夫婦情感 今日: 17|主題: 42425

我係全職媽咪，我同老公個關係已經差到去到冷漠對待，之前因爲湊仔問題加舖頭問題，同老公嗌到要離婚，我老公竟然同我講：你唔使旨意見個仔，我幾多錢都同你打官司打返黎。

其實我地生bb之前，已經傾好bb會返日間托兒所，因為我都諗住出去返工，屋企冇人湊，老公唔想請姐姐，所以選擇比bb返托兒所。但生完之後，我就發覺我個老公直情變左另一個人咁？佢完全溺愛個仔，咩都唔比，唔比我自己帶佢出街（如打針，要奶奶或老公姑姐一群人），到大d歲半左右，咁岩我朋友可以免費帶三個朋友入迪士尼，我朋友問我去唔去？我當然帶埋阿仔去啦⋯⋯點知出發前一日，我老公加埋奶奶發晒顛鬧我，話阿仔咁細個帶去迪士尼做咩？冇野岩玩？大佬呀⋯⋯唔通阿仔咁細個，我帶佢入去玩機動遊戲，過山車咩？梗係行下影下相之嘛，反正唔使錢去，之後又嗌交啦⋯⋯

過左幾日，有日我肚好痛肚痾，好唔容易接阿仔放學返到屋企，幫阿仔除緊鞋之際，我已經feel到已經急到就瀨，之後就沖入廁所，我係一路連行帶嗌我仔跟住我入廁所，我仔仲幫我閉門，之後係我腿與腿之間臭住陪我痾🙈🙈。夜晚我老公返到黎就諗住同佢當趣事分享下啦！點知我一講到沖入廁所......佢就發晒顛係咁鬧我，點解可以有得個仔自己係廳度？咁危險？有咩事點算？仲話：你就算真係瀨屎，你都要照顧佢安全先呀！跟住我話我都未講完？之後佢竟然入廁所，上fb出post講？之後我d朋友即刻whatsapp我，問做咩比老公公審咁大鑊？跟住當然又嗌交啦⋯⋯我當刻已覺得呢個人完全不可理喻？

我係全職媽咪，上面提到我個仔係返日間托兒所，最早8點，最遲6點接走，我原本都係諗住出返去返工，但我唔係一個做開文職既人，之前都係返行街，但唔係Sales，因為跑數太大壓力，所以只係做行街，但呢類工唔易搵，係未搵到呢類工之前，諗住搵下其他工先啦⋯⋯而我唔係做文職既人，所以要搵到朝9晚5/半仲要放星期六日係好難，搵其他時間既工，我老公就會：你自己衡量下個仔緊要定份工緊要啦，或者叫奶奶幫手湊下接放學，我盡量搵8點前返到屋企既工啦，跟住我老公同我講，叫我唔好成日預佢阿媽湊孫？ok，我搵兼職，跟住就會久唔久聽到我老公話：挑，搵埋都唔夠我賣兩袋？咁我唔搵工又話我淨係識得問佢攞錢？大佬呀⋯⋯你係我老公，我唔問你攞，唔通我週街問人攞咩？就淨係返工問題⋯⋯就已經嘈好多次，因為佢一直覺得我唔落舖幫佢手，係我唔岩....

1，我之前係有落舖幫佢手，但我落舖呢，佢就要我11點去開舖，而佢自己開舖的話，就差唔多2點先落到去開。

2，冇人工比我都算喇，有日我發燒，都要我落舖（其實舖頭是街邊排檔，沒有冷氣，夏天熱到溶，冬天凍到喊咁），問題我真係頂唔順要走，係都要我繼續係度唔比我走，最終我當場喊，先叫我快d走（因為佢只做表面野既人，人前佢係好好先生，咁我當然知道佢做野好辛苦啦，先可能脾氣差，但都唔係咁架？）喊既原因係，究竟有冇當過我係老婆？

3，平時已經因爲個仔問題，成日都會嗌交，唔想再落舖增加磨擦再嗌得越黎越多。最終我奶奶落舖幫手（幫2，3個鐘）。所以兩母子成日比說話我聽，話我唔返工又唔落舖幫手，娶埋唔知咩老婆？

最近因為結婚週年紀念日，其實我都估佢唔記得，我見呢排關係咁差，諗住問佢出唔出去食餐飯？點知佢原來記得，仲話：咁點姐，又要慶祝架？佢d屋企人就當我只係為左結婚週年紀念日唔食飯慶祝，咁小事就發脾氣？唉....我真係心灰意冷⋯⋯真係唔想繼續再同佢一齊生活落去，再係咁落去，我真係冇病都變有病？係，我冇返工搵錢，但唔係我想架嘛⋯⋯請姐姐又唔比，叫奶奶湊又唔肯，返兼職又嫌我搵埋唔夠佢賣兩個袋？我都唔知可以點喇？我真係驚有日頂佢順帶埋個仔走，但我帶住個仔出去，又唔想返外家（因為已經冇地方訓），去朋友度？又好似唔係咁好，我自己一個就話。唉.......

其實我想問以我呢個狀況，我想離婚，但我老公已講明個仔爭到抵，但佢根本唔識湊，又唔係佢湊開，佢姑姐已講明幾多錢都會同我打返黎......而我係全職媽咪根本沒錢同佢打官司⋯⋯我連搵律師攪離婚d錢都驚唔夠？仲有咩方法可以爭到仔？