少年成長今日: 0|主題: 15853

收藏本版

發帖

返回列表

跳至頁

查看: 17263 | 回覆: 2

假民主 [複製鏈接]

csir3290

子爵府

積分: 10961

1^#

發表於 22-1-23 10:53 |只看該作者 |倒序瀏覽 |打印

我哋社會成日討論究竟有冇民主，又或者就算有民主究竟嗰啲係咪假民主。講真我唔知我哋而家呢個社會究竟係真民主定係假民主。但係我知道其實世界上面最假民主嘅好多時就係家長。好多時家長都口口聲聲同人講自己對仔女好民主好尊重佢哋嘅諗法同意願，但係其實呢一種嘅民主好多時就係要喺符合家長心目中諗法嘅意願下先會發生，家長一面話尊重仔女嘅諗法同埋意願，但係其實心目中自己都已經有一套諗法，佢哋尊重仔女嘅意願係建基於仔女嘅意願是否同家長嘅諗法一致，如果有唔一致嘅時候，家長就會用盡方法令到仔女最後能夠選擇同父母嘅諗法一樣。所以家長口中嘅民主好多時都係口不對心，美其名仔女有得揀，但係佢哋只可以揀符合家長意願嘅選擇，所以我話家長先至係最假民主嘅人。

前幾日同老婆去行商場就遇到件咁嘅事。年近歲晚好多家長都會帶仔女去買新衫買新鞋，呢個時候你就會見到好多假民主嘅出現，話說嗰日見到有個爸爸同個仔喺度揀運動鞋，個仔應該五六歲到啦，佢揀咗一對好cutie有恐龍圖案嘅波鞋，我見到個細路仔好鍾意，但係個爸爸可能覺得太幼稚，又覺得上面嗰啲凸咗出嚟好似恐龍嘅裝飾可能好容易爛，所以就係咁遊說個仔揀第二對，但係個仔似乎對其他都睇唔上眼，淨係好鍾意佢原先揀嗰對，最後搞到個仔都冇晒心機話唔買要走，最後為咗揀對鞋好似有少少不歡而散咁。

其實新年買新鞋應該係件開心事，就係為咗揀個款式而搞到個仔又唔開心，個老豆又未必鍾意，咁為乜呢？既然老豆自己有諗法，咁不如唔好帶個仔出嚟，自己買咗然之後攞返屋企，可能個仔仲會開心啲，因為冇其他揀吖嘛！但係可能個爸爸又覺得揀嘢個仔應該有選擇權，揀到佢自己鍾意嘅可能會開心啲，所以就帶埋個仔出去買，但既然帶得佢出去買，畀得佢揀就應該放手畀佢揀，靚唔靚呀，鍾唔鍾意都係佢個仔自己著，我哋可以干涉啲乜嘢呢？如果係價錢問題，一早同個仔講定揀幾多錢以內咁就可以解決咗買得太貴嘅問題。

雖然買鞋喺件好小事，但係見微知著，如果連買鞋咁少嘅事，都唔能夠真正尊重細路仔嘅諗法，咁其他嘅事又會點呢！其實呢啲小事由細路仔細個開始累積，慢慢到啲細路仔去到青春期嘅時候，就可能會發展到啲家長成日所講嘅反叛期出現，正如我成日講因為細路仔細個通常都要屈服喺啲家長嘅諗法下面，但係去到十幾歲嘅時候，佢哋嘅主見越嚟越強咁就未必能夠接受到家長嘅諗法，咁家長就會覺得佢哋反叛覺得佢哋唔同咗！所以做父母唔好睇輕假民主呢樣嘢，如果父母經常假民主，久而久之，只會破壞同仔女嘅關係。到佢哋青春期嘅時候，出現問題嘅機率就會更加高。咁有啲父母可能會講，如果佢哋咁細個揀錯嘢買得唔好或者做錯決定咁又點呢？正如我之前講，如果只係衫褲鞋襪，其實都係佢哋著上身，靚唔靚佢哋自己先至最清楚，我哋點解要用我哋嘅睇法去干涉呢？如果係其他方面做錯決定，坦白講細路仔做錯嘢，揀錯嘢只係平常事。只要父母唔好落井下石，好好地同佢哋分析返，咁反而下次佢哋做決定嘅時候會更加小心。從錯誤中學習，同埋學習承擔後果，對細路仔嚟講都係仲要嘅一課，而且更重要係嘅佢哋知道父母真正懂得尊重佢哋嘅諗法。所以父母唔好再口口聲聲話自己民主，請家長真係諗清楚究竟自己係真民主定係假民主。