等催生,但就係醫院俾既催生期前2日夜晚,
我開始FEEL到姑娘講既痛,但係仲係好少既痛 所以我就冇理到,
諗住訓醒先算啦,到朝早我突然醒左覺得肚痛去廁所
一除褲就發現成地都係血,係成地都係...同我所認知既見紅好大分別
正常係會留一PAT野出黎咁,我係爆血咁...我當堂嚇到即刻去醫院去既途中肚都開始痛起上黎
我以為係穿左羊水+見紅一齊黎
但點知2個醫生幫我檢查完之後 冇穿水,亦冇開到度數,只係見紅+陣痛
只係做檢查已經流左咁多血,其實真係嚇到我有D驚
因為流好多血所以一定要留院觀察,就係咁開始左我60個鐘既血汗生B記
Ziyumami
|
因為之前已經入左一次醫院
我係重執過個走佬袋,盡量帶少D野
最後發現其實只要帶沖洗器,孕婦衛生巾X2,網褲,紙巾,濕棉,同日常用品就夠

上到房之後 我一直都有用APPS 計住陣痛
因為姑娘會問你,幾耐痛一次?
咁你答唔到佢係幫唔到你既
本身入到去我都仲可以行黎行去禁電話去學坐分娩球
後來就開始越黎越痛...由你仲可以WTSAPP同朋友傾計..
到你開始一直都KEEP住開住個APPS計住痛,
然後就開始要禁住個肚...再黎就坐立難安,訓唔到覺
到夜晚有姑娘黎CHECK度數,係我由朝早8點入院開始到依家
已經大概過左10幾個鐘,結果係..勉強開左....1度...
然後姑娘就叫我痛密左就要同佢講...
我心諗,嘩唔係呀,雖然依家個種痛我都仲忍到,但痛左成日先勉強開左1度?
咁仲要痛幾耐?個一晚我冇訓過咁滯,一來痛,二來因為好擔心唔知接住落黎會點

到第2朝朝早,終於等到醫生巡房
當醫生幫我CHECK度數時,我不停心入面係到諗:要開多D呀,開多D呀
結果...醫生答覆係:「開左一度多DD啦..」
呢個時候,我已經入左院24小時...


Ziyumami
|
然後我就問醫生,其實都就到催生期,咁如果過多日都係咁少度數係咪要催生
佢就答我係呀,不過都有D進步呀,加油
然後就去左睇下一個病人,醫生睇完之後可能個人灰左
D陣痛開始慢落黎,我都打定主意要等催生
之後我就望住其他床位既孕婦早過我黎,遲過我黎既都已經落晒去生
就得返我一直都仲係到.....
食埋飯後D陣痛又開始黎,仲越黎越痛,痛到我要深呼吸同緊握拳頭
大概每10弟鐘就會痛1分鐘,每痛一下我就望住個APPS D時間係到數住
55..56..就痛完啦...深呼吸!!
(每次越痛個時我都好想叫姑娘幫我CHECK下度數但又唔敢 因為冇痛密左只係痛得更痛左)

然後又數住..3點..4點..就天光見到醫生啦
到醫生黎CHECK時候我真係心急到死,結果醫生答我..開左2度啦,可以落去
當下開心到我!!嘩終於可以落產房啦!!好快完啦!!
真係太天真啦當時

(聯合係3度可以落產房,我見其他人都係開到3度先可以落去,可能因為我其實當日都係催生期,所以2度就可以落去,產房係獨立既1人1間,落左去老公就可以入房陪產到你生)
Ziyumami
|
落左產房之後會有姑娘黎人手穿羊水,
穿水係冇咩感覺,就係張開腿,然後佢會伸隻手同把剪刀入去,
摸到岩位就剪,然後就一大攤水出黎,
然後再打粒豆落手到落催生藥...4個鐘之後先會再幫我CHECK度數

我問姑娘藥力幾時見效,佢就話因人而異,有D人打完好快就開始黎,
有D人打完都冇反應,而我就係好快有反應個D,
打完一陣我已經開始FEEL到咩叫真正既痛.....
我開始出汗....眼角開始有眼淚..問姑娘拎熱FU,捉住床既扶手嗌
然後開始後悔點解要生BB......

然後我問姑娘仲有咩止痛方法,
佢就話聽音樂啦,笑氣啦..或者無痛
咁我就叫左佢俾笑氣我聞,之後都睇好多媽媽話聞左會好D
點知,我係一聞就嘔,係真係嘔
好在個時姑娘係到睇住我嘔,就幫我換衫同拎嘔吐袋

笑氣冇用之下,我只可以靠意志力同呼吸忍痛同埋....嗌!!,
除此之外我就係不停問我老公,夠鐘未夠鐘未,夠4個鐘未...
到終於捱過左4個鐘,我心諗痛到咁點都開左幾度啦掛!!
好可惜..答案係,經過4個鐘痛到就死咁...由2度...開到....2度多DD......

