最後，我搵到一個係中環嘅醫生，中環呢個醫生佢就年紀比較大，連入去登記嗰位姑娘都係你一睇就知呢間嘢應該好有經驗，因為你會feel到佢哋係比較classic 啲old school 啲。咁去到見中環嗰個醫生嘅時候，姑娘就叫我去驗尿，當我去驗尿我拎住個杯仔行入去嘅時候，我個心已經好唔舒服，因為我發現嗰杯裡面已經有啲血，係自從流啡以嚟流最多血嘅時候，我遞返杯比姑娘嘅時候我個心裏面已經開始流緊眼淚，我個內心好不安。跟住入到去見呢個咁有經驗年紀大嘅中環老醫生，未去到第四句佢已經同我講：「我建議你都係返屋企排咗佢啦，你呢個case應該可以自己自然去流產，你依家係作小產，係發育唔到㗎喇個小朋友。」佢呢幾句好直接亦都好乾脆俐落，佢講完呢幾句之後，我同我老公都諗唔到有啲咩問題想再去問佢，因為腦袋已經一片空白。咁又再去問下呢個醫生其實點解會咁樣，佢話：「係解釋唔到，因為卵子同精子結合咗之後，有個情況係發育唔，呢個情況係市場上都會出現大約15至20 present左右嘅人都會有咁樣嘅可能性。
自己個內心都係到諗，作為中國人聽咁多過去有人小產或者懷孕後都應該係要坐月，畀自己一個好嘅身體。為免自己嘅責備感會重，所以我都係決定咗畀自己喺屋企休息十四日，係呢個階段裏面，我就上網搵咗一啲公司，因為我發現我媽咪都唔係太識得去幫我調理身體，我媽咪可能淨係識得整隻雞蛋或者去樓下買啲叉燒飯，燉個雞湯，咁我就諗其實呢段時間我應該都係時候畀自己好好咁去做番個人，就係食定時定候，食足三餐，比自己有個好啲嘅均衡飲食。去學習調理身體，我上網搵咗一間叫祖媽嘅一個公司，佢哋就派咗一個阿姨嚟到煮飯。前後我都join咗兩個禮拜嘅package，個價錢都幾貴，六千幾蚊六日到，咁佢都好悉心照顧嘅由早午餐會煮好曬，晚餐佢就會係午餐到煮得比較多嘅份量係撥備畀我晚餐嘅時候用，有湯有糖水有好多適合呢段時間調理身體嘅飲食。好記得第一日個阿姨過嚟煮完飯出門口我就不禁流眼淚，因為我發現係好空虛，老公又要返工，媽咪又有嘢做，亦都要去返佢嘅工作崗位，咁平時我就係最博殺嗰個，我就竟然瞓咗喺屋企，亦都覺得唔知自己可以做到啲乜，突然之間好似要煞停曬所有工作。跟住面對咗一個唔開心嘅訊息，不禁連嗰個阿姨煮完第一餐飯出門口我都忍唔住喺度流眼淚，我又覺得適當嘅發洩同埋適當嘅情緒處理都係好嘅，亦都唔需要太過抑壓。因為始終身體係坦白，情緒應該都係畀佢能收能放會係比較好啲嘅，咁係呢個階段裏面，我就食咗嗰啲小月子餐。小月子餐就係專畀一啲流產後嘅女士去食嘅，到依家我on and off 都有再搵咗阿姨上嚟幫我煮一啲適合我嘅飯，適合我嘅用餐。我一個禮拜淨係搵佢哋一兩日，咁我都覺得真係對自己身體好咗。因為我注意飲食要均衡，時間就唔再係以前咁最快速度去食完一個飯盒就算，係呢段時間裏面因為join咗呢啲煮飯嘅package入面佢附帶咗一個叫做中醫打電話嘅電診。係最脆弱嘅時候，呢一個中醫係女土，都有同我傾電話了解下我個身體狀況，雖然佢冇把脈但都會提姨姨要用邊類型嘅食材，煲湯畀我飲，做番個調理。嗰個階段同嗰個中醫傾電話好難忘咁記得佢話佢幫呢間公司接單一個月，佢都遇到十幾二十個女性流產嘅case。佢打開門口做中醫係尖沙咀，一個月會接到大約二十單小產嘅case佢話的而且確而家嘅人呢真係小產嘅機率都係比以前高口啲，我自己亦都好認同佢咁樣講。因為我都係一個服務性行業，成日都會遇到好多客戶，都係有傾有講，咁我都喺呢三五年裏面眼見我有啲客都係好快就懷孕，然之後突然之間就冇咗消息就話懷孕失敗小產流產，咁但係我都見到佢哋好快快樂樂過咗一兩年之後，佢哋又帶埋佢哋嘅小寶寶出現喺公司，所以我都覺得呢個過程係難受，過程係唔開心，但係最緊要都真係要有身邊嘅屋企人支持同老公發揮一個最團結精神嘅時間。
發表於 
工作上 你係人 唔係神 難免會有情緒 睇下可唔可以行開放幾日假 ，必要時真係Handle 唔到個情緒就轉工啦 ，無野夠自己重要 ，同C6一齊Share下 
返回列表
