【如果你未知點解屯門琴晚有示威,因為下晝屯門人聞到濃烈異味,傳聞警方測試催淚彈】
有個女人坐輕鐵湊仔女放學,車上陸續有人咳,有人聞到異味。佢行到西北游泳池,刺鼻、流眼水、皮膚刺痛,係佢示威時聞過的催淚彈味。幼稚園老師為所有學生戴口罩,佢睇住等仔女的家長咳到癲。佢湊緊幼稚園的女回家時,先知讀小學的仔課外活動取消,後來知道仔女在學校都咳到入廁所嘔,「唔可以當冇事發生,而家冇人知係乜,最驚係唔知邊個做,邊個可以令半個屯門區都聞到?」
有個女人未聞過催淚彈,佢由卓爾居回家忽然流眼水、喉嚨痛和臉部刺痛,行到新圍苑發現好多人戴口罩,返到良景邨不斷打乞嚏,以為因為大風冷親。佢陸續見到消防車駛到,姪仔打電話來叫佢小心催淚煙,「我上網同睇電視都冇新聞講,我有鼻敏感所以好辛苦,長者吸了就更大問題。」
有個男人同好多屯門街坊有個社交群組,3點半開始,良景、田景、山景街坊都話聞到異味,有人見到從西北飄來的煙霧。有人懷疑是西北泳池的氯氣,但康文署話唔關事。群組內有人在泳池附近上班,指有消防員到場調查後,話氣味由警方大興行動基地傳來,但警方否認。「一年前好多人願意相信警察,現在民調超過一半人對警察的信任度是零分,呢個係警察的責任,查清楚,向街坊道歉,甚至賠償。」
有個男人在良景街市的藥房工作,3點半陸續有人聞到異味,衝入藥房買口罩。佢行出舖頭聞到催淚彈味,覺得喉嚨痛。佢4、5點在新墟仍然聞到,報警但對方話唔知乜事,「如果你做化學測試,係咪冇跟regulation?而家係咪冇人會查?如果係生化襲擊,香港人會死晒。」
有個女人住田生邨,即大興行動基地附近,夜晚示威者聚集要求警方交代異味原因,警方用催淚彈驅散人群,其中一個催淚彈射上佢大廈七樓,「個地面燶咗,我住低幾層,明明閂了窗,一樣刺眼同攻鼻,我隻狗不斷咳。」接近半夜12點,警方不斷用強光照上民居,「附近有間老人院,佢的催淚彈有冇影響老人家?我覺得佢要去了解同道歉。」
有個住在鯰灣的人,不願公開自己的聲音,叫主持人轉述自己屋企望到青山靶場,下晝聽到幾下巨響之後,睇住濃煙向天空發射。有寶田邨的小學發出通告,話琴晚警方用完催淚彈,今日學校會停用冷氣機和飲水機,要徹底清潔完先用返