個下我真係喊,係咪痴線,點樣捱到10度生!!!
然後我就望住姑娘同佢講,姑娘!!我要打無痛!!!!!!
貓宅
|
留毛
我7月都會喺聯合生, 等妳update
MrsSilviaChan
|
樓主平時有無做運動?咁多個鐘都係兩度?辛苦你了。
haha748494
|
60小時,媽媽真系辛苦喇。加油吖。
Ng_Taitai
|
追,雖然岩岩生完,身同感受。我由發癲嗰種痛到生完用左個半鐘,見到老公時我第一句係,我唔會再生所以,好難想像你痛到咁多個鐘

利申,第二胎
JD930
|
Ziyumami 發表於 19-3-2 17:26
落左產房之後會有姑娘黎人手穿羊水,
穿水係冇咩感覺,就係張開腿,然後佢會伸隻手同把剪刀入去,
摸到岩位就剪 ...

加油
klsabb
|
等你分享...我8月聯合生呀..
cm204783
|
我都岩岩係聯合生完由入院到生用左個半鐘,雖然快,但最後果半小時痛不欲生

申利:第三胎
terry9013
|
Ziyumami 發表於 19-3-2 17:26
落左產房之後會有姑娘黎人手穿羊水,
穿水係冇咩感覺,就係張開腿,然後佢會伸隻手同把剪刀入去,
摸到岩位就剪 ...

第一胎 係未可以要求無痛嫁?
xxjooolisa
|
喂!冇喇?好想知後續。我點都會想打無痛。本身諗緊順產定開刀
mingchan811
|
我都想打無痛, 姑娘會唔會咁輕易俾你打架?

期待後續
Ziyumami
|
本帖最後由 Ziyumami 於 19-3-4 17:04 編輯

姑娘!!我要打無痛!!!!!!

我講完之後,我老公同姑娘都一齊望住我
姑娘就問,你要打無痛?聞下笑氣先啦你??
我就話,唔得,聞左會嘔
然後姑娘就話,咁一係我拎D無痛資料俾你同老公睇左商量下先

然後佢就拎左D野俾我睇,有講咩係無痛,點樣打啦,打完會有咩後遺症咁
都係可能腰骨痛,嚴重會癱呀咁
講真,我已經痛左50幾個鐘不特止,痛到咁先開得2度半又聞唔到笑氣
唔好話係背到吉一大針,你叫我依家開刀我都制呀,個意志力真係堅持唔到落去

老公係唔想我打,因為佢睇完係好擔心我會有咩事
但我係咁求佢,因為真係好好好好痛佢都只好同意俾我打
然後我地就禁鐘叫姑娘入黎,同佢講,冇錯我想打無痛

然後姑娘就話咁好啦,我CALL麻醉科醫生落黎
我仲係咁問..幾時到..幾時到..?
講真我冇諗過佢咁順攤就俾我打無痛,你知啦公立醫院黎~~
可能佢見我痛左幾十個鐘落埋催生藥先開得2度半同情我所以好快俾我打無痛

麻醉科好快就到左,我個心放下心頭大石同時心防一放,就更加忍唔住痛
開始痛到係聽唔到姑娘指示,佢叫我抬起PATPAT個D我係聽到但俾唔到反應
隨住醫生黎左,就好多姑娘入左黎幫手,
咁係要曲埋身蝦米咁打側訓,醫生就會係背到插一大輪針
佢應該有打到麻醉,佢插D針落去我一D感覺都冇
醫生會係我陣痛個時停手,痛完再繼續.
因為我好痛係咁叫,姑娘不停塞個笑氣俾我聞
我係咁話唔要嘐我會嘔佢地好似覺得我講笑咁
好在岩岩睇住我嘔既姑娘黎左先幫我同其他人講佢地先冇叫我聞
Ziyumami
|
係生之前我都上網睇左打無痛個過程
個時覺得好恐怖,D針又勁大支又要打到流晒血
但原來到左個一刻,我係唔會驚,係不知幾恨佢打我!!

咁過左一陣醫生就話打完啦,我就可以訓返平,咁醫生就問依家仲有幾痛?
佢就再較個藥既份量,因為唔會俾你打到無左知覺,只係打到令你冇咩感覺
但我打完之後發現半邊痛半邊唔痛
原來係可能支針歪左一邊,因為支針係軟既,咁我就要再打側俾佢再較過D位
較完之後就好D啦,然後醫生會俾個制你,個制係你一禁,佢就會跟條管落藥,
當你覺得痛返D,就可以禁制,但佢有SET時間,你最多15分鐘禁一次
我就問醫生點解要禁?唔禁係咪會冇左藥效
佢就話,因為陣痛正常會越黎越痛,咁依家個份量就止唔住,所以要KEEP住禁
佢仲好搞笑咁話唔洗慳架,15分鐘就禁一次啦!
咁醫生解釋完竟就走左,佢會隔一陣再返黎睇下我點.

嘩,係打完之後真係上左天堂咁,個人係識笑返,仲可以同老公傾到計
你話係咪完全唔痛,唔係,其實都仲有痛,但係係地獄去返平時M痛咁
個個對比真係好大,咁初初我係冇禁制既
因為覺得OK呀忍受到,後來我就明醫生講既野,係真係會痛返,所以要禁制

然後打完隔左陣我就覺肚餓,想問姑娘拎塊餅食啦
點知原來打左無痛係唔俾食野架
只係可以飲少少水,姑娘就俾左盒果汁我,我只係飲左一啖就嘔到傻左咁
因為我打個時聞左笑氣令我飲野都飲唔到........
於是痛完幾十個鐘後我仲要捱餓捱渴
如果你地想打,記得打之前食D野先好打.......
Ziyumami
|
本帖最後由 Ziyumami 於 19-3-4 18:06 編輯

打完再隔左4個鐘頭,又到檢查時間
我都唔存希望,一心都打定輸數要開刀生
因為我已經人手穿左水就要24小時內生,唔得就要開刀
點知姑娘摸完就話,開左7度啦聽完真係好開心,唔通唔洗食全餐?
姑娘就開始同我講,因為我打左無痛啦,就算4個鐘後再檢查,開夠十度生得
都係唔準生住既,要停藥再等兩個鐘,因為驚我麻醉未過下面冇力生會危險
我就心諗,停藥2個鐘!!?岩岩打之前2度半都痛到死,依家7度咁咪痛死我!!

之後陣痛都越黎越勁,連無痛都有D止唔住,要開始控制呼吸
仲開始覺得好急屎,我就係到諗,唔通準備生得?
但奈何姑娘係都要4個鐘後先幫我CHECK咁我唯有係咁忍
咁係就夠鐘之前個一個鐘,我已經自行停左唔再禁制落藥
因為我唔想佢CHECK完再要等2個鐘
咁就開始FEEL到對腳都有返感覺,D陣痛都開始黎料又係到嗌

到終於夠鐘,姑娘一CHECK,十度! 等多兩個鐘生得啦
我以為佢會收起我D無痛,但原來係唔會,佢會照插住先,真係少D定力都會禁左
我個時已經好痛好痛,我就問姑娘我已經好痛同好急屎!!同埋我早一個鐘就停左
係咪一定要等兩個鐘?佢就話唔係既,係真係好痛好怨係就同我地講我再幫你睇
但主要係怕我用唔到力,到時BB出唔到黎要夾要吸就唔好啦

咁我就話好啦,我忍!!!
忍到一個鐘都冇我就頂唔順啦,禁鐘叫姑娘入黎問佢我想生呀我生到架你俾我生啦!!
咁當然姑娘又係重覆岩岩既說話啦
但我已經急到好似十日冇痾屎再肚痾咁
然後我又話好,我忍多陣......15分鐘後我又禁鐘~哈哈
姑娘就話好啦咁你試下啦,就SET左個腳架俾我 叫我試下用力PUSH好似痾屎咁
然後一PUSH,另一個姑娘就大嗌 嘩用得好好,岩啦就係咁,再黎!!
然後我又PUSH左幾下,嘩其實好攰,因為個道力要KEEP好耐
姑娘就話非常好呀應該幾下就生得,然後叫我唔好生住.....???
佢地就勁急忙好快手咁SET好晒D野等接住BB

咁姑娘摸完就話,應該可以唔洗剪會陰,因為BB頭都細
咁就叫我再用力,用力中途有一下突然好痛,痛到我嗌出黎話好痛呀!!!!
(後來就知係撕裂左)
姑娘就話,生仔係痛架啦再黎!!!再PUSH多幾下,BB就出左世了
過程唔洗15分鐘,姑娘都話我呢個無痛打得好呀
然後佢地就抱左呀B去清潔,推個胎盤出黎,聯針等
聯針前姑娘叫我禁左下無痛,咁就唔洗再打針了
之後BB就可以趴係我心口等一個鐘觀察,冇野就可以上返病房了
如是者,我係岩岩好,痛左60個鐘先終於生到呀女出黎
ShekC9
|
回覆 Ziyumami 的帖子

追追,5月聯合生,第一胎好緊張!多謝分享!
ShekC9
|
回覆 Ziyumami 的帖子

D姑娘惡唔惡,好驚俾人鬧😓
mingchan811
|
好厲害呀, 原來打完無痛要停2個鐘先生得,
想像唔到停針之後既痛苦...
60個鐘真係好漫長, 你好叻呀
Powered by Baby Kingdom

隨時隨地瀏覽及討論更多親子話題

開啟親子王國 App
繼續瀏覽